Matiyu 5:10 - The Keyagana NT and 25 OT books

¹⁰ Fatago kavaʼapilefeʼmo apaini huʼa apateʼnageʼa maiʼnaya vayaʼmogimo Gotiʼa yagaino neʼapateya kegiʼyafiʼmo uʼa haiʼa maiʼnageno muki yaʼamo apakaiʼapi yaʼmo haneʼniyaʼmofeʼmo Goti aulena vayaʼamo maiʼnae.

Matiyu 5:10 ပူးပေါင်းရင်းမြစ်များ

Samu 37:12

Hosu vayaʼmogimo fatago vayaʼaitegamo hosu kavaʼmo hisayafeʼmo ina kava hugune, ma kava hugune, huʼa huteʼa maiʼneʼapaeʼmo hosu apaugosamo kaliteʼa maku make huʼa neʼapatae.

Aiyeya 66:5

Aiyeyaʼa hunoʼaeʼmo, Ala kava neʼmo geʼamo afitetapaeʼmo atete nehaya vayane, huʼna, Ala kava neʼmo geʼamo afiyo. Lapakaemo nagiʼnilefeʼmo geʼnimo akame nehayaʼmofeʼmo lapakaefeʼmo apaini nehaya vayatapimogimo lahapafaiʼa lapataleteʼapaeʼmo, Lapakaemo afaʼa lataletapa vigenoʼao Ala kava neʼmoʼa ala agiʼamo alino, huʼa nehayaʼmonanafa lapakaemo agaemo lahapa maesiyafeʼmo agetetapaeʼmo lapamogaga aisageno apavagage hugiye.

Matiyu 10:23

Mago taonifatiʼmo apaini huʼa lapatesagetapaeʼmo ataletapa lapaune hetaletapa alu taonifiʼmo viyo. Lama ge lapa nepauve, huno, lapakaemo muki Isaleli vayaʼai taoniʼafi taoniʼafiʼmo uteta hutapa hano osuʼnisagenoʼaeʼmo Vemo mafaʼnemo eminegaiye.

Matiyu 19:14

Yesuʼa hunoʼaeʼmo, mafaʼnegana huʼa neʼmaiya vayaʼmogi Gotiʼa yagaino neʼapateya kegiʼyafiʼmo uʼa haiʼa maiʼnageno muki yaʼamo apakaiʼapi yaʼmo haneʼniyaʼmofeʼmo mafaʼne anagaʼmo apatafauta oʼapateta afaʼa apatalegeʼa nagaetegamo eyo, huno hapa paiteno

Matiyu 25:34

Apateʼnenoʼaeʼmo ala kini vekaʼapimoʼmo lamaga haopaleʼmo maiʼnisaya vayaʼaifeʼmo hunoʼaeʼmo, Afoʼnimoʼmo alino auleno lapateʼniya vayanagi eyo. Gotiʼa ma mopamo alo huʼniya afinaʼmo lapamisiyafeʼmo alo huno lapateʼniye. Mafaʼneʼapimogimo afoʼapimogi yaʼmo neʼaliya kava hutapa uta haita muki yaʼnimo aliyo.

Matiyu 5:3

Hapa painoʼaeʼmo, launelametefeʼmo kagemi yatimo ageta oʼmaleʼnona vayaʼmo maiʼnone, huʼa apakesamo neʼafisaya vayaʼmogimo Gotiʼa yagaino neʼapateya kegiʼyafiʼmo haiʼa maiʼnageno muki yaʼamo apakaiʼapi yaʼmo haneʼniyaʼmofeʼmo Goti aulena vayaʼamo maiʼnae.

Maki 10:14

Yesuʼa ani kavaʼmo agetenoʼaeʼmo hosu aipamo kaliʼnigeno geʼamo neʼafiya vayaʼaifeʼmo hunoʼaeʼmo, aise mafaʼne anagaʼmo apatafauta oʼapategeʼa nagaetegamo afaʼa esageʼna ani agufa mafaʼnegana vayaʼmo Gotiʼa yagaino neʼapateya koteʼmo haneʼniya yaʼmo apakaiʼapi yaʼmo haneʼniyaʼmofeʼmae.

Luki 21:12

Ani kavaʼmo afole oʼaiʼnisigeʼapaeʼmo hogoteʼa apaini huʼa lapatege kalavusi huʼa lapatege mono nokopiʼmo agoti huʼa lapateteʼa kalavusi huʼa lapatege hugae. Apakaemo nagiʼnilefeʼmo lapavaleli eʼa alaʼapimo yagaiʼa neʼapataya vayaʼaitegaʼe gamani vayaʼaitegaʼeʼmo aliʼa he tiʼa lapatesagetapaeʼmo nagae nava gemo huta faigoko geʼnimo hapa paigae.

Luki 22:29

Afoʼnimoʼmo ala vekaʼapimo yagaika apatesana vekae, huno lekana paino nateʼniya kavaʼmo huʼna yagaita apatesaya vayane, huʼna lekana paiʼna lapateʼnove.

Luki 6:20

Yesuʼa alino maku huno apakeyana geʼamo neʼafiya vayaʼmo maiʼnageno apaketenoʼaeʼmo, kagemi yatapimo ohaneʼnisaya vayaʼmogitapamo Gotiʼa yagaino neʼapateya kegiʼyafiʼmo uta haitapa maiʼnageno muki yaʼamo lapakaitapi yaʼmo haneʼniyaʼmofeʼmo Goti aulena vayaʼamo maiʼnae.

Luki 6:22

Vemo mafaʼnemo akame nehayaʼmofeʼmo vayaʼmogi lapakaefeʼmo apaini huge aliʼa lapafaiʼa lapatalege huʼa faipa huʼa lapateteʼapaeʼmo lapakitapileʼmo aliʼa afepi lapatege hugayaʼmofeʼmo Goti aulena vayaʼamo maiʼnae.

