Omataiya 1:21 - The Keyagana NT and 25 OT books

²¹ Mago vayaʼmogi vayaʼnimo apakufamo aliʼa katiʼa neʼapataya vayaʼmogimo Saiyoni aveleʼmo eʼa Iso vayaʼeʼmo kame huteʼapaeʼmo koʼapimo aliteʼa apakaeteʼmo yagaiʼa apategae. Ani afinaʼmo Ala kava neʼmoʼa agaiʼamo kini vekamo maiʼniyanageno muki vayaʼaiteʼmo yagaino apategaiye.

Omataiya 1:21 ပူးပေါင်းရင်းမြစ်များ

Aepa Gemae 25:23

Ala kava neʼmoʼa Lipekafeʼmo ha painoʼaeʼmo, Kaipafiʼmo lole nofi vekalaʼmo maiʼnaʼae. Kagaepatiʼmo lole nofi vekalaʼmo aliʼana fako huʼana mago nofi vekamo vayaʼmogi alu nofi vekamo vayaʼmo aeʼa apaka seʼa maigae. Yege mafaʼnemoʼmo aganaʼamo aiyafiʼmo maiʼneno aliʼyaʼamo aligiye, huno ha paiʼniye.

Samu 22:28

Ala kava neʼmo kini vekamo maiʼnenoʼaeʼmo muki alu nofi vaya alu nofi vayaʼaiteʼmo yagaino neʼapate.

Samu 22:29

Ma mopafiʼmo alagepa huʼa neʼmaiya vayaʼmogimo neʼyaʼmo neteʼa agaefeʼmo mono hugae. Muki vayaʼmogimo apakaiʼapimo afaʼa hapa oʼmaeʼa faligefeʼmo huʼnisaya vayaʼmogi apaleʼyamo faiteʼa ape huʼa maigae.

Samu 47:7

Gotiʼa kini vekamo maiʼneno muki ma mopafi vayaʼaiteʼmo neʼyagaiyaʼmofeʼmo ala agiʼamo amitetapa Samu yokemo hiyo.

Samu 67:4

Kagaemo fatago kavaʼmo huka alika fako huka apateteka muki alu nofi vaya alu nofi vayaʼaiteʼmo yagaika neʼapatanaʼmofeʼmo apamogaga aiteʼa yokemo hiyo.

Neniyo 12:3

Kokuʼnaʼmoʼa aeno ha neleya kava huʼa afiteʼa ageʼnaya vayaʼmogimo aeʼa ha legae. Kanefiʼmoʼa aeno ha neleya kava huʼa fatago kavaʼmo hisayafeʼmo vayaʼai apaipamo aliʼa afe leʼa neʼapataya vayaʼmogimo muki afinaʼaeʼmo aeʼa ha lege lege huʼa maigae.

Neniyo 2:35

Muki aenigi kalipa mopagi haesa aenigi siluva yafanagi goli yafanagi huno muki yaʼamo aino atagino aise aise huno ataleʼnigeno haletiʼya yakana huno afole aiʼniye. Yasimoʼmo ago alino halelino uno alagi lageso huʼnigeno ohaneʼniye. Ani auneʼaleʼmo amagiʼniya yafaʼmoʼa alopa avemo alino hamaleteno ma mopafiʼmo muki haopalega uneno huno haneʼniye.

Neniyo 2:44

Inagi ani teniʼa kini vayaʼmo maisaya afinaʼmo Gotiʼa mago kini vekamo alino afole aino atesigeno muki afinaʼmo yagaino apatege apatege huno maigiye. Mago alu kini vayaʼmo afole aiteʼa Gotiʼa alino afole aino atesiya kini vekamo afaʼa aliʼa afepi oʼategayaʼmonanafa agaekeʼmo alino afepi apateteno muki kini vayaʼmo alino hosu huno apataleteno agaemo muki afinaʼmo alagepa huno yagaino apatege apatege huno maigiye.

Neniyo 7:14

Ani akeyaʼvilagamo neʼmaiya vekamoʼmo ani vekamo alino kini vekamo ateteno ha le konali yaʼe yagaino apatesiya himamuʼeʼmo amiʼniye. Muki vayanagi muki nofi vayaʼenagi muki alu apakemo alu apakemo neʼaiya vayanagi huʼa aiyafi maisageno yagaino apatesiyafeʼmo alino ateʼniye. Agaemo muki afinaʼmo yagaino apateno alagi yagaino apateno hano osugiye. Yagaino apatesiya kavaʼmo afaʼa aliʼa oʼatalegae.

Neniyo 7:27

Inagi aeno apaka seno alagi anaga Gotiʼa muki kini vayaʼmogi yagaiʼa neʼapataya kavanagi lokiyaʼapigi ala apakiʼapigi huno vayaʼamo apamigiye. Agaemo muki afinaʼmo yagaino apatesigeʼa muki kotega vayaʼmogi aiyafiʼmo maiteʼa geʼamo akame hugae, huno naha paiʼniye.

