Yoni 15:2 - The Keyagana NT and 25 OT books

² Agaemo nagaepatiʼmo aeʼniya nofi akopamoʼmo alagamo noʼaeya nofi akopamo hatagauno alino alagepa nehiye. Ani agufa kavakeʼmo huno alagamo neʼaeya nofi akopafatiʼmo magoʼe huno alagamo aesiyafeʼmo hatagauno alino alagepa nehiye.

Yoni 15:2 ပူးပေါင်းရင်းမြစ်များ

Samu 92:14

Apakaemo kosuna lege anekalo lege huteʼa maiʼneʼapaeʼmo alagamo aeʼnaya kava huʼa alagamo neʼae. Apakaemo muki afinaʼae afinaʼaeʼmo lokiyaʼapimo haneʼnigeno haitaʼamoʼmo hegafa talili huno haneme hamene neʼviye.

Mai'naya kavane 4:18

Hosu vayaʼai kateʼmo hani huʼniye. Asagauʼa aiʼnageno apaiyafiʼmo nehapaigeʼapaeʼmo na agufa yateʼmo laiyafiʼmo lahaeʼnifi huʼa oʼageʼnae. Oʼageʼnayaʼmonanafa yegemo netepiʼmo haineteno leme leme haineno magoʼe huno leno lokiya neʼviya kava huʼa fatago vayaʼmo neʼvaya kateʼmo magoʼe huʼa alagepa huʼa uʼa haiʼa hapaigae.

Neniyo 11:35

Alagi alino alagepa huno apatege hosu kavaʼapimo aeno kalo paeno atalege yaveyave vayaʼmo alino hamaleno apatege huteno hapa maesiyafeʼmo mago afiteʼa ageʼnaya vayaʼmo faligae. Hapa maelino neʼvisigenoʼaeʼmo atupa afinaʼmo Gotiʼa lekana pai maleʼniya afinaʼmo afole aigiye.

Malakai 3:3

Agaemo atafiʼmo siluva yafaʼmo kaesigeno leno alagepa siluva yafaʼmo afole aisiyafeʼmo yagaino neʼmaiya vekagana huno afole aigiye. Agaemo Livai nofi vayaʼmogi hosu kavaʼapimo aeno kalo paeno ataleteno alino alagepa huno apategaiye. Atafiʼmo goli yafaʼe siluva yafaʼeʼmo kaeʼnageno leno kalopaeno alagepa yafaʼamo afole neʼaiya kava huno alino alagepa huno apatesigeʼa fatago kavaʼmo nehuʼapaeʼmo Ala kava neʼmo ofalinimo amigae.

Matiyu 13:12

Aliʼnisaya vayaʼmo magoʼe huno apamisigeno magoʼe yaʼapimo hanegaiyaʼmonanafa oʼaliʼnisaya vayaʼai apayapatiʼmo aiseʼamo aliʼnisaya yaʼmo hapa falegaiye.

Matiyu 13:33

huno huteno Yesuʼa magoʼe huno aeno kalafefa gemo huno hapa painoʼaeʼmo, Gotiʼa yagaino neʼapateya kavaʼmo haneʼniya kava huno mago aʼmoʼa falaovafiʼmo neʼataya yaʼmo agiʼamo yisimo alino alopa falaovafiʼmo ate maleʼnigenoʼaeʼmo uneno huno muki falaovafiʼmo aliʼyaʼmo aliʼnigeno aeno apafu nele, huno hapa paiʼniye.

Matiyu 15:13

muki yaʼamo kokuʼnapi afoʼnimoʼa ohakaleʼnisiya yaʼmo hafuʼyaʼaʼeʼmo alino vakaino atalegaiye.

Matiyu 25:29

Aliʼnaya vayaʼmo magoʼe huʼna apamisugeʼa magoʼe yaʼmo aligae. Oʼaliʼnaya vayaʼai apayapatiʼmo apamiʼnova yaʼmo hapa falegauve.

