Salomoni Yokemae 5:1 - The Keyagana NT and 25 OT books

¹ Nasaʼnimogamo aʼnimogae, huʼna, Nagaemo hoyaʼnilegamo ago eʼna alagepa atumo neʼaiya yaʼmo agiʼamo meyaʼe mago alagepa atumo neʼaiya yaʼeʼmo aliʼna anupa huʼnove. Nagaemo lumemo anoʼaʼe anuʼaʼeʼmo neʼnove. Nagaemo nuʼanuʼe nofi alagafati aniʼeʼmo neʼnove. Nao vayaʼnimogitapae, huʼna, alitapa neyo. Nahau nayamopafiʼmo neʼnahaiya vayaʼnimogitapae, huʼna, He, aniʼmo netapa lapamu hiyo.

Salomoni Yokemae 5:1 ပူးပေါင်းရင်းမြစ်များ

Salomoni Yokemae 6:2

Nahau nayamopafiʼmo neʼnahaiya vekaʼnimo hoyaʼafiʼmo uno maiʼniye. Agaemo sipisipi anagaʼamo hoyaʼafatiʼmo nesayafeʼmo apavalelino uʼniye. Agaemo kanale yaveyave kahau ausemo alino anupa huno malesiyafeʼmo hoyaʼafiʼmo uno maiʼniye.

Salomoni Yokemae 4:16

Hoga haopalegatiʼmo yasimo alinika eno. Lamaga haopalegatiʼmo yasimo alinikeka hoyaʼnifiʼmo aligenoʼao alagepa atumo neʼaiya yaʼmoʼa muki haopalegamo ailino uneno hino. Nahau nayamopafiʼmo neʼnahaiya vekaʼnimoʼa hoyaʼafatiʼmo eno alagepa yosa alagamo lagino neno.

Leveleseni 22:17

Goti Aunemeʼamoʼe sipisipi vekaleʼmo maisiya a kanomoʼeʼmo, Neʼeyo, huʼana huʼnaʼae. Ani gemo afiʼnisaya vayaʼmogimo, neʼeyo, huʼa hiyo. Anifeʼmo lapauʼnisiya vayaʼmogimo neʼeyo, huʼa nehae. Hapauʼnisiya vayaʼmogimo afaʼa neʼmaiya yaʼmo neʼapamiya aniʼmo fikumo negae, huno hapa paiʼniye.

Mai'naya kavane 9:5

Etapa peleti mayaʼnimo nege nofi alagafati aniʼmo nege hutapa maiyo.

Apa 11:29

Geʼamo neʼafiya vayaʼmogimo ani gemo afiteʼapaeʼmo, Yutiya kotega maiʼnaya konagatimogi hapa maeta na magi monimo maleʼnopigeta ani kavaʼmo huta magoke magoke huta apamigune, huʼa huʼnae.

Yoni 3:29

Aʼmo aligesuve, huno huʼniya vekamoʼmo alisiya a kanomo agaiʼa aʼmae. Aʼmo aliguve, huno huʼniya vekamo ao vekamo eno magokepi lokaeno he tino maiʼnigeno aʼmo aliguve, huno huʼniya vekamoʼa amogaga aino ge higeno afitenoʼaeʼmo amogaga neʼaiye. Ani kava huno aʼmo neʼaligeʼnaeʼmo namogaga neʼauva kavaʼmo alagi haeʼmae.

Luki 12:4

Nao vayaʼmogitapae, huʼna, ma mopafi vayaʼaifeʼmo koli osiyo. Afaʼa lapaesageta faligayaʼmonanafa magoʼe huʼa lapakafu kisiya yaʼmo aliʼa olapamigae.

Aiyeya 66:14

Ani afinaʼmo lapakaemo nagaemo lapakaetegamo ani hisuva kavaʼmo agetetapaeʼmo lapaipafiʼmo lapamogaga aisageno lokiyatapimo magoʼe huno afole aigiye. Ani afinaʼmo Ala kava neʼmo aliʼyaʼamo neʼaliya vayaʼmo hapa maesiya lokiyaʼamo agegayaʼmonanafa kame vayaʼamogimo aipamo neleya kavaʼamo agesayafeʼmo alino apave ligiye.

Aiyeya 65:13

Ani kavaʼmo huʼnayaʼmofeʼmo nagaemo Ala kava neʼmo Gotiʼnamo ina gemo huve. Afiyo, huʼna, Aliʼyaʼnimo neʼaliya vayaʼmo neʼyaʼmo negayaʼmonanafa lapakaemo lapaka tegaiye. Afiyo, huʼna, Aliʼyaʼnimo neʼaliya vayaʼmo aniʼmo negayaʼmonanafa lapakaemo anifeʼmo lahapaugiye. Afiyo, huʼna, Aliʼyaʼnimo neʼaliya vayaʼmo apamogaga aigayaʼmonanafa lapakaemo lapavagage hugiye.

Aiyeya 61:11

Mopamoʼmo neʼyaʼmo alino afole aino atege hoyafiʼmo hakale maleʼnaya avina yaʼmo hoyamoʼmo alino hageno atege nehiya kava huno Ala kava neʼmo Gotiʼa fatago kavaʼe agiʼaleʼmo aliʼa asaga nehaya kavaʼeʼmo muki nofi vayaʼai apaulagaleʼmo alino afole aino ategaiye.

