Aiyeya 57:15 - The Keyagana NT and 25 OT books

¹⁵ Muga anaga vekamo alino asagauno ateʼniya anaga vekamo muki afinaʼmo maige maige huno neʼmaiya vekamo agiʼamo Aote Vekamoʼmo hunoʼaeʼmo, Nagaemo muga anaga aote kotegamo maiʼneʼna hosu kavaʼapieʼmo apaipamo kana huge apakaiʼapimo aliʼa afepi apatege nehaya vayaʼeʼmo magokepi lokaeʼna maiʼnove. Apakaiʼapimo aliʼa afepi neʼapataya vayaʼaina apauneʼapameʼmo aliʼna he tiʼna apatege hosu kavaʼapieʼmo apaipamo kana nehiya vayaʼai apaipamo aliʼna he tiʼna apatege hisuvafeʼmo apakaeʼeʼmo maiʼnove.

Aiyeya 57:15 ပူးပေါင်းရင်းမြစ်များ

Aepa Gemae 21:33

Inagi Emalehamuʼa mago tamalisiki yosamo Miyasima kotegamo fai maleʼneno Ala kava neʼmo muki afinaʼae afinaʼaeʼmo neʼmaiya Gotitefeʼmo mono huʼniye.

2 Sitoli 34:27

Kagaemo Gotiʼa mani taonileʼe taonifiʼmo maiʼnaya vayaʼaitegaʼeʼmo hisiya kavafeʼmo huʼniya gemo afiʼnanageno kaipamoʼmo lokiya oʼvaino gemo afiteno alino amalagiʼniya kaipamo Goti aulagaleʼmo haneʼnigeka kagufamo alika afepiʼmo ateʼnane. Kagaemo naulagaleʼmo kagufamo alika afepiʼmo ateteka kukena yakamo alika apake aiteka aviʼyaʼmo huʼnane. Nagaemo ageteʼnaeʼmo nunumuʼmo huʼnana gemo afiʼnove, huno ha paiʼniye.

Samu 111:9

Agaemo vayaʼalefeʼmo miya faino hatu maeno apateteno kotalakemo hano osisiya kotalakemo apakaeʼeʼmo hu maleʼniye. Aote agiʼamo haneʼnigeno agaefeʼmo koli hisaya kavaʼmo neʼapamiya Gotiʼmo maiʼniye.

Samu 115:3

Gotitimoʼmo kokunapiʼmo maiʼniye. Agaemo muki hisiyafeʼmo hauʼniya kavaʼmo nehiye.

Samu 123:1

Kokuʼnapi maiʼnana Ala vekamogae, huʼna, Nagaemo aliʼna maku huʼna nekagove.

Samu 138:6

Ala kava neʼmo alagi anaga hogote vekamo maiʼniyaʼmonanafa agaemo afa vayaʼaifeʼmo agesamo neʼafiye. Apakaefeʼmo agesamo neʼafiyaʼmonanafa ala vekamo maiʼnove, huʼa nehaya vayaʼmo afagitegamo maiʼnageno apakeʼniye.

Samu 138:7

Nagaemo hanageke kavaʼmo hisaya folagapiʼmo maiʼnisuvaʼmonanafa nauneʼnameʼnimo alika he tika ategane. Kagaemo nageteka lokiya kavakaletiʼmo apaipamo neleya kame vayaʼnimo apamagiteka apayapatiʼmo nagufamo alika katika nategane. Lamaga kayatetiʼmo alika katika nategane.

Samu 147:3

Agaemo hosu kavaʼapieʼmo apaipamoʼmo kana nehiya vayaʼmo alino hapageno apateteno apaipafatiʼmo apakafu kiʼniya kavaʼapileʼmo hayaeno neʼapate.

Samu 34:18

Ala kava neʼmoʼa hosu kavaʼapieʼmo apaipamoʼmo kana nehiya vayaʼai hapaopaleʼmo maiʼnenoʼaeʼmo yulagefa neʼaiya vayaʼai apakufamo alino katino neʼapate.

Samu 34:19

Alagepa vayaʼmogimo lusi hanageke yaʼmo neʼaliyaʼmonanafa Ala kava neʼmoʼa muki hanageke yapatiʼmo apakufamo alino katino neʼapate.

Samu 51:17

Afu ofalinimo kamisuvafeʼmo okahauʼnifa hosu kavaʼnieʼmo naipamo kana hisiyafeʼmo kahauʼniye. O Gotiyo, huʼna, hosu kavaʼnieʼmo naipamo kana huge yulagefa aige hisuva kavafeʼmo kahauʼniye.

