Hatu maeno apate'niya gemae 34:6 - The Keyagana NT and 25 OT books

⁶ Ala kava neʼmo Mosese aulagaleʼmo neʼunoʼaeʼmo, Nagaemo Ala kava neʼmo Gotiʼnamae nagaemo Ala kava neʼmo Gotiʼnamae. Nagaemo nahau nayamopafiʼmo nahauge fikumo hapa maeʼna apamige malage huʼna naipamo leʼna oʼapatege lusi kava huʼna nahau huʼna apatege geʼnimo akame huge huʼna neʼmauve.

Hatu maeno apate'niya gemae 34:6 ပူးပေါင်းရင်းမြစ်များ

Aepa Gemae 24:27

Mono hunoʼaeʼmo, Ala vekaʼnimo Emalehamu Ala kava neʼamo Gotifeʼmo aliʼna auleʼna ategauve. Gotiʼa ala vekaʼnimo oʼataleno hau huno atege lama geʼamo alagi akame huge huteno ha maeʼniye. Nagaemo kategamo eʼnogenoʼaeʼmo Ala kava neʼmoʼa kaʼmo alino ho huno nateʼnigeʼna ala vekaʼnimo nofi vayaʼalegamo eʼnove, huno mono huʼniye.

1 Kini 19:11

Ala kava neʼmoʼa Ilaiyafeʼmo, Kagaemo yafa kapatiʼmo eka emikeka aveleʼmo naulagaleʼmo he tika maiyo, huno ha paiʼniye. Afiyo, Ala kava neʼmo eno uʼnigeno lusi kava huno lokiya yasimo aliteno aveʼe yafaʼeʼmo alino anaku paeʼniye. Ala kava neʼmo ani yasifiʼmo oʼmaiʼniye. Yasimo alitegenoʼaeʼmo imimaʼmo aliʼniye. Ala kava neʼmo ani aliʼniya imimapiʼmo oʼmaiʼniye. Imimaʼmo alitegenoʼaeʼmo ata leʼniye. Ala kava neʼmo ani atafiʼmo oʼmaiʼniye. Atamo letegenoʼaeʼmo mago vekamoʼmo aise gefatiʼmo sumi sumi huno ge huʼniye.

Samu 108:4

Kahau huka nelatana kavaʼmo atupaʼamoʼmo kokuʼnapiʼmo uno haino aeno aga seʼniye. Muki afinaʼmo gekamo akame nehana kavaʼmoʼa hiyateʼmo uno haiʼniye.

Samu 111:4

Ala kava neʼmoʼa alopa alagepa kavaʼmo huʼnigeʼa hapau aiʼnaya kavafeʼmo apake okaniʼa apakesamo afisayafeʼmo alino he tino apateʼniye. Agaemo fiku hapa maeno apamige hau huno apatege huno maiʼniye.

Samu 112:4

Hani huʼniya yapiʼmo ha le yaʼmoʼa fatago vekalefeʼmo aeno ha legaiye. Agaemo fiku hapa maeno apamige hau huno apatege vayaʼaitegamo hapauʼniya kavaʼmo huge fatago kavaʼmo huge nehiye.

Samu 116:5

Ala kava neʼmoʼa fikumo hapa maeno apamige fatago kavaʼamo huge nehiye. Gotitimoʼmo hau huno nelateya vekamo maiʼniye.

Samu 138:2

Kagaemo nagaefeʼmo muki afinaʼaeʼmo alagi kahauʼnigeka lama geʼageʼmo nehanaʼmofeʼmo nagaemo kagaemo kaote mono noʼmo aulagamo mono huʼna kagikaleʼmo aliʼna asaga huguve. Kagaemo kagikaleʼmo alika asaga huteka gekaleʼmo magoʼe huka alika asaga huʼnane.

Samu 145:8

Ala kava neʼmoʼa fikumo laha maeno lamige hau huno latege malage huno aipamo leno olatege hau ayamopafiʼmo hauge nehiye.

Samu 146:6

Ani Gotiʼmo kokuʼnanagi ma mopagi solovala aninagi ani yateʼmo muki maiʼnaya yanagi huno alo huʼniye. Agaemo muki afinaʼaeʼmo agaiʼa geʼamo akame nehiye.

