Aiyeya 43:1 - The Keyagana NT and 25 OT books

¹ Isaleli vayaʼmogitapae, huʼna, Ala kava neʼmoʼa alo huno lapateteno alino magoke nofi vayaʼmo hamaleno lapateʼniya vekamoʼmo hemenimo ina gemo huno lapa painoʼaeʼmo. Nagaemo miya faiʼna hatu maeʼna lapateʼnovaʼmofeʼmo koli osiyo. Nagaemo lapakitapimo lapateteʼnaeʼmo lapakaefeʼmo nagaiʼni vayane, huʼna huʼnove.

Aiyeya 43:1 ပူးပေါင်းရင်းမြစ်များ

Aepa Gemae 32:28

Inagi ani vekamoʼmo hunoʼaeʼmo, hemenimo Yekopugae kagimo magoʼe huno ohanegaiye. Kagaemo neʼyagaina vekamo maiʼneka Gotiʼeʼmo kayamukiki nananageka vayaʼaina ago aeka apaka seganaʼmofeʼmo saufa kagikamo Isaleligae huʼa aegae. Isaleliʼae agimo aepaʼamo yagaino apateʼniya vekamae.

Samu 100:3

Agetapa aeto hutetapaeʼmo Ala kava nefeʼmo, Gotiʼmae, hutapa hiyo. Lagaemo lagaitimo alo osuʼnopa agaiʼamo alo huno lateʼniyaʼmofeʼmo lagaemo agaiʼa vayaʼmo maiʼnone. Lagaemo vayaʼamo maiʼneta sipisipiʼamo agae kegiʼyafiʼmo haita maiʼnonagenoʼaeʼmo yagaino lateʼniye.

Hatu maeno apate'niya gemae 15:13

Kagaemo miya faika hatu maeka apateʼnana vayakaeʼmo kahau huka apateteka apavalelika uʼnane. Himamu lokiyakaletiʼmo kaʼmo alika ho huka apavalelika uka kaote maiʼnana koteʼmo apateʼnane.

Hatu maeno apate'niya gemae 15:16

O Ala kava nene, huʼna, Himamu lokiyakalefeʼmo kolikamo huge apamoʼya aige hugae. Vayakamo koʼapileʼmo neʼvisageʼapaeʼmo apakaetegamo mago kavaʼmo afaʼa osuʼa he tiʼa maiʼnisageʼa afaʼa ugae. Miya faika hatu maeka apateʼnana vayakamogimo aliʼa apatalete apatalete huliʼa ugae.

Hatu maeno apate'niya gemae 33:17

Ala kava neʼmoʼa Mosesefeʼmo ha painoʼaeʼmo, Nagaemo kageʼna alagepa huʼnovana naulagaleʼmo fikumo kaha maeʼna nekamuva kavaʼnimo ageʼnanaʼmofeʼmo gekamo akame huguve, huno ha paiʼniye.

Aiyeya 42:6

Nagaemo Ala kava neʼmoʼnamo fatago kavatetiʼmo kagaefeʼmo keya aeʼna ge huʼnovanageʼna kayateʼmo aliguve. Nagaemo yagaiʼna kateteʼna Isaleli vayaʼmogi kotalake gemo aepa vekamae, huʼna kateteʼna Yu vayaʼmo oʼmaiʼa malaga vayaʼmogi hale yaʼapimo maisanafeʼmo kategauve.

Aiyeya 43:21

Nagaemo ani vayaʼmo nagaiʼni vayaʼnimo aliʼna ha maleʼna apateʼnovanageʼa apakaemo ala nagiʼnieʼmo aeʼa hakalo hugae.

Aiyeya 43:5

Nagaemo lapakaeʼeʼmo magokepiʼmo maiʼnovaʼmofeʼmo koli osiyo. Nagaemo lapakinago vayaʼmo yegemo haine neʼeya haopalegatiʼmo apavaleliʼna ege yegemo uno lamino nefaleya haopalegatiʼmo apavaleliʼna ege huʼna aliʼna anupa huʼna apategauve.

Aiyeya 43:7

Apakaemo nagiʼnimo aliʼnageʼapaeʼmo vayaʼmogi apakaefeʼmo nagi neʼae. Nagaemo ala nagiʼnimo alisuvafeʼmo ani vayaʼmo alo huʼna apateʼnove. Apakufamo apamiteʼnaeʼmo, he, huteʼna, alo huʼna apateʼnove.