Matiyu 3:10

Koʼneletiʼmo yosamo hafuʼyaʼaʼeʼmo heno halagatino atalesiyafeʼmo ago alo huno maleʼniye. Agaemo muki yosamoʼmo alagepa alagamo noʼaesiyana koʼneletiʼmo heʼya aino atafiʼmo kaegaiye.

Matiyu 3:12

Agaemo sipetiʼamo ayapiʼmo aliʼniyanageno vitimo haletiʼyaʼamo sipetiletiʼmo haleteno neʼyaʼamo alino noʼafiʼmo anupa huno maleteno haletiʼyaʼamo alino yu oseno neleya atafiʼmo kaegaiye, huno hapa paiʼniye.

Matiyu 7:19

Muki alagepa alagamo noʼaeya yosaʼamo ago heʼya aiteʼa aliʼa atafiʼmo yaga auʼa nekae.

Maki 4:20

Mago avina yaʼmo alagepa mopafiʼmo asagauno aiʼniya avina yakana huʼa mago vayaʼmogi Goti geʼamo afiteʼapaeʼmo aliʼa apaipafiʼmo neʼmalagenoʼaeʼmo tetiʼa alagamo aege sigisitiʼa alagamo aege vani hataletiʼa alagamo aege huʼa neʼmaiye, huno hapa paiʼniye.

Luki 8:13

Mago avina yaʼmo yafa agotofuleʼmo asagauno aiʼniya avina yakana huʼa mago vayaʼmogi Goti geʼamo afiteʼapaeʼmo apamogaga neʼaiye. Hafuʼyamo mopafi oʼaeʼniya agufa kavaʼmo huʼa yoka apakesamo afiʼa fatago huʼnagenoʼaeʼmo apamalageka nehiya afinaʼmo ataleʼa ago asagauʼa neʼaiye.

Yoni 15:1

Yesuʼa hunoʼaeʼmo, nagaemo lama ge alagamo neʼaeya nofikana huʼna maiʼnove. Afoʼnimoʼmo ani nofi hoyamo afoʼamoʼmo maiʼneno neʼyagaiye.

Yoni 15:16

Lapakaemo lekana paitapa oʼnateʼnafa nagaekeʼmo lekana paiʼna lapateʼnovanagetapa alagamo hanege hanege huno hanesiya alagamo aesayafeʼmo lekana paiʼna lapateʼnove. Afoʼnimofeʼmo nagiʼniletiʼmo muki kavafeʼmo ge hutapa afi gesayana afaʼa lapamigiye.

Yoni 15:3

Nagaemo hatagauʼna aliʼna alagepa hugekana huʼna aliʼna lapaya maleʼnova geletiʼmo hosu kavatapimo sese huʼna lapateʼnogetapa yaveyave vayaʼmo maiʼnae.

Yoni 15:6

Mago vekamoʼa nagaepiʼmo aeno hanino oʼmaiʼnisiyaʼmoʼmo akopamo hatagauno ataleʼnisigeno leno vaitesigeʼa aliʼa anupa huteʼa atafiʼmo aliʼa yaga auʼa kaesageno leno sagaligiye.

Yoni 15:8

Lapakaemo asole alagamo aeʼnetapaeʼmo Afoʼnimoʼmo ala agiʼamo amisaya kavatetiʼmo geʼnimo neʼafiya vayaʼmo maigae.

Yoni 17:12

Nagaemo ma mopafiʼmo apakaeʼeʼmo magokepi lokaeʼna maiʼneʼnaeʼmo kagikaletiʼe himamukaletiʼeʼmo yagaiʼna apateʼnogeʼa afaʼa maiʼnayaʼmonanafa magoke vekaeʼmo kagae mukufi gemoʼmo hunoʼaeʼmo, afela hegaiye, huno huʼniya gemo afole aisiyafeʼmo alagi afela heʼniye.