Aiyeya 58:11

Muki afinaʼmo Ala kava neʼmoʼa alino ho huno lapateteno ko noʼaiya afinaʼmo lokiya vaino lapateteno lapauʼniya yaʼamo alagi lapamigiye. Lapakaemo aniʼmo haneʼniya hoyagana hutapa maige olaneno aeno nelatiya meti anikana hutapa maige huta maigae.

Aiyeya 51:3

Ala kava neʼmoʼnamo Saiyoni taonifiʼmo maiʼnaya vayaʼmo aliʼna yuna heʼna apategauve. No atufaʼageʼmo ageteʼnaeʼmo nahau huʼna apategauve. Agaemo kaʼme koʼapimo Iteni kokana huʼna aliʼna ha maleʼna ategauve. Kalukalusopa koʼmo Ala kava neʼmo hoyaʼagana huʼna aliʼna ha maleʼna ategauve. Apakaemo Saiyoni taonifiʼmo apamogaga aige Gotifeʼmo haoke hege yokemo huge hugae.

Salomoni Yokemae 8:13

Hoyafiʼmo maiʼnana aʼnimogae, huʼna, kagaeʼeʼmo magokepi lokaeʼa maiʼnaya vayaʼmogimo kagemo neʼafiye. Kagemo aigeʼna afino, huno ha paiʼniye.

Efasasi 5:18

Lusi aniʼmo netetapa negi nagi gemo osigenoʼao lapakufamo alino hosu huno olapateno. Osutapa Goti Aunemeʼamoʼmo lapaipafiʼmo havai teno.

Matiyu 25:40

Ala kini vekaʼapimoʼmo hunoʼaeʼmo, lama ge lapa nepauve, huno, lapakaemo nagae vayapatiʼmo ina agufa naganaʼnimogitegamo ani kava huʼnaya kavaʼmo nagaetegageʼmo huʼnae, huno hapa paigiye.

Aiyeya 53:11

Agupi mafaʼnemoʼmo lusi kava huno kana huʼniya aliʼyaʼmo alisigeno neʼyaʼmo afole aigiyaʼmofeʼmo aipamoʼmo ha gegaiye. Aliʼyaʼnimo neʼaliya fatago vekamoʼmo hosu kavaʼapimo aligiyaʼmofeʼmo agaemo ageʼa alagepa huʼa agesaya kavatetiʼmo asole vayaʼaifeʼmo, naulagaleʼmo fatago vayaʼmo maiʼnae, huno hapa paigiye.

Aiyeya 5:1

Hemenimo nateʼnegeʼnao lusi kava huno nahau nayamopafiʼmo nahauʼniya vekaeʼmo yokemo huguve. Lusi kava huno nahau nayamopafiʼmo nahauʼniya vekamo nofi hoyaʼaeʼmo yokemo huguve. Nahau nayamopafiʼmo nahauʼniya vekamoʼmo aise aveleʼmo alagepa lanitani mopafiʼmo nofi hoyamo vai maleʼniye.

Salomoni Yokemae 8:1

Nasaʼnimoʼa itaʼnimo nuʼaleʼmo neʼniya nasaʼnimogana huka maisanafeʼmo nahauʼniye. Nasaʼnimogamo maiʼnanesinana kumatega kageteʼnaeʼmo kahaeʼna nesugenoʼaeʼmo mago vekamoʼmo ani kavafeʼmo hosu agesamo afaʼa oʼafiyesine.

Salomoni Yokemae 6:11

Nagaemo kagoʼmufilagatiʼmo alagamo neʼaeya yosamo agesuvafeʼmo uʼna lamiʼna alagepa yosamoʼmo alagamo neʼaeya yosa hoyafiʼmo maiʼnove. Nofiʼmo alagepa huno haneʼnifi pamagalanati yosamoʼa ause heʼnifi huʼna agesuvafeʼmo uʼna lamiʼnove.

Samu 147:11

Ala kava neʼmoʼa vayaʼmogimo agaefeʼmo koli nehaya vayaʼaifeʼmo amuse huge hau huno neʼapateya kavafeʼmo aliʼa amufa neʼamiya vayaʼaifeʼmo amuse huge nehiye.

Mai'naya kavane 24:13

Mafaneʼnimogae, huʼna lume anumo alagepa neʼyaʼmo haneʼniyanagi no. Lume anoʼamoʼeʼmo kanale hagamo nehiyanagi no.

Salomoni Yokemae 1:13

Nahau nayamopafiʼmo neʼnahaiya vekaʼnimoʼa meya hayafatiʼmo alagepa atumo neʼaiya anikana huno maiʼneno muki haniʼilagamo nuʼnilaʼmogani folagapiʼmo havaegaiye.

Salomoni Yokemae 4:8

Aʼnimogae, huʼna, kagaemo nagaeʼeʼmo Lemanoni aveletiʼmo ataleka ugetaʼao. Amana aveletiʼmo agege Sena aveletiʼmo agege Hemoni aveletiʼmo agege huka ago. Ani loleʼe magoʼe avefiʼmo Laiyoni anagaʼe Laiyonigana huʼa maiʼnaya afela pusi anagaʼeʼmo maiʼnae.

Aepa Gemae 37:25

Apakaemo neʼya nesayafeʼmo fai maiʼneʼapaekeʼmo ageʼnayana Isameli nofi vayaʼmo Giliyati kotegatiʼmo Isipi kotega visayafeʼmo kamoluleʼmo malasini alige alagepa atu neʼaiya uvelimo alige huliʼa eʼnageʼa apakeʼnae.