Maika 4:7

Nagaemo logufa vayaʼmo apaiyamo hosuʼniya vayaʼmo aliʼna ha maleʼna apategauve. Apaini huʼa neʼapataya vayaʼmo lokiya nofi vayaʼmo magoke gamani vayaʼmo aliʼna ha maleʼna apategauve. Nagaemo ani kava huʼna Ala kava neʼmoʼnamo Saiyoni aveleʼmo maiʼnaya vayaʼaiteʼmo ani afinaʼmo aepa faiʼna yagaiʼna apateme apateme uʼna muki afinaʼaeʼmo yagaiʼna apategauve.

Matiyu 6:10

Vayaʼaiteʼmo yagaika apatesana kavakamo afole aino. Muki kokuʼnapi vayaʼmogimo kahauʼniya kavakamo akame nehaya kava huʼa ma mopafi vayaʼmogimo kahauʼniya kavakamo akame hiyo.

Matiyu 6:13

Lamalageka hisiya kavategamo lavalelikuka olateka hosu kavategatiʼmo alika atagineka lategeta eno. Kagaika himamukaletiʼe ha le konali yakaletiʼeʼmo yagaika neʼapatane. He, lama ge.

Luki 22:30

Yagaiʼna apatesuva koteʼmo hiʼyalamuʼnileʼmo siyateʼmo fai maiʼnetapa neʼyaʼmo nege aniʼmo nege huta maiʼnetapaeʼmo Isaleli vayaʼmo tuolofuʼa nofi vayaʼaiteʼmo yagaiʼa neʼapataya vayaʼai siyateʼmo fai maiʼnetapa yagaita apatesayafeʼmo lekana paiʼna lapateʼnove, huno hapa paiteno

1 Timoti 4:16

Kagaikaleʼmo alagepa huka yagaiʼneka alika apaya neʼmalana kavateʼmo yagaiyo. Yagaime yagaime neʼukaeʼmo kagaika kagufamo alika katika kateteka gekamo neʼafiya vayaʼai apakufamo alika katika apategane.

Yemisi 5:20

Hosu kavaʼmo nehiya vekamoʼmo hosu kavaʼmo osuno alagi atalesiyafeʼmo alino aino atagi neno avalelino eʼniya vekamoʼmo hunoʼaeʼmo, falisiya kavategatiʼmo agupi mafaʼnemo alino katino atesigeno Gotiʼa asole hosu kavaʼamo aeno ati kaeno ategaiye, huno agesamo afigiye.

Leveleseni 11:15

Napa seveni enisole vekamoʼmo pikuli huʼnigeʼapaeʼmo kokuʼnapatiʼmo alopa gefatiʼmo ge huʼapaeʼmo, Hemenimo ma mopafi vayaʼaiteʼmo yagaiʼa neʼapataya vayaʼai apaimuʼyaleʼmo Ala kava netiʼe lekana paino ateʼniya vekamo Kalaisi vekaʼeʼmo maigaʼae. Agaemo yagaino apateno hano osuno yagaino apateme apateme ugiye, huʼa huʼnageʼapaeʼmo

Leveleseni 19:6

Hutegeʼnaeʼmo afiʼnovana asole vayaʼmogimo apake aiʼnaya apakemoʼmo alopa ani haʼyamoʼmo hakalu hakalu huno age aigekana huʼa apakemo aiʼnageʼna afiʼnove. Apakaemo, Haleluya, huʼa, Ala kava netimo Gotiʼa muki lokiyaʼaʼe vekamoʼmo yagaino neʼapate.

Leveleseni 20:4

Ani kavaʼmo ageteʼnaeʼmo magoʼe kavaʼmo ageʼnovana agoti huʼa apatesaya himamuʼapimo aliʼnaya vayaʼmo siyateʼmo maiʼnageʼna apakeʼnove. Ageʼnovana naipeletiʼmo lugoʼapimo heʼa hatagauʼnageʼa faliʼnaya vayaʼai apauneʼapameʼamo apakeʼnove. Ani vayaʼmogimo Goti geʼamo Yesufeʼmo ava gemo hapa paiʼnayaʼmofeʼmo lugoʼapimo heʼa hatagauʼnae. Apakaemo afela afulefeʼmo mono osuge auneʼaeʼmo mono osuge huteʼa hapanileʼe apayateʼeʼmo afela afumo alagena yaʼamo oʼaliʼnae. Apakaemo afaʼa maisaya yaʼmo aliteʼa Kalaisiʼeʼmo vani tauseniʼa kafugamo magokepi maiʼneʼa yagaiʼa apateʼnayaʼmonanafa