Samu 51:19

Ani kava hisanageʼapaeʼmo alagepa ofalinimo atafi nekaya ofalinimo kamisageka amuse huka apategane. Ani afinaʼmo ve pulumakamo amagiʼa hiʼyalamuteʼmo atafiʼmo kaeʼa kamigae.

Samu 90:2

Akeyaʼvilagamo aveʼe ma mopaʼeʼmo alo osuʼnana afinaʼmo hogoteka maiʼnananageka maige maige huka alagi maigane.

Samu 93:2

Ala kava nene, huʼna, Kagaemo akeyaʼvilagatiʼmo alagi maime maime neʼane. Muki afinaʼaeʼmo kini vekamo maiʼnane.

Samu 97:9

O Ala kava nene, huʼna, kagaemo muki lokiyakamo haneʼniya Gotigamo muki haopalega ma mopafiʼmo neʼyagaine. Kagaemo muki gotigimo aeka apaka seʼnane.

Samu 99:3

Muki vayaʼmogimo ala agiʼamo haneʼniyanageʼa kini vekamo agiʼaleʼmo aliʼa asaga hugae. Agaemo alagi aote Gotiʼmae

Hatu maeno apate'niya gemae 15:11

O Ala kava nene, huʼna, alu gotigipatiʼmo ina laʼmo kagaekana huno maiʼniye. Kagaemo kaoteʼmo maiʼnana alagepa kaote kavakalefeʼmo ha le konali vekamo maiʼnane. Kageteʼapaeʼmo hapau aiʼnaya kavakalefeʼmo koli huʼnae. Oʼageʼnaya agufa kaune kavaʼmo nehane. Ani agufa kavaʼmo nehana Gotigamo maiʼnanaʼmofeʼmo ina lagimo kagaekana huʼa maiʼnae.

Hatu maeno apate'niya gemae 15:13

Kagaemo miya faika hatu maeka apateʼnana vayakaeʼmo kahau huka apateteka apavalelika uʼnane. Himamu lokiyakaletiʼmo kaʼmo alika ho huka apavalelika uka kaote maiʼnana koteʼmo apateʼnane.

Hatu maeno apate'niya gemae 15:18

Muki afinaʼmo Ala kava neʼmoʼa vayaʼaiteʼmo yagaino apatege apatege huno yagaino apateno maigiye.

Hatu maeno apate'niya gemae 40:34

Aliʼyaʼamo alagi alino hano huʼnigenoʼaeʼmo hiyaʼmo emineno seli mono noteʼmo kino ati kaeʼnigeno Ala kava neʼmo ha le konali yaʼamo ani nopiʼmo havai teʼniye.

Hatu maeno apate'niya gemae 40:35

Hiyaʼmoʼa noteʼmo haneʼnigeno Ala kava neʼmo ha le konali yaʼamo mono nopiʼmo havai teʼniyaʼmofeʼmo Moseseʼa uno ohaiʼniye.

Mai'naya kavane 16:19

Ina agufa vekamo maiʼnove, huno huteno ani agufa vayaʼeʼmo magokepi lokaeno neʼmaiya vekamoʼmo magoʼe huno alagepa huno maigiyaʼmonanafa apakiʼapileʼmo aliʼa asaga huʼa neʼataya vayaʼeʼmo magokepi lokaeno maiʼneno kumaya aliʼnaya kagemi yaʼmo aliʼa fako huʼa aliʼnaya kagemi yapatiʼmo alisiya vekamo alagepa huno oʼmaigiye.

Mai'naya kavane 8:23

Aepa ofaiʼniya afinatetiʼmo maiʼnogeno lekana paino nateʼniye. Ma mopamo ohaneʼnigeʼnaeʼmo hogoteʼna maiʼnove.

Aiyeya 33:5

Ala kava neʼmo anaga koʼaleʼmo maiʼniyaʼmofeʼmo ala agiʼamo amigae. Agaemo lusi kava huno alagepa fatago kavaʼmo huʼnigeʼa Saiyoni taonifi maiʼnaya vayaʼmogi alagepa huʼa aliʼa fako huge fatago kavaʼmo huge nehayaʼmofeʼmo ani agufa kavaʼmo taonifiʼmo havaitegaiye.

Aiyeya 40:28

Lapakaemo afiʼnafi oʼafiʼnae. Mago vayaʼmogimo lapa paiʼnagetapa oʼafiʼnafiye. Ala kava neʼmo maige maige huno neʼmaiya Gotiʼa muki ma mopamo aluga aluga atupalenagi huno alo huʼniya Gotiʼa aunena oʼaige alaga ohaege huʼnigeno neʼmaiye.

