1 JOHANNES 2:2 - BIBEL JAMITA NA DENGGAN

² Markite-hite Jesus Kristus do dapot hita hasesaan ni angka dosanta i. Jana nada hum dosanta na nisesaNia, tapi dohot do dosa ni sandok tano on.

1 JOHANNES 2:2 ပူးပေါင်းရင်းမြစ်များ

HAMALIMON 16:10

Hambeng na tarpili tu si Asasel angkon nipasahat mangolu tu Tuhan i, anso dipakehe tu si Asasel di parhorsihan anso disesa dosa ni bangso Israel.

LUKAS 14:22

Didok naposo i ma, ‘Madung nipalalu parenta ni tuan i, tapi laing bahat dope inganan na so marisi.’

JOHANNES 1:29

Ancogotna i diida si Johannes ma ro Jesus mandapotkon ia. Didok si Johannes ma, “Ligi ma! Indi ma ibana Anak Ni Biri-biri Ni Debata na manyesa dosa ni portibi on!

JOHANNES 12:32

Anggo Au muda dung dipatuginjang di ginjang ni tano, tarihonKu ma halak sudena tu Au.”

JOHANNES 4:42

Didok halahi ma tu anak boru i, “Saonnari madung porsaya hami, nada hara ni angka na nipaboami be tu hami, tapi hara ni na dung hami bege sandiri sian Ia, jana madung hami boto tutu do Ia Sipalua ni portibi on.”

IBRANI 2:17

Jadi astuanna, angkon sarupa do Ia dohot halahi di sude pangalaho. Jadi dung songon i tarbaen Ia ma diriNia gabe Malim Godang ni halahi, na burju jana na maribo ni roha di na nioloanNia Debata laho manyesa angka dosa ni halahi.

1 PETRUS 2:24

Kristus sandiri do mamorsan angka dosanta i di pamatangNia sandiri di ginjang ni hayu parsilang i, anso tola hita malua sian kuaso ni dosa jana tola hita mangihutkon hagiot ni Debata. Angke bugang ni Kristus i do na paluahon hamu.

1 PETRUS 3:18

Angke sanoli sajo do mate Kristus hara ni dosanta ro di salolot-lolotna – i ma sada halak na so marsala, na mate humopkop halak parsala, anso tartogu Ia hamu mandapotkon Debata. Nibunu do Ia mangihutkon sibuk tapi nipangolu mangulahi mangihutkon tondi.

1 JOHANNES 1:7

Tapi muda mangolu di na torang hita laing songon Debata na maringanan di na torang i, gabe mangolu ma hita di bagasan pardomuan na solkot na sada tu na asing, jana hara ni mudar ni Jesus AnakNa i gabe ias ma hita sian sasude dosanta.

1 JOHANNES 3:5

Diboto hamu do sanga hara ni aha umbaen na ro Kristus, i ma na laho manyesa angka dosa ni jolma jana nada adong dosa di bagasan Ia.

1 JOHANNES 4:10

On do holong ni roha i: Nada hita parjolo mangkaholongi Debata tapi Debata do na mangkaholongi hita jana na marsuru AnakNia tu portibi on anso dapotan pardengganan hita taringot tu angka dosanta.

1 JOHANNES 4:14

Madung hami ida sandiri Anak Ni Debata, jana saonnari hami saksihon, na dung disuru Ama i do Ia ro tu portibi on anso gabe Sipalua di portibi on.

1 JOHANNES 5:19

Taboto do na sian Debata haroroanta, jana sude na satano on di bagasan tangan ni si Parjahat i.

HALUMBAAN 12:9

Diambungkon ma naga i tu ruar! I ma ulok na tobang i na margoar Sibolis sanga Setan, na paoto-otohon sude portibi on. Diambungkon ma ia tu tano on rap dohot sude surusuruannia i.