Efasasi 6:12 - The Keyagana NT and 25 OT books

¹² Na kava hinagetaene. Lagaemo apakufaʼe kolaʼapiʼeʼmo haneʼniya vayaʼeʼmo kamemo nosunaʼmonanafa kokuʼnapiʼmo maiʼneʼa hosu kavaʼmo huʼa yagaiʼa neʼapataya apaune vayaʼeʼmo kamemo nehune. Ala apaki vayaʼenagi himamu vayaʼenagi ma mopafi vayaʼmo hani yapiʼmo neʼmaiya vayaʼaiteʼmo yagaiʼa neʼapataya vayaʼenagi huta kamemo nehunaʼmofeʼmo

Efasasi 6:12 ပူးပေါင်းရင်းမြစ်များ

Matiyu 16:17

Yesuʼa ha painoʼaeʼmo, Saimoniyo Yona mafaʼneʼamogae, huʼna, Gotiʼa alino auleno kateʼniye. Mago ma mopafi vekamoʼmo alino kave oliʼnifa kokuʼnapi Afoʼnimoʼmo alino kave liʼnigeka nageka alagepa huʼnane.

Luki 13:24

aise kipapiʼmo uta haisayafeʼmo lapaya mukiki hiyo. Nagaemo lapa paiʼnaeʼmo, asole vayaʼmo uʼa haisayafeʼmo hugayaʼmonanafa afaʼa uʼa ohaigae.

Luki 22:53

Nagaemo lapakaeʼeʼmo muki afinaʼae afinaʼaeʼmo alopa mono nopiʼmo maiʼnogetapaeʼmo oʼnatafauʼnayaʼmonanafa hemenimo lapakaemo ani kavaʼmo hisayafeʼmo hani nehiya kavateʼmo neʼyagaiya vekamo himamuʼaletiʼmo hisiya afinaʼmo ago afole aiʼnigetapaeʼmo nehae, huno hapa paiʼniye.

Yoni 12:31

Hemenimo ma mopafi vayaʼai hosu kavaʼapimo afole aisigeno Gotiʼa alino fako huno apategaiye. Hemenimo ma mopafi vayaʼaiteʼmo yagaino neʼapateya vekamo alino hafaino atalegaiye.

Yoni 14:30

Ma mopafi vayaʼaiteʼmo yagaino neʼapateya vekamo ago neʼeyaʼmofeʼmo yatala gemo lapa opaiguve. Ago neʼeyaʼmonanafa agae yaʼmo naipafiʼmo ohaneʼniyaʼmofeʼmo afaʼa yagaino oʼnategaiye.

Yoni 16:11

Nagaemo ma mopafi vayaʼaiteʼmo yagaino neʼapateya vekamo ago agoti huʼna ateʼnovaʼmofeʼmo agoti huʼna apatesuva kavaʼmo alino apave lisigeʼa agegae.

Apa 26:18

Apakaemo nagaefeʼmo apakesamo afiʼa fatago hisageʼna hosu kavaʼapimo aliʼna atalesugeʼa Goti apaote vayaʼaʼeʼmo hetamaʼapimo aliteʼa magokepi lokaeʼa maisayafeʼmo kagaemo uka apaulagamo alika ayakeka apateteka hani huʼnisiya yategatiʼmo apayate alinika aika atagi nekeka ha le yategamo apategane. Sataniʼa yagaino neʼapateya kegiʼyafatiʼmo apayate alika apavalelikeka Gotiʼa neʼyagaiya kegiʼyafiʼmo apategane, huno naha paiʼniye, huno ha paiʼniye.

Lomu 8:38

Nagaemo ago ageʼnovana falisuna kavaʼmopi afaʼa maisuna kavaʼmopi enisole vayaʼmogimofi yagaiʼa neʼapateya vayaʼmogimofi himamu vayaʼmogimofi hemenimo haneʼniya kavaʼmopi henagaʼamo afole aisiya kavaʼmopi lokiya yaʼmopi anaga haneʼniya yaʼmopi afelaga haneʼniya yaʼmopi muki yaʼmopi vayaʼmogimofi huʼa Gotiʼa Ala kava netimo Kalaisi Yesupiʼmo maiʼnona vayaʼmogitaeʼmo hau ayamopafiʼmo nehaiya kavapatiʼmo aliʼa fako huʼa olatalegae.

1 Kolitiyani 15:50

Konagaʼnimogitapae, huʼna, mani geʼeʼmo lapa paiʼnaeʼmo, Ma mopafi neʼmaiya apakufaʼe vayaʼmogimo Gotiʼa yagaino neʼapateya kopiʼmo afaʼa uʼa ohaigae. Kasalisiya apakufaʼe vayaʼmogimo okasalino afaʼa hanege hanege huno hanesiya yaʼmo alagi oʼaligae.

2 Kolitiyani 11:14

Sataniʼa agaiʼamo alino aino afe leno ha le enisole vekagana huno alino hamaleno ateʼniyaʼmofeʼmo aigofe apa vayaʼmogi hisaya kavaʼapieʼmo lahau oʼaigune. Atupa afinaʼmo nehaya kavaʼapimo anonaʼapilefeʼmo alino hano huno apatalegaiye.

