Lomu 4:17 - The Keyagana NT and 25 OT books

¹⁷ Ani kavatefeʼmo Goti mukufiʼmo avoʼmo kae maleʼniya gemoʼa hunoʼaeʼmo, Muki nofi vayaʼai apakinago afoʼapimoʼmo aliʼna afole aiʼna kateʼnove, huno hu maleʼniye. Ani gemo huno hu maleʼniya afinaʼmo Goti aulagaleʼmo Emalehamuʼa mukiʼamogita afotimoʼmo afole aiʼniye. Agaemo Gotifeʼmo agesamo afino fatago huʼnenoʼaeʼmo faliʼnaya vayaʼmo alino he tino apatege ohaneʼniya yafeʼmo, haneʼniye, huno huge nehiya Gotifeʼmo agesamo afino fatago huʼniye.

Lomu 4:17 ပူးပေါင်းရင်းမြစ်များ

Aepa Gemae 17:16

Nagaemo aliʼna auleʼna atesugeno ve mafaʼnekamo alino atesigeʼna magoʼe huʼna aliʼna auleʼna atesugeno asole nofi vayaʼe kini vayaʼmogi itaʼapimoʼeʼmo maigiye, huno ha paiʼnigeno.

Aepa Gemae 17:20

Hu malegauvaʼmonanafa Isamelitefeʼmo huʼnana gekamo ago afiʼnove. Nagaemo aliʼna auleʼna ateʼnovanageno asole mafaʼnemo alagi magoʼe huno alino apategaiye. Agaemo tuolofuʼa nofi vayaʼai afoʼapimogimo alino apategaiyanageʼna ago alagi alopa nofi vayaʼmo aliʼna hamaleʼna ategauve.

Aepa Gemae 28:3

Gotiʼa muki lokiyaʼamo haneʼniya vekamoʼmo alino auleno katesigeka asole mafaʼnemo alika apatesanageʼa asole vayaʼmo aliʼa alu aiʼa maigae.

Aiyeya 43:6

Nagaemo lamaga haopalega vayaʼaifeʼmo huʼnaeʼmo, Apatalegeʼa eyo, huʼna huge hoga haopalega vayaʼaifeʼmo huʼnaeʼmo, kaʼmo akanita oʼapateyo, huʼna huge huguve. Lapakaemo afagitegatiʼmo ve mafaʼne anagaʼnimo apavalelita eyo. Muki ma mopamo agiʼnalegatiʼmo a mafaʼne anagaʼnimo apavalelitapa eyo, huʼna hapa paiguve.

Aiyeya 49:12

Inagi lama gemo huʼnaeʼmo, Vayaʼnimo afagi kotegatiʼmo ege lamaga haopalegatiʼmo ege yegemo uno lamino nefaleya haopalegati ege Saina kotegatiʼmo ege hugae.

Aiyeya 51:2

Lapakaemo afotapimo Emalehamuʼe alino lapateʼniya a kanomo Selaʼefeʼmo lapakesamo afiyo. Nagaemo Emalehamuʼamo lekana paiʼna ateteʼna agaefekeʼmo keya aeʼna ge huteʼna huʼna auleʼna ateteʼnaeʼmo asole kaginago vayaʼmo maigae, huʼna ha paiʼnogeʼa afole aiʼnae.

Aiyeya 55:12

Lapakaemo kalavusi huʼa lapateʼnaya koʼmo ataletutapa lapamogaga aisageʼna nagaemo lapavaleliʼna visugeno mago hosu yaʼmo lapakaeteʼmo afole oʼaisigeno lapaipamoʼmo falu huʼnisigetapa ugae. Aise avemogiʼe alopa avemogiʼeʼmo lapaulagaleʼmo yokemo hisageʼapaeʼmo muki yosamogimo apayaʼmo amagiʼa apamogaga aigae.

