Samu 111:2 - The Keyagana NT and 25 OT books

² Ala kava neʼmoʼa aliʼyaʼmo neʼaliya kavaʼmo lusi kavane. Aliʼyaʼamo neʼaliya kavafeʼmo amuse huʼa neʼataya vayaʼmogi alagepa huʼa agesayafeʼmo lekana paiteʼa apaipa apakesafiʼmo aliʼa neʼmalae.

Samu 111:2 ပူးပေါင်းရင်းမြစ်များ

Samu 104:24

O Ala kava nene, huʼna, asole aliʼyaʼmo alu aliʼya alu aliʼyaʼmo aliʼnane. Kagaemo afiteka ageʼnana kavakamo alopa kavaʼmo haneʼnigeka muki yaʼmo alo huʼnane. Kagaemo alo huʼnana yaʼmoʼmo ma mopafiʼmo alagi havaiteʼniye.

Samu 104:34

Nagaemo Ala kava nefeʼmo namogaga neʼauvaʼmofeʼmo agaefeʼmo nagesa afifi nehuva kavafeʼmo amuse huno nateno.

Samu 107:43

Muki afiteʼa ageʼnaya vayaʼmogimo ani kavafeʼmo apakesa afifi huʼa maigae. Apakaemo Ala kava neʼmoʼa vayaʼaeʼmo hau ayamopafiʼmo hauʼniya kavaʼamo ageʼa aeto hugae.

Samu 118:15

Afiyo, huʼna, alagepa vayaʼmogimo seli noʼapifatiʼmo apakufamo ago alino katino apateʼniya kavafeʼmo yokemo huʼapaeʼmo, Ala kava neʼmoʼa himamuʼaletiʼmo ani kavaʼmo huʼniye.

Samu 139:14

Kagaemo alagepa huka alo huka nateʼnanaʼmofeʼmo koli huteʼna kagikaleʼmo aliʼna asaga nehuve. Nagaetegamo huʼnana kavaʼmo ageteʼnaeʼmo nahau neʼauve. Huʼnana kavafeʼmo alagepa kavaʼmo huʼnane, huʼna huteʼna aliʼna namalagiʼnove.

Samu 143:5

Nagaemo akeyaʼvilagamo afole aiʼniya kavafeʼmo nagesamo afiʼnove. Nagaemo kagaemo huʼnana kavafeʼmo nagesa afifi huʼna maiʼnove. Nagaemo kayatetiʼmo aliʼnana aliʼyakaeʼmo nagesa afifi huʼna maiʼnove.

Mai'naya kavane 17:16

Negi vekamoʼmo afiteno agesiya kavaʼmo alisiyafeʼmo ohauʼniyaʼmofeʼmo na kava higenoʼaeʼmo miyaʼamo aliʼniye.

Mai'naya kavane 24:14

Alagepa huka afiteka agesana kavaʼmoʼa kaipafiʼmo haga kahaugiye. Kahauya huka ageʼnisanaʼmoʼmo henagaʼamo alagepa yaʼmo afole aigiye. Afole aigiye, huteka kavayagunagu nehana kavaʼmo hano osugiye.

Aiyeya 40:12

Ina laʼmo ayapiʼmo muki solovala aniʼmo alino maleno agegeʼniye. Ina laʼmo ayatetiʼmo kokuʼnaʼmo maleno agegeʼniye. Ina laʼmo muki mopamo alino samofiʼmo maleno agegeʼniye. Ina laʼmo avemo kanaʼamo maleno agegeʼniye. Ina laʼmo aise avemo alino sigelileʼmo asaiʼniye.

Neniyo 4:3

Agaemo lokiya himamuʼaletiʼmo lokiya kavaʼmo huʼnigeʼa vayaʼmogi ageteʼapaeʼmo hapau neʼaiye. Yagaino neʼapateyanageno muki afinaʼmo yagaino hano osuno yagaino apateme apateme ugiye. Afole aiʼa maite maite hume visaya vayaʼaiteʼmo alagi yagaino apategaiye.

Lomu 1:28

Apakaemo Gotifeʼmo lama ge huʼa apakesa afisayafeʼmo ohapauʼniyaʼmofeʼmo Gotiʼa magoʼe huno apatafauno oʼmaiʼnifa afaʼa apakeno apataleʼnigeʼno hosu apaipa apakesakeʼmo alino he tino apateʼnigeʼa osisaya agufa kavaʼmo nehae.

Lomu 8:6

Atafa apaipamoʼmo hauʼniya kavafeʼmo hapauʼnigeʼa ani kavafeʼmo apakesamo neʼafiya vayaʼmo nefaliya kavategamo maiʼnae. Aunemeʼamoʼmo hauʼniya kavafeʼmo hapauʼnigeʼa ani kavafeʼmo apakesamo neʼafiya vayaʼmo afaʼa neʼmaiya kavategamo afaʼa maiʼneʼapaeʼmo, Gotiʼa aipamoʼmo falu huno nelate, huʼa nehagenoʼaeʼmo apaipamoʼmo falu nehiye.

Efasasi 1:19

Kagaemo lagaetegamo lusi kava huka aeno apakaseʼniya lokiyakaletiʼmo lokiya kavaʼmo huʼnananageka hemeniʼeʼmo nehane. Lokiyakaletiʼmo lokiya kavaʼmo huka Kalaisi agufafiʼmo kayamukiki huka aliʼyaʼmo aliteka faliʼniyatetiʼmo ago alika he tika ateteka lamaga kahaopaleʼmo avalelika uka haika ateʼnana kavaʼmo huka laipafiʼmo ani agufa lokiya kavaʼmo huka aliʼyaʼmo aliʼnanageta lagesamo afita fatago nehune. Mani lokiya kavaʼmo alika apave liyo, huʼna nunumuʼmo huʼna nelapatove.

Leveleseni 15:3

Apakaemo Moseseʼa Goti aliʼyaʼamo neʼaliya vekamo yokemo aikeli sipisipimo yokeʼamo huʼnae. Ani yokemo huʼapaeʼmo, Ala kava neʼmo kayamufaʼage Gotigae, huʼa, Magoʼe kavaʼmo nehanageʼapaeʼmo hapau neʼaiye. Apaote vayaʼaiteʼmo yagaika neʼapatana ala kini vekaʼapimogae, huʼa, nehana kavakamo kanale kavaʼageʼmo haneʼnigeka lama ge kavaʼmo nehane.