1 Yoni 5:1 - The Keyagana NT and 25 OT books

¹ Ina lagimo Yesuʼa Kalaisiʼmo vayaʼmo maiʼniye, huʼa huteʼa apakesamo afiʼa fatago nehafi Gotiʼa alino apateʼnigeʼa mafaʼneʼamo maiʼnae. Muki vayaʼamogimo alino apateʼniya vekaeʼmo hapau apayamopafiʼmo hapausiyana ani kava huno alino apateʼniya mafaʼneʼamogiʼefeʼmo hapau apayamopafiʼmo nehapaiye.

1 Yoni 5:1 ပူးပေါင်းရင်းမြစ်များ

Matiyu 16:16

Saimoni Pitaʼa geʼaleʼmo aeno atagaina hunoʼaeʼmo, Kalaisi vekamo maiʼnane. Maige maige huno neʼmaiya Goti mafaʼneʼamo maiʼnane, huno ha paiʼniye.

Luki 7:5

Yu vayaʼmogitaeʼmo hauʼnigeno mono noʼmo kino lateʼniyaʼmofeʼmo eka ha mao, huʼa Yesufeʼmo ha paiʼnae.

Yoni 1:3

Gotiʼa agaetetikeʼmo muki asole yaʼamo alo huʼniye. Magoke yaʼmo mago alu katetiʼmo alagi afole oʼaiʼniye.

Yoni 15:23

Ina lagimo nagaefeʼmo apaini nehafi ani kava huʼa Afoʼnimoʼefeʼmo apaini nehae.

Yoni 3:3

Yesuʼa hunoʼaeʼmo, alagi lama ge kaha nepauve, huno, Gotiʼa halate alino oʼapateʼnisiya vayaʼmogi Gotiʼa haiya kava huno yagaino neʼapatefi huʼa afaʼa ageʼa aeto osugae, huno ha paiʼnigenoʼaeʼmo,

Yoni 6:69

Hemenimo lagaemo lagesamo afita fatago huteta kageʼnonana aeto agufa vekamo Gotitegatiʼmo emikeʼnana vekamo maiʼnanageta kageʼnone, huno ha paiʼnigeno

Yoni 8:42

Nagaiʼnimo nagesamo afiʼna eminoʼmeʼnofa Gotiʼa alino nateʼnigeʼna eʼnove. Gotitegatiʼmo emiʼneʼnovaʼmofeʼmo Gotiʼa afotapimoʼa maiʼniyesinana nagaefeʼmo lapau lapayamopafiʼmo lapauʼniyesine.

Apa 8:36

Kategamo neʼuʼanaeʼmo mago ani kotuʼmo haneʼniya yateʼmo uʼana avaʼyi nehuʼanaeʼmo meku vekamoʼmo hunoʼaeʼmo, Manile ani kotuʼmo haneʼniye. Natafauno natesiya yaʼmo haneʼnifi afaʼa aniʼmo faleka nategane, huno afi geʼnigenoʼaeʼmo

Apa 8:37

Filipiʼa hunoʼaeʼmo, Muki kaipa kagesafatiʼmo alagi kagesamo afika fatago nehisanaʼmoʼmo afaʼa aniʼmo faleʼna kategauve, huno ha paiʼnigenoʼaeʼmo, Ago ani gemo kaha nepauve, huno, Yesu Kalaisiʼmo Goti mafaʼneʼamo maiʼniye, huʼna nagesamo afiʼna fatago nehuve, huno ha paiʼniye.

Yemisi 1:18

Agaemo hauʼnigeno muki alo huno apateʼniya vayaʼmo aeta apakaseta maisunafeʼmo lama geʼaletiʼmo alino lateʼnigeta mafaʼneʼamo maiʼnone.

1 Pita 1:3

Lagaemo Goti agiʼaleʼmo Ala kava netimo Yesu Kalaisi afoʼamo agiʼaleʼmo alita auleta ategetao. Lusi kava huno hau huno lateʼniyaʼmofeʼmo Yesu Kalaisiʼa faliʼniyatetiʼmo ago alino he tino ateʼniya kavatetiʼmo saufa vayaʼmo halate alino lateʼniye. Lagaemo afole aisiya kavatefeʼmo agava maiʼnetaeʼmo lama geʼalefeʼmo lavayagunagu huta maisunafeʼmo ani kavaʼmo huʼniye.

