Galesiya 3:14 - The Keyagana NT and 25 OT books

¹⁴ Gotiʼa Emalehamuʼmo alino auleno ateʼniya kava huno alu nofi vayaʼmogita alino auleno latesiyafeʼmo Kalaisiʼa hatu maeno lateʼniye. Gotiʼa polomasi gemo hunoʼaeʼmo, Nauneʼnameʼmo aliʼna lapamiguve, huno huʼnigeta Aunemeʼamo lagesamo afita fatago hisuna kavatetikeʼmo alisunafeʼmo hatu maeno lateʼniye.

Galesiya 3:14 ပူးပေါင်းရင်းမြစ်များ

Aepa Gemae 22:18

Geʼnimo akame huʼnanaʼmofeʼmo kaginago mafaʼnekafatiʼmo muki ma mopafi nofi vayaʼmo aliʼna auleʼna apategauve, huno ha paiʼniye.

Aiyeya 32:15

Ani agufa hosu kavaʼmo haneme haneme neʼvisigenoʼaeʼmo Ala kava neʼmoʼa anaga kotegatiʼmo Aunemeʼamo anikana huno lakitalesigeno lagaetegamo eminegaiye. Eminesigeno kahaepa koʼmoʼa alagepa mopamo alino hamalesigeno alu neʼya alu neʼyaʼmo afole aigiye. Afole aigiyaʼmonanafa asole neʼyaʼmo afole neʼaiya hoyaeʼmo huʼapaeʼmo, yahaofilagamo haneʼniye, huʼa hugae.

Aiyeya 49:6

Ala kava neʼmoʼa ina gemo huno naha painoʼaeʼmo, Kagaemo Yekopu nofi vayaʼmo alika he tika apatesanageʼa halate lokiya vaiʼa maige yagaiʼna apateʼnogeʼa afaʼa maiʼnaya Isaleli vayaʼmo alika alagepa huka apatesanageʼa halate alagepa huʼa maige hisayafeʼmo ani aise aliʼyaʼmo afaʼa alisanana kanale osugiye. Ani aliʼyaʼe magoʼe huʼna alu aliʼyaʼeʼmo kamiguve. Nagaemo ma mopafi muki haopalegamo maiʼnaya vayaʼmogi apakufamo alika katika apatesanafeʼmo ani malaga nofi vayaʼmogi ha le yaʼapigana huka maigane, huʼna aliʼna kateʼnove, huno huʼniye.

Aiyeya 52:10

Ala kava neʼmoʼa muki alu nofi vayaʼe alu nofi vayaʼmogi apaulagaleʼeʼmo aote lokiyaʼamo alino apave liʼniye. Gotitimoʼmo lagufamo alino katino latesigeʼa muki ma mopafi vayaʼmogimo agegae.

Luki 11:13

Lapakaemo hosu vayaʼmo maiʼnayaʼmonanafa mafaʼnetapimo alagepa yaʼmo alita neʼapamiya agufa kavaʼmo huno kokuʼnapi afotapimofeʼmo kaote Kaunekameʼmo alika namiyo, huʼa ge huʼa afi gesaya vayaʼmo afaʼa magoʼe huno alino apamigiye, huno hapa paiʼniye.

Luki 24:49

Afiyo, huno, Afoʼnimoʼmo polomasi gemo hunoʼaeʼmo, Nauneʼnameʼmo aliʼna lapamiguve, huno lapa paiʼniyanageʼna Goti Aunemeʼamo aliʼna atesugeno emineno lapakaeʼeʼmo maigiye. Emiʼnegaiyaʼmonanafa hogoteta uta Yulusalemu taonifikeʼmo agava maime maime neʼvigenoʼao Goti Aunemeʼamoʼmo emineno lokiya vaino lapategaiye, huno hapa paiʼniye.

Yoni 7:39

Yesuʼa Goti Aunemeʼamo agaefeʼmo apakesamo afiʼa fatago nehaya vayaʼmogi alisaya Aunemeʼaeʼmo ava gemo huno hapa paiʼniye. Ani afinaʼmo Yesuʼa he tino kokuʼnapiʼmo uno haino ha le konali yaʼamo oʼaliʼniyaʼmofeʼmo Goti Aunemeʼamo emi noʼmeʼniya afinaʼmae.

Apa 2:33

Gotiʼa ago alino he tino ateteno kokuʼnapiʼmo avalelino uno haino lamaga haopaleʼmo ateʼnigeno maiʼniye. Muki yaʼmo Afoʼamoʼmo hogoteno, kamiguve, huno ha paiʼniya Aunemeʼamo ago amiʼnigeno Yesuʼa Goti Aunemeʼamo aniʼmo lakigekana huno alino ateʼnigeno emineʼnigetapaeʼmo hemenimo lapakaemo ani afole aiʼniya kavaʼmo ago agetetapa afiʼnae.

