Efasasi 4:24 - The Keyagana NT and 25 OT books

²⁴ Atafa vekatapimo ataletetapa saufa vekatapimo Gotiʼa alo huʼniya vekatapimo agaiʼagana huno neʼmaiya vekatapimo alita vaiyo. Lama geʼaletiʼmo saufa vekatapifatiʼmo vayaʼaitegamo fatago kavaʼmo huge Gotitegamo lama ge aote kavaʼmo huge hugae.

Efasasi 4:24 ပူးပေါင်းရင်းမြစ်များ

Aepa Gemae 5:1

Ina kava huno Atamu aginago vayaʼai apakimo haneʼniye. Gotiʼa vemo alo huʼniya afinaʼmo agaiʼagana huno alo huʼniye.

Aiyeya 52:1

Agaemo Yulusalemu vayaʼaifeʼmo hunoʼaeʼmo, O Saiyoniyo, huno, Aupatiʼmo hauneyo, aupatiʼmo hauneyo, Kagaemo he tika lokiya vaiyo. O Yulusalemu kaote taoniyo, huno, Kagaemo kanale kanale konali kukenakamo alika vaiyo. Apakufaleʼmo Goti alagena yaʼamo oʼaliʼnisaya vayaʼe oʼaniʼya faiʼniya vayaʼeʼmo kagaetegamo magoʼe huʼa oʼmegae.

Aiyeya 59:17

Kame nehaya vayaʼmogimo kapa siyotiʼapiletiʼmo hapaifiʼyaleʼmo aiʼa ati nekaya kava huno Ala kava neʼmoʼa fatago kavaʼamo hapino aliʼniye. Agaemo vayaʼamo apakufamo alino katino apatesiyafeʼmo kapa kakolitamo agenopaleʼmo maleno aliʼniye. Agaemo vayaʼamo kame vayaʼapimogi hosu kavaʼapimo anonaʼapilefeʼmo apamisiyafeʼmo kame kukenamo alino vaiʼniye. Agaemo aipamo neleya kavaʼamo yatala kukena yakana huno vaino aliʼniye.

Yoni 17:17

Lama gekaletiʼmo apavaleka apaote apato. Gekamo alagi lama geʼageʼmo haneʼniye.

Lomu 12:2

Ma mopafi vayakana hutapa oʼmaigenoʼao Gotiʼa saufa lapaipa lapakesaʼe vayaʼmo alino hamaleno lapateno. Lapakaemo ani kavatetiʼmo Gotiʼa hiyo, huno nehiya kavaʼmo amalageka hutapa agegae. Agetetapaeʼmo, alagepa kavaʼmo Gotiʼa hauʼniya kavaʼmogeno uno haino hapaiʼniya kavaʼmo haneʼniye, hutapa agegae.

Lomu 13:12

Hani nehiya kavaʼmo hano hisiyafeʼmo ago hogo nehigenoʼaeʼmo ha le yaʼmo afole aisiyafeʼmo nehiyanagi hanipiʼmo nehaya kavatapimo ataletetapa kame hisuna kukenatimo ha le kukenatimo alita vaigetao.

Lomu 13:14

Lapakaemo lapakufamoʼmo hauʼniya kavaʼmo afole aisayafeʼmo alo osutapa Ala kava netapimo Yesu Kalaisikeʼmo kukenagana hutapa alita vaiyo.

Lomu 6:4

Muki yaʼmo Afoʼamoʼmo ha le konali yaʼaletiʼmo Kalaisiʼa faliʼniyatetiʼmo ago alino he tino ateʼniya kava huta he tita saufa kavaʼmo huta maisunafeʼmo Gotiʼa Kalaisipiʼmo aniʼmo faleno lateʼnigeta agaeʼeʼmo magokepi faliʼnonagenoʼaeʼmo agaeʼeʼmo magokepi kino lateʼniye.

Lomu 7:6

Huʼnonaʼmonanafa hemenimo keʼaepa gemoʼa nofi aeno lateʼniya gelefeʼmo faliʼnonagenoʼaeʼmo Gotiʼa ago hatu maeno lateʼniye. Hemenimo Goti geʼamo akame nehutaeʼmo magoʼe huta atafa gemo avoʼmo kae maleʼniya keʼaepa gemoʼa ma kavaʼmo hiyo ina kavaʼmo osiyo huno huʼniya kateʼmo noʼunaʼmonanafa saufa kaʼmo Goti Aunemeʼamoʼmo valino nelateya katekeʼmo neʼune.

Lomu 8:29

Ani kavatefeʼmo Gotiʼa hogoteno agesamo afitenoʼaeʼmo hau ayamopafiʼmo hauʼniya vayaʼaifeʼmo, mafaʼneʼnigana huʼa maigae, huteno lekana paino apateʼniye. Aganaʼamogimo asole vayaʼmo maisageno hogote yege mafaʼneʼamoʼmo nepuʼapimoʼmo maisiyafekeʼmo lekana paino apateʼniye.

