Lomu 15:4 - The Keyagana NT and 25 OT books

⁴ Akeyaʼvilagamo avoʼmo kae maleʼnaya gemoʼmo alino laya malesiyafeʼmo avoʼmo kae maleʼnae. Goti mukufiʼmo huʼniya gemoʼa laha maesigeta oʼataleta atafauta alagi huta maiʼnisunageno laipamoʼmo falu huʼnisigeta lavayagunagu huta agava maisunafeʼmo avoʼmo kae maleʼnae.

Lomu 15:4 ပူးပေါင်းရင်းမြစ်များ

Samu 119:50

Gekamoʼmo alagepa huʼna maisuva yaʼmo alino namiʼniyaʼmofeʼmo kana yaʼmo neʼalugenoʼaeʼmo naipamoʼmo falu nehiye.

Hamakaki 2:2

Huʼna nagesamo afiteʼna maiʼnogenoʼaeʼmo Ala kava neʼmoʼa geʼnileʼmo aeno atagaina hunoʼaeʼmo ani ge huno naha paiʼniye. Nagaemo aliʼna kavelisugeka alagamuna agegekana huka agegane. Agetekaeʼmo ageʼa alagepa huʼa agesayafeʼmo kalipa mopaleʼmo avoʼmo kae maleʼnisanageno lekana paisiya vekamoʼmo ageno alagepa hutenoʼaeʼmo alinino nagu nagu huno ugiye.

Lomu 12:12

Afole aisiya kavafeʼmo agava maiʼnetapaeʼmo lapavayagunagu hutapa lapamogaga aiyo. Hanageke yaʼmo aliʼnetapaeʼmo oʼataleta atafautapa alagi hutapa maiyo. Oʼataleta nunumuʼmo huge huge hutapa maiyo.

1 Kolitiyani 10:11

Apakaetegamo afole aiʼniya kavaʼmoʼa alino lave lisiya aune kavaʼmo haneʼniyaʼmofeʼmo lagaefeʼmo ehetapiye, huno nehiye. Hemenimo ma mopamo alagi hano hisiyafeʼmo nehiya afinaʼmo maiʼnone.

1 Tesaloniyani 1:3

Lapakesamo afita fatago huʼnetapaeʼmo alagepa kavaʼmo nehae. Lapau lapayamopafiʼmo lapauʼnigetapaeʼmo lokiya aliʼyaʼmo neʼaliye. Ala kava netimo Yesu Kalaisifeʼmo agava maiʼnetapa lapavayagunagu nehutapaeʼmo oʼataletapa atafauta alagi hutapa neʼmaiye. Lagaemo Afotimo Goti aulagaleʼmo ani kavatapieʼmo lagesamo afitetaeʼmo muki afinaʼmo olapataleta nunumuʼmo huta nelapatone.

1 Pita 1:13

Ani alagepa faigoko gemo afole aiʼniyaʼmofeʼmo alagepa huta afisayafeʼmo lapakesamo alo hutetapa lapakufaleʼmo yagaita lapateyo. Yesu Kalaisiʼa emineno vayaʼai apaulagaleʼmo afole aitenoʼaeʼmo fikumo laha maeno lamigiye, huta ani geʼaekeʼmo lapakesamo afitetapa agava maiʼnetapa lapavayagunagu hutapa maiyo.