Lomu 11:17

Gotiʼa hoyafiʼmo haneʼniya yosamo agiʼamo olivi yosa akopamo lo aeno ataleteno kahaufilaga olivi yosa akopamo lo aelineno aeno hanino ateʼniye. Lapakaemo alu nofi vayaʼmo kahaufilaga yosagana hutapa maiʼnae. Hemenimo lapakaemo yosa akopaʼaʼeʼmo lokaetapa maiʼnetapaeʼmo hafuʼyaʼafatiʼmo yosa anumo aliʼnageno alino lokiya vaino nelapate.

Lomu 11:22

Gotiʼa ani kavaʼmo huʼniyaʼmofeʼmo yuna aipamo kalino nelapateya kavaʼaʼe lokiya aipamo kalino neʼapateya kavaʼaʼefeʼmo lapakesamo afiyo. Agaemo asagauʼa aiʼnaya vayaʼaifeʼmo lokiya aipamo kalino neʼapateyaʼmonanafa lapakaefeʼmo yuna aipamo kalino nelapate. Lapakaemo yuna aipamo kalino nelapateya kavaʼafiʼmo maime maime neʼvisayana yuna aipamo kalino lapategaiyaʼmonanafa atalesayaʼmoʼmo Gotiʼa ani kava huno lapakaeʼeʼmo alino lo aeno lapatalegaiye.

Lomu 8:28

Muki alu kava alu kavaʼmo afole neʼaiya kavaʼmoʼa Gotifeʼmo hapau apayamopafiʼmo nehapaiya vayaʼaifeʼmo Gotiʼa huguve, huno hu maleʼniya geʼaletiʼmo keya aeno ge huʼniya vayaʼmo alagepa huʼa maisayafeʼmo muki alu kavatetiʼe alu kavatetiʼeʼmo alino magokepi lokaeno aliʼyaʼmo neʼaliye.

1 Kolitiyani 13:1

Nagaemo ma mopafi vayaʼai apakefatiʼe enisole vayaʼai apakefatiʼeʼmo nagemo neʼaisuvana nahau nayamopafiʼmo oʼnahauʼnisigeʼna veloʼmo neʼamagigenoʼaeʼmo afa agemo aige yaveʼyamo neʼamagigenoʼaeʼmo afa agemo aige nehiya kava huʼna afa gemo nehuguve.

Taitasi 2:14

Agaemo muki keʼaepa gemo amagita ataleʼnona kavategatiʼmo miya faino hatu maeno latetenoʼaeʼmo hosu kavatimo aeno kalo paeno lateʼnigeta agaiʼa vayaʼamo maiʼneta layamukiki huta alagepa kavaʼmo huta maisunafeʼmo agaiʼa agufaʼamo ofalinigana huno Gotina amiʼniye.

Himulu 12:15

Fiku yanageʼa mago konagatapimogimo Gotiʼa fikumo hapa maeno neʼapamiya kavateʼmo uʼa haiʼa metalegayanagi kava yagaitapa maiyo. Fiku yanageno hafuʼyafatiʼmo ausisi aeteno hosu atu neheya yaʼmo afole aiteno hanageke yaʼmo alino lapamiteno asole vayaʼmo alino hosu huno apategaiyanagi yagaitapa maiyo.

1 Yoni 2:19

Apakaemo ago lataleʼa uʼnayaʼmonanafa vayatimo oʼmaiʼnae. Apakaemo lagaepatiʼmo maiʼnaesinana olataleʼa lagaeʼeʼmo magokepi lokaeʼa maiʼnaesine. Ani vayapatiʼmo mago vayaʼmogi vayatimo oʼmaiʼnae, huta apakesunafeʼmo ago lataleʼa uʼnae.

Leveleseni 3:19

Muki nahau nayamopafiʼmo nahauʼniya vayaʼaifeʼmo, hosu kavaʼmo nehae, huʼna huteʼna aliʼna api aiʼna neʼapatovaʼmofeʼmo lapayamukiki hutapa lapaipamo alita afe leyo.