Leveleseni 7:1 - The Keyagana NT and 25 OT books

¹ Ani gemo afiteʼna ageʼnovana loleʼe loleʼe enisole vayaʼmogimo mopafiʼmo loleʼe loleʼe atupaleʼmo he tiʼa maiʼneʼapaeʼmo mopalenagi solovala anitenagi yosalenagi huʼa yasimo oʼalisiyafeʼmo ma mopamo atupaleʼmo loleʼe loleʼe yasileʼmo atafauʼnageʼna apakeʼnove.

Leveleseni 7:1 ပူးပေါင်းရင်းမြစ်များ

Aiyeya 11:12

Agaemo kalahuʼmeʼmo alino asai maleteno hapa faiʼa apataleʼnaya Isaleli vayaʼe hapa faiʼa apataleʼnageʼa atagu faeʼa uʼeʼa huʼnaya Yuta vayaʼmogiʼeʼmo ma mopamo loleʼe loleʼe atupaletiʼmo apavalelino eno alino anupa huno apategaiye.

Neniyo 11:4

Hugiyaʼmonanafa yagaisiya kopatiʼmo aliʼa fako hisageno loleʼe loleʼe koʼmo hanegaiye. Mafaʼne anagaʼamogi ani koteʼmo oʼyagaigayaʼmonanafa alu vayaʼmogimo yagaigae. Agaemo alopa lokiyaʼaletiʼmo yagaisiya kava huʼa oʼyagaigae.

Neniyo 7:2

Neniyoʼmo hunoʼaeʼmo, Nagaemo mago alagamuna ageʼnovana loleʼe loleʼe yasimo kokuʼnapati alinineno solovala aniteʼmo aliʼnigeno solovala aniʼmoʼmo aino holakau holakau huʼniye.

Neniyo 8:8

Inagi ani ve mememo ala vekamo hamaleʼnigeno lokiya himamuʼamo afole neʼaigenoʼaeʼmo agenopafati alopa lokiyaʼamo lo aeʼniye. Ani lo aeʼniya lokiyaʼmo aimuʼyaleʼmo alu loleʼe loleʼe alopa lokiyaʼamo haineʼniye. Mago lokiyaʼamoʼmo lamaga haopalegamo alino augosa huʼnigeno mago lokiyaʼamoʼmo hoga haopalegamo alino augosa huʼnigeno mago lokiyaʼamoʼmo yegemo haine neʼeya haopalegamo alino augosa huʼnigeno mago lokiyaʼamoʼmo yegemo uno lamino nefaleya haopalegamo alino augosa huʼnigeʼa huʼnae.

Yona 1:4

Aune hetaleno neʼvigenoʼaeʼmo Ala kava neʼmoʼa lusi lokiya yasimo alino ateʼnigeno solovala aniteʼmo alinino eʼniye. Lusi yasimo alige ko aige huʼnigeno aniʼmoʼa aino holakau holakau huno sipimo aeno atagisiya agufa kavaʼmo huʼniye.

Matiyu 24:31

Mago enisole vekamoʼmo alopa gefatiʼmo pikuli nehisigenoʼaeʼmo agaemo enisole vayaʼamo alino apatesigeʼa ma mopamo loleʼe loleʼe atupaleʼmo uʼeʼa huʼa lekana paino apateʼniya vayaʼmo apavaleli eʼa aliʼa anupa huʼa apategae.

Maki 13:27

Agaemo enisole vayaʼamo alino apatesigeʼa ma mopamo loleʼe loleʼe atupaleʼe kokuʼna atupaleʼeʼmo uʼeʼa huʼa lekana paino apateʼniya vayaʼamo apavaleli eʼa aliʼa anupa huʼa apategae.

Leveleseni 20:8

Uno muki alu kotega alu kotegamo maiʼnaya vayaʼmo Gogi nofi vayaʼe Megogi nofi vayaʼeʼmo humi apateteno kamemo hisayafeʼmo asole vayaʼmo ani kahaepamo lekana opaisuna agufa vayaʼmo alino anupa huno apategaiye.

Leveleseni 6:6

Inagi loleʼe loleʼe vayapati vekamoʼmo age aigekana huno ge hunoʼaeʼmo, kafu hu afinafeʼmo magoke afinaʼmo aliʼyaʼmo aliʼnaya yatefeʼmo miyaʼapimo afaʼa ataleʼa loleʼe loleʼe laisi kapumo hugekana huʼa huʼnaya yaʼmo agiʼamo vitimo miya faigae. Magoke afinaʼmo aliʼyaʼmo aliʼnaya yatefeʼmo miyaʼapimo afaʼa ataleʼa tuolofuʼa kapumo napa tu agufa vitimo agiʼamo malimo miya faigae. Alifi yosa alagafati aniʼe nofi alagafati aniʼeʼmo alika hosu huka oʼato, huno huʼniye.

Leveleseni 7:3

Lapakaemo ma mopagi solovala aninagi yosagi hutapa alita hosu hutapa oʼataleʼnigetao hogoteta Gotitimo aliʼyaʼamo neʼaliya vayaʼai hapanileʼmo alagena kavaʼamo hu malegaune, huno hapa paiʼniye.

Leveleseni 8:7

Hogote enisole vekamoʼmo pikuli huʼnigenoʼaeʼmo ko aigekana huno ko mopagi atagi kolanagi huno aiʼniye. Ma mopamo loleʼe magoʼe atupaletiʼmo magokayaga atupa mopamo ago atamoʼmo leno sagaliʼniye. Ani kava huno loleʼe magoʼe yosafatiʼmo magoke yosamo leno sagaliʼniye. Muki kahauʼamo ago leno sagaliʼniye.

Leveleseni 9:14

Agaemo pikulimo aliʼneno napa sigisi enisole vekaeʼmo, Loleʼe loleʼe enisole vayaʼmo alopa aniʼmo uno nelamiya aniʼmo agiʼamo Yufaletisi ani agiʼnaleʼmo nofi kiʼa apateʼnaya enisole vayaʼmo uka nofiʼmo hakalu heka apato, huno ha paiʼniye.

Leveleseni 9:4

Apakaefeʼmo, ma mopafi kahaugi hegafatalili yanagi yosagi hutapa alita hosu hutapa oʼateyo. Goti alagena yaʼamo hapanileʼmo ohaneʼnisiya vayaʼageʼmo hapaeyo, huno hapa paiʼniye.