Yoni 15:20

Nagaemo, mago aliʼyaʼamo neʼaliya vekamoʼmo aliʼyaʼmo afoʼamoʼmo aeno noʼagase, huʼna lapa paiʼnova geeʼmo lapakesamo afiyo. Apakaemo apaini huʼa natesaya agufa kava huʼa lapakaeʼeʼmo apaini huʼa lapategae. Apakaemo geʼnimo afiʼnisayana getapimo afigae.

Apa 5:40

Kanisole vayaʼmogimo ani gemo afiteʼapaeʼmo akame huʼa apa vayaʼaifeʼmo keya aeʼnageʼa eʼnageʼapaeʼmo nofi kayotetiʼmo apamagiteʼapaeʼmo, Yesu agiʼalefeʼmo gemo osiyo, huʼa hapa paiteʼa aliʼa apataleʼnageʼa uʼnae.

Apa 8:1

Sitiveniʼa faliʼniya afinaʼmo Yulusalemu taonifiʼmo maiʼnaya siosi vayaʼmo lusi hanageke yaʼmo apamiʼnae. Apamiʼnageʼapaeʼmo muki siosi vayaʼmo atagu faeʼa apaune heʼa Yutiya kotegaʼe Sameliya kotegaʼeʼmo uʼeʼa huʼnageʼa apa vayaʼageʼmo Yulusalemu taonifiʼmo maiʼnae.

2 Kolitiyani 4:17

Aise hanageke yaʼmo aise afinaʼmo neʼaluna kavaʼmoʼa alino alo huno nelateyanageta anonaʼaleʼmo lusi kava huno aeno agaseʼniya ha le konali yatimo hanege hanege huno hanesiya ha le konali yatimo aligune.

Filipai 1:28

Kame vayatapieʼmo koliʼapimo osutapa lokiya vaita maiyo. Lapakaemo ani kavatetiʼmo, alagi afela hegae, hutapa alita apave lisageʼa agegae. Agegayaʼmonanafa lapakaemo agetapaeʼmo, lagufamo alino katino lategaiye, hutapa agesagenoʼaeʼmo Gotiʼa lapa maegaiyaʼmofeʼmae.

2 Timoti 2:12

Alagi oʼataleta kana yaʼmo alime alime neʼvisunana kini vayakana huta agaeʼeʼmo magokepi lokaeta maiʼneta yagaita apategaune. Lagaemo agaefeʼmo oʼageʼnona vekae, huta nehisunana lagaefeʼmo oʼapakeʼnova vayane, huno hugiye.

2 Timoti 3:11

Apaini huʼa nateʼnageka nagege kana yaʼmo aliʼnogeka nagege huʼnane. Nagaemo Atiyoki taonifinagi Lisitiya taonifinagi Aikoniyamu taonifinagi huʼa hanageke yaʼmo namiʼnageka nageʼnane. Ala kava neʼmoʼa muki hanageke kavapatiʼmo nagufamo alino katino nateʼniye.

Yemisi 1:12

Hanageke kavaʼmoʼa apamalageka nehisigeʼapaeʼmo oʼataleʼa atafauʼa alagi huʼa maiʼnisaya vayaʼmo aulena vayaʼmo maiʼnae. Na kava hinageʼapaene. Apamalageka nehisigeʼapaeʼmo oʼataleʼa atafauʼa alagi huʼa maiʼnisagenoʼaeʼmo Ala kava neʼmoʼa hunoʼaeʼmo, nagaefeʼmo hapauʼniyaʼmofeʼmo alagepa huʼa maige maige huʼa maisaya yaʼmo apamiguve, huno huʼniya yaʼmo aligae.

Yemisi 5:11

Lagaemo hutaeʼmo, oʼataleʼa atafauʼa alagi huʼa maiʼnaya vayaʼaifeʼmo Gotiʼa hunoʼaeʼmo, naulagaleʼmo alagepa huʼa maiʼnaya vayane, huno nehiye, huta nehune. Lapakaemo ago afiʼnayana akeyaʼvilaga vekamo Yopuʼa kana yaʼmo aliʼnenoʼaeʼmo oʼataleno atafauno alagi huno maime maime neʼegenoʼaeʼmo Ala kava neʼmoʼa ha maeʼniya kavafeʼmo ava gemo ago afiʼnae. He, Ala kava neʼmoʼa lusi kava huno hau huno apateteno hau ayamopafiʼmo nehaiya vekamo maiʼniye, hutapa ago afiʼnae.

1 Yoni 3:12

Kenikana huta oʼmaigetao. Keniʼa hosu vekamo mafaʼneʼamo maiʼneno aganaʼamoʼmo kamitimo amagiʼnigeno faliʼniye. Na kava higeno kamitimo amagiʼniye. Keniʼa hosu kavaʼmo huʼnigeno aganaʼamoʼmo fatago kavaʼmo huʼniyaʼmofeʼmo kamitimo amagiʼnigeno faliʼniye.

Leveleseni 2:10

Aise afinaʼmo utesigeta kana yaʼmo aligayaʼmofeʼmo koli osiyo. Afiyo, huʼna, Sataniʼa lapamalageka huteno kalavusi huno lapatesigetapa naya loleʼa afinaʼmo hanageke yaʼmo aligae. Lapakesamo afita fatago huʼnaya kavatapileʼmo atafauta alagi huta maime maime utapa faliyo. Nehisageʼnaeʼmo aeʼa neʼapakasaya vayaʼmogi neʼaliya agufa kakolitagana yaʼmo maige maige hutapa maisaya yaʼmo lapamiguve.