Lomu 16:26 - The Keyagana NT and 25 OT books

²⁶ hemenimo Gotitegati gemo alini eʼa aeʼa hakalo huʼa hapa nepaiya vayaʼmogimo avoʼmo kae maleʼnaya gemo alagepa faigoko geʼamo ha le yategamo ago afole aiʼniye. Maige maige huno neʼmaiya Gotiʼa, alita aeta hakalo hiyo, huno huʼnigeʼa muki nofi vayaʼmogi apakesamo afiʼa fatago hisaya gemo akame hisayafeʼmo aeʼa hakalo huʼa hapa paiʼnae.

Lomu 16:26 ပူးပေါင်းရင်းမြစ်များ

Aepa Gemae 21:33

Inagi Emalehamuʼa mago tamalisiki yosamo Miyasima kotegamo fai maleʼneno Ala kava neʼmo muki afinaʼae afinaʼaeʼmo neʼmaiya Gotitefeʼmo mono huʼniye.

Aiyeya 40:28

Lapakaemo afiʼnafi oʼafiʼnae. Mago vayaʼmogimo lapa paiʼnagetapa oʼafiʼnafiye. Ala kava neʼmo maige maige huno neʼmaiya Gotiʼa muki ma mopamo aluga aluga atupalenagi huno alo huʼniya Gotiʼa aunena oʼaige alaga ohaege huʼnigeno neʼmaiye.

Aiyeya 9:6

Laha maesiyafeʼmo akanomoʼmo mago mafaʼnemo alino ateʼniye. Afoʼamoʼmo ani mafaʼnemo avaleno lamiʼniye. Agaemo asole vayaʼaiteʼmo yagaino apatesiyafeʼmo kana yaʼmo alino agiʼnaleʼmo kofilino ugiye. Agiʼamo aeʼapaeʼmo, hapau neʼaiya kavaʼmo nehiya vekae, huʼa agi aege gemo huno alino api aino neʼapateya vekae, huʼa agi aege himamuʼage Gotiʼae, huʼa agi aege maige maige huno neʼmaiya Afoʼapimoʼae, huʼa agi aege kini vekamoʼmo alagepa huno yagaino neʼapategeʼa falu apaipa kaliʼa neʼmaiya kavaʼmo aepa vekae, huʼa agi aege hugae.

Maika 5:2

Gotiʼa ina ge huno huʼniye. Metelehamu Efalatao, huno, Kagaemo muki Yuta taonimo folagapiʼmo alagi aise taonimo haneʼnanaʼmonanafa Isaleli kini vekamo maisiyafeʼmo mago vekamo nagaetefeʼmo kagaepatiʼmo afole aino maigiye. Agaemo akeyaʼvilagamo Gotiʼa ma mopaʼe kokuʼnaʼeʼmo alo osuʼniya afinaʼmo maiʼniye.

Maki 16:15

Agaemo hunoʼaeʼmo, muki ma mopafi vayaʼaitegamo uta alagepa faigoko geʼnimo aeta hakalo hutapa hapa paiyo.

Apa 10:43

Muki laginago vayaʼmogi Gotitegati gemo alini eʼa aeʼa hakalo huʼa hapa nepaiya vayaʼmogimo ava gemo huʼapaeʼmo, Gotiʼa ani vekamo agiʼaletiʼmo agaefeʼmo apakesamo afiʼa fatago nehaya vayaʼai hosu kavaʼapimo alino atalegaiye, huʼa avoʼmo kae maleʼnae, huno hapa paiʼniye.

Apa 6:7

Inagi Goti geʼamoʼmo muki haopalegamo aino atagu faeno uneno huʼniye. Yulusalemu taonifiʼmo maiʼnaya vayapatiʼmo Yesu geʼamo neʼafiya vayaʼmo magoʼe magoʼe huʼa afole aiʼnae. Mono huʼa neʼapataya vayaʼmo asole vayaʼmogimo apakesamo afiʼa fatago huteʼa akame huʼnae.

Lomu 1:2

Akeyaʼvilaga Gotiʼa agaetegati gemo alini eʼa aeʼa hakalo huʼa hapa nepaiya vayaʼmogi aote mukufiʼmo avoʼmo kae maleʼnaya geʼapimoʼa mani alagepa faigoko geʼalefeʼmo, afole aigiye, huno hapa paiʼniye.