1 Yoni 2:10

Konagaʼaeʼmo hau ayamopafiʼmo nehaiya vekamoʼmo ha le yateʼmo alagi maiʼnigenoʼaeʼmo aipafiʼmo alino agoʼya faino atalesiya agufa kavaʼmo alagi ohaneʼniye.

1 Yoni 2:29

Lapakaemo Gotiʼa alagepa kavaʼageʼmo nehiya vekae, hutapa ago afiʼnayaʼmofeʼmo agaemo alagepa kavaʼmo nehaya vayaʼmo hogoteno alino apateʼnigeʼa mafaʼneʼamo maiʼnae, hutapa afiʼnae.

1 Yoni 3:14

Lagaemo konagatieʼmo lahau layamopafiʼmo nelahaiyaʼmofeʼmo afiʼnonana nefaliya kavategatiʼmo ago ataleta eta afaʼa neʼmaiya kavategamo maiʼnone. Konagaʼapieʼmo hapau apayamopafiʼmo nohapaiya vayaʼmo nefaliya kavategamo alagi neʼmaiye.

1 Yoni 3:17

Atalegaunaʼmonanafa mago vekamoʼmo hapa maesiya yaʼamo haneʼniya vekamoʼmo agesiyana mago konagaʼamoʼmo kafu huʼnisigeno agetenoʼaeʼmo hau huno ateteno oʼamiʼnisiyana Gotiʼa hau ayamopafiʼmo hauʼniya kavaʼamo aipafiʼmo haneʼnifiye.

1 Yoni 3:9

Ina lagimo Gotiʼa alino apateʼnifi Goti avina yaʼamo apaipafiʼmo haneʼniyaʼmofeʼmo hosu kavaʼmo akame nosae. Gotiʼa alino apateʼniyaʼmofeʼmo apakaemo hosu kavaʼmo alagi akame osugae.

1 Yoni 4:2

Muki vayaʼmogimo, Yesuʼa Kalaisi vekamo maiʼneno ma mopafi vayaʼai apakufagana agufamo aliteno vayaʼmo hamaleʼniye, huʼa nehaya vayaʼmo Goti Aunemeʼamo aliʼnae. Lapakaemo ani kavatetiʼmo ageʼnayana Goti Aunemeʼamo apaipafiʼmo maiʼniye, huta agetapa aeto huʼnae.

1 Yoni 4:20

Mago vekamoʼmo hunoʼaeʼmo, Nagaemo Gotifeʼmo nahau nayamopafiʼmo neʼnahaiye, huno nehunoʼaeʼmo konagaʼamogifeʼmo aini hisiyana aigofe vekamo maiʼniye. Agaemo ageʼniya konagaʼamofeʼmo nohausiyana haiya kava huno oʼageʼniya Gotifeʼmo hau ayamopafiʼmo haugiye.

1 Yoni 4:7

Nahauʼniya vayaʼmogitapae, huʼna, Hapau apayamopafiʼmo nehapaiya kavaʼmo afoʼamoʼmo Gotiʼa maiʼniyaʼmofeʼmo konagatimogifeʼmo lahau layamopafiʼmo lahaino. Muki vayaʼmo hapau apayamopafiʼmo nehapaiya vayaʼmo Gotiʼa alino apateʼnigeʼa mafaʼneʼamo maiʼneʼa Gotiʼa ageʼa aeto huʼnae.

1 Yoni 5:18

Gotiʼa alino apateʼniya mafaʼneʼamogimo hosu kavaʼmo akame nosae. Gotiʼa alino apateʼniya vayaʼmogi apakaiʼapileʼmo yagaiʼa neʼapatagenoʼaeʼmo hosu vekamoʼmo alino hosu huno noʼapate.

1 Yoni 5:4

Gotiʼa alino apateʼniya mafaʼneʼamogimo ma mopafi kavaʼeʼmo kame huʼa aeʼa neʼagasae. Lagaemo Goti Mafaʼneʼaeʼmo lagesamo afita fatago huʼnona kavatetiʼmo ma mopafi kavaʼmo kame huta ago aeta agaseʼnone.

1 Yoni 5:5

Ina lagimo ma mopafi kavaʼmo kame huʼa aeʼa agasegae. Yesuʼa Goti Mafaʼneʼamo maiʼniye, huʼa apakesamo afiʼa fatago nehaya vayaʼamogigeʼmo kame huʼa aeʼa agasegae.