2 Timoti 1:16 - The Keyagana NT and 25 OT books

^16-17 Ala kava neʼmoʼa Onesifolasiʼe afamo anagaʼaʼeʼmo hau huno apateno. Onesifolasiʼa kalavusifiʼmo maiʼnova kavafeʼmo avagage osuʼnigeno Lomu taonifiʼmo eno avaʼyi huteno lusi kava huno kahauya huno nagetenoʼaeʼmo muki afinaʼmo naha maete naha maete huʼnigenoʼaeʼmo naipamoʼmo falu huʼniye.

2 Timoti 1:16 ပူးပေါင်းရင်းမြစ်များ

Samu 18:25

Kagaemo hapau huʼa neʼapataya vayaʼaifeʼmo kahau huka apategane. Kagaemo vaiʼmo oʼaliʼnisaya vayaʼmo alika apave lisanageʼa vaiʼmo oʼaliʼnana Gotigamo maiʼnane, huʼa kagegae.

Samu 37:26

Fatago vayaʼmogimo muki afinaʼmo hapau huʼa apateteʼa magoʼe yaʼmo apamiteʼa anonaʼapilefeʼmo neʼapamiye. Ala kava neʼmoʼa mafaʼneʼapimo fiku hapa maeno neʼapamiye.

Matiyu 25:17

Ani kava huno tu tausenimo amiʼniya vekamoʼmo akamelegaʼamo magoʼe huno tu tausenimo aliʼniye.

Matiyu 5:7

Gotiʼa alu vayaʼaifeʼmo hapau huʼa apateteʼa hapa neʼmaya vayaʼaifeʼmo hau huno apateteno hapa maegaiyaʼmofeʼmo Goti aulena vayaʼamo maiʼnae.

Apa 21:33

Ati vayaʼaiteʼmo hogote vekamo yagaino neʼapateya vekamoʼmo Polo haopaleʼmo uno maiʼnenoʼaeʼmo, Lole seli nofitalatetiʼmo kitapa ateyo, huno hapa paiʼniye. Agaemo ani vayaʼaifeʼmo hunoʼaeʼmo, Ina laʼmo maiʼnenoʼaeʼmo na agufa kava huʼniye, huno apafi geʼniye.

Apa 28:20

Ani kavaʼmo afole aiʼniyaʼmofeʼmo lapaketeʼnaeʼmo ani gemo lapa paisuvafeʼmo huve. Isaleli vayaʼmogimo apavayagunagu huʼa agava maiʼnaya vekalefeʼmo kalavusi huʼa nateʼnageʼna hemenimo maiʼnove, huno hapa paiʼniye.

1 Kolitiyani 16:18

Naipamo aliʼa falu huʼa nateʼnaya kava huʼa lapaipamo aliʼa falu huʼa lapateʼnae. Ani agufa vayaʼaifeʼmo, alagepa vayaʼmo maiʼnae, hutapa hutetapa geʼapimo afiyo.

Efasasi 6:20

Ani gelefeʼmo Goti apa vekaʼamo kalavusi huʼnove. Gotiʼa alino namiʼniya gemo koli osuʼna lokiya gemo huʼna aeʼna hakalo huʼna hapa paisuvafeʼmo nunumuʼmo hutapa nateyo.

2 Timoti 1:12

Ani aliʼyaʼmo neʼaluvaʼmofeʼmo mani kana yaʼmo aliʼna maiʼnovaʼmonanafa navagagemo alagi nosiye. Nagaemo naha maesiyafeʼmo ina lafeʼmo nagesamo afiʼna fatago huʼnofi huʼna ago ageʼna aeto huʼnove. Nagaemo ageteʼnaeʼmo amiʼnova yateʼmo afaʼa yagaino nateme nateme neʼviyanageno agaiʼa afinaʼmo afole aigiye, huʼna nagesamo afisuvafeʼmo alino nave liʼnigeʼna ago ageʼnove.

2 Timoti 1:18

Efasasi taonifiʼmo maiʼnogenoʼaeʼmo muki afinaʼaeʼmo naha maeʼniya kavaʼmo ago ageʼnane. Nagaemo Ala kava nefeʼmo, kagae afinaʼmo afole aisigekaeʼmo kahau huka ato, huʼna nunumuʼmo huʼna neʼatove.

2 Timoti 1:8

Lamiʼniyaʼmofeʼmo Ala kava netimo faigoko geʼamo aeka hakalo huka hapa paisanafeʼmo kavagage osinageka Kalaisi agiʼalefeʼmo kalavusifiʼmo maiʼnova vekaeʼmo kavagage osino. Kavagagemo osinageka faigoko gelefeʼmo hanageke yaʼmo alisayafeʼmo Goti himamuʼaletiʼmo kana yaʼmo aliyo. Nagaemo kana yaʼmo aliʼnova kava huka kana yaʼmo aligetaʼao.

2 Timoti 4:19

Pilisilaʼe Akuvilaʼenagi Onesifolasi afamo anagaʼaʼenagi hutapa ge apamamaeyo.

Failimoni 1:20

Konagaʼnimogae, huʼna, Ala kava neʼmo agiʼalefeʼmo namogaga aisuvafeʼmo ani kavaʼmo huka naha mao. Kalaisipiʼmo maiʼnetaʼaeʼmo naipamo alika falu huka nato.

Failimoni 1:7

Kagaemo apaote vayaʼai apaipamo alika falu huka apatetekaeʼmo kahau kayamopafiʼmo kahauʼnigekaeʼmo alika lokiya vaika nelatanagetaeʼmo lusi kava huta lamogaga neʼaune.

Himulu 10:34

Nagaemo kalavusifiʼmo maiʼnogetapaeʼmo lapau hutapa nateʼnae. Kagemi yatapimo kumayaʼmo aliʼnagetapaeʼmo kanalene, hutapa huʼnae. Hogote kagemi yatimo kokuʼnapiʼmo okasalisiya kagemi yatimo haneʼniye, hutapa lapaipafiʼmo lapakesamo afiʼnayaʼmofeʼmae.

Himulu 6:10

Lapakaemo aliʼyaʼmo alige Gotifeʼmo lapau lapayamopafiʼmo lapauʼnigeta aliʼyaʼamo alige nehutapa apaote vayaʼamo hapa maeʼnayanageta hapa neʼmae. Gotiʼa hosu kavaʼmo huno alino fako huno noʼapateyaʼmofeʼmo alagepa kavatapieʼmo alagi age okanigiye.

Luti 1:8

Neyomiʼa anakaefeʼmo hunoʼaeʼmo, Kotanilegamo aitana atagi netanutana itatanimoganiʼeʼmo maiʼao. Alagepa kavaʼmo hutana yagaitana natetetana faliʼnaʼa anautanilaʼmoganiʼeʼmo alagepa hutana yagaitana anateʼnaʼae. Ani kava huno Gotiʼa alagepa kavaʼmo huno yagaino lanatenagetana maiʼao.