1 JOHANNES 1:9 - BIBEL JAMITA NA DENGGAN

⁹ Muda taoku dosanta, gabe na bonar jana na tigor do Ia, jadi sesaonNia ma dosanta jana dipaias Ia hita sian sasude hageduhan.

1 JOHANNES 1:9 ပူးပေါင်းရင်းမြစ်များ

1 RAJA-RAJA 8:47

“Muda di luat i halahi, sian ias dohot sian situtu ni roha ni halahi maninggalkon angka dosa ni halahi, dioku halahi dosa dohot hajahatan ni halahi, martangiang halahi tu Ho adop luat on na dung nilehenMu tu ompungnami adop kota na nipiliMu dohot adop bagas parsombaan on na dung hupajongjong di Ho,

NEHEMIA 1:6

Tatap ma au Tuhan, jana tangihon ma tangiang na hupagincat tu adopanMu arian dohot borngin salaho tu halak Israel, angka naposoMi. Huoku do anggo hami bangso Israel madung mardosa; salangkan au pe dohot angka daompung na dung mardosa muse do.

MASMUR 19:12

O, Tuhan nada adong na umboto hasalaanna sandiri, antong palua ma au sian hasalaan na buni.

MASMUR 32:5

Jadi gabe huoku dosangku tu Ho, nada adong hubunihon hasalaanku tu Ho. Diputuskon rohangku do mangoku i tu Ho, gabe diampuni Ho sude dosangku tu Ho.

HARURUAR 34:7

Hupatulus do baga-bagangKu tu marribu-ribu sundut jana Huampuni do hajahatan dohot dosa i tapi nada lalap boti Au manguhumi parjahat bope dakdanak dohot pahompumunu lopus tu sundut patoluhon dohot paopatkon hara ni dosa ni simatobang ni halahi.”

PODA 28:13

Na manabunihon dosana, nada i maruntung. Sanga ise na mangokui jana manadingkon dosana, Debata do, mangalehen ampun.

JESAYA 45:21

Paboa jana patuduhon ma sidalianmu, olo, padiar ma halahi rap martahi, Ise dehe na paboahon sian na robi, jana mambaritahonsa? Nada he Au, Tuhan? Nada adong na asing, nada adong Debata asing sian Au! Debata na tigor jana Sipalua, nada adong asing sian Au!”

JEREMIA 3:13

Sandok okui sajo ma paboa na marsala dohot na dung mangalo ho tu Tuhan, Debatamu. Okui ma na dung dipataridahon ho holong ni rohamu maradopkon debata ni angka bangso na asing di toru ni ganop hayu na rumbun, dohot na so dioloi ho angka na Huparentahon. Au, Tuhan, madung mandok songon i.”

JEREMIA 33:8

Giot paiasonKu halahi sian angka dosa na dung dibaen halahi maradopkon Au; Huampuni angka dosa dohot pangalaho ni halahi na so ture.

ANDUNG 3:23

mulak imbaru do i ganop manyogot; songon parbincar ni mataniari do habonaran ni Tuhan.

JEHESKIEL 36:25

Dung i pispisonKu ma hamu dohot aek na lan, anso ias hamu sian sude gana-ganaanmunu dohot sian sasude na pahodarkon hamu.

JEHESKIEL 37:23

Nada be pahodaron ni halahi dirina dohot dosa dohot na manyomba angka gana-ganaan sihagigian. PaluaonKu ma halahi sian sude hahodaron na mambaen halahi marbalik tu Au. Ias ma baenonKu halahi; gabe bangsongKu ma halahi, jana Au Debata ni halahi.

ZAKARIA 9:9

Ale boru Sion, marjop ni roha ma ho! Marolop-olop ma hamu ale pangisi ni Jerusalem! Ligi ma! Ro rajamu mardongan hamonangan! Raja na tigor do Ia na maroban haluaan. Na serep roha do Ia, jana mangalombut halode, sada halode jara-jara.

MATEUS 3:6

Dioku halahi ma angka dosa ni halahi, gabe dididihon si Johannes ma halahi di Batang aek Jordan i.

