Matiyu 25:34 - The Keyagana NT and 25 OT books34 Apateʼnenoʼaeʼmo ala kini vekaʼapimoʼmo lamaga haopaleʼmo maiʼnisaya vayaʼaifeʼmo hunoʼaeʼmo, Afoʼnimoʼmo alino auleno lapateʼniya vayanagi eyo. Gotiʼa ma mopamo alo huʼniya afinaʼmo lapamisiyafeʼmo alo huno lapateʼniye. Mafaʼneʼapimogimo afoʼapimogi yaʼmo neʼaliya kava hutapa uta haita muki yaʼnimo aliyo. အခန်းကိုကြည့်ပါ။ |
Nagaemo huʼnaeʼmo, Nagaemo oʼaniʼya navayamo haneʼnigeʼna oʼaniʼya apavayamo haneʼniya vayaʼmogi folagapiʼmo maiʼnovaʼmofeʼmo lusi kava huʼna kage kage huteʼnaeʼmo, alagi afela heʼnove. Faliʼnova vekamo maiʼnove. Naulagafatiʼmo Ala kava neʼmo asole vayaʼaiteʼmo yagaino neʼapateya kini vekaʼapimo ago ageʼnovaʼmofeʼmo faliʼnova vekamo maiʼnove.
Yagaino apatesiya vayaʼmo magoʼe huʼa asole vayaʼmo afole aiteʼa magoʼe huʼa alagepa huʼa maigae. Kini vekamo Neviniʼa yagaino apateʼniya kava huno Nevini aimuʼyaleʼmo maiʼnenoʼaeʼmo vayaʼaleʼmo yagaino apateme apateme uno yagaino apateno hano osuno yagaino apategaiye. Agaemo alagepa huno alino fako huno apateteno yagaino apateme apateme uno muki afinaʼaeʼmo yagaino apategaiye. Ala kava neʼmoʼa asole vayaʼaiteʼmo yagaino neʼapateya vekamoʼmo ayamukiki huno ani kavaʼmo alino afole aino ategaiye.
Ani kava hugiyaʼmofeʼmo kagaemo afole aisiya kavaʼmo afiteka ago. Halate Yulusalemu taonimo utapa kiyo, huno hisiya afinaʼmo seveniʼa sotamo afole aiteno sigisiti tuʼa sotamo afole aitesigeno Mesaiya vekamo yagaino apatesiya vekamoʼmo aliʼyaʼamo aepa faino aligiye. Hogoteno seveniʼa sotamo afole neʼaisigeʼapaeʼmo alopa hanageke yaʼmo afole aisiya afinaʼmo Yulusalemu kaʼe yafa kegiʼyaʼeʼmo hugae.
Ala kava neʼmoʼa agoti huno lapateteno lapamagiʼniya kayoʼmo ago alino ataleʼniye. Agaemo muki kame vayatapimo alino hapafaino apataleʼniye. Isaleli vayaʼmogi kini vekamo Ala kava neʼmo lapakae folagapiʼmo maiʼniyanagetapa mago hanageke yafeʼmo koli osugae. He, henagaʼamo halate hanageke yafeʼmo alagi koli osutapa afaʼa maige maige hutapa maigae.
Ani ge huno hapa nepaigenoʼaeʼmo Gotitegati gemo alinineno aeno hakalo huno hapa nepaiya vekamoʼmo huʼniya gemo afole aiʼniye. Ani gemoʼa hunoʼaeʼmo, Aeʼna kalafefa gefatikeʼmo huʼna hapa paiguve. Ma mopamo alo huʼniya afinatetiʼmo alino fala kino maleʼniya gemo aeʼna hakalo huʼna hapa paiguve, huno avoʼmo kae maleʼniye.
Muki vayaʼmogimo nagaetefeʼmo noʼapimo ataleʼa eʼnisafi konagaʼapimogi apataleʼa eʼnisafi apasaʼapimogi apataleʼa eʼnisafi afoʼapimogi apataleʼa eʼnisafi itaʼapimogi apataleʼa eʼnisafi mafaʼneʼapimo apataleʼa eʼnisafi hoyaʼapimo ataleʼa eʼnisafi huʼnisaya vayaʼmogimo vani hataletiʼa agufa yaʼmo aliteʼa alagepa huʼa maige maige huʼa maigae.
Huno hapa paiteno hoga haopaleʼmo maiʼnisaya vayaʼaifeʼmo hunoʼaeʼmo, Afoʼnimoʼmo lifana huno lapateʼniya vayanagi nagaetegatiʼmo ataleta lapaune heta viyo. Gotiʼa Nevoʼe hosu apaune vayaʼaʼeʼmo maisayafeʼmo alo hu maleʼniya ata kopiʼmo leno yu oseno lege lege huno neʼmaiya ata kopiʼmo lamitapa maiyo.
Inagi mago vekamoʼmo henaga keʼaepa gefatiʼmo mago aise gemo amagino ataleteno vayaʼmogi amagiʼa atalesayafeʼmo alino apaya malesiyana Gotiʼa yagaino neʼapateya koteʼmo ina agufa vekamo maigiye. Maigiyaʼmonanafa mago vekamoʼmo keʼaepa gemo akame nehunoʼaeʼmo vayaʼmogi akame hisayafeʼmo alino apaya maleʼnisiyana Gotiʼa yagaino neʼapateya koteʼmo ala vekamo maigiye.
malipu yosaleʼmo nili aiyo, nili aiyo, huʼa huteʼa nili aiteka alika he tika ato, huʼa alopa gefatiʼmo huʼnae. Pailatiʼa hunoʼaeʼmo, yagaino nelapateya kini vekatapimo malipu yosaleʼmo nili aiteʼna aliʼna he tiʼna atesufiye, huno apafi geʼnigeʼapaeʼmo mono huʼa neʼapataya vayaʼaiteʼmo yagaiʼa neʼapataya vayaʼmogimo, Sisakeʼmo yagaino nelateya kini vekatimo maiʼniye, huʼa ha paiʼnae.