Apa 4:12

Mago alu vekamoʼmo lapakufamo alino katino lapatesiya vekamo oʼmaiʼnifa agaekeʼmo magokeʼage maiʼniye. Mago alu agiʼe vekamo oʼmaiʼniyaʼmofeʼmo Gotiʼa magoke vekamo agiʼamo ma mopafi vayaʼaina apamiʼniyanageʼa agimo aeʼa ge hisageno hapa maeno, huno hapa paiʼniye.

Apa 5:32

Lagaemo ani kavafeʼmo ava gemo huta aeta hakalo huta hapa nepauna vayaʼmo maiʼnone. Lagaeʼe Goti geʼamo akame nehaya vayaʼaina fiku hapa maeno apamiʼniya Aunemeʼamoʼeʼmo ava gemo nehune, huʼa hapa paiʼnae.

1 Kolitiyani 12:13

Ani kavatefeʼmo Kalaisiʼa mukiʼamogitamo Aunemeʼaletiʼmo agufafiʼmo faleno lateʼnigeta magoke agufaʼamo maiʼnone. Ani kavaʼmo huno Aunemeʼamo lamiʼnigeta aniʼmo negekana huta neteta aliʼnone. Mukiʼamogitamo Yu vayanagi Yu nofi vayapatiʼmo oʼmaiʼnaya vayanagi kalavusifi maiʼneʼa afa aliʼyaʼmo neʼaliya vayanagi afaʼa neʼmaiya vayaʼmogi huta magoke Kalaisi agufaʼamo maiʼnone.

Galesiya 3:16

Inagi Gotiʼa Emalehamufeʼmo, fikumo kaha maegauve, huno ha paiʼniya polomasi gemo aginago vekaeʼmo, kaha maegauve, huno ha paiʼniye. Gotiʼa Emalehamu aginago vayaʼaifeʼmo ani gemo hapa opaiʼnifa magoke aginago vekaeʼmo ani gemo ha paiʼniye. Ani magoke aginago vekamo Kalaisiʼmae.

Galesiya 3:2

Magoke kavafeʼmo ge huʼna lapafi gesuvafeʼmo huve. Lapakaemo keʼaepa gemo akame huʼnaya kavatetiʼmo Goti Aunemeʼamo aliʼnafi Kalaisifeʼmo ava gemo afitetapa lapakesamo afita fatago huʼnaya kavatetiʼmo aliʼnae.

Galesiya 4:6

Lapakaemo mafaʼneʼamo maiʼnayaʼmofeʼmo Gotiʼa Mafaʼneʼamo Aunemeʼamo alino ateʼnigeno emineno lapaipafiʼmo uno haino maiʼnigetapaeʼmo, Afo, Afotimogae, hutapa ge nehae.

Efasasi 2:18

Agaemo lagaeʼe lapakaeʼeʼmo kaʼmo valino lateʼniyanageta hemenimo magoke Aunemeʼaletiʼmo muki yaʼmo Afoʼamotegamo afaʼa uta haigune.

Efasasi 2:22

Agaepiʼmo Gotiʼa Aunemeʼamo noʼafiʼmo maisiyafeʼmo lapakaeʼeʼmo alino anupa huno no kigekana huno nelapate.

Efasasi 3:16

Nunumuʼmo nehuʼnaeʼmo, lusi kava huka ha le konali vekamo maiʼnanaʼmofeʼmo ha le konali kagemi yakalefeʼmo himamukaletiʼe Kaunekametetiʼeʼmo apakupi mafaʼnemo lokiya vaika apato. Kalaisiʼa agaefeʼmo apakesamo afiʼa fatago nehaya kavatetiʼmo apaipafiʼmo alagi maiyo. Kalaisiʼa apaipafiʼmo maiʼnisigeʼapaeʼmo hapau apayamopafiʼmo hapauʼnisigeʼa hapafuʼyamo aegekana huʼa maiʼneʼa noʼmo faiʼa neʼataya yateʼmo alagi atafauʼa alagi huʼa maiyo.

Efasasi 4:30

Gotiʼa henagaʼamo lapavalesiya afinafeʼmo Aunemeʼaletiʼmo lapakaeteʼmo alagena kavaʼamo ago hu maletenoʼaeʼmo, mafaʼneʼnimo maiʼnae, huno huʼniyaʼmofeʼmo Aote Aunemeʼamoʼmo aipamoʼmo kana hisiya kavaʼmo osiyo.

1 Pita 1:22

Lama gemo afitetapaeʼmo lapaipamo sese huta atetetapa konaga vayatapieʼmo lama ge huno lapau lapayamopafiʼmo lapauʼniyaʼmofeʼmo lokiya kavaʼmo hutapa yaveyave lapaipafatiʼmo lapau lapayamopafiʼmo lapaino.

1 Pita 3:9

Inagi mago vayaʼmogimo lapakaetegamo hosu kavaʼmo nehisagetapaeʼmo anonaʼapilefeʼmo hosu kavaʼmo osiyo. Mago vayaʼmogimo lifana huʼa lapatesagetapaeʼmo anonaʼapileʼmo alita auleta apateyo. Gotiʼa ani kavaʼmo hisagenoʼaeʼmo alino auleno lapatesiyafeʼmo keya aeno ge huʼniye.