Aiyeya 45:11

Ala kava neʼmo Isaleli vayaʼmogi aote Gotiʼa alo huno apateʼniya Gotiʼapimoʼmo ina gemo hunoʼaeʼmo, Lapakaemo ve mafaʼneʼnilegamo afole aisiya kavafeʼmo ge hutapa nafi geyo. Nafigegayaʼmonanafa alo huʼna apateʼnova mafaʼneʼnilegamo hisuva kavafeʼmo huvo, hutapa naha nepaifiye.

Aiyeya 49:1

Lapakaemo solovala ani haigifiʼmo maiʼnaya vayaʼmogitapaʼe afagitegamo maiʼnaya vayaʼmogitapaʼeʼmo geʼnimo afiyo. Itanimoʼmo alino oʼnateʼniya afinaʼmo Ala kava neʼmoʼa lekana paino nateteno nagiʼnimo nateʼniye.

Aiyeya 49:26

Nagaemo kana yaʼmo nelapamiya vayaʼmo vayaʼapimogimo apakufamo nesayafeʼmo apavaleʼna apamiguve. Apakaemo apakaiʼapi vayaʼapiʼeʼmo kamemo huteʼa apakaiʼapi kolaʼmo neteʼa negi nagi huʼa maigae. Muki ma mopafi vayaʼmogimo ani nagaemo hisuva kavaʼmo ageteʼapaeʼmo Ala kava neʼmoʼa apakufamo alino katino neʼapateya vekamoʼmo miya faino hatu maeno apateʼniya vekamo maiʼniye. Agaemo Yekopu alagi lokiya vekaʼamo maiʼniye, huʼa hugae.

Aiyeya 51:13

Lapakaemo alo huʼna lapateʼnova Ala kava neʼmoʼnaeʼmo lapake kaniʼniye. Nagaemo kokuʼnaʼmo aliʼna api aiʼna yatala huge mopamo alo huteʼna aepaʼamo aliʼna lokiya vaiʼna atege huʼnove. Hanagekeyaʼmo nelapamiya vayaʼmogimo aliʼa hano huʼa lapatalesayafeʼmo alo huʼa maiʼneʼa apaipamo leʼa nelapataya kavafeʼmo muki afinaʼaeʼmo koli huʼnae. Koli huʼnayaʼmonanafa apaipamo leʼa nelapataya vayamo hemenimo haiyategamo maiʼnae.

Aiyeya 52:9

Yulusalemu noʼatufa kote vayane, huno, mukiʼamogitapamo lapamogaga aitetapa magokepiʼmo alopa gefatiʼmo yokemo hiyo. Ala kava neʼmoʼa eno vayaʼamo apaipamo alino falu huno apateʼniyaʼmofeʼmae. Agaemo Yulusalemu vayaʼmo miya faino hatu maeno apateʼniye.

Aiyeya 62:12

Apakaemo ani vayaʼaifeʼmo ina ge huʼa apaki aegae. Apakaemo apaote vayane, huʼa huge Ala kava neʼmoʼa miya faino hatu maeno apateʼniya vayane, huʼa huge hugae. Apakaemo kagaefeʼmo kagimo aeʼapaeʼmo, Ala kava neʼmoʼa hauʼniya taonimo haneʼniye. Ataleno oʼuʼniya taonie, huʼa hugae.

Aiyeya 63:16

Huʼnanaʼmonanafa kagaemo afotimogamo alagi maiʼnane. Emalehamuʼmo hemenimo olageʼnigeno Isaleliʼmo gemo laha nopaiyaʼmonanafa kagaemo O Ala kava neʼmogae, huta, afotimogamo maiʼnane. Alagi akeyaʼvilagamo miya faika hatu maeka nelatana Gotigae, huta kagi neʼaone.

Aiyeya 63:9

Apakaemo muki kana yaʼmo aliʼnagenoʼaeʼmo ani kana yaʼmo aipafiʼmo asagauno aiʼnigeno agaeʼeʼmo aliʼniye. Goti aulagaleʼmo maiʼniya enisole vekamoʼmo apakufamo alino katino apateʼniye. Hau ayamopafiʼmo hauʼnigeno hau huno apateteno miya faino hatu maeno apateʼniye. Akeyaʼvilagamo muki afinaʼae afinaʼaeʼmo apasagauno apavalelino uʼniye.