Matiyu 3:9

Lapakaemo hutapaeʼmo, Emalehamuʼa lagaiti laginago vekatimo maiʼniye, hutapa lapakesamo oʼafiyo. Gotiʼa mani yafapatiʼmo Emalehamu aginagoʼamo afaʼa alino hamaleno apategaiye.

Yoni 5:21

Muki yaʼmo Afoʼamoʼmo faliʼnaya vayaʼmo alino he tino apateteno afaʼa maisaya yaʼmo neʼapamiya kava huno Mafaʼneʼamoʼa afaʼa maisaya yaʼmo apamisiyafeʼmo hauʼnisiya vayaʼaina afaʼa neʼapamiye.

Yoni 5:25

Lama gemo lapa nepauve, huno, Mago afinaʼmo afole aigiyana ago afole aiʼniye. Nefaliya kavategamo maiʼnaya vayaʼmogi Goti mafaʼneʼamo geʼamo afaʼa afigae. Afiʼnisaya vayaʼmogi afaʼa maisaya yaʼmo aliteʼa maigae.

Yoni 6:63

Nauneʼnameʼmoʼa afaʼa maisaya yaʼmo neʼapamiye. Nagufafati nameʼamoʼmo lapa oʼmaegaiye. Lapa nepauva gefiʼmo aunemeʼamo haneʼniyanageno afaʼa maisaya yaʼmo neʼapamiya gemo haneʼniye.

Apa 15:18

Gotiʼa akeyaʼvilaga aliguve, huno hu maleʼniya aliʼyaʼamo ago ageʼniyaʼmofeʼmae, huno huteno,

Lomu 3:29

Yu vayaʼmogitageʼmo Gotitimoʼmo maiʼniye, huta hisupi Yu nofi vayapatiʼmo oʼmaiʼnaya vayaʼmogiʼeʼmo, Gotitimoʼmo maiʼniye, huʼa hugae. He, Yu nofi vayapatiʼmo oʼmaiʼnaya vayaʼmogiʼeʼmo Gotitimoʼmo maiʼniye, huʼa hugae.

Lomu 4:18

Emalehamuʼa afole aisiya kaʼmo oʼageʼniyaʼmonanafa agesamo afino fatago huteno avayagunagu huno agava maiʼniyaʼmofeʼmo Gotiʼa, muki asole kaginago vayaʼmo maigae, huno ha paiʼniya gemo afole aiʼnigeno muki nofi vayaʼai afoʼapimoʼmo ha maleʼniye.

Lomu 4:2

Haʼao. Gotiʼa Emalehamuʼmo alagepa kavaʼmo huʼniya kavatetiʼmo, naulagaleʼmo fatago vekamo maiʼnane, huno huʼniyesinana Emalehamuʼa agaiʼa agiʼaleʼmo afaʼa alino asaga huno ateʼniyesine. Ateʼniyesinaʼmonanafa Emalehamuʼa Goti aulagaleʼmo agiʼaleʼmo afaʼa alino asaga osugiye.

Lomu 8:11

Goti Aunemeʼamoʼmo Yesuʼmo faliʼniyatetiʼmo ago alino he tino ateʼniya vekamo lapaipafiʼmo maiʼnisiyana Kalaisiʼa alino he tino ateʼniya vekamoʼmo ani kava huno lapaipafiʼmo maiʼniya Aunemeʼaletiʼmo falisiya lapakufamo alino he tino lapategaiye.

Lomu 9:11

Alino oʼanateʼnigeʼanaeʼmo mago alagepa kavaʼe hosu kavaʼeʼmo osuʼnaʼa afinaʼmo Gotiʼa, yege mafaʼnemoʼa aganaʼamo aiyafiʼmo maiʼneno aliʼyaʼamo alisiya vekamo maigiye, huno ha paiʼniye. Gotiʼa hogoteno agesa afiteno hauʼnigeno lekana paino ateʼniya kavaʼamo alino afole aino atesiyafeʼmo ani gemo hu maleʼniye. Mago vekamo alagepa kavaʼaletiʼmo lekana paino oʼateʼnifa keya aeno ge nehiya vekamoʼmo agaiʼageʼmo hauʼnigeno lekana paino ateʼniye.

