Hamakaki 3:6 - The Keyagana NT and 25 OT books

⁶ Agaemo he tino mopamo agetenoʼaeʼmo hakumo maleno apateʼniye. Apaketenoʼaeʼmo alu nofi vaya alu nofi vayaʼmo alino hapa faino apataleʼnigeʼa atagu faeʼa uʼeʼa huʼnae. Hanege hanege huno nehaneya avemo aino anakupaeno asagauno aiʼniye. Akeyaʼvilagamo haneʼnaya aveʼamo aiʼa anakupaeʼa asagau aiʼnae. Gotiʼa nehiya kavaʼmo muki afinaʼmo hanege hanege huno nehane.

Hamakaki 3:6 ပူးပေါင်းရင်းမြစ်များ

Aepa Gemae 49:26

Afokamoʼnamo Gotiʼa kaha maesigeka alagepa huka maisana yaʼmo kamuvanageno laginago vayaʼmo Gotiʼa apamiʼniya yaʼmo ago aeno aga seʼniye. Ani yaʼmoʼa magoʼe huno kilino uno haino muki afinaʼmo hanege hanege huno hanesiya avemo kino aino ati kaegaiye. Ani yaʼmoʼa Yosefeʼmo konagaʼamogiʼeʼmo magokepi lokaeno oʼmaiʼnifa aote maiʼniya vekamo agenopaleʼmo asagauno aigiye.

Samu 103:17

Nefalunaʼmonanafa Ala kava nefeʼmo koli huteʼa mono nehaya vayaʼaifeʼmo akeyaʼvilagatiʼmo hau huno apatelineno henagaʼamo afole aisaya afinaʼeʼmo hau huno apatelinuno hau huno apateno hano osugiye. Agaemo laha neʼmaeya kava huno alita apateʼnonanageʼa henagaʼamo aliʼa apateliʼa visaya mafaʼne anagaʼmogimo kotalake geʼamo akame huteʼa ina kavaʼmo hiyo, huno huʼniya gemo neʼafiya vayaʼmo hapa neʼmae.

Samu 104:32

Agaemo mopaleʼmo aulu haeno neʼagegenoʼaeʼmo mopamoʼmo atete nehiye. Agaemo aveleʼmo ayatetiʼmo ame neʼaligenoʼaeʼmo avefatiʼmo halinamo neʼaiye.

Samu 68:16

O alopa avemogae, huʼna, Na kava higekaeʼmo Gotiʼa maisiyafeʼmo lekana pai maleʼniya avemo agetekaeʼmo kaipa kafamo haeʼnane. Ala kava neʼmoʼa Saiyoni aveleʼmo maisiyafeʼmo hauʼniye. Ani aveleʼmo muki afinaʼaeʼmo maige maige huno maigiye.

Samu 90:2

Akeyaʼvilagamo aveʼe ma mopaʼeʼmo alo osuʼnana afinaʼmo hogoteka maiʼnananageka maige maige huka alagi maigane.

Samu 97:5

Gotiʼa muki ma mopafi Ala kava neʼmae. Agaemo emine neʼegeʼapaeʼmo avemoʼmo ina kava huno aniʼmo alino nehamale.

Hatu maeno apate'niya gemae 15:14

Muki nofi vayaʼmogimo ani kavafeʼmo kava gemo afiteʼapaeʼmo atete huʼa kolikamo hugae. Filisatini vayaʼmogimo yulagefaʼmo aigae.

Hatu maeno apate'niya gemae 15:15

Itomi nofi vayaʼaiteʼmo yagaiʼa neʼapataya vayaʼmogimo lusi kava huno apamoʼyamo aigiye. Movapu kotega lokiya ami vayaʼmogimo atete hugae. Muki Kenani koteʼmo maiʼnaya vayaʼmogimo lokiyaʼapimo alagi hano hisigeʼa ataleʼa apaune heʼa uʼa fala kigae.

Hatu maeno apate'niya gemae 15:17

Kagaemo kagaika aveleʼmo apavalelika uka mopamo lapamiguve, huka hapa paiʼnana mopaleʼmo apatesanageʼa maigae. O Ala kava nene, huʼna, Ani mopaleʼmo maisana noʼmo ki maleʼnane. Kaote maisana mono nokamo alika lokiya vaika ateʼnananageno afaʼa hanegaiye.

Hatu maeno apate'niya gemae 19:18

Ala kava neʼmo ata vaipiʼmo maiteno emineʼniyaʼmofeʼmo Sainai avefatiʼmo halinamoʼmo huteno avemo aino atikaeʼniye. Alopa sitopufatiʼmo lusi kava huno halinamo ailino uno nehaiya kava huno halinamo aiʼnigeno avefiʼmo alopa imimaʼmo aliʼniye.

