Aiyeya 45:24 - The Keyagana NT and 25 OT books

²⁴ Apakaemo huʼapaeʼmo, Lama gemo nehune, huʼa, Ala kava nepiʼmo maiʼnetaeʼmo fatago kavaʼamo aliteta himamuʼamo aliʼnone. Muki vayaʼmo agaetegamo egae. Agaefeʼmo apaipamo leʼa ateʼnaya vayaʼmo apavagage hugiye.

Aiyeya 45:24 ပူးပေါင်းရင်းမြစ်များ

Aepa Gemae 49:10

Kini vayaʼmogimo hayopa kayoʼapiletiʼmo yagaiʼa neʼapataya kava huʼa Yuta nofi vayaʼmogimo yagaiʼa apateme apateme neʼesageno mago vekamo Sailoʼmo egaiye. Sailoʼmo esigeʼapaeʼmo muki vayaʼmogimo aiyafiʼmo maiʼneʼa geʼamo afigae.

Samu 110:2

Ala kava neʼmoʼa kayotetiʼmo yagaika apatesana himamukamo Saiyoni taonifatiʼmo alino atesigeno ugiye. Kame vayakamogi folagapiʼmo maiʼneka yagaika apato, huno kaha paiʼniye.

Samu 72:9

Kaʼme kotega maiʼnaya vayaʼmogimo agaeteʼmo ape huʼa maisageʼapaeʼmo kame vayaʼamogimo agaefeʼmo atete huteʼa apagoʼya faigae.

Samu 89:17

Ha le konali himamuʼapimo kagaetegatiʼmo aliʼnae. Kagaemo fiku laha maeka lamiʼnanageta aeta apakaseʼnone.

Aiyeya 26:4

Yihovaʼmo Ala kava neʼmo lokiya yafakana huno maiʼnigeno muki afinaʼmo lokiyaʼamo hanege hanege huno hanegaiyaʼmofeʼmo Ala kava nefeʼmo muki afinaʼmo alita amufa amiyo.

Aiyeya 45:25

Muki Isaleli aginago vayaʼmogi Ala kava nepiʼmo maiʼnayanageno Gotiʼa hunoʼaeʼmo, Lapakaemo naulagaleʼmo fatago vayaʼmo maiʼnae, huno hapa paisigeʼapaeʼmo apamogaga aiteʼa ala nagiʼnimo namigae.

Aiyeya 54:17

Nehayaʼmonanafa kame nehaya yaʼmo alo huʼnaya yaʼmo aliʼa kame huʼa aeʼa lapaka osegae. Vayaʼmogimo alu ge alu gemo huteʼa aliʼa kagaepiʼmo faiʼa katege katege huʼa maisaya vayaʼmogi geʼapileʼmo afaʼa aeka atagaina huka ge hugane. Aliʼyaʼnimo neʼaliya vayaʼmogimo ani hetamaʼapimo alige fatago kavaʼapimo nagaetegatiʼmo alige hugae, huno Ala kava neʼmoʼa huʼniye.

Aiyeya 55:5

Ala kava neʼmo Gotitapimoʼmo Isaleli vayaʼmogi aote Gotiʼapimoʼmo ala lapakitapimo lapamiʼniyaʼmofeʼmo lapakaemo oʼapakeʼnaya nofi vayaʼaifeʼmo keya aeta ge hisageʼa olapakeʼnaya alu nofi vayaʼe alu nofi vayaʼmogiʼeʼmo nagu nagu huʼa lapakaetegamo egae, huno huʼniye.

Aiyeya 60:21

Muki vayatapimo fatago vayaʼageʼmo maigae. Apakaemo mopa hetamaʼapimo aliteʼa ani mopaleʼmo maige maige huʼa maigae. Nagaemo ala nagiʼnimo alisuvafeʼmo vayatapimo saufamo fai maleʼnogeno muki nehageya yosagana huʼa maigae. Apakaemo nayatetiʼmo alo huʼnova vayaʼmo maigae.