Lomu 9:26

Vayaʼnimo oʼmaiʼnae, huʼna hapa paiʼnova vayaʼai koteʼmo maiʼnaya vayaʼmogi alagi afaʼa neʼmaiya Goti mafaʼneʼamo maiʼnae, huʼa hugae huno huʼniye.

1 Kolitiyani 1:28

Apaki ohaneʼniya vayaʼmo lekana paino apatege ma mopafi vayaʼmogimo, apakaemo ina agufa vayaʼmo maiʼnae, huʼa nehaya vayaʼmo lekana paino apatege huʼniye. Ala apaki vayaʼmo alino afepi apatesiyafeʼmo oʼmaiʼnegekana huʼa neʼmaiya vayaʼmo lekana paino apateʼniye.

1 Kolitiyani 15:45

Ani kavafeʼmo Goti mukufi gemoʼmo hunoʼaeʼmo, Gotiʼa hogote vekamo Atamuʼmo aunemeʼe vekamo alo huno ateʼniye, huno huʼniye. Henaga Atamuʼmo afaʼa neʼmaiya yaʼmo neʼapamiya vekamo maiʼniye.

1 Timoti 6:13

Nagaemo afaʼa neʼmaiya yaʼmo neʼapamiya Goti aulagaleʼe Kalaisi Yesuʼa Ponitiyasi Pailati aulagaleʼmo alagepa gemo huteno faliʼniya vekamo aulagaleʼeʼmo maiʼneʼnaeʼmo kaha nepauve.

Himulu 11:12

Huʼniyaʼmofeʼmo magoke vekamo alagi ago hogoʼamo falisiyafeʼmo huʼniya vekafatiʼmo asole aginago vayaʼmo kokuʼnate asole kanefiʼmo haneʼniyanageta lekana opaige ani kahaepamo lekana opaige hisuna agufa aginago vayaʼmo afole aiʼnae.

Himulu 11:3

Lagaemo lagesamo afita fatago nehuna kavatetiʼmo hutaeʼmo, Gotiʼa geʼaletiʼmo ma mopagi kokuʼnanagi muki neʼagona yanagi huno oʼageʼnona yatetiʼmo alo hu maleʼniye, huta afita aeto nehune.

Himulu 11:7

Gotiʼa muki vayaʼmogimo oʼageʼnaya kavafeʼmo Noafeʼmo hunoʼaeʼmo, ehekae, huno, hosu vayaʼmo alagi aliʼna hano huʼna apatalegauve, huno ha paiʼnigeno Noaʼa lusi kava huno amoʼyamo aliʼnigeno agesamo afino fatago huʼniyaʼmofeʼmo afamo anagaʼamogi apakufamo alino katino apatesiyafeʼmo mago alopa sipimo alo huʼniye. Ani kavaʼmo huʼniya kavatetiʼmo ma mopafi vayaʼaifeʼmo, lapakaemo hosu kavaʼmo nehayanagetapa faligae, huno alino apave liʼniye. Agaemo Gotitegatiʼmo fatago kavaʼmo apakesamo afiʼa fatago nehageno neʼapamiya agufa fatago kavaʼmo aliʼniye.

1 Pita 2:10

Hogotetapa afa vayaʼmo maiʼnayaʼmonanafa hemenimo Goti vayaʼamo maiʼnae. Hogoteno Gotiʼa hau huno olapateʼniyaʼmonanafa hemenimo hau huno lapateʼniye.

2 Pita 3:8

Nahauʼniya vayaʼnimogitapae, huʼna, Goti aulagaleʼmo magoke afinaʼmo vani tauseniʼa kafugagana huno haneʼneno vani tauseniʼa kafugamoʼmo magoke afinakana huno haneʼniye. Ani kavatefeʼmo lapake okanino.