Yoni 17:23 - The Keyagana NT and 25 OT books

²³ Nagaemo apakaepiʼmo maiʼnogeka nagaepiʼmo maiʼnanaʼmofeʼmo magokeʼageʼmo maisayafeʼmo nunumuʼmo huʼna neʼapatove. Magokeʼageʼmo maiʼnisageʼa ma mopafi vayaʼmogimo apaketeʼapaeʼmo, Gotiʼa alino ateʼnigeno emineʼniye. Gotiʼa Mafaʼneʼaeʼmo hau ayamopafiʼmo hauʼniya kava huno apakaefeʼmo hau ayamopafiʼmo hauʼniye, huʼa hisayafeʼmo nunumuʼmo huʼna neʼapatove.

Yoni 17:23 ပူးပေါင်းရင်းမြစ်များ

Yoni 10:38

Nehisuvana nagaefeʼmo alagi lama gemo nehiye, hutapa hiyo. Nagaefeʼmo lapakesa afita fatago nosayaʼmonanafa Gotiʼa nehiya agufa kavaʼmo nehisuvana Afoʼamoʼa agaepiʼmo maiʼnigeno agaemo agaepiʼmo maiʼniye, hutapa hisayafeʼmo nehuva kavafeʼmo lapakesa afita fatago hiyo, huno hapa paiʼnigeʼapaeʼmo

Yoni 13:35

Konagatapimogifeʼmo lapau lapayamopafiʼmo lapausigeʼapaeʼmo muki vayaʼmogimo lapaketeʼapaeʼmo, Yesu geʼamo neʼafiya vayaʼmo maiʼnae, huʼa hugae, huno hapa paiʼniye.

Yoni 14:10

Nagaemo muki yaʼmo Afoʼamopiʼmo maiʼnogeno muki yaʼmo Afoʼamoʼmo nagaepiʼmo maiʼniye, huka kagesamo afika fatago osuʼnapiye. Lapa nepauva gemo nagaiʼni nagesafatiʼmo nagesa afiʼna lapa nopauvaʼmonanafa agaemo muki yaʼmo Afoʼamoʼmo nagaepiʼmo maiʼnenoʼaeʼmo aliʼyaʼamo neʼaliye.

Yoni 14:23

Yesuʼa geʼaleʼmo aeno atagaina huno ha painoʼaeʼmo, nagaefeʼmo hapau apayamopafiʼmo nehapaiya vayaʼmogimo geʼnimo akame hugae. Akame hisageno Afoʼnimoʼa apakaefeʼmo hau ayamopafiʼmo hauʼnisigetaʼa agaeʼe nagaeʼeʼmo apakaemo maiʼnisayategamo emitetaʼa magokepi lokaetaʼa maige maige huta maigune.

Yoni 15:9

Afoʼnimoʼmo nagaefeʼmo hau ayamopafiʼmo hauʼniya kava huno lapakaefeʼmo nahau nayamopafiʼmo nahauʼniye. Nahau nayamopafiʼmo nahauʼniya kavapiʼmo aeta hanitapa maiyo.

Yoni 16:27

Lapakaemo nagaefeʼmo lapau lapayamopafiʼmo lapauʼnigetapaeʼmo Gotitegatiʼmo emineʼniye, hutapa lapakesamo afita fatago nehayaʼmofeʼmo Afoʼnimoʼmo agaiʼamo lapakaefeʼmo hau ayamopafiʼmo hauʼniye.

Yoni 17:11

Hemenimo ma mopafiʼmo magoʼe huʼna oʼmaiʼna ataleʼna kagaetegamo uʼna haiguvaʼmonanafa apakaemo ma mopafiʼmo maiʼnae. Afo, huʼna, kaote vekamo maiʼneka alagepa kavaʼageʼmo nehana vekae, huʼna, ani kavaʼmo hutaʼa magokeʼageʼmo maiʼnoʼa kava huʼa apavaleka namiʼnana vayaʼmo magokeʼageʼmo maiʼnayanageʼa ani kava huʼa maisayafeʼmo himamukaletiʼmo yagaika apato.