Aiyeya 60:9

Alagi lama gemo huʼnaeʼmo, afagi kotega vayaʼmogimo nagava maigae. Nagava maiʼneʼa sipiʼapimo aliʼa atesageno lapakae mafaʼne anagaʼmo apavalelino lapakaetegamo egaiye. Aote Isaleli vayaʼmogi Gotiʼapimoʼmo ala lapakitapimo lapamigiyaʼmofeʼmo apakaemo Ala kava neʼmo Gotitapimo agiʼalefeʼmo siluvaʼe goli yafaʼeʼmo sipifiʼmo lapakaetegamo aliniʼa egae.

Aiyeya 61:10

Ala kava nefeʼmo magoʼe huʼna lusi kava huʼna namogaga aiguve. Nagupi mafaʼnemoʼmo Gotiʼnimofeʼmo magoʼe huno amuse huno ategaiye. Na kava hinageʼnaene. Agaemo nagufamo alino katino nateteno fatago kavaʼamo yatala kukenagana huno alino vaino nateʼniye. Agaemo fatago kavaʼmo alagi alagepa yatala kukenagana huno alino nagufaleʼmo ago aino ati kaeno nateʼniye. Aʼmo alisiya vekamoʼmo konalimo neʼaliya kava huʼna maiʼnove. Veleʼmo maisiya a kanomoʼmo alopa moniletiʼmo miya nefaiya sesu konalimo aliteno neʼmaiya agufa kava huʼna maiʼnove.

Aiyeya 61:11

Mopamoʼmo neʼyaʼmo alino afole aino atege hoyafiʼmo hakale maleʼnaya avina yaʼmo hoyamoʼmo alino hageno atege nehiya kava huno Ala kava neʼmo Gotiʼa fatago kavaʼe agiʼaleʼmo aliʼa asaga nehaya kavaʼeʼmo muki nofi vayaʼai apaulagaleʼmo alino afole aino ategaiye.

Hamakaki 3:19

Ala kava neʼmo Gotiʼa lokiyaʼnimo maiʼniye. Agaemo lokiya vaino natesigeno naiyamoʼmo afela afumoʼmo nagu nagu nehiya afumo aiyagana huno haneʼnisigeʼna alopa avefiʼmo uʼna haiʼna umenitata huguve. Ani gemo alino yokemo nehaya vayaʼaiteʼmo yagaiʼniya vekamo amiʼniye. Yokemo hisayafeʼmo neʼamagiʼa nehaya agufa kavaʼmo hisayafeʼmae.

Luki 13:17

kame vayaʼamogi afiteʼa apavagage huʼniyaʼmonanafa muki vayaʼmogi noʼagaya agufa alagepa kavaʼmo huʼnigeʼa ageteʼapaeʼmo apamogaga aiʼnae.

Luki 19:27

inagi kame vayaʼnimogi agaemo yagaino latesiyafeʼmo olahauʼniye, huʼa huʼnaya vayaʼmo apavaleliteta naulagaleʼmo kamitimo apamagiyo, huno hapa paiʼniye, huno Yesuʼa hapa paiʼniye.

Yoni 12:32

Apakaemo ma mopafiʼmo aliʼa he tiʼa natetesageʼnaeʼmo muki vayaʼamo nagaiʼnilegamo aiʼna apavayu huliʼna egauve, huno hapa paiʼniye.

Yoni 7:37

Hopa afinaʼmo hano hugefeʼmo huʼniya afinaʼmo henagaʼamo alopa afinaʼmo afole aiʼnigenoʼaeʼmo Yesuʼa he tino alopa gefatiʼmo hapa painoʼaeʼmo, mago vekamoʼa anifeʼmo hauʼnisiyana eno nagaetegatiʼmo aniʼmo neno.

1 Kolitiyani 1:30

Gotiʼa Kalaisi Yesupiʼmo faleno lapateʼnigetapa maiʼnae. Gotiʼa Kalaisiʼmo alino hamaleno ateʼniyanageta Gotitegatiʼmo ageteta afisuna agufa kavaʼmo hamaleʼniye. Ina kava huno Kalaisiʼa Goti aulagaleʼmo fatago vayaʼmo maisunafeʼmo fatago kavatimo maiʼniyanageno hemenimo magoʼe magoʼe huno alino alagepa huno nelateyanageno muki hosu kavapatiʼmo lagufamo alino katino lategaiye.

