Yoni 5:23 - The Keyagana NT and 25 OT books

²³ Muki vayaʼamogi muki yaʼmo Afoʼamo agiʼaleʼmo aliʼa asaga huʼa neʼataya kava huʼa Mafaʼneʼamo agiʼaleʼmo aliʼa asaga huʼa atesayafeʼmo alino ateʼnigeno emineʼniye. Ina lagimo Mafaʼneʼamo agiʼaleʼmo aliʼa asaga huʼa noʼatesafi ani kavaʼmo huʼa muki yaʼmo Afoʼamoʼmo alino ateʼnigeno emineʼniya vekamo agiʼaleʼmo aliʼa asaga huʼa noʼatae.

Yoni 5:23 ပူးပေါင်းရင်းမြစ်များ

Samu 2:12

Mafaʼneʼamo haetapa neyo. Fiku yanageno aipamo aiseʼamo leno lapateteno lapamagisigetapa kateʼmo asagautapa aigayanagi. Agaefeʼmo aliʼa amufa amiʼnaya vayaʼmo aulena vayaʼmo maiʼnae.

Aiyeya 42:8

Nagaiʼnigeʼmo Ala kava neʼmae. Ani nagimo nagiʼnimae. Nagaiʼni hale konali yaʼnimo mago vekamo oʼamiguve. Vayaʼmogimo ala nagiʼnimo neʼnamiya agufa kava huʼa yosaletiʼmo alo nehaya aigofe gotigi ala apakiʼapimo apamisayafeʼmo he, huʼna osuguve.

Aiyeya 45:15

O Isaleli vayaʼmogi Gotiʼapimogamo apakufamo alika katika neʼapatana Gotigae, huʼna, Lama gemo huʼnaeʼmo, Kagaikamo alika fala kika nekatane.

Aiyeya 45:21

Lapakaemo eta agotileʼmo getapimo aeta hakalo hiyo. Magokepiʼmo maiʼnetapaeʼmo ge huge afige hutapa maiyo. Ina laʼmo afole aisiya kavafeʼmo akeyavilagamo aeno hakalo huʼniye. Nagaiʼnigeʼmo aeʼna hakalo huʼna hapa paiʼnofiye. He, alu gotiʼmo oʼmaiʼniye. Nagaemo fatago kavaʼageʼmo nehuva Gotiʼnamo apakufamo aliʼna katiʼna neʼapatova Gotiʼnamo maiʼnove. Alu gotiʼa alagi oʼmaiʼniye.

Matiyu 10:37

Mago vayaʼmogimo itaʼapi afoʼapimogifekeʼmo hogoteno hapau apayamopafiʼmo hapauʼnisigeʼa nagaefeʼmo henagaʼamo hapau apayamopafiʼmo hapauʼnisiyana vayaʼnimo maisaya agufa kavaʼmo huʼa oʼmaiʼnae. Ani kava huʼa mago vayaʼmogimo mafaʼneʼapieʼmofi aʼmafaʼneʼapieʼmofi huno hogoteno hapau apayamopafiʼmo hapauʼnisigeʼa nagaefeʼmo henagaʼamo hapau apayamopafiʼmo hapauʼnisiyana vayaʼnimo maisaya agufa kava huʼa oʼmaiʼnae.

Matiyu 11:27

Afoʼnimoʼmo aliʼyaʼamo alisuvafeʼmo muki yaʼamo namiʼniye. Muki vayaʼmogimo mafaʼneʼamo nageʼa alagepa osuʼnayaʼmonanafa Afoʼnimokeʼmo nageno alagepa huʼniye. Muki vayaʼmogimo afoʼnimoʼmo ageʼa alagepa osuʼnayaʼmonanafa nagaemo ageʼna alagepa huʼneʼna nahauʼnigeʼna ageʼneʼna aliʼna apave liʼnova vayaʼmogiʼeʼmo ageʼa alagepa huʼa agege huʼnone.

Matiyu 15:8

Agaemo hunoʼaeʼmo, Mani vayaʼmogimo apavayaʼaletikeʼmo nahao ke heteʼa apaipa apakesaʼamo aliʼa nagaetegamo atalageno noʼmeyaʼmonanafa afagitegamo aliʼa atalageno neʼviye.

Matiyu 28:19

Namiʼniyaʼmofeʼmo uta muki alu nofi alu nofi vayaʼmo alita apaya malegeʼapao geʼnimo afisaya vayaʼmo hamaleyo. Hamalesagetapaeʼmo Afoʼnimo agiʼaletinagi mafaʼneʼamoʼna nagiʼniletinagi aote Aunemeʼamo agiʼaletinagi hutapa aniʼmo faleta apateyo.

Luki 10:16

Geʼamo neʼafiya vayaʼaifeʼmo hunoʼaeʼmo, getapimo neʼafiya kava huʼa geʼnimo neʼafiye. Apakameʼyamo nelapamiya kava huʼa apakameʼyamo neʼnamiye. Apakameʼyamo neʼnamiya kava huʼa alino nateʼnigeʼna emiʼneʼnova vekaʼeʼmo apakameʼyamo neʼamiye, huno hapa paiteno alino apateʼnigeʼa uʼnae.