Lomu 1:20

Gotiʼa ma mopamo alo huʼniya afinatetiʼmo muki vayaʼmogi alo huʼniya yaʼamo ago ageme ageme eʼnae. Ageme ageme neʼeʼapaeʼmo apaulagaletiʼmo noʼagaya yaʼmo Gotiʼa hanege hanege huno hanesiya himamuʼamo ageteʼapaeʼmo, aeto agufa vekamo hogote vekamo alagi ago aeno lagaseʼniya vekamo maiʼniye, huʼa neʼagae. Neʼagayaʼmofeʼmo hosu kavaʼapimo aeʼa ati kaesayafeʼmo, alagi oʼageʼnone, huʼa afaʼa osugae.

Lomu 1:5

Gotiʼa agaetetiʼmo fikumo naha maeno namiteno Kalaisi agiʼalefeʼmo apa aliʼyaʼamo alisuvafeʼmo navaleno nateʼniye. Gotiʼa muki nofi vayaʼaifeʼmo akame hiyo, huno huʼniya geʼamo akame huʼa apakesamo afiʼa fatago hisayafeʼmo apa aliʼyaʼamo alisuvafeʼmo navaleno nateʼniye.

Lomu 15:18

Kalaisiʼa lokiya vaino nateʼnigeʼna alu nofi vayaʼmogi Goti geʼamo afiteʼa akame hisayafeʼmo ge huge lokiya kavaʼmo huge nehuʼnaeʼmo aiʼna apavayu huliʼna neʼova kavafekeʼmo ava gemo huʼna lapa paiguve.

Lomu 15:4

Akeyaʼvilagamo avoʼmo kae maleʼnaya gemoʼmo alino laya malesiyafeʼmo avoʼmo kae maleʼnae. Goti mukufiʼmo huʼniya gemoʼa laha maesigeta oʼataleta atafauta alagi huta maiʼnisunageno laipamoʼmo falu huʼnisigeta lavayagunagu huta agava maisunafeʼmo avoʼmo kae maleʼnae.

Lomu 3:21

Ani kava huʼa maiʼnayaʼmonanafa hemenimo Gotiʼa fatago kavaʼamo agaiʼalegatiʼmo alino apave neliye. Keʼaepa geʼamo akame nehaya kavatetiʼmo noʼapamifa fikumo hapa maeno neʼapamiye. Moseseʼe Gotitegati gemo alini eʼa aeʼa hakalo huʼa hapa nepaiya vayaʼmogiʼeʼmo avoʼmo kae maleʼnaya gefatiʼmo ani kavafeʼmo ava gemo aeʼa hakalo huʼa hapa nepaiye.

Galesiya 3:8

Gotiʼa hogoteno apakeʼniyana malaga nofi vayaʼmogimo apakesamo afiʼa fatago hisageʼna apaketeʼnaeʼmo, naulagaleʼmo fatago vayaʼmo maiʼnae, huʼna hapa paiguve, huno apakeʼniye. Apaketeno hogoteno alagepa faigoko geʼamo Emalehamufeʼmo polomasi gemo huno ha painoʼaeʼmo, nagaemo kagaetetiʼmo muki nofi vayaʼmo aliʼna auleʼna apategauve, huno ha paiʼniye.

Efasasi 1:9

Hauʼniya kavatefeʼmo ani kavaʼmo huguve, huno agesamo afiteno lokiya gemo hu maleʼniya kavaʼmo hogoteno alino fala ki maleʼniyaʼmonanafa hemenimo ago alino lave liʼniye.

Efasasi 2:20

Apa vayaʼmo Gotitegati gemo alini eʼa aeʼa hakalo huʼa hapa nepaiya vayaʼmogimo Gotiʼa noʼmo faino neʼateya yafakana huʼa maiʼnae. Gotiʼa ani yafateʼmo no kigekana huno alino lapateʼniye. Yesu Kalaisiʼa hogote yafaʼmo aluga aluga atupaleʼmo noʼmo faiʼa neʼataya yafakana huno maiʼniye.

Kolosi 1:26

Gotiʼa mago kavaʼamo alino fala ki maleʼnigeʼa muki vayaʼmogimo muki afinaʼmo oʼageʼnayaʼmonanafa hemenimo apaote vayaʼamo alino apave liʼniye.

