Himulu 13:9 - The Keyagana NT and 25 OT books

⁹ Fiku yanageʼa mago vayaʼmogi aeto aeto agufa geletiʼmo lapayateʼmo heʼa lapavayu huliʼa ugayanagi ehetapiye. Alagepa kavanageno Gotiʼa fikumo lapa maeno nelapamiya gemoʼa lapaipa lapakesamo alino lokiya vaino lapategaiye. Neʼyafeʼmo, neyo, huʼa huge oʼneyo, huʼa huge nehaya gemoʼa lapaipa lapakesamo alino lokiya vaino olapategaiye. Ani gemo akame nehaya vayaʼmo hapa oʼmaeʼniye.

Himulu 13:9 ပူးပေါင်းရင်းမြစ်များ

Samu 112:8

Agaemo mago yafeʼmo agesa afiteno koli nosiye. Agaemo agesiyana Gotiʼa ha maeno kame vayaʼamo aeno apaka sesigeno agegaiye.

Matiyu 24:24

Mago vayaʼmogi, Kalaisiʼnamo maiʼnove, huʼa huge mago vayaʼmogi Gotitegati gemo aliniʼneʼna aeʼna hakalo huʼna hapa nepauva vekamo maiʼnove, huʼa huge huteʼa magoʼe huʼa noʼagaya agufa apaune kavaʼmo hugayaʼmofeʼmae. Lekana paino apateʼniya vayaʼmo humi apatesayafeʼmo hugayana afaʼa humi oʼapategae.

Matiyu 24:4

Yesuʼa, humi olapatesayafeʼmo alagepa hutapa yagaita lapateyo.

Luki 5:38

Saufa aniʼmo saufa afu agufa kepikeʼmo lakisayaʼmoʼmo aniʼe keʼeʼmo afaʼa hanegaiye.

Apa 20:30

Mago vayaʼmo lapakaepatiʼmo he tiʼa apakame hisayafeʼmo aigofe gemo huteʼa apakesamo faiteʼa apayate aligae.

Apa 20:32

Konagaʼnimogitapae, huʼna, hemenimo nagaemo Gotiʼa yagaino lapatesiyafeʼmo ayapiʼmo lapateʼnove. Gotiʼa fiku hapa maeno neʼapamiya geʼaletiʼmo afaʼa alino lokiya vaino lapateteno hetamatapimo lapamiteno apaote vayaʼaʼeʼmo magokepi alino lokaeno lapategaiye.

Lomu 14:17

Na kava higetapaene. Gotiʼa neʼyaʼe aniʼeʼmo neʼnaya kavateʼmo yagaino noʼapatefa Goti Aunemeʼamoʼmo laipafiʼmo maiʼnigeta fatago kavaʼmo nehunagenoʼaeʼmo laipamoʼmo falu huʼnisigeta lamogaga aisuna kavatekeʼmo yagaino nelate.

Lomu 14:2

Mago vayaʼmogimo apakesamo afiʼa fatago nehuʼapaeʼmo, muki agufa neʼyaʼmo afaʼa negaune, huʼa nehageʼapaeʼmo mago lokiya vaiʼa apakesamo afiʼa fatago nosaya vayaʼmogimo ameʼamo noʼnae.

Lomu 14:6

Mago vayaʼmogi Ala kava nefeʼmo apakesamo afiteʼapaeʼmo, aote afinaʼmo haneʼniye, huʼa nehae. Ameʼamo neʼnaya vayaʼmogi Ala kava nefeʼmo apakesamo afiteʼa nesayafeʼmo Gotifekeʼmo haoke nehae. Ameʼamo noʼnaya vayaʼmogi Ala kava nefeʼmo apakesamo afiteʼapaeʼmo Gotifekeʼmo haoke nehae.

1 Kolitiyani 6:13

Lapakaemo hutapaeʼmo, Neʼyaʼmo lagupamo yaʼmo haneʼnigeno lagupamoʼmo neʼyaʼmo neʼne, hutapa nehayaʼmonanafa Gotiʼa neʼyaʼe vayaʼmogi apakupaʼeʼmo alagi alino hano huno atalegaiye. Gotiʼa kumai kavaʼmo hisunafeʼmo lagufamo alo huno olateʼnifa Ala kava netefekeʼmo alo huno lateteno Ala kava neʼmoʼa lagufaleʼmo yagaino latesiyafeʼmo alo huno lateʼniye.

1 Kolitiyani 8:8

Neʼatayaʼmonanafa neʼyaʼmo neʼnisupi oʼneʼnisupigeno Gotiʼa ani kavatefeʼmo amuse huno olategaiye. Ofalini afumo ameʼamo oʼnesunana magoʼe huta hosu kavaʼmo huta oʼmaigune. Ofalini ameʼamo nesunana magoʼe huta alagepa kavaʼmo huta oʼmaigune.

2 Kolitiyani 1:21

Gotiʼa agaiʼa aliʼyaʼamo alisunafeʼmo lavaleno latesiyafeʼmo uvelimo lakino lategekana huno Aunemeʼaletiʼmo lakino lateʼniye. Alagena yaʼamo laipafiʼmo hu maleʼnenoʼaeʼmo, vayaʼnimo maiʼnae, huno huʼniye. Lamisiya yapatiʼmo Aunemeʼamo hogoteno ago laipafiʼmo lamiʼniyaʼmofeʼmo ago afiʼnonana muki alagepa yaʼamo lamigiye. Gotiʼa lamiteno lokiya vaino nelategetaeʼmo lagaeʼe lapakaeʼeʼmo Kalaisipiʼmo lokiya vaita maiʼnone.