Yoni 14:1

Yesuʼa hunoʼaeʼmo, Lahapausoli osuge lapaipamoʼmo atete osuge hino. Gotifeʼmo lapakesamo afita fatago huge nagaefeʼmo lapakesa afita fatago huge nehayaʼmofeʼmo oʼataletapa magoʼe hutapa lapakesa afita fatago hiyo.

Yoni 16:14

Agaemo ha le konali yaʼnimo alino lapave liteno nagiʼnileʼmo alino asaga huno nategaiye.

Yoni 17:10

Muki vayaʼnimo vayakamo maiʼnae. Ani kavaʼmo huʼa vayakamo vayaʼnimo maiʼnae. Apakaemo ha le konali yaʼnimo aliʼa apave liteʼa nagiʼnileʼmo aliʼa asaga huʼa neʼnatae.

Lomu 1:7

Maiʼnayaʼmofeʼmo nagaemo muki Lomu taonifiʼmo maiʼnaya vayaʼmogitapaeʼmo Gotiʼa hau ayamopafiʼmo hauʼnigenoʼaeʼmo lapaote vayaʼamo maisayafeʼmo keya aeno ge huʼniya vayaʼamogitapaeʼmo mani avoʼmo nekaove. Afotimo Gotiʼe Ala kava netimo Yesu Kalaisiʼeʼmo fikumo lapa maeʼana lapamiʼanageno lapaipamoʼmo falu hino.

Lomu 15:12

Aiyeyaʼa magoʼe gemo hunoʼaeʼmo, Yesi aginago vayaʼmogimo mago yosamo heʼya aiʼa ataleʼnaya yosagana huʼa maiʼnae. Maiʼnayaʼmonanafa magoke aginagomoʼa alu nofi vayaʼaiteʼe alu nofi vayaʼaiteʼeʼmo yagaino apatesiyafeʼmo yosa atufaʼafatiʼmo ausisimo aesigeʼapaeʼmo alu nofi vayaʼmogimo agaefeʼmo apavayagunagu huʼa agava maigae, huno huʼniye.

Lomu 6:22

Aligayaʼmonanafa Gotiʼa hosu kavapatiʼmo ago hatu maeno lapateʼnigetapa Goti kalavusi aliʼyaʼamo neʼaliya vayaʼmo hamaleʼnayaʼmofeʼmo hemenimo lapaipafatiʼmo alagepa alagamo neʼaegetapaeʼmo lapaote vayaʼmo hamaleme hamaleme neʼvayanagetapa atupa afinaʼmo alagepa hutapa maige maige huta maigae.

Lomu 8:9

Osugayaʼmonanafa Goti Aunemeʼamo lapaipafiʼmo maiʼnisiyana atafa lapaipamoʼmo magoʼe huno yagaino nolapate. Muki vayaʼmogi Kalaisi Aunemeʼamo oʼaliʼnisayana Kalaisi vayaʼamo oʼmaiʼnae.

1 Kolitiyani 1:3

Gotiʼa Afotimoʼe Ala kava netimo Yesu Kalaisiʼeʼmo fikumo lahapa maeʼana lapamiʼanageno lapaipamoʼmo falu hino.

1 Kolitiyani 10:31

Inagi lapakaemo muki kavaʼmo hisaya afinaʼmo neʼyaʼmo nege aniʼmo nege nehutapaeʼmo Goti agiʼalekeʼmo alita asaga hisayafekeʼmo muki kavaʼmo hiyo.

1 Kolitiyani 16:22

Ala kava nefeʼmo hapau apayamopafiʼmo nohapaiya vayaʼmo Gotiʼa alagi apatalesigeʼa afela heyo. Ala kava netimo emikeno.

1 Kolitiyani 6:19

Lapakufamo aote Aunemeʼamo mono noʼamo haneʼniye, hutapa oʼafiʼnafiye. Gotiʼa Aunemeʼamo ago lapamiʼnigeno lapaipafiʼmo neʼmaiye. Lapakaemo lapakaitapi vayaʼmo oʼmaiʼnafa Yesu Kalaisiʼa lapakaemo ago miya faiʼniyaʼmofeʼmo lapaunelapamepatiʼe lapakufaletiʼeʼmo Goti agiʼalekeʼmo alita asaga hutapa ateyo.

2 Kolitiyani 1:9

He, yasi vekamoʼmo hunoʼaeʼmo, faligae, huno huʼniya agufa gemo laipafiʼmo ago afole aiʼniye. Lagaitieʼmo alita amufa olamita Gotiʼa faliʼnayatetiʼmo alino he tino neʼapateya vekaekeʼmo alita amufa amigune, huta lagesamo afisunafeʼmo mani hanageke yaʼmo lagaeteʼmo afole aiʼniye.