1 Timoti 1:17

Ala kini vekamo ofalino maige maige huno neʼmaiya vekamo noʼagona vekamo agaiʼageʼmo ageteno afiʼniya vekamo ala agiʼaʼe ha le konali yaʼaʼeʼmo muki afinaʼmo hanege hanege huno haneno. He, lama ge.

1 Timoti 3:16

Mono kavatimo hogote kavaʼmo alopa kavaʼmo haneʼnigeno alino fala ki maleʼneno alino lave liʼnigeta ani mono kavaʼmo nehune. Mani geeʼmo hutaeʼmo, Gotiʼa agufamo aliteno vayaʼai apaulagaleʼmo afole aiʼniye. Goti Aunemeʼamoʼmo hunoʼaeʼmo, fatago vekamae, huno huʼniye. Enisole vayaʼmogi ageʼnae. Alu nofi vaya alu nofi vayaʼaifeʼmo agaefeʼmo alagepa faigoko geʼamo aeʼa hakalo huʼa hapa paiʼnae. Ma mopafi vayaʼmogimo agaefeʼmo apakesamo afiʼa fatago huʼnae. Gotiʼa avalelino uno haino kokuʼnapi ateʼnigeno maiʼniye, huta nehune.

2 Timoti 1:10

Akeyaʼvilagamo lamiʼniyaʼmonanafa Yesu Kalaisiʼa lagufamo alino katino lateteno lahau neʼvaiya vekamo afole aiʼnigenoʼaeʼmo hemenimo ani kavaʼmo laulagaleʼmo ago afole aiʼnigeta ageʼnone. Agaemo nefaluna kavaʼmo lokiyaʼamo alino hano huno ataleteno agaiʼaeʼmo alagepa faigoko geʼaletiʼmo maige maige huʼa maisaya yaʼmo alino afole aino ateʼniye.

Himulu 13:8

Yesu Kalaisiʼa alu afina alu afinaʼmo alu kavaʼmo huno noʼmaifa akeyaʼvilaga maiʼniya kavakeʼmo huno neʼmaiyanageno henagaʼamo ani agufa kavakeʼmo huno maigiye.

Himulu 9:14

Afumo kolaʼmoʼa vayaʼmogi amega apakufaleʼmo aeno kalo paeno apaeʼniyaʼmonanafa afaʼa neʼmaiya yaʼmo neʼapamiya Goti aliʼyaʼamo alisayafeʼmo Kalaisi kolaʼamoʼa magoʼe huno lapakupi mafaʼnemo falisaya kavaʼmo aliʼyaʼalefeʼmo aeno kalo paeno lapategaiye. Agaemo hosu kavaʼamo alagi ohaneʼniya vekamo maige maige huno neʼmaiya Aunemeʼaletiʼmo agaiʼa agufamo Gotiʼmo amiʼniye.

1 Yoni 5:20

Lagaemo ageʼnonana Goti Mafaʼneʼamo emineno lama ge Gotiʼa ageta alagepa hisunafeʼmo lagesamo afisuna yaʼmo lamiʼniye. Lagaemo lama ge vekafiʼmo maiʼnetaeʼmo Mafaʼneʼamo Yesu Kalaisipiʼmo maiʼnone. Ani vekamo lama ge Gotiʼa maiʼnenoʼaeʼmo alagepa huta maige maige huta maisuna yaʼmo afoʼamoʼmo maiʼniye.

Leveleseni 1:17

Ageteʼnaeʼmo faliʼniya vekagana huʼna aiyafiʼmo asagauʼna aiʼna maiʼnogenoʼaeʼmo lamaga ayatetiʼmo nagufaleʼmo maleʼnenoʼaeʼmo, Koli osuvo. Hogote vekamo maiʼneʼnaeʼmo henaga vekamo maiʼnove.

Leveleseni 19:10

Naha paiʼnigeʼna agaefeʼmo mono hisuvafeʼmo aiyafiʼmo asagauʼna aiʼnogenoʼaeʼmo, Nagaefeʼmo mono osuvo. Kagaeʼe konagakamogiʼeʼmo Yesufeʼmo ava geleʼmo atafauʼa alagi huʼnaya konagakamogiʼeʼmo magoke agufa aliʼyaʼmo neʼalune. Gotifekeʼmo mono huvo. Goti Aunemeʼamoʼmo Gotitegati gemo alini eʼa aeʼa hakalo huʼa hapa nepaiya vayaʼmo ani gemo apamiʼnigeʼa Yesufeʼmo ava gemo nehae, huno naha paiʼniye.