Aiyeya 54:9 - The Keyagana NT and 25 OT books

⁹ Ani kavaʼmo kagaetefeʼmo nehuva kavaʼmoʼa Novaʼmo maiʼniya afinaʼmo afole aiʼniya agufa kavakana huno haneʼniye. Nagaemo nagoʼyamo ataleteʼna polomasi gemo huʼnaeʼmo, Halate alopa aniʼmo heteno muki ma mopamo aeno ati okaegaiye, huʼna huʼnova agufa kavaʼmo huʼna nagoʼyamo ataleteʼnaeʼmo, Nagaemo halate naipamo leʼna katege ge kahauge osuguve, huʼna huʼnove.

Aiyeya 54:9 ပူးပေါင်းရင်းမြစ်များ

Aepa Gemae 8:21

Kaeʼnigeno ani ofalinimoʼmo haga atumo ailino uno haiʼnigeno Ala kava neʼmoʼa atuʼamo afitenoʼaeʼmo aipafiʼmo agesa afinoʼaeʼmo, halate magoʼe huʼna geʼniletiʼmo vayaʼai kavatefeʼmo mopamo aliʼna hosu huʼna oʼategauve. Muki vayaʼmo aise mafaʼnemo maiʼnaya afinatetiʼmo muki apaipa apakesa neʼafiya yaʼapifiʼmo alagi hosuʼniyaʼmofeʼmogeʼna hemenimo huva agufa kavaʼmo halate magoʼe huʼna muki apauneʼapameʼe yaʼmo aliʼna hano huʼna oʼapatalegauve.

Samu 104:9

Kagaemo hakuʼmo ago male maleʼnananageno solovala aniʼmoʼa ani hakuʼmo afaʼa aeno ha olegaiye. Afaʼa aeno ha olegaiyaʼmofeʼmo solovala aniʼmoʼa halate muki mopamo aeno ati okaegaiye.

Aiyeya 12:1

Ani afinaʼmo Goti vayaʼamogi huʼapaeʼmo, O Ala kava nene, huʼa, kaipamo leka lateʼnanaʼmonanafa kaipamo leka nateʼnana kavakamo hano huʼnigekaeʼmo naipamo alika falu huʼnane.

Aiyeya 49:18

Alika maku huka maiʼneka aulu heka agelika ugeka huka apako. Muki ve mafaʼne anagakamo magokepi aliʼa anupa huteʼa kagaetegamo neʼae. Ala kava neʼmoʼa agoʼyamo ataletenoʼaeʼmo, Alagi lama gemo huʼnaeʼmo, A kanomoʼmo veleʼmo maisiyafeʼmo kanale konalimo aliteno amogaga neʼaiya agufa kava huka mafaʼne anagakamo apavaleka kamogaga aigane.

Aiyeya 51:22

Ala kava neʼmo vayaʼamo hapau neʼvaiya Gotitapimoʼmo hunoʼaeʼmo, Ageyo, huʼna, Nagaemo ani naipamo leʼna nelapatova kapufi aniʼmo netetapa lusi kava hutapa negi nagi nehaya kapumo lapayapatiʼmo lapa faleʼna malegauve. Halate lapakaemo magoʼe hutapa oʼnegae.

Aiyeya 51:6

Kokuʼnaʼmo halinagana huno alagi hano hisigeʼa oʼagegayaʼmofeʼmo lapakaemo anaga kokuʼnategamo alita maku hutapa ageyo. Ma mopamo kukena yakana huno atafa hegaiyaʼmofeʼmo lapakaemo afelaga mopafiʼmo aulu heyo. Muki ma mopafi vayaʼmo ani kava huʼa faligayaʼmonanafa nagaemo hanege hanege huno hanesiya fatago kavaʼniletiʼmo vayaʼnimo alagi apakufamo aliʼna katiʼna apatesugeʼa muki afinaʼmo maige maige huʼa maigae. Maisageʼa vayaʼmogi fatago kavaʼnimo aliʼa hano huʼa oʼatalegae.

Aiyeya 51:8

Kafamoʼmo kukena yaʼmo nehatagaiya kava huʼa apakaemo aliʼa hano huʼa apatalegae. Aliʼa hano huʼa apatalegayaʼmonanafa fatago kavaʼnimoʼa hano osuno muki afinaʼmo hanege hanege huno hanegaiye. Apakufamo aliʼna katiʼna neʼapatova vayaʼmogi muki afinaʼmo maige maige huʼa maigae.

Aiyeya 55:11

Ani agufa kavakeʼmo huno geʼnimo nagaetegamo fikumo atagi neno oʼmegaifa aliyakeʼmo aligiye, huʼna ge huʼnova kava huno nahauʼnisiya kavaʼmo afole aigiye.

Aiyeya 62:8

Ala kava neʼmoʼa agoʼyamo ataleno lokiya lamaga ayatetiʼmo polomasi gemo hunoʼaeʼmo, Nagaemo magoʼe huʼna neʼyatapimo aliʼna kame vayatapimo oʼapamiguve. Nagaemo magoʼe huʼna alu kotega vayaʼmo afaʼa apatesugeʼa eʼa aliʼyatapimo aliteʼa alo hu maleʼnaya nofi alagafati aniʼmo aliʼa oʼnegae.