Matiyu 2:11 - The Keyagana NT and 25 OT books

¹¹ Apakaemo nopiʼmo uʼa haiʼa anakayana mafaʼneʼaʼe itaʼamoʼmo Maliyaʼeʼmo maiʼnaʼageʼa anaketeʼapaeʼmo apaleʼyamo faiʼneʼa ape huʼa Yesufeʼmo mono huʼnae. Kesiʼapifatiʼmo yakiʼa goli yafanagi lusi moniletiʼmo miya nefaiya yaʼmo atafiʼmo kaeʼnageno alagepa atumo neʼaiya yanagi alagepa atumo neʼaiya uvelimogi huʼa amiʼnae.

Matiyu 2:11 ပူးပေါင်းရင်းမြစ်များ

Aepa Gemae 43:11

Afoʼapimoʼmo Isaleliʼa hapa painoʼaeʼmo, Mago alu kaʼmo ohaneʼnisiyaʼmoʼmo ani kavaʼmo hiyo. Lapakaemo mani kotetiʼmo hogote neʼyaʼmo fikumo amisayafeʼmo kutapifiʼmo aita alinitapa visaya neʼyaʼmo yosa anufati malasinigi lume anugi alagepa atumo neʼaiya uveligi alu alagepa yosa alaga alu alagepa yosa alagagi hutapa alinitutapa amiyo.

Samu 2:12

Mafaʼneʼamo haetapa neyo. Fiku yanageno aipamo aiseʼamo leno lapateteno lapamagisigetapa kateʼmo asagautapa aigayanagi. Agaefeʼmo aliʼa amufa amiʼnaya vayaʼmo aulena vayaʼmo maiʼnae.

Samu 45:8

Alagepa atumo neʼaiya yaʼmo agiʼamo meyagi alosigi kasiyagi huno kukenakaleʼmo haneʼnigeno alagepa atumo neʼaiye. Alagepa noʼmo kini vekamo nopiʼmo konali aliʼa ateʼnaya nopiʼmo yokemo huʼnagekaeʼmo kamogaga aiteka emikeʼnane.

Samu 72:10

Sipeni koteʼmo yagaiʼnaya vayaʼmogiʼe muki solovala ani haigifiʼmo yagaiʼnaya vayaʼmogiʼeʼmo muki yaʼmo fiku alini eʼa amigae. Alepiya koteʼmo yagaiʼnaya vayaʼmogiʼe Itiyopiya koteʼmo yagaiʼnaya vayaʼmogiʼeʼmo ofalinimo fiku amigae.

Samu 72:15

Agaemo ofalino afaʼa maigiye. Alepiya kotegatiʼmo monimo aliniʼeʼa amigae. Muki afinaʼmo nunumuʼmo huʼa ategae. Muki afinaʼae afinaʼaeʼmo ala agiʼamo amigae.

Samu 95:6

Eta ape higetao Ala kava neʼmoʼa alo huno lateʼniya vekaeʼmo laleʼyaʼmo faiʼneta mono hugune.

Salomoni Yokemae 3:6

Ageyo, huʼna, Ina laʼmo yahaofilagamo aniʼmo ohaneʼniya kotegatiʼmo haine neʼe. Maketiletiʼmo miya nefaiya laʼnefamo atafiʼmo nekaya afinaʼmo alagepa atumo neʼaigeno halinaʼamoʼmo posigana huno haneʼneno halinamo ailinuno nehaiya kava huno haine neʼe.

Aiyeya 60:6

Asole kamo afu anagaʼmo Mitiyani kotegatinagi Ifa kotegatinagi Sima kotegatinagi huʼa kagemi yaʼmo aliniʼa kagaetegamo egae. Sima kotegatiʼmo esaya kamo afu anagaʼmogimo goli yafaʼe atafiʼmo kaeʼnageno alagepa atumo neʼaiya yaʼeʼmo aliniʼa kagaetegamo egae. Esaya vayaʼmogimo Ala kava neʼmo ala agiʼaleʼmo aliʼa asaga huʼa ategae.

Malakai 1:11

Yu nofi vayapatiʼmo oʼmaiʼnaya vayaʼmo yegemo haine neʼeya kotega maiʼnaya vayanagi yegemo uno lamino nefaleya kotega maiʼnaya vayanagi muki haopalegamo maiʼnaya vayanagi huʼa ala nagiʼnimo namigae. Nagiʼnilefeʼmo muki haopalegatiʼmo alagepa atu neʼaiya laʼnefamo kaeteʼa kanale ofalinimo afaʼa namigae. Ala kava neʼmo muki vayaʼaiteʼmo yagaiʼna neʼapatova vekamoʼnamo huʼnaeʼmo, Muki ma mopafi nofi vayaʼmogimo ala nagiʼnimo namiteʼa nagiʼnileʼmo afaʼa aliʼa asaga huʼa nategae, huʼna nehuve.

