Failimoni 1:16 - The Keyagana NT and 25 OT books

¹⁶ Kalavusi aliʼyakamo neʼaliya vekamo magoʼe huno oʼalino afaʼa maiʼniya vekaeʼmo lahau layamopafiʼmo lahauʼniya konagatimo maiʼniyaʼmofeʼmo afaʼa alika falu fala huka ategane. Magoʼe huno konagaʼnimoʼmo maiʼniyaʼmonanafa ma mopafi konagakamoʼmo maige Ala kava netefeʼmo konagakamoʼmo maige huʼniyaʼmofeʼmo afaʼa alika falu fala huka atesana kavaʼmo haneʼniye.

Failimoni 1:16 ပူးပေါင်းရင်းမြစ်များ

Matiyu 23:8

Nehapaiyaʼmonanafa lapakaefeʼmo, ala tisa nene, huʼa lapaki aesaya agufa kavatapimo ohaneʼniye. Ala tisa netapimo magoke vekatapimo maiʼnigetapaeʼmo lapakaemo magoke aiyaya konaga vayaʼmo maiʼnayaʼmofeʼmae.

Apa 9:17

Ha paiʼnigeno Ananaiyasiʼa uno ani nopiʼmo uno haino Solo agufaleʼmo ayaʼmo maleʼnenoʼaeʼmo, Solo konagaʼnimogae, huno, Ala kava neʼmo Yesuʼa kateʼmo neʼanageno kaulagaleʼmo afole aiʼnigeka ageʼnana vekamoʼmo nagaemo alino nateʼnigeʼna eʼnove. Nagaemo kaulagamo aliʼna ayakeʼna katesugeno Goti Aunemeʼamoʼmo kaipafiʼmo havai tesiyafeʼmo alino nateʼnigeʼna eʼnove, huno ha nepaigenoʼaeʼmo

1 Kolitiyani 7:22

Ala kava neʼmo kalavusifiʼmo maiʼneʼa aliʼyaʼmo neʼaliya vayaʼaifeʼmo keya aeno ge huteno apakupi mafaʼnemo hatu maeno apateʼnigeʼa Ala kava neʼmo afa vayaʼamo maiʼnae. Kalaisiʼa afaʼa maiʼnaya vayaʼaifeʼmo keya aeno ge huteno nofi aeno apateʼnigeʼa nofiteʼmo maiʼneʼa aliʼyaʼamo neʼaliya vayaʼmo maiʼnae.

Kolosi 3:22

Aliʼyaʼmo neʼaliya vayaʼmogitapae, huʼna, fiku yanagetapa aliʼyaʼmo afoʼamogimo amuse huʼa lapatesayafeʼmo apaulagaleʼmo maiʼnetapaeʼmo geʼapimo neʼafiye. Gotifeʼmo koli hutetapa muki afinaʼmo lapaipafatiʼmo geʼapimo afiyo.

1 Timoti 6:2

Aliʼyaʼmo afoʼamoʼmo agesamo afino fatago huʼnisiya vekamoʼmo maiʼnisiyana aliʼyaʼamo neʼaliya vayaʼmogimo huʼapaeʼmo, konagatimoʼmo maiʼniyaʼmofeʼmo geʼamo oʼafigune, huʼa osuʼa, lagaemo ha maesuna vekamo agesamo afino fatago huʼniya vekamo lahauʼniya vekamo maiʼniyaʼmofeʼmo geʼamo afigune, huʼa hisaya kavaʼmo haneʼniye. Ani kavaʼmo hiyo, huka hapa paiteka alika apaya malo.

Himulu 3:1

Gotiʼa lapakaefeʼmo kokuʼnapiʼmo uta haitapa magokepi lokaeta maisayafeʼmo keya aeno ge huʼniya lapaote konagaʼnimogitapae, huʼna, Yesufekeʼmo lapakesamo afifi hutapa maiyo. Lagaemo lagesamo afita fatago hutaeʼmo, Goti apa vekaʼamo maiʼneno hogote mono vekamo mono huno nelateya vekamo maiʼniye, huta aeta hakalo nehune.

1 Yoni 5:1

Ina lagimo Yesuʼa Kalaisiʼmo vayaʼmo maiʼniye, huʼa huteʼa apakesamo afiʼa fatago nehafi Gotiʼa alino apateʼnigeʼa mafaʼneʼamo maiʼnae. Muki vayaʼamogimo alino apateʼniya vekaeʼmo hapau apayamopafiʼmo hapausiyana ani kava huno alino apateʼniya mafaʼneʼamogiʼefeʼmo hapau apayamopafiʼmo nehapaiye.