Aiyeya 51:6

Kokuʼnaʼmo halinagana huno alagi hano hisigeʼa oʼagegayaʼmofeʼmo lapakaemo anaga kokuʼnategamo alita maku hutapa ageyo. Ma mopamo kukena yakana huno atafa hegaiyaʼmofeʼmo lapakaemo afelaga mopafiʼmo aulu heyo. Muki ma mopafi vayaʼmo ani kava huʼa faligayaʼmonanafa nagaemo hanege hanege huno hanesiya fatago kavaʼniletiʼmo vayaʼnimo alagi apakufamo aliʼna katiʼna apatesugeʼa muki afinaʼmo maige maige huʼa maigae. Maisageʼa vayaʼmogi fatago kavaʼnimo aliʼa hano huʼa oʼatalegae.

Aiyeya 51:8

Kafamoʼmo kukena yaʼmo nehatagaiya kava huʼa apakaemo aliʼa hano huʼa apatalegae. Aliʼa hano huʼa apatalegayaʼmonanafa fatago kavaʼnimoʼa hano osuno muki afinaʼmo hanege hanege huno hanegaiye. Apakufamo aliʼna katiʼna neʼapatova vayaʼmogi muki afinaʼmo maige maige huʼa maigae.

Maika 5:8

Ani logufaʼa vayaʼmo Yekopu vayaʼmogimo laiyonimoʼmo afela afumo hapaesiyafeʼmo nehiya kava huʼa alu nofi vayaʼai folagapiʼmo hapaegae. Aikeli laiyonimoʼmo sipisipi anagaʼmogi folagapiʼmo maiʼneno apatafauge hapaeno nege nehiya kava huʼa maigae. Mago sipisipi anagaʼmo hapa maesiya vekamo maiʼniya kava huʼa Yekopu kame vayaʼamo hapa maesaya vayaʼmo oʼmaigae.

Neyomi 1:5

Ala kava neʼmoʼa emineʼnigenoʼaeʼmo imimaʼmo aliʼnigeno muki alopa avemoʼmo kanage kanage huge muki aise avefatiʼmo hamaiʼmo alige nehiye. Eno avaʼyi hisiya afinaʼmo ma mopamo leno sagaligiye. He, Agaemo mopaʼe ma mopafi vayaʼeʼmo leno pasagaligiye.

Hamakaki 1:12

Hamakaʼa hunoʼaeʼmo, O Ala kava nene, huʼna, kaote Gotiʼnimogae, kagaemo muki afinaʼmo neʼmaina Gotigamo maiʼnane. Lagaemo ofaligune. O Ala kava nene, huʼna, kagaemo agoti huka apateteka kayoʼmo apamisanafeʼmo gemo ago hu maleʼnane. Kagaemo lokiya yafakana huka maiʼneka alika api aika apatesanafeʼmo gemo hu maleʼnane.

Hamakaki 3:10

Avemogimo kageteʼapaeʼmo kanage kanage huʼnae. Alopa aniʼmo emineʼniye. Aniʼmo vasilonaʼafatiʼmo fugaligali huteno alopa agemo aiʼniye.

Matiyu 24:35

Kokuʼnaʼe mopaʼeʼmo hano hugiyaʼmonanafa geʼnimo alagi hano osuno afaʼa hanege hanege huno hanegaiye.

Luki 1:50

Agaefeʼmo koli huteʼa aiyafiʼmo maiʼnaya vayaʼaifeʼmo hau huno apateme apateme uno hau huno neʼapate.

Apa 17:26

Agaemo magoke vekamo alo huʼniya vekafatiʼmo alu nofi vaya alu nofi vayaʼmo alino afole aino apateʼniye. Hogoteno hunoʼaeʼmo, hainu afinaʼmo maisafi haiyategamo maisafi, huno lekana pai maleʼniye.

Himulu 13:8

Yesu Kalaisiʼa alu afina alu afinaʼmo alu kavaʼmo huno noʼmaifa akeyaʼvilaga maiʼniya kavakeʼmo huno neʼmaiyanageno henagaʼamo ani agufa kavakeʼmo huno maigiye.

Yasuva 10:42

Ala kava neʼmo Isaleli vayaʼmogi Gotiʼapimoʼmo hapa maeʼnigeʼapaeʼmo Yasuvaʼe Isaleli vayaʼmogiʼeʼmo magoke afinaʼmo muki ani kini vayaʼeʼmo kamemo huʼa aeʼa apaka seteʼa mopaʼapimo aliʼnae.