2 Kolitiyani 13:14

Ala kava neʼmo Yesu Kalaisiʼa mukiʼamogitapa fikumo lapa maeno lapamino. Gotiʼa mukiʼamogitapaeʼmo hau ayamopafiʼmo hauʼniya kavaʼamo lapaipafiʼmo haneno. Aote Aunemeʼamoʼmo mukiʼamogitapaʼeʼmo magokepi lokaeno afalu afalu huno maino. He, lama ge.

2 Kolitiyani 5:14

Kalaisiʼa lagaefeʼmo hau ayamopafiʼmo hauʼniya kavaʼamoʼa heno lavayu hulinuno nelate. Mani kavatefeʼmo alita fako huta lagesamo afiʼnonana magoke vekamoʼmo muki vayaʼaitefeʼmo falino apateʼniyaʼmofeʼmo mukiʼamogi agaeʼeʼmo faliʼnae.

2 Kolitiyani 5:19

Inagi Gotiʼa Kalaisipiʼmo alino ao yaʼmo hu maleʼniyaʼmofeʼmo hosu kavaʼapilefeʼmo vaiʼmo noʼapamiye. Agaemo alino ao yaʼmo hu maleʼniya geleʼmo alagepa huta yagaita atesunafeʼmo aliʼyaʼamo lamiʼniye.

Efasasi 6:24

Gotiʼa Ala kava netimo Yesu Kalaisifeʼmo hapau apayamopafiʼmo hapaume hapaume neʼvigeʼapaeʼmo oʼataleʼa muki afinaʼmo nehapausiya vayaʼmo fikumo hapa maeno apamino. He, lama ge.

2 Timoti 1:12

Ani aliʼyaʼmo neʼaluvaʼmofeʼmo mani kana yaʼmo aliʼna maiʼnovaʼmonanafa navagagemo alagi nosiye. Nagaemo naha maesiyafeʼmo ina lafeʼmo nagesamo afiʼna fatago huʼnofi huʼna ago ageʼna aeto huʼnove. Nagaemo ageteʼnaeʼmo amiʼnova yateʼmo afaʼa yagaino nateme nateme neʼviyanageno agaiʼa afinaʼmo afole aigiye, huʼna nagesamo afisuvafeʼmo alino nave liʼnigeʼna ago ageʼnove.

Himulu 1:6

Hapa opaiʼniyaʼmonanafa yege Mafaʼneʼamo ma mopafiʼmo alino atesigeno eminesiyafeʼmo mani gemo hunoʼaeʼmo, Muki enisole vayaʼmogitapamo agiʼaleʼmo alita asaga hutapa agaetefekeʼmo mono hiyo, huno hapa paiʼniye.

2 Pita 1:1

Nagaemo Saimoni Pitaʼnamo Yesu Kalaisi aliʼyaʼamo neʼaluva vekamo maiʼneʼna apa vekaʼamo maiʼnove. Gotiʼa lagufamo alino katino nelateya Gotitimoʼa Yesu Kalaisi fatago kavaʼaletiʼmo fikumo lapamaeno lapamiʼnigetapa lapakesamo afita fatago huʼnaya vayaʼamogitapaeʼmo mani gemo avoʼmo nekaove. Lapakesamo afita fatago nehaya kavatapimo alopa monileʼyaʼmo aeno agaseʼniya kavaʼe lagesamo afita fatago nehuna kavatiʼeʼmo magoke aiyaya kavaʼmo haneʼniye.

2 Pita 3:18

Ani kavaʼmo osutapa Ala kava netimo lagufamo alino katino nelateya vekatimo Yesu Kalaisiʼa fikumo lapa maeno lapamiʼniya kavafekeʼmo magoʼe hutapa lapakesamo afita fatago hutetapa Kalaisifeʼmo magoʼe hutapa lapakesamo afitetapa ageta aeto hutetapaeʼmo kosita alopa vayaʼmo maiyo. Ha le konali yaʼamo hemenimo haneʼniyanageno muki afinaʼaeʼmo hanege hanege huno haneno. He, lama ge.

1 Yoni 2:23

Muki vayaʼamogi, Yesuʼa Kalaisi vekamo oʼmaiʼniye, huʼa aeʼa hakalo huʼa hapa nepaiya vayaʼai apaipafiʼmo muki yaʼmo Afoʼamoʼmo avaleʼa oʼateʼnae. Muki vayaʼamogimo, Yesuʼa Kalaisi vekamo maiʼniye, huʼa aeʼa hakalo huʼa hapa nepaiya vayaʼai apaipafiʼmo muki yaʼmo Afoʼamoʼe Mafaʼneʼaʼeʼmo anavaleʼa anateʼnageʼana neʼmaiʼae.

2 Yoni 1:9

Muki vayaʼamogi Kalaisiʼa alino apaya maleʼniya geleʼmo atafauʼa alagi huʼa oʼmaiʼnisayana Gotiʼa avaleʼa apaipafiʼmo oʼateʼnae. Muki vayaʼamogi Kalaisiʼa alino apaya maleʼniya geleʼmo atafauʼa alagi huʼa maiʼnisayana Gotiʼa avaleʼa apaipafiʼmo ateʼnageno maiʼnigeno Mafaʼneʼaʼeʼmo apaipafiʼmo maiʼniye.