Galesiya 3:10 - The Keyagana NT and 25 OT books

¹⁰ Goti Mukufiʼmo avoʼmo kae maleʼniya gemoʼmo hunoʼaeʼmo, Ina lagimo muki afinaʼmo muki keʼaepa geʼamo akame huʼa hano nosisafigeno Gotiʼa lifana huno neʼapate, huno huʼniyaʼmofeʼmo Goti keʼaepa gemo akame nehaya kavaʼapilefeʼmo aliʼa amufa amiʼnaya vayaʼaifeʼmo lifana huno apateʼniye.

Galesiya 3:10 ပူးပေါင်းရင်းမြစ်များ

Aepa Gemae 4:11

Amagiʼnanagenoʼaeʼmo kaganakamo kolaʼamo mopamoʼmo ago neʼniyaʼmofeʼmo kagaeteʼmo hosu kavaʼmo afole aino, huʼna lifana huʼna katove.

Aiyeya 43:28

Huʼnayaʼmofeʼmo nagaemo mono huʼa nelapataya vayatapimo hosu apakiʼapimo apamige Yekopu nofi vayaʼmo lifana huʼna apatege Isaleli vayaʼmo afaʼa apateʼnisugeʼa huʼa faipa huʼa apatege hugae.

Matiyu 25:41

Huno hapa paiteno hoga haopaleʼmo maiʼnisaya vayaʼaifeʼmo hunoʼaeʼmo, Afoʼnimoʼmo lifana huno lapateʼniya vayanagi nagaetegatiʼmo ataleta lapaune heta viyo. Gotiʼa Nevoʼe hosu apaune vayaʼaʼeʼmo maisayafeʼmo alo hu maleʼniya ata kopiʼmo leno yu oseno lege lege huno neʼmaiya ata kopiʼmo lamitapa maiyo.

Lomu 4:15

Na kava higenoʼaene. Keʼaepa geʼamo ohaneʼniyesinana keʼaepa geʼamo amagiʼa noʼatalaesine. Hiyaʼmonanafa keʼaepa geʼamo haneʼniyaʼmofeʼmo aipamo leno neʼapateya kayoʼmo apamisiya agufa kavaʼmo alino afole aino neʼate.

Lomu 6:23

Na kavaʼmo nehagenoʼaene. Hosu kavaʼmo aliʼyaʼamo neʼaliya vayaʼai miyaʼapimo falisaya kavaʼmo haneʼniyaʼmonanafa Gotiʼa fikumo hapa maeno neʼapamiya kavaʼmo alagepa huʼa maige maige huʼa maisaya kavaʼmo haneʼniye. Agaemo Ala kava netimo Yesu Kalaisipiʼmo neʼmaiya vayaʼmo neʼapamiye.

Lomu 8:7

Atafa apaipamoʼmo hauʼniya kavapiʼmo maiʼnisaya vayaʼmogi Goti aiyafiʼmo oʼmaige Goti keʼaepa geʼamo oʼafige nehayanageʼa afaʼa oʼafigayaʼmofeʼmo Goti kame vayaʼamo maiʼnae.

2 Kolitiyani 3:7

Vayaʼmo neʼapamagiya gemo yafateʼmo avoʼmo kae maleʼniya gemo aliʼyaʼamoʼmo ha le konali yaʼamo haneʼniye. Moseseʼa keʼaepa gemo aliʼniya afinaʼmo augosafatiʼmo aeno ha leʼnigeʼapaeʼmo Isaleli vayaʼmogimo alagi aulu haeʼa oʼageʼnayaʼmonanafa augosafatiʼmo aeno ha leʼniya yaʼamo aise aise huno hano hume hume eʼniya ha le konali yaʼamo haneʼniye.

Galesiya 2:16

Lagaemo afiʼnonana Gotiʼa keʼaepa geʼamo akame nehaya kavatetiʼmo, naulagaleʼmo fatago vayaʼmo maiʼnae, huno hapa nopaiyaʼmonanafa Yesu Kalaisifekeʼmo apakesamo afiʼa fatago nehaya kavatetikeʼmo, naulagaleʼmo fatago vayaʼmo maiʼnae, huno hapa nepaiye, huta ago afiʼnone. Gotiʼa keʼaepa geʼamo akame nehuna kavatetiʼmo, naulagaleʼmo fatago vayaʼmo maiʼnae, huno laha opaigiyaʼmonanafa Kalaisifekeʼmo lagesamo afita fatago nehuna kavatetikeʼmo, naulagaleʼmo fatago vayaʼmo maiʼnae, huno laha paisiyafeʼmo lagaeʼeʼmo Kalaisifekeʼmo lagesamo afita fatago huʼnone. Gotiʼa muki vayaʼaifeʼmo hunoʼaeʼmo, keʼaepa geʼnimo akame hisaya kavatetiʼmo naulagaleʼmo fatago vayaʼmo maiʼnae, huno nosiyaʼmofeʼmae.