Aiyeya 52:13

Ala kava neʼmoʼa ina gemo hunoʼaeʼmo, Ageyo, huno, aliʼyaʼnimo neʼaliya vekamoʼmo alagepa huno afiteno ageʼnenoʼaeʼmo aliʼyaʼamo neʼalisigeno alagi afole aigiye. Vayaʼmogimo ala agiʼamo amiteʼapaeʼmo aliʼa asaga huliʼa anagamo uʼa haisageno hogote vekamo maigiye.

Aiyeya 6:1

Nagaemo ala kini netimo agiʼamo Uyaiyaʼmo faliʼniya kafugamo ageʼnovana Ala kava neʼmoʼa yagaino neʼapateya siyaʼaleʼmo fai maiʼnigeʼna ageʼnove. Alino asagauno ateʼnigeno muga anaʼaleʼmo fai maiʼnigeno yatala kukena atupaʼamoʼmo alopa mono nopiʼmo alagi havaiteʼnigeʼna ageʼnove.

Aiyeya 6:3

Mago enisole vekamoʼmo alu enisole vayaʼaifeʼmo hunoʼaeʼmo, Ala kava neʼmoʼa asole vayaʼaiteʼmo yagaino neʼapateya vekamo aote vekamo maiʼniye, aote vekamo maiʼniye, aote vekamo maiʼniye. Ha le konali yaʼamoʼmo muki ma mopafiʼmo aino atagu faeno uneno huno havai teʼniye, huno hapa paiʼnigeʼa alu enisole vayaʼmogi afiteʼa ani gemo huʼa hapa paige huʼnae.

Aiyeya 63:15

Ala kava nene, huʼa, kagaemo kaote kokamo ha le konali kokuʼnapiʼmo maiʼneka afepilagamo aulu lahaeka lago. Kagaemo na agufa kavaʼmo higekaeʼmo kayamukiki nehana kavakagi lokiyakagi kahau kayamopafiʼmo kahauʼniya kavakagi kahau huka nelatana kavakagi huka alika lave noline. Kaipamo alika akani maleʼnapiye.

Neniyo 2:11

Kini vekamoʼmo lusi kava huno lokiya vaiʼniya kavafeʼmo ge huno lafi geʼniye. Muki ma mopafiʼmo vayapatiʼmo magoke vekamoʼmo ani kavafeʼmo kaha opaigayaʼmonanafa ma mopafi oʼmaiya gotigigeʼmo afaʼa kaha paigae, huʼa huʼnageno

Neniyo 4:17

Yagaiʼa neʼapataya enisole vayaʼmogimo ani agufa kavaʼmo afole aisiyafeʼmo ago vege hu maleʼnae. Muki vayaʼmo aeno apaka seno alagi anaga Gotiʼa muki kini vayaʼaiteʼmo yagaino neʼapateya kavaʼamo agesayafeʼmo apaote vayaʼmogimo ago vegemo hu maleʼnae. Gotiʼa ina laʼmo yagaino apatesiya himamuʼmo amiguve, huno hisifi afaʼa amigiye. Agaemo henagamo neʼmaiya vayapatikeʼmo yagaisayafeʼmo lekana paino neʼapate, huno huʼniye.

Neniyo 4:34

Seveniʼa kafugamo hano huʼnigeʼnaeʼmo nagaemo Nepukanesaʼnamo kokuʼnapi aliʼna aulu heʼna neʼagogenoʼaeʼmo alagepa nagesa afi yaʼmo halate afole aiʼnigeʼna aeno apakaseno alagi anaga Goti aliʼna auleʼna ateʼnove. Nagaemo muki afinaʼmo maige maige huno neʼmaiya Goti ala agiʼamo amiʼnove. Yagaino neʼapateyanageno muki afinaʼmo yagaino hano osuno yagaino apatelino ugiye. Afole aime aime hisaya vayaʼaiteʼmo yagaino apategaiye.

Maika 5:2

Gotiʼa ina ge huno huʼniye. Metelehamu Efalatao, huno, Kagaemo muki Yuta taonimo folagapiʼmo alagi aise taonimo haneʼnanaʼmonanafa Isaleli kini vekamo maisiyafeʼmo mago vekamo nagaetefeʼmo kagaepatiʼmo afole aino maigiye. Agaemo akeyaʼvilagamo Gotiʼa ma mopaʼe kokuʼnaʼeʼmo alo osuʼniya afinaʼmo maiʼniye.

