2 Sitoli 20:17 - The Keyagana NT and 25 OT books

¹⁷ Apakegayaʼmonanafa lapakaitapimo kamemo osutapa afaʼa maigae. Kamemo hisaya kumateʼmo utapa avaʼyi hutetapaeʼmo he tita lamitapa aulu hetapa ageta maiyo. Ala kava neʼmoʼa lapa maesigetapa agegayana lapakufamo alino katino lapatesigetapa agegae. Lapakaemo Yulusalemu vayaʼmogitapaʼe muki haopalega maiʼnaya Yuta vayaʼmogitapaʼeʼmo lapaipamoʼmo kana huʼninagetapa koli osiyo. Egamo lapakaemo kamemo hisayafeʼmo vigenoʼao Ala kava neʼmoʼa lapakaeʼeʼmo magokepi lokaeno vino, huno hapa paiʼniye.

2 Sitoli 20:17 ပူးပေါင်းရင်းမြစ်များ

1 Kini 20:13

Ani afinaʼmo mago Gotitegati gemo alinineno aeno hakalo nehiya vekamoʼmo kini vekamo Ehapitegamo malage huno eno ha painoʼaeʼmo, Ala kava neʼmoʼa hunoʼaeʼmo, Ani Meniheʼneʼmo asole ati vayaʼamo apakeʼnapiye. Hemenimo nagaemo apavaleliʼneʼna kayapiʼmo apatesugeka nagetekaeʼmo nagaiʼniekeʼmo Ala kava neʼmo maiʼniye, huka nagegane, huno huʼniye.

2 Sitoli 20:16

Egamo kame vayaʼmo lapakaeʼeʼmo kamemo hisayafeʼmo Sisi avele kateʼmo eʼa hai egae. Lapakaemo uta lamiyo. Lamitapaeʼmo yegemo haine neʼeya haopalega Yeluveli kaʼme koʼmo atupaleʼmo apakegae.

Samu 46:7

Ala kava neʼmoʼa asole vayaʼaiteʼmo yagaino neʼapateya vekamoʼmo lagaeʼeʼmo magokepi lokaeno maiʼniye. Yekopu Gotiʼamoʼmo uta fala kita neʼmauna kotigana huno maiʼniye.

Hatu maeno apate'niya gemae 14:25

Agaemo talalaʼapimo aiyaʼamo mopafiʼmo aeno lapaneteno oʼvisiya agufa kavaʼmo huʼnigeʼapaeʼmo Isipi vayaʼmogimo huʼapaeʼmo, Ala kava neʼmoʼa Isaleli vayaʼmo hapa maeno lagaeʼeʼmo kamemo nehiyanageta apataleta laune heta ugune, huʼa huʼnae.

Hatu maeno apate'niya gemae 6:1

Ala kava neʼmoʼa Mosesefeʼmo ha painoʼaeʼmo, Nagaemo hemenimo kini vekalegamo hisuva kavaʼmo agegane. Himamuʼniletiʼmo hisugeno apatalesigeʼa afaʼa ugae. Himamuʼniletiʼmo hisugenoʼaeʼmo mani agaiʼa kotetiʼmo alino hapa faino apatalesigeʼa ugae, huno ha paiʼniye.

Napa 14:9

Lavalelinuno lamigiyaʼmonanafa akame hisaya Gotiʼa geʼamo amagitapa oʼataleyo. Ani haopalegamo maiʼnaya vayaʼmo lagae neʼyakana huʼa maisageta alita hano huta apatalegaunaʼmofeʼmo ani vayaʼaifeʼmo koli osiyo. Hapa maesaya gotiʼapimogimo oʼmaiʼnayaʼmonanafa Ala kava neʼmoʼa lagaeʼeʼmo magokepiʼmo lokaeno maiʼniye. Apakaefeʼmo koliʼapimo osiyo, huʼana hapa paiʼnaʼae.

Matiyu 1:23

Agaemo hapa painoʼaeʼmo, Veʼeʼmo magokepi lokaeno ohavaeʼnisiya aʼmafaʼnemoʼa aipaguʼeʼmo maiteno ve mafaʼnemo alino ategaiye. Agiʼamo Imaniyuveliʼae huʼa aegae, huno avoʼmo kae maleʼniye. Imaniyuveliʼae agimo aepaʼamo Gotiʼa lagaeʼeʼmo magokepi lokaeno neʼmaiye.

Matiyu 28:20

Aniʼmo faleta apatetetapaeʼmo muki ma kavaʼmo hiyo ina kavaʼmo hiyo, huʼna lapa paiʼnova gemo akame hiyo, hutapa alita apaya maleyo. Lama gemo lapa nepauve, huno, nagaemo lapakaeʼeʼmo magokepi lokaeʼna maime maime neʼvisugenoʼaeʼmo ma mopaʼe kokuʼnaʼeʼmo hano hisiya afinaʼmo afole aigiye, huno hapa paiʼniye. He, lama ge.

Lomu 8:31

Ani kavaʼmo nehiya kavatefeʼmo na agufa gemo hugune. Gotiʼa lagaekeʼmo laha neʼmaeyaʼmofeʼmo haiya vayaʼmogimo lagaefeʼmo kame huʼa lategae.

2 Timoti 4:22

Ala kava neʼmoʼa kagaeʼeʼmo magokepiʼmo lokaeno maino. Gotiʼa fikumo lapa maeno lapamino. He, lama ge.

1 Samiyo 17:47

Muki manileʼmo maiʼnaya vayaʼmogimo ageʼapaeʼmo Ala kava neʼmoʼa hayoletiʼe keveletiʼeʼmo apakufamo alino katino noʼapate, huʼa agegae. Agaiʼageʼmo kamemo huno aeno neʼapakaseyanageno layapiʼmo alino lapategaiye.