Himulu 10:22 - The Keyagana NT and 25 OT books

²² lama ge laipamo kaliteta magoke laipa lagesamo alitetaeʼmo lagesamo afita fatago nehutaeʼmo Goti haopaleʼmo uta haigetao. Laipafiʼmo aino fuli fuli huno lateʼnigenoʼaeʼmo yuʼilaga vekatimoʼmo hosu kavatapimo haneʼniye, huno nosiye. Lagufaleʼmo alagepa anitetiʼmo faleno lateʼniyanagi uta haigetao.

Himulu 10:22 ပူးပေါင်းရင်းမြစ်များ

Samu 111:1

Ala kava neʼmo agiʼaleʼmo alita asaga hiyo. Nagaemo muki naipafatiʼmo fatago vayaʼmo aliʼa anupa huʼa maiʼnayategamo Ala kava neʼmo agiʼaleʼmo aliʼna asaga huguve.

Samu 119:10

Muki naipafatiʼmo kagesuvafeʼmo kahauya huʼnove. Hiyo, huka huʼnana keʼaepa gekamo ataleʼna visuvafeʼmo oʼnatalo.

Samu 119:145

Nagaemo muki naipafatiʼmo, Ala kava nene, huʼna, geʼnimo afiyo, avoʼmo kae maleʼnaya keʼaepa gekamo akame huguve, huʼna kagaefeʼmo ge nehuve.

Samu 119:2

Avayafatiʼmo huʼniya keʼaepa geʼamo akame huge agesayafeʼmo muki apaipafatiʼmo kahauya huge huʼa neʼmaiya vayaʼmogi Goti aulagaleʼmo alagepa huʼa maiʼnayanageʼa afaʼa apamogaga aigae.

Samu 119:34

Alagepa nagesamo afisuva yaʼmo alika namigeʼnao keʼaepa gekamo akame hino. He, muki naipafatiʼmo akame huguve.

Samu 119:58

Nagaemo muki naipafatiʼmo, fiku naha maeka namiyo, huʼna kaha paiʼnove. Nahau huʼna lapategauve, huka laha paiʼnana kava huka kahau huka nato.

Samu 119:69

Himuʼnamu kavaʼmo nehaya vayaʼmogi aigofe nava gemo huteʼa huʼa faipa huʼa nateʼnayaʼmonanafa muki naipafatiʼmo namiʼnana gekamo akame huguve.

Samu 119:7

Nagaemo fatago kavaʼmo huka alika fako huka nehana gekamo alagepa huʼna afiteʼnaeʼmo kanale fatago naipafatiʼmo ala kagikamo kamiguve.

Samu 119:80

Nagaemo avoʼmo kae maleʼnaya keʼaepa gekaleʼmo aiʼna hapaisuva naipa nagesamo namigeʼnao navagage osisiyafeʼmo akame hino.

Samu 32:11

Alagepa vayaʼmogitapae, huʼna, Ala kava nefekeʼmo lapamogaga aitetapa amuse hiyo. Geʼamo akame nehaya vayaʼmogitapae, huʼna, lapamogaga aitetapa alopa gefatiʼmo hiyo.

Samu 51:10

O Gotiyo, huʼna, yaveyave naipamo alo huka nateteka gekamo afisuvafeʼmo nauneʼnameʼmo alika saufa nauneʼnameʼmo hamaleka ato.

Samu 73:28

kahaopaleʼmo uʼna maisuva kavaʼmo kanale kavane. Nagaemo muki nehana kavafeʼmo ava gemo aeʼna hakalo huʼna hapa paisuvafeʼmo Ala kava neʼmo Gotiʼnimofeʼmo aliʼna amufa amiʼnove.

Samu 84:11

Ala kava netimo yegetiʼe halegutiʼeʼmo maiʼniye. Agaemo ala apakiʼapimo apamiteno alagepa yaʼmo fiku hapa maeno apamigiye. Agaemo api kavaʼmo nehaya vayaʼaifeʼmo alagepa yaʼmo magokeʼageʼmo lapamiguve huno osugifa muki alagepa yaʼamo afaʼa apamigiye.

Samu 9:1

O Ala kava nene, huʼna, muki naipafatiʼmo ala kagikamo kamiguve. Lusi kava huka alagepa kavaʼmo nehana kavafeʼmo aeʼna hakalo huʼna hapa paiguve.

