Salomoni Yokemae 1:3 - The Keyagana NT and 25 OT books

³ Asole alagepa atumo neʼaiya uveliletiʼmo kagufaleʼmo fale maleʼnanageno kagufalegatiʼmo alagepa atumo neʼaiye. Kagikamoʼmo alagepa atuʼmo neʼaiya aniʼmo aino lakiʼniya anikana huno haneʼneno alagepa atumo neʼaiyaʼmofeʼmo veʼeʼmo magokepi lokaeʼa ohavaeʼnaya aʼmafaʼne anagaʼmogimo kagaefeʼmo hapau apayamopafiʼmo nehapaiye.

Salomoni Yokemae 1:3 ပူးပေါင်းရင်းမြစ်များ

Samu 133:2

Mani agufa alagepa kavaʼmoʼa alagepa atumo neʼaiya uvelimo alopa monileʼyaʼmo aeno agaseʼniya uvelimo Gotiʼa aliʼyaʼamo alisayafeʼmo lekana paino apateʼniya vayaʼai apakufaleʼmo lakiʼa neʼapataya uveligana huno haneʼniye. Eloniʼa hogote vekamo mono huno neʼapateya vekamo agenopafiʼmo ani agufa uvelimo lakiʼa ateʼnageno emineno avenanapa ayokatetiʼmo yatala kukenaʼamo atupaleʼmo uno lamino kasaeʼniye.

Samu 45:14

Konali kukenamo vaitesigeʼapaeʼmo kini vekalegamo avaleliʼa ugae. Afaluʼamogimo veʼeʼmo magokepi lokaeʼa ohavaeʼnaya aʼmafaʼne anagaʼmogi akame huʼa visageʼa kagaetegamo apavaleliʼa ugae.

Hatu maeno apate'niya gemae 33:12

Moseseʼa Ala kava nefeʼmo, Kagaemo nagaefeʼmo muki vayaʼmo apavalelika uvo, huka naha paiʼnanaʼmonanafa nagaeʼeʼmo lokaeno visiya vekaeʼmo naha opaiʼnane. Naha opaiʼnanaʼmonanafa nagaefeʼmo, kagaemo ago kageʼna alagepa huʼnove, huka huʼnane. Naulagaleʼmo fikumo kaha maeʼna nekamuva kavaʼmo ago ageʼnane, huka naha paiʼnane.

Hatu maeno apate'niya gemae 33:19

Ala kava neʼmoʼa Mosesefeʼmo ha painoʼaeʼmo, Nagaemo nahau nayamopafiʼmo neʼnahaiya alagepa kavaʼnimo aliʼna atesugeno visigeka agegane. Nagaemo nagiʼnimo Ala kava neʼmo maiʼnove, huʼna kaha paisugeka afigane. Ina lagifeʼmo fikumo hapa maeʼna apamiguve, huʼna huʼnisufigeʼna fikumo hapa maeʼna apamiguve. Ina lagifeʼmo nahau nayamopafiʼmo nahauʼnisifi apakaefeʼmo afaʼa nahau nayamopafiʼmo nahaugiye.

Mai'naya kavane 27:9

Alagepa atumo neʼaiʼa yatalaʼmo galisiʼe uveliʼefeʼmo amuse nehuna kava huta lao vayaʼeʼmo alagepa huno laha maesiya geeʼmo amuse nehune.

Salomoni Yokemae 3:6

Ageyo, huʼna, Ina laʼmo yahaofilagamo aniʼmo ohaneʼniya kotegatiʼmo haine neʼe. Maketiletiʼmo miya nefaiya laʼnefamo atafiʼmo nekaya afinaʼmo alagepa atumo neʼaigeno halinaʼamoʼmo posigana huno haneʼneno halinamo ailinuno nehaiya kava huno haine neʼe.

Salomoni Yokemae 4:10

Nasaʼnimogamo aʼnimae, huʼna, Nagaefeʼmo kahau kayamopafiʼmo kahauʼniya kavaʼmoʼa kanale alagepa kavaʼmo haneʼniye. Ani kahauʼniya kavakamo hagaʼamoʼmo nofi alagafati aniʼmoʼa nehiya hagaʼamo alagi ago aeno agaseʼniye. Ani nefalana aniʼmoʼa alagepa atuʼamoʼmo muki alagepa atumo neʼaiya yaʼmo atuʼamo ago aeno agaseʼniye.

Salomoni Yokemae 5:13

Agalametaletiʼmo alagepa atumo neʼaiya yosamo aise yosamo hiʼyalamuteʼmo haneʼniya yosagana huno hanege kahaumo ausemo aulafilega haneʼniya kahaumo ausegana huno hanege huʼniye. Avayamo kanale kahaumo ausegana huno haneʼnigeno avayafatiʼmo alagepa atumo neʼaiya aniʼmo meya aniʼmo lape tape huno asagauno neʼaiye.

