Leveleseni 7:2 - The Keyagana NT and 25 OT books

² Ageʼnovana mago alu enisole vekamoʼmo yegemo haine neʼeya kotegatiʼmo afaʼa neʼmaiya Goti alagena kavaʼamo hu malesiyafeʼmo aliteno eʼnigeʼna ageʼnove. Agaemo loleʼe loleʼe enisole vayaʼaifeʼmo Gotiʼa ma mopaʼe solovala aniʼeʼmo aliʼa hosu huʼa atalesaya himamuʼapimo apamiʼniya enisole vayaʼaifeʼmo alopa gefatiʼmo keya aeno ge huʼniye.

Leveleseni 7:2 ပူးပေါင်းရင်းမြစ်များ

Salomoni Yokemae 8:6

Mago vekamoʼmo alagena kavaʼmo hu neʼmaleya kava huka nagaemo alika kaipafiʼmo alagena kavaʼmo hugekana huka hu malo. Ani kava huka nagaemo alika kayamoteʼmo alagena kavaʼmo hugekana huka hu malo. Ani kavatefeʼmo nahau nayamopafiʼmo nahauʼniya kavaʼmo lokiyaʼamoʼmo fali kavaʼmo lokiyaʼagana huno haneʼniye. Nagaemo kaino nefauva kavaʼmoʼa nefaliya kavakana huno haneʼniye. Kaino nefauva kavaʼmo atagana huno nele. He, lusi kava huno nele.

Malakai 3:1

Ala kava neʼmo muki vayaʼaiteʼmo yagaino neʼapateya vekamoʼmo hunoʼaeʼmo, Afiyo, huno, nagaemo apa vekaʼnimo aliʼna atesugeno uno hogoteteno kaʼmo valino nategaiye. Ala kava neʼmo kahauya hutapa agesayafeʼmo lapauʼniya vekamo malage huno alopa mono noʼaleʼmo egaiye. Kotalakemo hu maleʼniya gelefeʼmo apa vekaʼamo egaiye. Afiyo, huno, egaiye.

Malakai 4:2

Alagi oʼmaigayaʼmonanafa nagiʼnilefeʼmo koli nehaya vayaʼaitegamo ani kavaʼmo huno fatago vekamo yegegana huno hainesiya kavaʼamoʼmo alino hapageno apatesigeʼa alagepa huʼa maigae. Nopatiʼmo pulumaka anaʼau anagaʼmo kita yakiʼa apateʼnageʼapaeʼmo aeʼa hailo hailo huliʼa neʼvaya kava hutapa ugae.

Matiyu 16:16

Saimoni Pitaʼa geʼaleʼmo aeno atagaina hunoʼaeʼmo, Kalaisi vekamo maiʼnane. Maige maige huno neʼmaiya Goti mafaʼneʼamo maiʼnane, huno ha paiʼniye.

Matiyu 26:63

Halate agaefeʼmo hukaeʼmo, maige maige huno neʼmaiya Gotitegatiʼmo alagi lama gemo nehuve, huka huvo. Kalaisi vekamo Goti mafaʼneʼamo maiʼnisanana laha paiyo, huno afi geʼnigenoʼaeʼmo,

Yoni 6:27

Lapakaemo kasalisiya neʼyaʼmo alisayafekeʼmo aliʼyaʼmo oʼalitapa hanege hanege huno hanesiya neʼyaʼmo lapamisigetapa alagepa hutapa maige maige hutapa maisaya yaʼmo alisayafekeʼmo aliʼyaʼmo aliyo. Vemo Mafaʼnemoʼmo ani agufa neʼyaʼmo lapamigiye. Muki yaʼmo Afoʼamoʼmo Gotiʼa lekana paiʼna ateʼnove, huno alino apave lisiyafeʼmo himamuʼamo amiʼniye, huno hapa paiʼnigeʼapaeʼmo,

Efasasi 1:13

Ani kava hutapa lapakaeʼeʼmo alagi mani lama gemoʼmo lapau neʼvaiya kavatefeʼmo alagepa faigoko geʼamo afitetapaeʼmo alita amufa amiʼnae. Lapakaemo Kalaisifeʼmo lapakesamo afita fatago huʼnagenoʼaeʼmo Gotiʼa polomasi gemo hunoʼaeʼmo, Nauneʼnameʼmo apamiguve, huno hu maleʼniya Aunemeʼamo lapamitenoʼaeʼmo lapaipafiʼmo alagena yaʼamo ago hu maletenoʼaeʼmo, vayaʼnimo maiʼnae, huno lapa paiʼniye.

Efasasi 4:30

Gotiʼa henagaʼamo lapavalesiya afinafeʼmo Aunemeʼaletiʼmo lapakaeteʼmo alagena kavaʼamo ago hu maletenoʼaeʼmo, mafaʼneʼnimo maiʼnae, huno huʼniyaʼmofeʼmo Aote Aunemeʼamoʼmo aipamoʼmo kana hisiya kavaʼmo osiyo.

1 Tesaloniyani 1:9

Ani vayaʼmogimo lagaefeʼmo huʼapaeʼmo, apakaemo Tesaloniyani vayaʼaitegamo uʼnageʼapaeʼmo aigofe gotiʼapimogi apataleʼa aiʼa afe leʼa Gotitegamo eʼa afaʼa neʼmaiya lama ge Goti aliʼyaʼamo neʼaliye.