Samu 31:19

Kagaefeʼmo koli nehaya vayaʼaiteʼmo magoʼe magoʼe huka alagepa kavaʼmo nehane. Apamisanafeʼmo alagepa kavaʼmo alika anupa huka neʼatane. Kagaemo vayaʼai apaulagaleʼmo kagaefeʼmo aliʼa amufa nekamiya vayaʼmogi kanale alagepa kavaʼmo apamisanafeʼmo alika alo huka ateʼnane.

Samu 57:10

Kahau huka nelatana kavaʼmo atupaʼamoʼmo kokuʼnapiʼmo uno haino aeno aga seʼniye. Muki afinaʼmo gekamo akame nehana kavaʼmoʼa hiyateʼmo uno haiʼniye.

Samu 91:4

Agaemo hakumo alino atalelineno hakufiʼmo alino fala kino katesigeka alagepa huka hakufiʼmo fala kika maigane. Lama geʼamoʼmo kagae halegukana huno haneʼneno yagaino katesigeka maigane.

Hatu maeno apate'niya gemae 20:5

Nagaemo Ala kava neʼmo Gotitapimoʼnamo neʼmauva naimuʼyaleʼmo maiʼnaya aigofe gotigifeʼmo naipa kafamo hapaeteʼna kaino nefauva vekamo maiʼnovaʼmofeʼmo alu gotigitefeʼmo lapaleʼyamo faiʼnetapa ape hutapa mono osiyo. Afoʼapimogi hosu kavaʼapilefeʼmo nagaefeʼmo ohapauʼnigeʼa apaini huʼa neʼnataya vayaʼmogi mafaʼne anagaʼapimo nagaemo kayo apamiguve. Nagaemo mafaʼneʼapimogi aliʼa apatesaya mafaʼnemo kayoʼmo apamige apakaemo aliʼa apateme apateme visaya mafaʼnemo kayoʼmo apamige huguve.

Hatu maeno apate'niya gemae 33:19

Ala kava neʼmoʼa Mosesefeʼmo ha painoʼaeʼmo, Nagaemo nahau nayamopafiʼmo neʼnahaiya alagepa kavaʼnimo aliʼna atesugeno visigeka agegane. Nagaemo nagiʼnimo Ala kava neʼmo maiʼnove, huʼna kaha paisugeka afigane. Ina lagifeʼmo fikumo hapa maeʼna apamiguve, huʼna huʼnisufigeʼna fikumo hapa maeʼna apamiguve. Ina lagifeʼmo nahau nayamopafiʼmo nahauʼnisifi apakaefeʼmo afaʼa nahau nayamopafiʼmo nahaugiye.

Mai'naya kavane 3:3

Kahau huka apateteka lama geʼageʼmo hapa paiyo. Ani lole kavaʼmo oʼataleka atafauka alika lugokafiʼmo nofitetiʼmo kige kaipafiʼmo avoʼmo kae malege huvo.

Aiyeya 12:4

Kagaemo ani afinaʼmo ina gemo hugane. Ala kava neʼmo agiʼaleʼmo alita asaga hiyo. Agaefeʼmo agimo aeta keya aeyo. Muki nofi vayaʼaifeʼmo alopa aliʼyaʼmo neʼaliya kavafeʼmo aeta hakalo hiyo. Ala agiʼamo aliʼniye, hutapa hiyo.

Aiyeya 65:16

Gotiʼa oʼapamagiʼniya vayaʼmo ma mopafiʼmo maiʼneʼapaeʼmo apakaiʼapimo alino auleno apatesiyafeʼmo lama geʼageʼmo nehiya Gotiʼa agiʼaletiʼmo apakaiʼapimo aliʼa auleʼa apategae. Ina kava huʼa vayaʼmogimo apagoʼyamo ataleteʼapaeʼmo lama geʼageʼmo nehiya Goti agiʼaletiʼmo gemo hugae. Nagaemo akeyaʼvilagamo hanageke kavaʼapieʼmo nage kaniʼna ataleʼnovaʼmofeʼmo aliʼna auleʼna apategauve.