MARKUS 1:5

Markehean ma halak sian Judea dohot sian Jerusalem laho manangihon si Johannes. Dioku halahi ma dosa ni halahi, dung i dididihon si Johannes ma halahi di Batang aek Jordan.

LUKAS 22:57

Tapi diporso si Petrus do i. Didok ia, “Saotik pe nada hutanda Ia!”

JOHANNES 17:25

Ale Amang na tigor roha! Nada ditanda portibi on Ho, tapi anggo Au Hutanda do Damang, jana halak on pe diboto halahi do, Damang do na marsuru Au.

BAENON NI ANGKA RASUL 19:18

Bahat do halak na dung porsaya i tu Jesus mangoku angka pangalaho ni halahi di jolo ni angka dongan na bahat.

SURAT NI SI PAULUS TU PARLAGUTAN ROM 3:26

Jadi dipatidahon Ia do hatigoranNia di hatiha on, anso tarida na tigor do Ia, jana patigorkon halak na porsaya tu Jesus.

1 KORINTUS 1:9

Pos do roha di Debata, nada adong sihagangguhonon diSia. Ia do Debata na mamio hamu gabe sada dohot AnakNa i, i ma Jesus Kristus Tuhanta i.

1 KORINTUS 6:11

Songon i hian do deba sian hamu najolo. Tapi anggo saonnari madung dipaias hamu sian dosa, madung diparbadiai, jana madung dipatigor hamu di bagasan goar ni Tuhan Jesus Kristus dohot di bagasan Tondi Ni Debatanta.

EPESUS 5:26

Dibaen Kristus do songon i anso tarpaias Ia parlagutan i dohot ajaranNia bope markite-hite aek pandidion, anso tarpasahat Ia muse parlagutan i tu Debata.

PANGARATAION 7:9

Ingot hamu ma! Sasada Tuhan Debatamunu i do Debata, jana Debata na setia do Ia. Tu angka na manghaholongi Ia jana na mangoloi angka parentaNia, patulusonNia ma janjiNa jana patuduhononNia ma holong ni rohaNia na manongtong i lopus tu sundut pasaribuhon.

1 TIMOTEUS 1:15

Hata na tutu do pandohan on, na patut jagiton jana sihaporsayaan – : “Ro pe Kristus Jesus tu portibi on na giot paluahon halak pardosa do.” Jana sian sude halahi, au ma na umbahat dosana.

TITUS 2:14

Madung dihaulkon Ia diriNia hara ni hita laho paluahon hita sian hajahatan sudena, jana dibaen Ia hita gabe bangso hapunjunganNia, jana na ringgas mambaen na denggan.

IBRANI 10:23

Togu ma hita marsitiopan tu arop ni rohanta na dung taoku i angke haposan do Debata, patulusonNia do janjiNia.

IBRANI 11:11

Hara ni na porsaya, gabe maruli pomparan si Abraham dohot si Sara, haru pe na dung matobangtu si Abraham boti si Sara pe na so maruntungan. Pos do roha ni si Abraham laing na gohan ni Debata do janjiNia.

IBRANI 6:10

Nada Debata na so tigor. Nada halupahononNia sanga aha na denggan na nibaenmunu tuSia. Sai na ingotonNia do holong ni roha na nipatuduhonmunu tuSia di bagasan pangurupionmunu na nipasahatmunu maradopkon angka dongan Kristen na asing i. Jana lopus saonnari pe laing dilehen hamu do pangurupion i.

1 JOHANNES 1:7

Tapi muda mangolu di na torang hita laing songon Debata na maringanan di na torang i, gabe mangolu ma hita di bagasan pardomuan na solkot na sada tu na asing, jana hara ni mudar ni Jesus AnakNa i gabe ias ma hita sian sasude dosanta.

HALUMBAAN 15:3

Jana diendehon halahi ma ende ni si Musa, naposo ni Debata i dohot ende ni Anak Ni Biri-biri i. Songon on ma ende ni halahi i, “Na godang jana hahomangan do angka pambaenanMu ale Tuhan, Debata Parkuaso Na Sumurung. Na tigor jana na sintong do sude dalanMu, ale Raja ni sude bangso.