Mai'naya kavane 23:26

Mafaʼneʼnimogae, huʼna, kaipa kagesamo namiʼneka nehuva geʼnimo alagepa huka afiyo.

Aiyeya 52:15

Ani kavatetiʼmo agaemo asole nofi vayaʼaiteʼmo aino fuli fuli huno hosu kavaʼapimo aeno kalo paeno atalegaiye. Kini vayaʼmogimo oʼafiʼnaya gemo afige hapa opaiʼnaya gemo afiteʼapaeʼmo apakesa afifi huge huʼa maigayaʼmofeʼmo lusi kava huʼa agaefeʼmo hapau aiteʼapaeʼmo ge osugae.

Matiyu 3:11

Nagaemo lapaipamo alita afe leʼnaya kavatefeʼmo aniʼaletikeʼmo faleʼna nelapatovanageno nagae nakame huno esiya vekamoʼmo Goti Aote Aunemeʼaletiʼe ataletiʼeʼmo aniʼmo faleno lapategaiye. Agaemo lokiyaʼamoʼmo nagaemo lokiyaʼnimo ago aeno naga seʼniyaʼmofeʼmo afa vekamo maiʼneʼna aliʼyaʼamo neʼaluva agufa vekaʼagana huʼna maiʼnovanageʼna suʼamo aliniʼna visuva kavaʼmo huʼna afaʼa oʼmaiʼnove.

Luki 1:1

Ala vekamo Tiyofalasigamo afiyo. Mago kavaʼmo lagaetegamo ago afole aiʼnigeta alagi lagesamo afita fatago nehune. Aepa faiʼniya afinatetiʼmo mago vayaʼmogimo ageme ageme eteʼapaeʼmo ani kavafeʼmo ava gemo aeʼa hakalo huʼa hapa paiʼnae. Ani vayaʼmogimo hapa paiʼnageʼapaeʼmo asole vayaʼmogi afiteʼa amalageka huʼa ani kavafeʼmo ava gemo apaote apaote huʼa avoʼmo kaeteʼa aliʼa magokepiʼmo avoʼmo kae maleʼnae.

Yoni 3:5

alagi lama gemo kaha nepauve, huno, anitetiʼe Aunemeʼaletiʼeʼmo alino oʼapateʼnisiya vayaʼmo Gotiʼa yagaino neʼapateya kegiʼyafiʼmo afaʼa uʼa ohaigae.

Yoni 8:9

Ani gemo afiʼnagenoʼaeʼmo yuʼilaga vekaʼapimoʼa hosu kavaʼapimo alino apave liʼnigeʼapaeʼmo muki vayaʼamo ataleʼa ute ute huʼnae. Hogoteʼa asole kafugamo maiʼnaya vayaʼmo utageʼapaeʼmo henagaʼamo aise kafugamo maiʼnaya vayaʼmo magoke magoke vayaʼmo ute ute huʼa uʼnae. Ataleʼa utageno Yesuʼa agaiʼageʼmo maiʼnigeno ani a kanomo he tino maiʼniye.

Apa 22:16

Na kava higeka afaʼa maiʼnane. He tika aniʼmo faleteka Ala kava neʼmo agiʼalefeʼmo ge hugenoʼao hosu kavakamo aeno kalo paeno ataleno, huno naha paiʼniye.

Apa 8:21

Goti aulagaleʼmo kaipamoʼmo kanale osuʼniyaʼmofeʼmo mani aliʼyaʼmo kagae aliʼyaʼmo ohaneʼniye.

1 Kolitiyani 6:11

Hogotetapa magoʼamogitapamo ani agufa vayaʼmo maiʼnae. Maiʼnayaʼmonanafa Kalaisiʼa ani faleno lapateʼnigeno Goti Aunemeʼamoʼa lapavaleno lapaote lapateʼnigeno Gotiʼa Ala kava netimo Yesu Kalaisi agiʼaletiʼe Aunemeʼaletiʼeʼmo, naulagaleʼmo fatago vayaʼmo maiʼnae, huno lapa paiʼniye.