2 Kolitiyani 5:21

Na kava higetaene. Lagaemo Kalaisipiʼmo maiʼnetaeʼmo Goti fatago kavaʼamo hamalesunafeʼmo Gotiʼa hosu kavaʼmo alagi osuʼniya vekamo alino hamaleno ateʼnigeno hosu kavaʼmo hamaleʼniye.

Efasasi 3:16

Nunumuʼmo nehuʼnaeʼmo, lusi kava huka ha le konali vekamo maiʼnanaʼmofeʼmo ha le konali kagemi yakalefeʼmo himamukaletiʼe Kaunekametetiʼeʼmo apakupi mafaʼnemo lokiya vaika apato. Kalaisiʼa agaefeʼmo apakesamo afiʼa fatago nehaya kavatetiʼmo apaipafiʼmo alagi maiyo. Kalaisiʼa apaipafiʼmo maiʼnisigeʼapaeʼmo hapau apayamopafiʼmo hapauʼnisigeʼa hapafuʼyamo aegekana huʼa maiʼneʼa noʼmo faiʼa neʼataya yateʼmo alagi atafauʼa alagi huʼa maiyo.

Efasasi 6:10

Henaga geʼnimo lapa paiʼnaeʼmo, Ala kava nepiʼmo maiʼnetapaeʼmo lapayamufa valetapa himamuʼamo alitetapa lokiya vaita maiyo.

Filipai 4:13

Nagaemo Kalaisipiʼmo maiʼneʼnaeʼmo lokiya vaino neʼnateya himamuʼaletiʼmo muki kavaʼamo afaʼa huguve.

Kolosi 1:11

Gotiʼa ha le konali lokiyaʼaʼe vekamoʼmo lokiyaʼaletiʼmo lokiya vaino lapateno. Lokiya vaino lapatesigetapa hosu afinaʼmo oʼataleta hosu lapaipamo okalita lapamogaga aiʼnetapa muki yaʼmo Afoʼamofekeʼmo hao ke hegae.

2 Pita 1:1

Nagaemo Saimoni Pitaʼnamo Yesu Kalaisi aliʼyaʼamo neʼaluva vekamo maiʼneʼna apa vekaʼamo maiʼnove. Gotiʼa lagufamo alino katino nelateya Gotitimoʼa Yesu Kalaisi fatago kavaʼaletiʼmo fikumo lapamaeno lapamiʼnigetapa lapakesamo afita fatago huʼnaya vayaʼamogitapaeʼmo mani gemo avoʼmo nekaove. Lapakesamo afita fatago nehaya kavatapimo alopa monileʼyaʼmo aeno agaseʼniya kavaʼe lagesamo afita fatago nehuna kavatiʼeʼmo magoke aiyaya kavaʼmo haneʼniye.

Leveleseni 11:18

Kaipamo leka neʼapatana kavakamo afole yateʼmo afole aisigekaeʼmo faliʼnaya vayaʼmo agoti huka apatesana afinaʼmo afole neʼaiyaʼmofeʼmo malaga vayaʼmogimo lusi kava huʼa apaipamo leʼa kateʼnae. Kagaemo aliʼyakamo neʼaliya vayaʼmogimo kagaetegati gemo alini eʼa aeʼa hakalo huʼa hapa nepaiya vayanagi muki apaote vayakagi muki vayaʼmogi kagaefeʼmo koli nehaya vayanagi ala apakiʼapimo oʼaliʼnisaya vayanagi ala apaki vayanagi huka miyaʼapimo apamisana afinaʼmo ago afole aiʼniye. Ma mopafi vayaʼmo aliʼa hosu huʼa neʼapataya vayaʼmo alika hosu huka apatesana afinaʼmo ago afole aiʼniye, huʼa huʼnae.

Leveleseni 22:17

Goti Aunemeʼamoʼe sipisipi vekaleʼmo maisiya a kanomoʼeʼmo, Neʼeyo, huʼana huʼnaʼae. Ani gemo afiʼnisaya vayaʼmogimo, neʼeyo, huʼa hiyo. Anifeʼmo lapauʼnisiya vayaʼmogimo neʼeyo, huʼa nehae. Hapauʼnisiya vayaʼmogimo afaʼa neʼmaiya yaʼmo neʼapamiya aniʼmo fikumo negae, huno hapa paiʼniye.