2 Timoti 2:19

Asagauno aiʼniyaʼmonanafa Goti noʼamo lokiya yafateʼmo faino ateʼniya yafaʼmo afaʼa haneʼniye. Gotiʼa faino ateʼniya yafateʼmo alagena yaʼmo hu maleʼniya yateʼmo haneʼniya gemoʼmo hunoʼaeʼmo, Ala kava neʼmoʼa vayaʼamo apakeʼniye, huno huteno magoʼe gemoʼmo hunoʼaeʼmo, Muki vayaʼamogimo Kalaisi agiʼamo neʼaya vayaʼmogi hosu kavategatiʼmo ataleʼa viyo, huno hu maleʼniye.

Himulu 12:22

Lapakaemo Sainai aveleʼmo oʼmeʼnafa Saiyoni kotega avemo kokuʼnapi Yulusalemu taonifiʼmo yalagisa Gotiʼa neʼmaiya taonifiʼmo tauseni tauseniʼa enisole vayaʼmo neʼmaiya taonifiʼmo etapa maiʼnae.

Leveleseni 1:3

Mani aune gemo lekana paiteʼa siosi vayaʼaifeʼmo aeʼa hakalo huʼa hapa nepaiya vayaʼe afiteʼa akame nehaya vayaʼeʼmo Goti aulena vayaʼamo maiʼnae. Afole aisiya afinaʼmo alagi hogo nehiyaʼmofeʼmae.

Leveleseni 10:1

Hutegeʼna ageʼnovana lokiya enisole vekamo kokuʼnapatiʼmo emineʼnigeʼna ageʼnove. Hiya kukenamoʼa yatala kukenamo vailiʼnigeno fugagiʼnaʼmoʼa agenopaleʼmo kino ku aino ateʼniye. Augosafatiʼmo yegegana huno leʼnigeno aiyalaʼmoʼa ata neleya posigana huno haneʼniye.

Leveleseni 10:4

Age aiʼnigeʼna aepa faiʼna avoʼmo kaegefeʼmo nehugenoʼaeʼmo mago vekamoʼmo kokuʼnapatiʼmo hunoʼaeʼmo, seveniʼa afinaʼmo hakalu hakalu hugekana huno age aiʼniya vekamoʼmo huʼniya gemo avoʼmo okaeka kagesafiʼmo afaʼa haneno, huno naha paiʼniye.

Leveleseni 16:12

Napa sigisi enisole vekamoʼmo yuvapaʼamo alinino uno alopa aniʼmo uno nelamiya aniʼmo agiʼamo Yufaletisi anipiʼmo aino lakiʼnigeno yegemo haine neʼeya kotegamo yagaiʼa neʼapataya kini vayaʼmo esaya kaʼmo valino apatesiyafeʼmo aniʼmo leno laneʼniye.

Leveleseni 5:2

Ageʼnovana mago lokiya enisole vekamoʼmo hunoʼaeʼmo, Ina laʼmo himamuʼaʼe vekamo maiʼniyanageno seveniʼa kamemo afaʼa alino akauteno alino ata legaiye, huno alopa gefatiʼmo aeno hakalo huno hapa paiʼniye.

Leveleseni 8:3

Mago alu enisole vekamoʼmo goli yuvapafiʼmo atamo kaeʼa neʼmalaya yuvapamo aliteno ofalinimo neʼmalaya hiʼyalamuteʼmo eno he tino maiʼniye. Mago vekamoʼmo asole yaʼmo atafiʼmo kaeʼnigeno alagepa atumo neʼaiya yaʼmo alino enisole vekamo amiʼniye. Muki apaote vayaʼmogimo nunumuʼmo nehaya geʼapiʼe alagepa atumo neʼaiya yaʼeʼmo alino goli hiʼyalamuteʼmo maleteno Gotiʼmo amisiyafeʼmo amiʼniye.

Leveleseni 9:14

Agaemo pikulimo aliʼneno napa sigisi enisole vekaeʼmo, Loleʼe loleʼe enisole vayaʼmo alopa aniʼmo uno nelamiya aniʼmo agiʼamo Yufaletisi ani agiʼnaleʼmo nofi kiʼa apateʼnaya enisole vayaʼmo uka nofiʼmo hakalu heka apato, huno ha paiʼniye.

Leveleseni 9:4

Apakaefeʼmo, ma mopafi kahaugi hegafatalili yanagi yosagi hutapa alita hosu hutapa oʼateyo. Goti alagena yaʼamo hapanileʼmo ohaneʼnisiya vayaʼageʼmo hapaeyo, huno hapa paiʼniye.

1 Samiyo 17:26

Neviniʼmo agae haopaleʼmo maiʼnaya vayaʼaifeʼmo ina ge huno ge huno apafi geʼniye. Inagi kini vekamoʼmo ani Filisatini vekamo kamitimo haesigenoʼaeʼmo lagaemo Isaleli vayaʼmo alopa lavagage yaʼmo afole neʼaiya kavaʼmo alino atalesiya vekalegamo na agufa kavaʼmo hugiye. Ani Filisatini vekamo malaga afa vekageʼmae. Ina laʼmo afaʼa maiʼniya Goti ami vayaʼaeʼmo lame lame gemo nehiye.

1 Samiyo 17:36

Nagaemo laiyoniʼe meyaʼeʼmo kamiti anamagiʼnova kava huʼna malaga Filisatini vekamo kamiti amagiguve. Agaemo afaʼa maiʼniya Goti ami vayaʼaeʼmo lame lame gemo huno huno faipa huno apateʼniyaʼmofeʼmae.