2 Kolitiyani 7:1

Nahau nayamopafiʼmo nahauʼniya vayaʼnimogitapae, huʼna, Gotiʼa ani kavaʼmo huguve, huno hu maleʼniya gemo ago afiʼnonaʼmofeʼmo lagaitimo muki hosu kavatimo lagufaleʼe laipa lagesafiʼeʼmo oʼaniʼya faiʼniya yakana huno haneʼniya kavaʼmo aeta kalo paeta atalegetao. Gotifeʼmo koli nehutaeʼmo aote kavaʼmo agetetaeʼmo alagi hume hume utah haita hapaigetao.

Efasasi 3:12

Agaepiʼmo maiʼneta agaefeʼmo lagesamo afita fatago nehuna kavatetiʼmo koli osuge lole lagesamo oʼafige huteta Gotitegamo neʼune.

Efasasi 5:26

Agaemo siosi vayaʼamo alino apaote apateʼneno Goti geʼaletiʼmo aniʼmo falegekana huno faleno apatesiyafeʼmo siosi vayaʼalefeʼmo falino apateʼniye.

Efasasi 6:5

Aliʼyaʼmo neʼaliya vayaʼmogitapae, huʼna, lapakaemo Ala kava neʼmo geʼamo neʼafiya kava hutapa aliʼyaʼmo afoʼamogi geʼapimo afiyo. Fiku yanagetapa lole lapakesamo afigayanagi koli hutetapa atete nehutapaeʼmo lapaipafatiʼmo geʼapimo afiyo.

1 Timoti 4:2

Apavayaletiʼmo aigofe gemo hugayaʼmonanafa apakupi mafaʼnemo faliʼnegekana huno maiʼniye.

Taitasi 3:5

Agaemo fatago kavaʼmo huta alagepa aliʼyaʼmo aliʼnona kavatiletiʼmo lagufamo alino katino olateʼnifa fikumo hau huno latetenoʼaeʼmo lagufamo alino katino lateʼniye. Aunemeʼaletiʼmo alino lateteno hosu kavatimo aeno kalo paeno lateʼnigetaeʼmo saufa vayaʼmo hamaleʼnone.

Himulu 10:1

Gotiʼa Yu vayaʼmo apamiʼniya keʼaepa gemoʼmo alagepa aune kavaʼmo ohaneʼnifa alagepa kavaʼmo Gotiʼa afole aigiye, huno hu maleʼniya kavaʼmo alino lave lisiyafeʼmo yegemo auneʼagana huno haneʼniye. Kafugaʼae kafugaʼaeʼmo afumo amagiʼa amiʼnayaʼmonanafa ani agufa ofalinimoʼa alagepa huʼa maige maige huʼa maisayafeʼmo Gotitegamo neʼvaya vayaʼmo alagi alino alagepa huno oʼapategaiye.

Himulu 10:19

Konagaʼnimogitapae, huʼna, ani gemo huʼniyaʼmofeʼmo koli osuta Yesu kolaʼaletiʼmo alagi aote mono nopiʼmo uta haigetao.

Himulu 11:28

Agesamo afino fatago huʼniya kavatetiʼmo Isipi vayaʼai yege mafaʼneʼapimo kamitimo apamagiʼniya enisole vekamoʼa Isaleli nofi vayaʼai yege mafaʼneʼapimo oʼapamagisiyafeʼmo Pasova kavaʼmo hutapa sipisipimo amagitapa kolaʼaletiʼmo notapimo kipa yosaleʼmo faleyo, huno hapa paiʼniye.

Himulu 12:24

Yesuʼa folagapi vekamo saufa kotalakemo hu maleʼniya vekalegamo eʼnae. Kolaʼaletiʼmo aino fuli fuli huno faleno apateʼniya kolaʼalegamo eʼnae. Ani kolaʼmoʼa Evo kolaʼmo ago aeno agaseʼniyaʼmofeʼmo hosu kavafeʼmo ge nosifa alagepa kavafekeʼmo ge nehiye.

Himulu 4:16

Inagi atete osuta Gotiʼa yagaino neʼapateya siyaʼaleʼmo fai maiʼnenoʼaeʼmo fikumo laha maeno nelamiya kavategamo vigetao, kana yaʼmo alisuna afinaʼmo hau huno lateteno fikumo laha maeno lamigiyaʼmofeʼmae.

Himulu 6:11

Lahauʼniyanagetapa mukiʼamogitapa ani kavaʼmo hutetapa magoke lapaipa lapakesamo alitetapa lapavayagunagu hutapa agava maime maime neʼvisageʼapaeʼmo atupa afinaʼmo he tisayafeʼmo lapayamukiki hugae.