1 Kolitiyani 15:53

Lagaemo kasalisiya lagufamo ataleta okasalisiya lagufamo aligune. Falisuna lagufamo ataleta afaʼa hanege hanege huno hanesiya lagufamo aligune.

2 Kolitiyani 3:18

Gotiʼa laugosafatiʼmo kenamo ago alino ataleʼnigeta alaveʼyofatiʼmo laugosamo neʼagona kava huta Ala kava neʼmo ha le konali yaʼamo neʼagonagenoʼaeʼmo Ala kava neʼmo Aunemeʼamoʼmo alino hamaleno nelategetaeʼmo ha le konali yaʼamo alime alime uta Ala kava nekana huta hamaleme hamaleme neʼune.

2 Kolitiyani 4:16

Gotiʼa alino he tino lategaiyaʼmofeʼmo laipamoʼmo kana osuʼnigeta oʼataleʼnone. Afole vekatimo alino kalagu kime kime neʼviyaʼmonanafa muki afinaʼae afinaʼaeʼmo Gotiʼa yuʼilaga vekatimo alino saufa vekamo hamaleno neʼate.

2 Kolitiyani 5:17

Gotiʼa ina lagimo Kalaisipiʼmo maiʼnisafi ago saufa vayaʼmo alo huno apateʼniye. Afiyo, huʼna, atafa kavaʼapimo ago hano huʼnigenoʼaeʼmo muki saufa kavaʼapimo afole aiʼniye.

Galesiya 3:27

Aniʼmo faleʼa neʼapataya kava huno Kalaisipiʼmo faleno lapateʼnigetapa Kalaisiʼa kukenamo vaigekana hutapa alita vaitetapa maiʼnae.

Galesiya 6:15

Mani kavatefeʼmo huʼnaeʼmo, Kalaisi Yesupiʼmo maiʼnonaʼmofeʼmo lagufamo lagauʼnisupi olagauʼnisupi ina agufa kavaʼmo haneʼniye. Gotiʼa saufa vayaʼmo alo huno lateʼniya kavakeʼmo kanale kavaʼmo haneʼniye.

Efasasi 2:10

Gotiʼa alagepa kavaʼmo hisunafeʼmo hogoteno, hugae, huno hu maleʼniya kavaʼmo hisunafeʼmo Kalaisi Yesupiʼmo saufa vayaʼmo alo huno lateʼniye.

Efasasi 2:15

Agaemo malipu yosaleʼmo maiʼnenoʼaeʼmo agufaletiʼmo Yu keʼaepa gemoʼmo ani kavaʼmo hiyo, ina kavaʼmo osiyo, huno huʼniya gemo alino ataleteno Yu nofi vayaʼe alu nofi vayaʼeʼmo alino agaepiʼmo lokaeno lateteno saufa nofi vayaʼmo alo huno latetenoʼaeʼmo kame nehuna kavatimo alino hano huno ataleʼniye.

Efasasi 6:11

Lapakaemo muki kamemo hisaya kukenamo Gotiʼa lapamiʼniya kukenamo vaitetapa maiyo, Sataniʼa lapamalageka nehisigetapaeʼmo kamemo hutetapa he titapa maigayanagi.

Taitasi 2:14

Agaemo muki keʼaepa gemo amagita ataleʼnona kavategatiʼmo miya faino hatu maeno latetenoʼaeʼmo hosu kavatimo aeno kalo paeno lateʼnigeta agaiʼa vayaʼamo maiʼneta layamukiki huta alagepa kavaʼmo huta maisunafeʼmo agaiʼa agufaʼamo ofalinigana huno Gotina amiʼniye.

Himulu 1:8

Huno huʼniyaʼmonanafa Mafaʼneʼaeʼmo hunoʼaeʼmo, O Gotiyo, huno, muki afinaʼmo alagi ofalika afaʼa maige maige huka maiʼneka yagaika apategane. Alagepa huka alika fako huka apateteka yagaika neʼapatane.

Himulu 12:14

Lapakaemo muki vayaʼeʼmo alagepa hutapa magokepi lokaeta maiʼnetapa aote kavaʼmo alisayafeʼmo nagu nagu hutapa vegala aeyo. Aote kavaʼmo oʼaliʼnisaya vayaʼmogimo Ala kava neʼmo oʼagegayaʼmofeʼmae.

1 Pita 2:2

Nute mafaʼnemogimo nufekeʼmo lusi kava huno nehapaiye. Goti geʼamo nukana huno haneʼniyaʼmofeʼmo mani alagepa nufeʼmo lapauʼninagetapa neyo netapa kosigae.

2 Pita 1:4

Gotiʼa ani kavatetiʼmo alopa monileʼyaʼmo aeno agaseʼniya geʼamo fikumo lapa maeʼna lapamiguve, huno hu maleʼniya geʼamo hemenimo ago laha paiʼniye. Lapakaemo ma mopafi kavafeʼmo hapaʼye huʼnigeno alino hosu huno neʼapateya kavategatiʼmo ago faita kasalo paeʼnayanagetapa Goti aipa agesamo alisayafeʼmo mani alopa kavatefeʼmo alagepa polomasi geʼamo ago lapa paiʼniye.