Maika 6:8

O vekamogae, huʼna, Ala kava neʼmoʼa alagepa kavaʼmo hisuna kavaʼmo ago alino lave liʼniye. Agaemo anonatilefeʼmo hisunafeʼmo hunoʼaeʼmo, vayaʼaitegamo fatago kavaʼmo huge lapau hutapa apatetetapa lahapauge lapakufamo alita afepiʼmo lapatege hutetapaeʼmo Gotitapimoʼeʼmo afalu afalu kavaʼmo hutapa magokepi lokaetapa umenitata hiyo, huno laha paiʼniye.

Matiyu 6:9

Lapakaemo nunumuʼmo hugefeʼmo ina ge hutapa hiyo, kokuʼnapi Afotimogae, hutapa, kagikamo alagepa huno kaote haneʼniyanageʼa aliʼa asaga hisaya kavaʼmo haneʼniye.

Luki 1:49

Ayamufaʼage vekamoʼa lusi kava huno naha maeʼniye. Agiʼamo Aoteʼae.

Luki 4:18

Agaemo kagemi yaʼmo oʼaliʼnisaya vayaʼaifeʼmo alagepa faigoko gemo aeʼna hakalo huʼna hapa paisuvafeʼmo uvelimo ago lakino nateʼniyaʼmofeʼmo Ala kava neʼmo Aunemeʼamo emineno nagaeteʼmo maiʼniye. Agaemo alino nateʼnigeʼna emineʼna hosu kavaʼapieʼmo apaipamo kana nehiya vayaʼaina aliʼna hapageʼna apatege kalavusifi maiʼnaya vayaʼaifeʼmo huʼnaeʼmo, hatu maeʼna lapategauve, huʼna hapa paige apaulagamo ali huʼniya vayaʼaifeʼmo huʼnaeʼmo, agetapa ayakeyo, huʼna hapa paige aliʼa afepi apateteʼa huʼa apami neʼmalaya vayaʼmo hatu maeʼna apatege

Apa 3:14

Agaemo aote fatago vekamo maiʼniyaʼmonanafa lapakameʼyamo amitetapa vayaʼmo apamagiʼniya vekaeʼmo lahapauʼnigetapa Pailatifeʼmo hutapaeʼmo, Lagaetefeʼmo afaʼa ato,

Lomu 1:20

Gotiʼa ma mopamo alo huʼniya afinatetiʼmo muki vayaʼmogi alo huʼniya yaʼamo ago ageme ageme eʼnae. Ageme ageme neʼeʼapaeʼmo apaulagaletiʼmo noʼagaya yaʼmo Gotiʼa hanege hanege huno hanesiya himamuʼamo ageteʼapaeʼmo, aeto agufa vekamo hogote vekamo alagi ago aeno lagaseʼniya vekamo maiʼniye, huʼa neʼagae. Neʼagayaʼmofeʼmo hosu kavaʼapimo aeʼa ati kaesayafeʼmo, alagi oʼageʼnone, huʼa afaʼa osugae.

2 Kolitiyani 1:4

Lagaemo muki agufa hanageke yaʼmo neʼalisaya vayaʼmo hapa maeta alita lokiya vaita apatesunafeʼmo Gotiʼa laha maeno alino lokiya vaino nelate. Lagaemo muki hanageke yaʼmo neʼalunagenoʼaeʼmo laha maeno alino lokiya vaino nelateya kavatetiʼmo hapa maeta alita lokiya vaita apatesunafeʼmo laha maeno alino lokiya vaino nelate.

2 Kolitiyani 2:7

Fiku yanageno aipamoʼmo lusi kava huno kana hisigeno atalegaiyanagi hosu kavaʼamo alita ataletetapa alita lokiya vaita ateyo.

2 Kolitiyani 7:6

Huʼnonaʼmonanafa Gotiʼa apaipamoʼmo kana nehiya vayaʼai apaipamo alino falu nehiya vekamoʼmo Taitasiʼa alino ateʼnigeno halate lagaetegamo eʼniya kavatetiʼmo laipamo alino falu huʼniye.

1 Timoti 1:17

Ala kini vekamo ofalino maige maige huno neʼmaiya vekamo noʼagona vekamo agaiʼageʼmo ageteno afiʼniya vekamo ala agiʼaʼe ha le konali yaʼaʼeʼmo muki afinaʼmo hanege hanege huno haneno. He, lama ge.

1 Timoti 6:16

Agaiʼamo ofalino maiʼneno afaʼa neʼmaiya yaʼmo afoʼamoʼmo maiʼneno ha le yategamo maiʼniyanageʼa vayaʼmo alagi oʼvisaya agufa ha le yategamo maiʼniye. Muki vayaʼmogi oʼageʼnayanageʼa afaʼa oʼagegae. Ala agiʼamo amisageno himamuʼaletiʼmo muki afinaʼmo yagaige yagaige huno yagaino maino. He, lama ge.