Galesiya 6:1

Konagaʼnimogitapae, huʼna, mago hosu kavaʼmoʼa malage huno mago konagatapimoʼmo atafausigeno hosu kavaʼmo huʼnisigetapaeʼmo lapakaepatiʼmo Goti Aunemeʼamo alagepa huʼa akame nehisaya vayaʼmogimo yagu yaga gemo huʼa aliʼa alagepa huʼa ateyo. Lapakaeʼeʼmo lapamalageka hisagetapaeʼmo hosu kavaʼmo osisayafeʼmo lapakaitapileʼmo alagepa hutapa yagaiʼnetapaekeʼmo alita api aita ateyo.

Efasasi 4:14

Magoʼe huta mafaʼnegana huta oʼmaita kosigune. Mafaʼnegana huta maiʼnisunaʼmoʼmo aigofe vayaʼmogi aliʼa apaya neʼmalaya gemoʼmo yasimo alinino uneno nehigeno aino afelo afalo nehiya sipigana huta maigune. Apakaemo apakaiʼapimo apakesamo afiteʼa humiʼnami gemo huteʼa apayate neʼaliye.

Efasasi 5:6

Mani agufa hosu kavaʼmo nehayaʼmofeʼmo Goti geʼamo oʼafiʼa amagiʼa neʼatalaya vayaʼaifeʼmo aipamo leno neʼapateyanageno alagi apamagigiyaʼmofeʼmo fiku yanageʼa mago vayaʼmogi afa gemo huteʼa humi lapategae.

Kolosi 2:4

Mago vayaʼmogimo haga lapausiya agufa gemo huteʼapaeʼmo lapakesamo faiteʼa humi olapatesayafeʼmo mani gemo lapa nepauve.

2 Tesaloniyani 2:2

Mago vayaʼmogi huʼapaeʼmo, Kalaisi afinaʼmo ago afole aiʼniye, huʼa nehayaʼmonanafa lokiya gefatiʼmo hutaeʼmo, Goti Aunemeʼamoʼmo laha paiʼniye, huʼa huʼnisafi mago vayaʼmogi eʼa aeʼa hakalo huʼa laha paiʼnae, huʼa huʼnisafi mago vayaʼmogi huʼapaeʼmo, Poloʼeʼmo lagaefeʼmo avoʼmo kaeʼnae, huʼa lapa paiʼnisafigi ani geeʼmo afitapa lapau aitetapa lapausoli osiyo.

1 Timoti 6:20

Timotiyo, huʼna, Gotiʼa yagaika atesanafeʼmo alagepa faigoko geʼamo kamiʼniya geʼaleʼmo alagepa huka yagaika ato. Mago vayaʼmogimo Gotifeʼmo mono osuʼa afa geletiʼmo Goti geʼaleʼmo huʼa aeʼa ati nekae. Mani geeʼmo ageteʼa afiʼnaya gemae, huʼa nehayaʼmonanafa aigofe geʼapimo haneʼniye.

1 Yoni 4:1

Nahauʼniya vayaʼnimogitapae, huʼna, Asole aigofe vayaʼmogi gemo aeʼa hakalo huʼa hapa nepaiya vayaʼmo muki ma mopafiʼmo umenitata nehae. Umenitata nehayanagi lama gemo nehae, huta oʼafitapa alagepa huta alita fako hutapa afitetapaeʼmo, Gotitegatiʼmo eʼnafi oʼmeʼnafi, hutapa afiyo.

Yuti 1:12

Lapakaemo magoke konagamo maiʼnone, hutetapa magokepi alita anupa huta maiʼnetapaeʼmo neʼyaʼmo neʼnaya afinaʼmo mani vayaʼmogi koli osuʼa lusi neʼyaʼmo neʼneʼapaeʼmo apakaiʼapiekeʼmo apakesamo afiteʼa yagaiʼa neʼapatayaʼmonanafa kukenaleʼmo mago hosu yaʼmoʼa aeno nekamaeya agufa yakana huʼa maiʼnae. Apakaemo hiyapatiʼmo mago ko noʼaiya hiyaʼmo yasimoʼmo alinino neʼviya hiyakana huʼa maiʼnae. Yosa alagamo afu neleya afinaʼmo mago alagamo oʼaeʼniya yosamo hafuʼyaʼaʼeʼmo aino halaka tiʼnigeno alagi falu teʼniya yosagana huʼa maiʼnae. Apakaemo lole afinaʼmo faliʼnaya vayaʼmo maiʼnae.

Yuti 1:3

Neʼnahaiya vayaʼnimogitapae, huʼna, Gotiʼa lagaeʼe lapakaeʼeʼmo lagufamo alino katino lateʼniya kavafeʼmo avoʼmo kaegauve, huteʼna lusi kavaʼmo huʼna nagesamo afiteʼnaeʼmo hogoteʼna avoʼmo kaesuva kavaʼmo afole aiʼniye. Lagesamo afita fatago nehuna gelefeʼmo kamemo hutapa ha maesayafeʼmo mani gemo avoʼmo kaeʼna lapaipamo aliʼna lokiya vaiʼna lapatesuvafeʼmo huve. Gotiʼa mani gelefeʼmo lagesamo afita fatago nehuna gemo muki afinafeʼmo magoke afinaʼmo agaemo laote vayaʼamo lamiʼniye.