Aiyeya 33:17 - The Keyagana NT and 25 OT books

¹⁷ Lapakaemo alagepa apaulagamo neʼagaya kini vekamo agegae. Lapakaemo alagi afagitegamo haneʼniya koʼmo agegae.

Aiyeya 33:17 ပူးပေါင်းရင်းမြစ်များ

Samu 31:8

Kagaemo kame vayaʼnimogi apaiyafiʼmo alika oʼnateʼnananafa navalelika uka alagepa koteʼmo nateʼnane.

Samu 45:2

Kagaemo aeto agufa kanale vekamo maiʼneka muki vayaʼmo alagi aeka apakaseka maiʼnane. Gotiʼa fiku hapa maeno neʼapamiya gemo kavayafiʼmo maleʼnigeka ani gemo nehane. Gotiʼa muki afinaʼmo alino auleno neʼateyaʼmofeʼmae.

Salomoni Yokemae 5:10

Nahau nayamopafiʼmo neʼnahaiya vekaʼnimo yaveyave augosamo hanege haesa augosamo hanege huʼniye. Agaemo asole tauseniʼa vayaʼmo ago aeno apakaseʼniye.

Aiyeya 26:15

O Ala kava nene, huʼna, Kagaemo kagaika nofi vayaʼmo magoʼe huka alika apateʼnane. He, magoʼe huka alika apateʼnanageʼa magoʼe huʼa vayakamo afole aiʼnae. Ala kagikamo aliʼnane. Kagaemo lagae mopamo hakuʼmo alime alime uteka maleʼnane.

Aiyeya 33:21

Ani taonifiʼmo Ala kava neʼmoʼa laha maesiyafeʼmo lokiya kavaʼmo hugiye. Lagaemo asole alopa aniʼe aise aniʼeʼmo haneʼniya koteʼmo maigunaʼmonanafa kame nehaya sipiʼe alopa sipiʼeʼmo afaʼa oʼmegae.

Aiyeya 33:22

Ala kava neʼmo lagae yasi vekamo maige keʼaepa gemo nelamiya vekamo maige kini vekatimo maige huʼniyaʼmofeʼmo lagufamo alino katino lategaiye.

Aiyeya 6:5

Nagaemo huʼnaeʼmo, Nagaemo oʼaniʼya navayamo haneʼnigeʼna oʼaniʼya apavayamo haneʼniya vayaʼmogi folagapiʼmo maiʼnovaʼmofeʼmo lusi kava huʼna kage kage huteʼnaeʼmo, alagi afela heʼnove. Faliʼnova vekamo maiʼnove. Naulagafatiʼmo Ala kava neʼmo asole vayaʼaiteʼmo yagaino neʼapateya kini vekaʼapimo ago ageʼnovaʼmofeʼmo faliʼnova vekamo maiʼnove.

Matiyu 17:2

Apaulagaleʼmo aeto agufa agufamo alino hamaleʼniye. Augosafatiʼmo yegegana huno leʼnigeno kukenaʼalegatiʼmo ha le yakana huno yaveyaveʼage huʼniye.

Yoni 1:14

Ani vekamo agiʼamo Goti Geʼamoʼmo emineno agufamo aliteno nata neno emineno lagaeʼeʼmo magokepi lokaeno maiʼniye. Lagaeʼeʼmo lokaeno maiʼnigeta ageʼnonana ha le konali yaʼamo Afoʼamoʼmo aiya magoke mafaʼneʼamo aeto agufa kumani mafaʼneʼamo ha le konali yaʼamoʼa aeno ha leʼnigeta ageʼnone. Fiku laha maeno lamisiya kavaʼaʼe lama geʼaʼeʼmo aipafiʼmo havai teʼnigeno aeno ha leʼnigeta ageʼnone.

Yoni 14:21

Vayaʼmogi keʼaepa geʼnimo ma kava hiyo, ina kava osiyo, huʼna hapa nepauva gemo afiteʼa akame nehaya vayaʼmogi nagaefeʼmo hapau apayamopafiʼmo nehapaiya vayaʼmo maiʼnae. Afoʼnimoʼmo nagaefeʼmo hapau apayamopafiʼmo nehapaiya vayaʼaifeʼmo ani kavakeʼmo huno hau ayamopafiʼmo hauʼnisigeʼna nagaeʼeʼmo ani kavakeʼmo huʼna nahau nayamopafiʼmo nahauʼnisigeʼna nagaiʼnimo aliʼna apave lisugeʼa nagegae, huno hapa paiʼnigeno

Yoni 17:24

Afo, huʼna, nahauʼniyanagi apavaleka namiʼnana vayaʼnimo nagaetegamo eʼa maiʼneʼa namiʼnana ha le konali yaʼnimo agesayafeʼmo nahauʼniye. Ma mopamo alo osuʼnana afinaʼmo nagaefeʼmo kahau kayamopafiʼmo kahauʼniyaʼmofeʼmo ha le konali yaʼnimo namiʼnane.

2 Kolitiyani 4:18

Lagaemo neʼagona yafeʼmo lagesamo oʼafita noʼagona yafekeʼmo lagesamo neʼafunagenoʼaeʼmo alo huno nelate. Neʼagona yaʼmo aupa afinaʼmo hanegaiyaʼmonanafa noʼagona yatimo hanege hanege huno hanegaiyamofeʼmae.

1 Yoni 3:2

Nahauʼniya vayaʼmogitapae, huʼna, hemenimo Goti mafaʼneʼamo maiʼnonanageta henagaʼamo haiya agufa vayaʼmo maisupi, huta oʼafiʼnonaʼmonanafa agaemo emineno afole aisigetaeʼmo agaekana huta maigune, huta afiʼnone. Haiya agufa vekamo maiʼnifi, huta ageta aeto hugunaʼmofeʼmo agaekana huta maigune.