Matiyu 1:18

Yesu Kalaisiʼa itaʼamoʼmo alino ateʼniya kavaʼmo ina kavaʼmo huno afole aiʼniye. Yosefeʼa Maliyaʼmo lekana pai maleʼniyaʼmonanafa agaeʼeʼmo magokepi lokaeʼana ohavaeʼnaʼagenoʼaeʼmo aote Aunemeʼamoʼmo aipaguʼmo amiʼnigeno ageʼniye.

Matiyu 12:46

Yesuʼa vayaʼaifeʼmo gemo hapa nepaigeʼapaeʼmo itaʼamoʼe aganaʼamogiʼeʼmo eʼa avaʼyi huteʼa gemo ha paisayafeʼmo kumatega agava maiʼnae.

Matiyu 2:10

Haneʼnigeʼa ageteʼapaeʼmo lusi kava huʼa apamogaga aime aime uʼnae.

Matiyu 2:2

Yu vayaʼaiteʼmo yagaino apatesiya kini vekamo saufamo alino ateʼniya mafaʼnemo haiyaʼaleʼmo maiʼniye. Lagaemo agae kanefiʼmo yegemo haine neʼeya kotegatiʼmo ageteta agaefeʼmo mono hisunafeʼmo agaetegamo neʼone, huʼa huʼnae.

Luki 2:16

malage huʼa uʼa apakayana Maliyaʼagi Yosefeʼagi pulumakamogi neʼyaʼmo neʼmalaya yuvapafiʼmo havaeno maiʼniya mafaʼnegi huʼa maiʼnageʼapaeʼmo apakeʼnae.

Luki 2:38

Ani afinaʼmo Yesutegaʼe itaʼafoʼalaʼmoganitegaʼeʼmo eno Gotifeʼmo hao ke hetenoʼaeʼmo mafaʼneʼaeʼmo ava gemo hunoʼaeʼmo, Yulusalemu vayaʼai apakufamo alino katino apateteno hatu maeno apatesiyafeʼmo agava maiʼnaya vayaʼaifeʼmo hapa paiʼniye.

Yoni 19:39

Nikonimasiʼa hogoteno mago haniʼilagamo Yesutegamo eʼniya vekamoʼmo lole yosalapati aniʼmoʼa alagepa atumo neʼaiya malasini aniʼmoʼa agufaʼamo okasalino afaʼa hanesiya anitalamogani anakiʼanimo meyaʼe atosiʼeʼmo lusi kava huno kana huʼniya kuʼmo alinino eʼniye. Kana huʼniya yaʼamoʼmo 34 kilo agufa kana huʼniya yaʼmo haneʼniye.

Leveleseni 19:10

Naha paiʼnigeʼna agaefeʼmo mono hisuvafeʼmo aiyafiʼmo asagauʼna aiʼnogenoʼaeʼmo, Nagaefeʼmo mono osuvo. Kagaeʼe konagakamogiʼeʼmo Yesufeʼmo ava geleʼmo atafauʼa alagi huʼnaya konagakamogiʼeʼmo magoke agufa aliʼyaʼmo neʼalune. Gotifekeʼmo mono huvo. Goti Aunemeʼamoʼmo Gotitegati gemo alini eʼa aeʼa hakalo huʼa hapa nepaiya vayaʼmo ani gemo apamiʼnigeʼa Yesufeʼmo ava gemo nehae, huno naha paiʼniye.

Leveleseni 5:8

Aliʼnigeʼapaeʼmo loleʼe loleʼe vayaʼe tuveti foʼa vayatama vayaʼmogiʼeʼmo aikeli sipisipimo aiyafiʼmo asagauʼa aiʼnae. Mukiʼamogimo apamete apamete huʼa alopa gitagana yaʼmo alige alopa goli yuvapa alige huteʼa maiʼnae. Ani yuvapafiʼmo atafiʼmo kaeʼnageno alagepa atumo neʼaiya agufa yaʼmo haneʼniya kava huno apaote vayaʼmogimo nunumuʼmo nehaya gemo haneʼniye.

1 Samiyo 10:27

Uʼnayaʼmonanafa mago faipa vayaʼmogimo huʼapaeʼmo, Haiya agufa kavaʼmo huno lagufamo alino katino lategaiye, huʼa huʼnae. Huteʼa apakaemo huʼapaeʼmo, Ina agufa vekae, huʼa apakesamo afiteʼa mago yaʼmo fikumo oʼamiʼnae. Oʼamiʼnayaʼmonanafa Soloʼmo mago gemo osuʼniye.