Neniyo 10:19

Agaemo naha painoʼaeʼmo, Gotiʼa kagaefeʼmo hau ayamopafi hauʼniya vekamogae, huno, kaipamoʼmo falu huʼninageka koli osuka lokiya vaika maiyo, huno naha paiteno alino lokiya vaino nateʼniye. Inagi nagaemo huʼnaeʼmo, Ala vekaʼnimogae, huʼna, ago alika lokiya vaika nateʼnanaʼmofeʼmo ge huvo, huʼna huʼnove.

Malakai 3:17

Ala kava neʼmoʼa asole vayaʼaiteʼmo yagaino neʼapateya vekamoʼmo hunoʼaeʼmo, Mago vekamoʼmo hogote alagepa yaʼamo alopa moniletiʼmo miya nefaiya yaʼmo alino kesifiʼmo neʼmaleya kava huʼna nagaemo muki nofi vayapatiʼmo apavaleliʼneʼna aliʼna anupa huʼna apateteʼnaeʼmo apakaefeʼmo, lapakaemo nagaiʼni vayaʼmo maigae, huʼna hapa paiguve, huno huʼniye. Mago vekamoʼmo agaiʼa mafaʼnemoʼmo aliʼyaʼamo neʼaliya mafaʼnemo kayoʼmo oʼamino afaʼa agegeno neʼateya kava huʼna kayoʼmo oʼapamiʼna afaʼa apakegeʼna apategauve.

Apa 27:20

Yatala afinaʼmo yegemo oʼagege kanefiʼmo oʼagege huta maiʼnonagenoʼaeʼmo lusi kava huno yasimo alige alige huno maiʼniye. Neʼaligeta lagesa afitaeʼmo falisunagenoʼaeʼmo laugosamo alagi lageso hugiye, huta lagesamo afiʼnone.

Apa 27:25

koli osutapa lapaipamo alita lokiya vaitapa ateyo. Goti geʼaeʼmo nagesamo afiʼna fatago nehuvanageno naha paiʼniya gemo afole aigiye.

Efasasi 2:10

Gotiʼa alagepa kavaʼmo hisunafeʼmo hogoteno, hugae, huno hu maleʼniya kavaʼmo hisunafeʼmo Kalaisi Yesupiʼmo saufa vayaʼmo alo huno lateʼniye.

2 Timoti 2:19

Asagauno aiʼniyaʼmonanafa Goti noʼamo lokiya yafateʼmo faino ateʼniya yafaʼmo afaʼa haneʼniye. Gotiʼa faino ateʼniya yafateʼmo alagena yaʼmo hu maleʼniya yateʼmo haneʼniya gemoʼmo hunoʼaeʼmo, Ala kava neʼmoʼa vayaʼamo apakeʼniye, huno huteno magoʼe gemoʼmo hunoʼaeʼmo, Muki vayaʼamogimo Kalaisi agiʼamo neʼaya vayaʼmogi hosu kavategatiʼmo ataleʼa viyo, huno hu maleʼniye.

Taitasi 2:14

Agaemo muki keʼaepa gemo amagita ataleʼnona kavategatiʼmo miya faino hatu maeno latetenoʼaeʼmo hosu kavatimo aeno kalo paeno lateʼnigeta agaiʼa vayaʼamo maiʼneta layamukiki huta alagepa kavaʼmo huta maisunafeʼmo agaiʼa agufaʼamo ofalinigana huno Gotina amiʼniye.

Leveleseni 5:9

Apakaemo saufa yokemo huʼapaeʼmo, Kamagiʼnageka faliteka Gotitefeʼmo kolakaletiʼmo miya faika lateʼnane. Kagaemo muki alu nofi vaya alu nofi vayanagi muki alu apake alu apakemo neʼaiya vayanagi muki alu apakufaʼe alu apakufaʼe vayanagi muki alu kotega alu kotegamo maiʼnaya vayanagi huka miya faika hatu maeka lateʼnanaʼmofeʼmo alino kafage ki maleʼniya pepaletiʼmo kamemo afaʼa alika akautaleka alika ata lesana vekamo maiʼnane.