Aiyeya 52:7 - The Keyagana NT and 25 OT books

⁷ Alagepa faigoko geʼaletiʼmo alino nanu aeno neʼapateya gemo aliniʼeʼa aeʼa hakalo huʼa hapa nepaiya vayaʼai apaiyamo aveleʼmo neʼaya vayaʼai apaiyamo alagepa laulagamo neʼagona apaiyamo haneʼnigeʼa aliniʼa neʼae. Apakaemo apakufamo alino katino apatesiya kavafeʼmo ava gemo afiteʼa apamogaga aisayafeʼmo aliniʼa neʼae. Apakaemo Saiyoni vayaʼaifeʼmo huʼapaeʼmo, Gotitapimoʼa kini vekamo maiʼnenoʼaeʼmo yagaiʼniye, huʼa nehae.

Aiyeya 52:7 ပူးပေါင်းရင်းမြစ်များ

Samu 59:13

Kagaemo apakaefeʼmo kaipamo leka neʼapatakaeʼmo kamitimo apamagiyo. Alagi alika hano huka apato. Ani kavaʼmo hisanageʼa muki vayaʼmogi agegayana Gotiʼa Isaleli kotegamo yagaino neʼapate, huʼa agegae. Gotiʼa muki mopafi vayaʼaiteʼmo yagaino neʼapate, huʼa agegae.

Samu 68:11

Ala kava neʼmoʼa hunoʼaeʼmo, Afole aiʼniya kavafeʼmo ava gemo alinitapa uta hapa paiyo, huno hapa paiʼnigeʼa asole vayaʼmo Saiyoni vayaʼmogimo aliniʼa uʼnae.

Samu 93:1

Ala kava neʼmo kini vekamo maiʼneno yagaino neʼapate. Agaemo ala agiʼaʼe ha le konali yaʼaʼeʼmo vaino aliʼniye. Lokiyaʼamo kukenagana huno vaino aliʼniye. Agaemo ma mopamo alino lokiya vaino ateʼniyanageno kanage kanage osugiye.

Samu 96:10

Muki alu nofi vaya alu nofi vayaʼaifeʼmo, Ala kava neʼmoʼa yagaino neʼmaiye, hutapa hapa paiyo. Mopamo alino lokiya vaino ateteno maleʼniyanageno afaʼa hanegaiye. Agaemo fatago kavaʼmo nehunoʼaeʼmo muki vayaʼmo alino fako huno apategaiye.

Samu 97:1

Ala kava neʼmoʼa kini vekamo maiʼnenoʼaeʼmo yagaino neʼapate. Muki ma mopafiʼmo maiʼnaya vayaʼmogitapae, huʼna, lapamogaga aiyo. Afagitega maiʼnaya vayaʼmogitapae, huʼna, lapakaeʼeʼmo lapamogaga aiyo.

Samu 98:2

Ala kava neʼmoʼa vayaʼai apakufamo alino katino neʼapateya kavafeʼmo aeno hakalo huno hapa paiʼniye. Agaemo fatago kavaʼmo alino apave liʼnigeʼa alu nofi vaya alu nofi vayaʼmogimo ageʼnae.

Samu 98:3

Agaemo Isaleli vayaʼaifeʼmo hu maleʼniya polomasi geʼaeʼmo agesamo afiteno geʼamo akame huno Isaleli vayaʼaifeʼmo hau huno apateʼniye. Muki kotegatiʼmo muki vayaʼmogimo Gotitimoʼmo vayaʼai apakufamo alino katino neʼapateya kavaʼmo ago ageʼnae.

Samu 99:1

Ala kava neʼmoʼa kini vekamo maiʼneno yagaino neʼapateyanageʼa muki alu nofi vaya alu nofi vayaʼmogimo atete hiyo. Agaemo mono noʼafiʼmo lole enisole vekalaʼani anauneʼamo maleʼnaya folagapiʼmo fai maiʼniye. Ma mopamoʼmo atete hino.

Salomoni Yokemae 2:8

Nahau nayamopafiʼmo neʼnahaiya vekaʼnimo agemo afiʼnove. Agaemo aeno hailo hailo hulino nagu nagu huno aveleʼmo neʼe.

Aiyeya 33:22

Ala kava neʼmo lagae yasi vekamo maige keʼaepa gemo nelamiya vekamo maige kini vekatimo maige huʼniyaʼmofeʼmo lagufamo alino katino lategaiye.

Aiyeya 40:9

O Saiyoniyo, huʼna, Alagepa faigoko gemo alinika neʼana vekae, huʼna, yatala avefiʼmo uka haiyo. O Yulusalemuo, huʼna, Alagepa faigoko gemo alinika eʼnana vekae, huʼna, Kagaemo alopa gefatiʼmo alagepa faigoko gemo aeka hakalo huvo. Koli osuka Yuta kote taoniʼafi taoniʼafiʼmo maiʼnaya vayaʼaifeʼmo ina gemo hukaeʼmo, Ageyo, Lapakaemo Gotitapiʼmoʼmo ageyo, huka huvo.

Aiyeya 42:11

Hau huʼniya kaʼme kotegatiʼe ani kotega muki haneʼniya taonifiʼmo maiʼnaya vayaʼmogitapaʼeʼmo ala agiʼamo amiyo. Kiʼna nofi vayaʼmogitapamo ala agiʼamo amiyo. Sila taonifiʼmo maiʼnaya vayaʼmogitapamo yokemo hiyo. Apakaemo avefatiʼmo he tiʼa alopa gefatiʼmo hiyo.