Yona 4:2

Yonaʼa nunumuʼmo hunoʼaeʼmo, Ala kava nene, huno, Koʼnimo ataleʼna oʼmeʼnova afinaʼmo ani kavaʼmo hugane, huʼna huʼnofiye. He, ani gemo ago huʼnove. Ani kavaʼmo hugane, huʼna nagesamo afiʼnovaʼmofeʼmo ataleʼna naune hetaleʼna Tasisi taonifiʼmo ugefeʼmo huʼnove. Ago afiʼnovana kagaemo fiku hapa maeka apamiteka kahau huka neʼapatana Gotigamo maiʼnane. Kaipamo malage huno nole. Kahau kayamopafiʼmo kahauʼniya kavaʼmo asole kavakamo haneʼniye. Kagaemo vayaʼmo apamagisanafeʼmo okahauʼniyaʼmofeʼmo halate alu kaipa kagesamo afiʼnane.

Maika 7:18

Ina laʼmo Gotigakana huno maiʼniye. Kagaemo hosu kavaʼapilefeʼmo afaʼa ateyo, huka huteka alika neʼatalane. Kagaemo aise nofi vayaʼmo logufa vayakamogimo gekamo amagiʼa ataleʼnaya hosu kavaʼapimo uka aeka aga seka alika neʼatalane. Hau huno latesiyafeʼmo amuse nehiyaʼmofeʼmo muki afinaʼmo aipamo leno lateme lateme noʼviyanageno hau huno lategaiye.

Maika 7:20

Kagaemo Yekopu aginago vayaʼmogita laha maeka Yekopufeʼmo ha paiʼnana lama ge kotalake gemo akame huge Emalehamu aginago vayaʼmogitaeʼmo kahau huka latege hugane. Akeyaʼvilagamo kagaemo laginago vayaʼaifeʼmo kagoʼyamo ataletekaeʼmo, Nagaemo lama gemo huʼnaeʼmo, lapa maeʼna lapamiguve, huka ani hapa paiʼnana gemo akame hugane.

Neyomi 1:3

Ala kava neʼmoʼa vase vase huno aipamo leno apategaiyaʼmonanafa lusi kava huno lokiya Gotiʼa maiʼniye. Agaemo hosu kavaʼapilefeʼmo vaiʼapimo haneʼnisiya vayaʼmo afaʼa apakegeno oʼapategaiye. Ala kava neʼmoʼa kaʼaleʼmo neʼvigenoʼaeʼmo alopa yasiʼe koʼeʼmo afole neʼaiye. Mago vekamo uneno nehigenoʼaeʼmo mumusopamoʼmo nehiya agufa kava huno Ala kava neʼmoʼa uneno nehigenoʼaeʼmo hiyaʼmoʼa mumusopagana huno afole neʼaiye.

Yoni 1:17

Ani kavatefeʼmo Gotiʼa Mosesetetiʼmo keʼaepa geʼamo lamiʼniyaʼmonanafa Yesu Kalaisitetiʼmo fiku laha maeno lamiteno lama geʼamo alino afole aino ateʼniye.

Lomu 2:4

Gotiʼa kagemi yaʼagana huno maleʼniya yapatiʼmo kagaetegamo lusi alagepa kavaʼmo huteno malage huno aipamo leno okateno yatala afinaʼmo afaʼa nekateyaʼmonanafa alagepa huka kagesa oʼafiʼneka afa kavane, huka kagesamo neʼafipiye. Gotiʼa kaipamo alika afe lesanafeʼmo kagaetegamo alagepa kavaʼmo nehiye, huka oʼafiʼnapiye.

Yemisi 5:11

Lagaemo hutaeʼmo, oʼataleʼa atafauʼa alagi huʼa maiʼnaya vayaʼaifeʼmo Gotiʼa hunoʼaeʼmo, naulagaleʼmo alagepa huʼa maiʼnaya vayane, huno nehiye, huta nehune. Lapakaemo ago afiʼnayana akeyaʼvilaga vekamo Yopuʼa kana yaʼmo aliʼnenoʼaeʼmo oʼataleno atafauno alagi huno maime maime neʼegenoʼaeʼmo Ala kava neʼmoʼa ha maeʼniya kavafeʼmo ava gemo ago afiʼnae. He, Ala kava neʼmoʼa lusi kava huno hau huno apateteno hau ayamopafiʼmo nehaiya vekamo maiʼniye, hutapa ago afiʼnae.