Yoni 17:21

Apakaemo mukiʼamogi magokeʼageʼmo maiʼneʼa Afoʼnimogamo nagaepiʼmo maiʼnanageʼna kagaepiʼmo maiʼnova kava huʼa laʼagaepiʼmo magokeʼageʼmo maisayafeʼmo nunumuʼmo huʼna neʼapatove. Magokeʼageʼmo maiʼnisageʼapaeʼmo ma mopafi vayaʼmogi apaketeʼapaeʼmo nagaefeʼmo, Gotiʼa alino ateʼnigeno emineʼniye, huʼa apakesamo afiʼa fatago hisayafeʼmo nunumuʼmo huʼna neʼapatove.

Yoni 17:24

Afo, huʼna, nahauʼniyanagi apavaleka namiʼnana vayaʼnimo nagaetegamo eʼa maiʼneʼa namiʼnana ha le konali yaʼnimo agesayafeʼmo nahauʼniye. Ma mopamo alo osuʼnana afinaʼmo nagaefeʼmo kahau kayamopafiʼmo kahauʼniyaʼmofeʼmo ha le konali yaʼnimo namiʼnane.

Yoni 17:26

Nagaefeʼmo kahau kayamopafiʼmo kahauʼniya kavakamo apakaepiʼmo hanesigeʼna apakaepiʼmo maisuvafeʼmo kagikamo aepaʼamo aliʼna apave liʼnovanageʼna magoʼe huʼna aliʼna apave liguve, huno nunumuʼmo huʼniye.

Yoni 17:3

Kagaemo lama geʼageʼmo nehana Gotigaʼe Yesu Kalaisiʼmo alika ateʼnanageno emineʼniya vekaʼeʼmo anakeʼa alagepa huʼnaya vayaʼmogimo maige maige huʼa maisaya yaʼmo ago aliʼnae.

Yoni 17:8

Ani kavaʼmo huʼna namiʼnana gemo apamiʼnogeʼa aliteʼapaeʼmo, Gotitegatiʼmo emineʼniye, huʼa nageteʼapaeʼmo Gotiʼa alino ateʼnigeno emineʼniye, huʼa apakesa afiʼa fatago nehae.

Yoni 3:17

Gotiʼa ma mopafi vayaʼmo agoti huno apatetenoʼaeʼmo, hosu kavaʼmo huʼnae, huno hisiyafeʼmo mafaʼneʼamo alino ateʼnigeno emiʼnoʼmeʼnifa apakufamo alino katino apateteno hapau vaisiyafeʼmo alino ateʼnigeno emineʼniye.

Yoni 6:56

Ina lagimo nameʼniʼe kolaʼniʼeʼmo neʼnisafigeʼa nagaepiʼmo maiʼnageʼna apakaepiʼmo maiʼnove.

1 Kolitiyani 1:30

Gotiʼa Kalaisi Yesupiʼmo faleno lapateʼnigetapa maiʼnae. Gotiʼa Kalaisiʼmo alino hamaleno ateʼniyanageta Gotitegatiʼmo ageteta afisuna agufa kavaʼmo hamaleʼniye. Ina kava huno Kalaisiʼa Goti aulagaleʼmo fatago vayaʼmo maisunafeʼmo fatago kavatimo maiʼniyanageno hemenimo magoʼe magoʼe huno alino alagepa huno nelateyanageno muki hosu kavapatiʼmo lagufamo alino katino lategaiye.

2 Kolitiyani 5:21

Na kava higetaene. Lagaemo Kalaisipiʼmo maiʼnetaeʼmo Goti fatago kavaʼamo hamalesunafeʼmo Gotiʼa hosu kavaʼmo alagi osuʼniya vekamo alino hamaleno ateʼnigeno hosu kavaʼmo hamaleʼniye.

Galesiya 3:28

Kalaisipiʼmo magoke aiyaya vayaʼmo maiʼnayaʼmofeʼmo mago vayaʼmo Yu vayaʼmo maige mago vayaʼmo alu nofi vayaʼmo maige huʼnone, hutapa osuge kalavusi aliʼyaʼmo neʼaliya vayaʼmo maige afa vayaʼmo maige huʼnone, hutapa osuge ve maige aʼne maige huʼnone, hutapa osuge hutetapa maiyo. Kalaisi Yesupiʼmo maiʼnetapaeʼmo magoke aiyaya vayaʼmo maiʼnae.