2 Kolitiyani 4:4

Ma mopafi vayaʼmogi gotiʼapimoʼa apakesamo afiʼa fatago nosaya vayaʼai apakesamo afisaya apaulagamo alino fali kaeno apateʼnigeʼapaeʼmo afaʼa noʼagae. Kalaisiʼa Goti auneʼamo alagi maiʼniyaʼmonanafa apakaemo Kalaisi ha le konali yaʼaeʼmo alagepa faigoko geʼamoʼmo aeno ha neleya konali yaʼamo afaʼa oʼagegae.

Galesiya 1:16

Agaemo Mafaʼneʼaeʼmo ava gemo malaga nofi vayaʼaifeʼmo aeʼna hakalo huʼna hapa paisuvafeʼmo Gotiʼa hauʼniya afinaʼmo Mafaʼneʼamo naipafiʼmo alino nave liʼnigeʼna ageteʼnaeʼmo uʼna mago vayaʼeʼmo ge huge afige huʼna oʼmaiʼnove.

Efasasi 1:21

Kalaisiʼa kokuʼnapiʼmo maiʼnenoʼaeʼmo hemenimo yagaiʼa neʼapataya vayanagi enisole vayanagi himamu vayanagi ala kava vayanagi ala apaki vayanagi huno ago aeno apakaseno hemenimo yagaino neʼapateyanageno henagaʼamo afole aisiya afinaʼeʼmo ani kavakeʼmo huno yagaino apategaiye.

Efasasi 1:3

Lagaemo Gotiʼa alita auleta ategetao. Agaemo Ala kava netimo Yesu Kalaisi Gotiʼamoʼmo maige Afoʼamoʼmo maige huʼniye. Lagaemo Kalaisipiʼmo maiʼnonagenoʼaeʼmo agaemo muki aulena yaʼamo kokuʼnapatiʼmo launelameʼmo ha maesiya yatetiʼmo ago alino auleno lateʼniye.

Efasasi 2:2

Ma mopafi hosu kavaʼmo akame huge ala vekamo kokuʼnaʼe mopaʼeʼmo hanetegeno folagate neʼmaiya vekamoʼmo hosu enisole vayaʼaiteʼmo yagaino neʼapateya vekamo geʼamo akame huge huʼnae. Agaemo Goti geʼamo amagiʼa neʼatalaya vayaʼai apaipafiʼmo aliʼyaʼmo neʼaliya aune vekamo maiʼniye.

Efasasi 3:10

Gotiʼa hunoʼaeʼmo, alagepa huʼna nagesamo afiteʼna siosi vayaʼalegamo alagepa huʼna alu kava alu kavaʼmo huʼna hapa maesugeʼa enisole vayaʼmo kokuʼnapi maiʼneʼa yagaiʼa neʼapataya vayaʼmogi ageteʼapaeʼmo, Gotiʼa muki yaʼamo alagepa huno ageʼniya vekamae, huʼa hugae, huno hu maleʼniye.

Kolosi 1:13

Agaemo hani koʼmo lokiyaʼalegatiʼmo lagufamo alino katino lateteno lavalelineno hauʼniya Mafaʼneʼamoʼmo yagaino neʼapateya kegiʼyafiʼmo lateʼniye.

Kolosi 2:15

Kalaisiʼa falitenoʼaeʼmo yagaiʼa neʼapataya vayaʼe ala kava vayaʼeʼmo agaiʼamo ago aeno apakaseteno kamemo hisaya yaʼapimo apayapatiʼmo hapafaleno nofi kino apateteno vayaʼai apaulagaleʼmo heno apavayu hulino uʼniye.

2 Timoti 2:5

Nagu nagu huʼa yokalo nelaya vayaʼmogimo nagu nagu hisaya keʼaepa gemo akame osisayana maleʼnaya yaʼmo afaʼa oʼaligae.

Himulu 12:1

Ani asole vayaʼmogi apakesamo afiʼa fatago huʼnaya kavaʼmo aliʼa lave liʼnaya vayaʼmo faliteʼapaeʼmo hiyakana huʼa maiʼneʼa faiʼa vego huʼa lateʼa maiʼnageta folagapiʼmo maiʼnonageʼapaeʼmo aulu lahaeʼa lageʼa maiʼnae. Aulu lahaeʼa lageʼa maiʼnayaʼmofeʼmo lagaemo aliʼnona kana yaʼmo atalege latafausiya hosu kavaʼmo hatu maeta atalege huteta lesisi agufa kavaʼmo huta oʼataleta atafauta alagi huta maiʼneta laulagaleʼmo valino lateʼniya kateʼmo nagu nagu huta vigetao.

Himulu 12:4

Hosu kavafeʼmo kame nehageʼapaeʼmo kamitimo olapamagiʼnayaʼmofeʼmo oʼataleta kamemo hutapa ateyo.

1 Pita 3:22

Kalaisiʼa he tino kokuʼnapiʼmo uno haino Goti lamaga haopaleʼmo maiʼneno muki vayaʼaiteʼmo yagaino neʼapate. Gotiʼa enisole vayanagi yagaiʼa neʼapataya vayanagi lokiya apauneʼapameʼe vayanagi huno alino Kalaisi aiyafiʼmo apateʼnigeno yagaino neʼapate.