Hosu kavaʼmo nehaya vayaʼmogimo Gotiʼa yagaino neʼapateya koteʼmo uʼa haiʼa oʼmaigae, hutapa oʼafiʼnafiye. Lapakaitapieʼmo humi olapateyo. Kumai kavaʼmo nehaya vayaʼmofi aigofe gotiʼapimogi apakame nehaya vayaʼmofi alu vayaʼai aʼnemo apayate neʼaliya vayaʼmofi vemogi aʼnegana huʼa kumai kavaʼmo nehaya vayaʼmofi negafo negafo huteʼa magokepi lokaeʼa neʼmaiya kavaʼmoʼa kumai kavakana agufa kavaʼmo nehaya vayaʼmofi
Hosu apaipa kalige kamitimo apamagige lusi aniʼmo neteʼa negi nagi gemo huge lusi kava huʼa ogefage huʼa apavamusa valeʼa negi nagi huge magoʼe huʼa ani agufa hosu kavaʼmo huge nehae. Hogoteʼna lapa paiʼnovanageʼna hemenimo halate magoʼe gemo huʼnaeʼmo, ehetapiye, huʼna lapa nepauve. Afole oʼaiʼniya afinaʼmo hogoteʼna lapa paiʼnaeʼmo mani agufa hosu kavaʼmo nehaya vayaʼmogimo Gotiʼa yagaino neʼapateya kopiʼmo uʼa haiʼa mafaʼneʼapimogimo afoʼapimogi yaʼmo neʼaliya kava huʼa Gotitegatiʼmo hetamaʼapimo afaʼa oʼaligae.
Lapakaemo ago afiʼnayana kumai kavaʼmo nehaya vayaʼmofi oʼaniʼya kavaʼmo nehaya vayaʼmofi hosu hapaʼye nehiya vayaʼmofi huʼa Kalaisiʼe Gotiʼeʼmo yagaiʼana neʼapataʼa kotetiʼmo hetamaʼapimo oʼaligae. Mago vayaʼmogi aigofe gotiʼapimogifeʼmo mono nehaya agufa kavaʼmo huʼa hapaʼye nehiya vayaʼmogi ma mopafi yatefekeʼmo mono nehae.
Lagesamo afita fatago huʼnona vayaʼmogitamo uta haita Gotiʼeʼmo magokepi lokaeta maita haga legaune. Gotiʼa ma mopamo alo huno hano hu maleʼniyaʼmofeʼmo maiʼa haga lesaya kavaʼmo haneʼniye. Haneʼniyaʼmonanafa Gotiʼa hunoʼaeʼmo, Naipamo leʼnigeʼna nagoʼyamo ataleteʼna lokiya gefatiʼmo huʼnaeʼmo, nagaeʼeʼmo maiʼa haga leʼa maisayapiʼmo alagi u haiʼa oʼmaigae, huʼna huʼnove, huno huʼniye.
Huʼniyaʼmonanafa Kalaisiʼa ani kavaʼmo osuʼnifa muki afinaʼae afinaʼaeʼmo ofalinimo amisiyafeʼmo kolaʼamo aliteno uno ohaiʼniye. Muki afinaʼae afinaʼaeʼmo agaiʼamo ofalini amisiyafeʼmo ma mopamo alo huʼniya afinatetiʼmo falite falite hume hume neʼeyesine. Huʼniyesinaʼmonanafa hemeni atupa afinaʼmo agaiʼa agufamo ofalini huteno hosu kavaʼapimo alagi alino atalesiyafeʼmo magoke afinaʼmo emineno vayaʼai apaulagaleʼmo afole aiʼniye.
Neʼnahaiya konagaʼnimogitapamo afiyo, huʼna, Gotiʼa kagemi yaʼapimo ohaneʼniya vayaʼmo apakesamo afiʼa fatago nehaya kavaʼmoʼa kagemi yaʼapikana huno hanesigeʼa neʼyagaiya koʼmo alisayafeʼmo lekana paino apateʼniye. Gotiʼa agaefeʼmo hapau apayamopafiʼmo hapauʼnisiya vayaʼaifeʼmo hunoʼaeʼmo, mafaʼne anagaʼmogi afoʼapimo yaʼmo neʼaliya kava hutapa ani neʼyagauva koʼmo aligae, huno hapa paiʼniyaʼmofeʼmae.
Ageʼnana afela afumo hogoteno maiʼniyana hemenimo oʼmaiʼniyanageno henagaʼamo ive kelifatiʼmo afole aisigeno alagi alino agoʼya lagauno atalegaiye. Ma mopafi vayaʼmo Gotiʼa ma mopamo alo osuʼniya afinaʼmo afaʼa maisaya yaʼmo aliʼnisaya vayaʼai apakiʼapimo haneʼniya mukufiʼmo avoʼmo okaeʼnisiya vayaʼmogimo afela afumo ageteʼapaeʼmo hapau aigae. Hogoteno maiʼniyana hemenimo oʼmaiʼniyanageno halate henagaʼamo afole aigiyaʼmofeʼmo hapau aigae.