Filipai 3:15

Neʼuvaʼmofeʼmo alopa vayaʼmo uta haita hapaiʼnona vayaʼmogitamo ani kavaʼmo huta maigetao. Mago vayaʼamogitapamo alu lapakesamo neʼafisayaʼmoʼmo Gotiʼa mani kavaʼmo afaʼa alino lapave ligiye.

Kolosi 1:28

Lagaemo muki vayaʼamo apavalelita uta apatesunageʼa Goti aulagaleʼmo Kalaisipiʼmo maiʼneʼa uʼa haiʼa hapaisayafeʼmo muki vayaʼaifeʼmo Kalaisife ava gemo aeta hakalo huta hapa nepaune. Lagaemo alagepa huta lagesamo afiʼnetaeʼmo muki vayaʼaifeʼmo hutaeʼmo, ehetapiye, huta huge muki vayaʼaina alita apaya malege huta neʼmaune.

Kolosi 2:2

Lapaipamoʼmo atete osuno lokiya vaino haneʼnisigetapa lapau lapayamopafiʼmo lapauʼnisigetapa magoke lapaipa lapakesamo alita maisayafeʼmo aliʼyaʼmo neʼaluve. Ani kavaʼmo huta maiʼnetapaeʼmo Gotiʼa hogoteno alino fala kino ateʼneno alino lapaveliʼniya vekamo Kalaisiʼmo alagepa hutapa ageta aeto hutetapa lole lapakesamo oʼafitapa lusi kava huta magoke lapakesamo afisayafeʼmo nahauʼniye.

Kolosi 3:14

Mani kavaʼmo nehutapaeʼmo hogote kavaʼmo hutapa lapau lapayamopafiʼmo lapainageno alagepa huno magokepi alino lokaeno lapateno.

1 Pita 5:10

Muki yaʼamo fikumo lapa maeno nelapamiya Gotiʼa Yesu Kalaisitetiʼmo alagi hanege hanege huno hanesiya ha le konali yaʼamo alisunafeʼmo lagaefeʼmo keya aeno ge huʼniye. Inagi lapakaemo aise afinaʼmo kana yaʼmo alisagenoʼaeʼmo agaemo alagi alino alagepa huno lapatege alino lokiya vaino lapatege lokiyaʼamo alino lapamige agaiʼaleʼmo faino lapatege hugiye.

1 Yoni 1:3

Lagaemo afiteta ageʼnona kavafeʼmo ava gemo hutaeʼmo lapakaemo lagaeʼeʼmo afalu afalugana huta maisunafeʼmo aeta hakalo huta lapa nepaune. Lagaemo Afotimoʼe mafaʼneʼamo Yesu Kalaisiʼeʼmo afalu afalugana huta neʼmaune.

1 Yoni 3:1

Afiyo, huʼna, Afotimoʼmo lagaefeʼmo aeto agufa kavaʼmo huno hau ayamopafiʼmo hauʼnigenoʼaeʼmo, Mafaʼneʼnimogitapae, huno nehigetaeʼmo lahau neʼaune. Ma mopafi vayaʼmogimo Gotiʼmo oʼageʼnayaʼmofeʼmo lagaeʼeʼmo lageʼa aeto nosae.

1 Yoni 4:19

Gotiʼa hogoteno lagaefeʼmo hau ayamopafiʼmo hauʼniyaʼmofeʼmo lagaemo Gotifeʼmo lahau layamopafiʼmo nelahaiye.

Leveleseni 3:9

Mago vayaʼmogimo Sataniʼeʼmo aliʼa anupa huʼa maiʼneʼapaeʼmo, Yu vayaʼmo maiʼnone, huʼa nehayaʼmonanafa aigofeʼmo nehae. Lama gemo lapa nepauve, huno, nagaemo apavaleliʼneʼna lapaiyafiʼmo apatesugeʼapaeʼmo Kalaisiʼa lapakaefeʼmo hau ayamopafiʼmo hauʼniya vayaʼmo maiʼnae, huʼa hugae.