Himulu 7:19

Keʼaepa gemoʼa uʼa haiʼa hapaisaya kaʼmo valino oʼapateʼniyaʼmonanafa hemenimo ago aeno agaseʼniya kavaʼmo hu maleʼnigeta lavayagunagu huta agava neʼmauna kavatetikeʼmo Goti haopaleʼmo neʼune.

Himulu 9:10

Ani agufa kavaʼmo amega apakufale kavaʼmo haneʼniyana neʼyanagi aninagi sese nehaya kavanagi huno haneʼniye. Ani kavaʼmo haneme haneme neʼesigenoʼaeʼmo saufa afinaʼmo Gotiʼa alino alagepa huno apatesiya afinaʼmo afole aisigenoʼaeʼmo hano hugiye.

Himulu 9:19

Ani kavatefeʼmo Moseseʼa muki keʼaepa geʼamo muki vayaʼaifeʼmo hapa paiteno aikeli pulumakaʼe memeʼeʼmo amagiteno kolaʼamo anipiʼmo laki maleʼneno sipisipimo haesa ayokaʼmo yosa akopamo agiʼamo hisopu akopaleʼmo maleno ki maleʼneno kolapiʼmo aeteno keʼaepa gemo haneʼniya mukuleʼe muki vayaʼai apakufaleʼeʼmo aino fuli fuli huʼniye.

Yemisi 1:6

Amigiyaʼmonanafa lole agesamo oʼafiʼneno alagepa huno agesamo afino fatago huʼnenoʼaeʼmo ge huno afi gegaiye. Lole agesamo neʼafiya vekamo solovala aniteʼmo yasimo neʼaligenoʼaeʼmo aino holakau holakau hulino uneno nehiya agufa anikana huno maiʼniye.

Yemisi 4:8

Goti haopaleʼmo vigenoʼao lapakae lapaopaleʼmo eno. Hosu kavaʼmo nehaya vayaʼmogitapae, huʼna, lapayaʼmo sese hiyo. Lole lapakesamo neʼafiya vayanagi lapaipafatiʼmo oʼaniʼyamo aeta kalo paetapa ataleyo.

1 Pita 1:2

Gotiʼa muki yaʼmo afoʼamoʼmo lapaketenoʼaeʼmo, mafaʼneʼnimo maigae, huteno lekana paino lapateʼniye. Aunemeʼamoʼmo lapakaemo Yesu Kalaisifeʼmo ava gemo afitetapa akame hisageno Yesu Kalaisi kolaʼaletiʼmo aino fuli fuli huno faleno lapatesiyafeʼmo alino lapaote vayaʼamo lapateʼniye. Lusi kava huno fikumo lapa maeno lapamisaʼageno lapaipamoʼmo falu hino.

1 Pita 3:21

Apakaemo sipifiʼmo maiʼnagenoʼaeʼmo Gotiʼa anipatiʼmo apakufamo alino katino apateʼniya kavaʼmo aune kavaʼmo huno Gotiʼa aniʼmo faleʼa nelataya kavatetiʼmo lagufamo alino katino nelate. Fikumo aniʼmo faleʼa neʼapataya kavaʼmoʼa amega apakufale oʼaniʼyaʼageʼmo aeno kalo paeno neʼataleyaʼmonanafa Gotiʼa Yesu Kalaisiʼmo alino he tino ateʼniya kavatetiʼmo yuʼilaga mafaʼnetimo alino alagepa huno lateʼniya mafaʼnetifatiʼmo Goti geʼaleʼmo aeta atagaina huta nehune.

Leveleseni 1:5

Yesu Kalaisiʼa Gotifeʼmo lama ge ava gemo nehiya vekamoʼmo faliʼnaya vayapatiʼmo hogoteno alino he tino ateʼniya yege mafaʼneʼamo maiʼniye. Agaemo ma mopafi ala kini vayaʼaiteʼmo yagaino neʼapateya vekaʼapimoʼa fikumo lapa maeno lapamisigeno lapaipamoʼmo falu hino. Agaemo lagaefeʼmo hau ayamopafiʼmo hauʼnigenoʼaeʼmo hosu kavatimo kolaʼaletiʼmo aeno kalo paeno ataleʼniye.