Maika 4:7

Nagaemo logufa vayaʼmo apaiyamo hosuʼniya vayaʼmo aliʼna ha maleʼna apategauve. Apaini huʼa neʼapataya vayaʼmo lokiya nofi vayaʼmo magoke gamani vayaʼmo aliʼna ha maleʼna apategauve. Nagaemo ani kava huʼna Ala kava neʼmoʼnamo Saiyoni aveleʼmo maiʼnaya vayaʼaiteʼmo ani afinaʼmo aepa faiʼna yagaiʼna apateme apateme uʼna muki afinaʼaeʼmo yagaiʼna apategauve.

Neyomi 1:15

O Yuta vayaʼmogitapae, huʼna, Ageyo, mago vekamoʼmo avefiʼmo haneʼniya kotega kateʼmo alagepa faigoko gemo alininenoʼaeʼmo, kame osugayanagi maitapa haga leyo, huno aeno hakalo huno lapa nepaiye. Gotiʼa mono hisayafeʼmo hu maleʼniya hopa afinaʼmo mono hiyo. Lapakaemo Gotifeʼmo ago polomasi gemo hu maleʼnaya kavaʼmo hiyo. Hosu vekamo halate lapakaetegamo oʼmegaiye. Gotiʼa ago alino hosu huno ataleʼniye.

Neyomi 2:1

Ago alagi alino hosu huno neʼataleya vekamoʼmo lapakaeʼeʼmo kame hugiye. Niniva vayane, huʼna, Taonile yafa kegiʼyaleʼmo yagaisaya ati vayaʼmo apavaleta apateyo. Kame vayaʼmo esaya kateʼmo alagepa hutapa yagaiyo. Lapakaemo he titapa lokiya vaita maiʼnetapa kamemo hisayafeʼmo alo hiyo. Ati vayatapimo apavaleta alita anupa hutapa apateyo, huʼna lapa nepauve.

Matiyu 25:34

Apateʼnenoʼaeʼmo ala kini vekaʼapimoʼmo lamaga haopaleʼmo maiʼnisaya vayaʼaifeʼmo hunoʼaeʼmo, Afoʼnimoʼmo alino auleno lapateʼniya vayanagi eyo. Gotiʼa ma mopamo alo huʼniya afinaʼmo lapamisiyafeʼmo alo huno lapateʼniye. Mafaʼneʼapimogimo afoʼapimogi yaʼmo neʼaliya kava hutapa uta haita muki yaʼnimo aliyo.

Matiyu 28:18

Yesuʼa apakaetegamo enoʼaeʼmo, muki himamuʼamo kokuʼnapinagi ma mopafi kavatenagi vayaʼaitenagi huʼna yagaisuva himamuʼamo ago namiʼniye.

Maki 13:10

Hogoteʼa muki alu nofi vaya alu nofi vayaʼaifeʼmo nava gemo huʼa alagepa faigoko geʼnimo aeʼa hakalo huʼa hapa paiʼa hano hugae.

Maki 16:15

Agaemo hunoʼaeʼmo, muki ma mopafi vayaʼaitegamo uta alagepa faigoko geʼnimo aeta hakalo hutapa hapa paiyo.

Luki 2:10

Enisole vekamoʼmo hapa painoʼaeʼmo, lapamoʼyamo oʼaita afiyo. Alagepa gemo muki vayaʼmogi afiteʼa lusi kava huʼa apamogaga aisaya gemo aliniʼna emiʼneʼnove.

Luki 24:47

He tino maiʼnisigeʼapaeʼmo Yulusalemu taonifatiʼmo aepa faiteʼa hapa paiʼapaeʼmo, lapaipamo alita afe legenoʼao Gotiʼa Kalaisi agiʼaletiʼmo hosu kavatapimo alino ataleno, huʼa hapa paiteʼapaeʼmo ani agufa gemo huʼa muki nofi vayaʼaifeʼmo aeʼa hakalo huʼa hapa paigae, huʼa avoʼmo kae maleʼnae.

Efasasi 6:15

Alagepa faigoko geʼamoʼmo alino nanu aeno lapateʼniya gemo sukana huno haneʼniyanagi alitapa vaigenoʼao alo huno lapateno.

Leveleseni 11:15

Napa seveni enisole vekamoʼmo pikuli huʼnigeʼapaeʼmo kokuʼnapatiʼmo alopa gefatiʼmo ge huʼapaeʼmo, Hemenimo ma mopafi vayaʼaiteʼmo yagaiʼa neʼapataya vayaʼai apaimuʼyaleʼmo Ala kava netiʼe lekana paino ateʼniya vekamo Kalaisi vekaʼeʼmo maigaʼae. Agaemo yagaino apateno hano osuno yagaino apateme apateme ugiye, huʼa huʼnageʼapaeʼmo

Leveleseni 14:6

Halate ageʼnovana mago enisole vekamoʼmo alagepa faigoko gemo hanege hanege huno hanesiya gemo alu kotega alu kotegamo maiʼnaya vayanagi muki alu nofi vaya alu nofi vayanagi muki alu apake alu apakemo neʼaiya vayanagi muki alu apakufaʼe alu apakufaʼe vayanagi huno aeno hakalo huno hapa paisiyafeʼmo kokuʼnaʼmo folagateʼmo halelino uʼniye.