Salomoni Yokemae 5:5

Nagaemo kitamo yakiʼna atesuvafeʼmo he tiʼna kitamo alita neʼyakuna yaʼaleʼmo nayaʼmo neʼalugenoʼaeʼmo meya aniʼmo alagepa atu neʼaiya aniʼmo nayate haneʼniya aniʼmoʼa kita alita neʼyakuna yaʼaleʼmo aeno kamaeʼniye.

Salomoni Yokemae 6:8

Kini vekamo aʼne anagaʼmo asole aʼne anagaʼmo maiʼnae. Sigisitiʼa kuvini aʼne anagaʼmo maige henaga aʼne anagaʼamo eitiʼamo maige lekana opaisuna agufa alu aʼmafaʼne anagaʼmo aliʼniya aʼne anagaʼamo maige huʼnae.

Aiyeya 61:3

Saiyoni taonifiʼmo maiʼnaya vayaʼmogi yulagefa neʼaiya vayaʼmo apaipamo aliʼna falu huʼna apatege apakenopafatiʼmo laʼnefamo aliʼna ataleteʼna kanale konalimo aliʼna apatege aviʼyaʼmo nehaya kavaʼapimo aliʼna ataleteʼna apamogaga aisaya uvelimo apakufaleʼmo faleʼna apatege apaipamo kana huʼniya kavaʼapimo aliʼna ataleteʼna yokemo hisayafeʼmo aliʼna lokiya vaiʼna apatege hisuvafeʼmo alino nateʼnigeʼna eʼnove. Vayaʼmogimo ani vayaʼaifeʼmo huʼapaeʼmo, Apakaemo fatago kavatefeʼmo alagepa alagamo neʼaeya yosagana huʼa maiʼnae. Ala kava neʼmoʼa fai maleʼniye, huʼa huteʼa agiʼaleʼmo aliʼa asaga huʼa ategae.

Matiyu 25:1

Gotiʼa yagaino apatesiya afinaʼmo afole aisigenoʼaeʼmo hisiya kava huno naya loleʼa aʼmafaʼne anagaʼmogimo veʼeʼmo lokaeʼa ohavaeʼnaya aʼmafaʼne anagaʼaitegamo afole aiʼniye. Ani aʼmafaʼne anagaʼmogimo saufa aʼmo alisiyafeʼmo huʼniya vekaʼeʼmo uʼa fotu hisayafeʼmo uʼnae.

Yoni 12:3

Maiʼneʼapaeʼmo Maliyaʼa alopa moniletiʼmo miya nefaiya uvelimo alagepa atumo neʼaiya uvelimo lole kapufiʼmo haneʼniya agufa uvelimo alinineno Yesu aiyalateʼmo lakino faleno ateteno ayokatetiʼmo alino hau huno ateʼnigenoʼaeʼmo alagepa atuʼamoʼmo ani maiʼnaya nopiʼmo havai teʼniye.

2 Kolitiyani 11:2

Gotiʼa lapakaefeʼmo kaino nefaiya kava huʼna kaino nefauve. Nagaemo magoke vekamo Kalaisi aʼamo maisayafeʼmo, apavaleʼna kamiguve, huʼna Kalaisifeʼmo ha paiʼnove. Lapakaemo veʼeʼmo lokaeno ohavaeʼniya aʼmafaʼnemoʼa yaveyave kavaʼmo nehiya aʼmafaʼnegana hutapa maiʼnisageʼna lapavalelinuʼna haiʼna amisuvafeʼmo nehuve.

Filipai 4:18

Inagi muki namiʼnaya yaʼmo aliʼnogeno magoʼe yaʼnimo afaʼa haneʼniye. Epafalonaitasiʼa fikumo namiʼnaya yaʼmo alinineno namiʼnigeʼna alagi haiʼmo aliʼnove. Alagepa atumo neʼaiya ofalinimo haneʼnigeno Gotiʼa hauʼnigeno amuse huno nelapate.

Leveleseni 14:4

Apakaemo aʼneʼeʼmo magokepi lokaeʼa ohavaeʼnaya vayaʼmo yaveyave apaipa vayaʼageʼmo maiʼnae. Apakaemo aikeli sipisipimo haiyategamo uʼnifi akame huʼa neʼvae. Agaemo ma mopafi vayapatiʼmo miya faino hatu maeno apateʼniye. Yu vayaʼmogimo hoyafatiʼmo hogoteno leʼniya neʼyaʼmo aliʼa Gotiʼa amiʼnageno Gotiʼa neʼyaʼmo haneʼniya kava huʼa apakaemo Gotiʼe aikeli sipisipi vekaʼeʼmo vayaʼanimo maiʼnae.