Samu 18:21 - The Keyagana NT and 25 OT books

²¹ Nagaemo keʼaepa geʼamo akame huʼnovaʼmofeʼmae. Hosu kavaʼmo huʼna Gotiʼnimoʼmo ataleʼna oʼuʼnove.

Samu 18:21 ပူးပေါင်းရင်းမြစ်များ

2 Sitoli 34:33

Ani afinaʼmo muki Isaleli haopalegamo asole aigofe gotigi apauneʼamo afaʼageʼmo haneʼnigenoʼaeʼmo ani yafeʼmo Ala kava neʼmoʼa alagi ohauʼnigenoʼaeʼmo avenatuʼnaʼmo heno neʼatale. Kini vekamo Yosaiyaʼmo ani kavatetiʼmo muki ani hosu yaʼmo muki Isaleli vayaʼmo maiʼnaya kotegatiʼmo alino ataleteno muki Isaleli vayaʼmogimo Ala kava neʼmo Gotiʼapimoʼmo alagi akame hisayafeʼmo alino he tino apateʼniye. Kini vekamo muki maiʼniya afinaʼmo apakaemo Ala kava neʼmo apakinago vayaʼmogi Gotiʼapimoʼmo alagi oʼataleʼnae.

Samu 119:102

Kagaikamo alika naya maleʼnanaʼmofeʼmo alika fako nehana gekamo oʼataleʼnove.

Samu 17:4

Ma mopafi vayaʼai kavaʼapieʼmo oʼnahauʼnigeʼna nagesamo noʼafuve. Gekamo afiteʼnaeʼmo vayaʼmo nehapaeya vekamo kaʼaleʼmo oʼuʼnove.

Samu 26:1

Apakaemo nagaepikeʼmo aliʼa faiʼa nateʼnae. O Ala kava nene, huʼna, Alagepa kavaʼmo huʼnovaʼmofeʼmo kagaemo hukaeʼmo, Haʼao, alagepa kavaʼmo huʼniye, huka hapa paiyo. Nagaemo Ala kava nefeʼmo aliʼna amufa neʼamuvaʼmofeʼmo aeʼna halu oʼvalegauve.

Samu 7:9

Kagaemo fatago Gotigamo maiʼneka apaipa apakesafiʼmo alika fako nehane. Hosu vayaʼmogi hosu kavaʼapimo alika hano huka atalegeʼa magoʼe huʼa osiyo. Alagepa vayaʼaina alagepa huʼa maisaya yaʼmo apamigeʼa alagepa huʼa maiyo.

Mai'naya kavane 8:32

Mafaʼneʼnimogitapae, huʼna, Geʼnimo akame nehaya vayaʼmo aliʼna auleʼna neʼapatovaʼmofeʼmo geʼnimo afiyo.

Neniyo 6:23

Kini vekamo lusi kava huno amogaga aiteno vayaʼaifeʼmo ge huʼnigeʼa laiyonimogi kelifatiʼmo avayu huliʼa hai eʼnae. Neniyoʼa Gotiʼamofeʼmo agesamo afino fatago huʼniyaʼmofeʼmo ageʼnayana mago agufa hanageke yaʼmo alagi oʼaliʼniye.

Apa 24:16

Nagaemo Goti aulagaleʼe ma mopafi vayaʼai apaulagaleʼeʼmo yuʼilaga vekaʼnimoʼa agoti huno oʼnatesiyafeʼmo nayamukiki huʼna alagepa kavaʼmo nehuve.

1 Tesaloniyani 2:10

Lagaemo lapakesamo afita fatago nehaya vayaʼmogitapaʼeʼmo lokaeta maiʼnetaeʼmo Gotitegamo alagepa kavaʼmo huge vayaʼaitegamo alagepa kavaʼmo huge vaiʼmo olamisaya agufa kavaʼmo huge huta maiʼnonagetapaeʼmo lapakaeʼe Gotiʼeʼmo ago lageʼnayanagetapa laha maesiya faigoko gemo afaʼa hugae.

1 Yoni 2:19

Apakaemo ago lataleʼa uʼnayaʼmonanafa vayatimo oʼmaiʼnae. Apakaemo lagaepatiʼmo maiʼnaesinana olataleʼa lagaeʼeʼmo magokepi lokaeʼa maiʼnaesine. Ani vayapatiʼmo mago vayaʼmogi vayatimo oʼmaiʼnae, huta apakesunafeʼmo ago lataleʼa uʼnae.

1 Samiyo 15:11

Afiyo, huno, Soloʼmo magoʼe huno nakame osuʼnifa nataleno atagi neno uʼniye. Agaemo huvo, huʼna ha paiʼnova gemo osuʼnifa geʼnimo amagino ataleʼniyaʼmofeʼmo kini vekamo aliʼna hamaleʼna ateʼnova kavafeʼmo lusi kava huʼna nahau huve, huno ha paiʼniye. Samiyoʼmo ani gemo afitenoʼaeʼmo aipamo kana huʼnigeno muki ani haniʼilagamo nunumuʼmo hume hume uʼniye.