Himulu 9:14

Afumo kolaʼmoʼa vayaʼmogi amega apakufaleʼmo aeno kalo paeno apaeʼniyaʼmonanafa afaʼa neʼmaiya yaʼmo neʼapamiya Goti aliʼyaʼamo alisayafeʼmo Kalaisi kolaʼamoʼa magoʼe huno lapakupi mafaʼnemo falisaya kavaʼmo aliʼyaʼalefeʼmo aeno kalo paeno lapategaiye. Agaemo hosu kavaʼamo alagi ohaneʼniya vekamo maige maige huno neʼmaiya Aunemeʼaletiʼmo agaiʼa agufamo Gotiʼmo amiʼniye.

Yemisi 4:6

Haʼye nehiyaʼmonanafa Gotiʼa fikumo laha maeno magoʼe huno nelamiye. Ani kavatefeʼmo hunoʼaeʼmo, Gotiʼa ala vayaʼmo maiʼnone, huʼa apakesamo neʼafiya vayaʼaifeʼmo kame huno neʼapateyaʼmonanafa ina agufa vayaʼmo maiʼnone, huʼa apakesamo neʼafiya vayaʼaina fikumo hapa maeno neʼapamiye, huno huʼniye.

1 Pita 5:5

Neya vayaʼmogitapae, huʼna, vayatama vayaʼai apaiyafiʼmo maiʼnetapa geʼapimo afiyo. He, muki vayaʼamogitapae, huʼna, ina agufa vayaʼmo maiʼnone, nehutapa aliʼyaʼmo neʼaliya vayaʼmogimo aliʼa neʼvaiya kukenamo aliʼa neʼvaiya kava hutapa konagatapimogi apaiyafiʼmo maiʼnetapa geʼapimo afiyo. Na kava nehiyaʼmofeʼmae. Gotiʼa ala vayaʼmo maiʼnone, huʼa apakesamo neʼafiya vayaʼaifeʼmo kame huno neʼapateyaʼmonanafa ina agufa vayaʼmo maiʼnone, huʼa apakesamo neʼafiya vayaʼaina fiku hapa maeno neʼapamiye.

Leveleseni 15:4

O Ala kava nene, huʼa, kagaikageʼmo kaote vekamo maiʼnanaʼmofeʼmo ina lagimo kagaefeʼmo koli osuʼa kagikaleʼmo aliʼa asaga osugae. Kagaemo anonaʼapilefeʼmo alagepa huka alika fako huka apateteka neʼapamina kavakamo ago afole aiʼniyaʼmofeʼmo muki alu nofi vaya alu nofi vayaʼmogimo eʼa kaulagaleʼmo kagaetefeʼmo mono hugae, huʼa huʼnae.

Leveleseni 3:7

Kagaemo Filatefiya taonifiʼmo maiʼnaya siosi vayaʼaiteʼmo yagaino neʼapateya apa vekalegamo mani kaha nepauva gemo avoʼmo kaeka atalegeno vino. Nagaemo naote vekamo lama geʼageʼmo nehuva vekamoʼnamo Neviniʼa yagaino neʼapateya kava huʼna yagaiʼna apatesuva kiʼmo aliʼnova vekamoʼnamo mani gemo lapa nepauve. Kitamo yakiʼna apateʼnisugeʼapaeʼmo mago vayaʼmogi eʼa kitamo kiʼa oʼapategae. Kitamo ki maleʼnisugeʼapaeʼmo mago vayaʼmogi eʼa kitamo yakiʼa oʼapategae.

Leveleseni 4:8

Loleʼe loleʼe vayaʼmogimo sigisiʼa hapakumo haneʼnigeno muki apakufafiʼmo apaulagamo haneʼniye. Muki afinaʼmo felugaʼe haniʼilagaʼeʼmo maiʼa haga oleʼa huʼapaeʼmo, Ala kava neʼmo Gotiʼa muki himamuʼamo aliʼniya vekamo aote vekamae aote vekamae aote vekamo maiʼniye. Hogoteno maiʼniyanageno hemeniʼeʼmo neʼmaiyanageno henagaʼamo alagi maige maige huno maigiye, huʼa huʼnae.

1 Samiyo 2:2

Ala kava nene, huʼna, Kagaemo alagi kaote vekamo maiʼnanageno mago vekamo aote vekamo kagaekana huno oʼmaiʼniye. Kagaemo magokeʼageʼmo maiʼnane. Gotitimogamo kagaekeʼmo alopa yafakana huka maiʼnanageta kahaopaleʼmo alagepa huta neʼmaune.