1 Pita 4:3 - The Keyagana NT and 25 OT books

³ Lagaemo hogoteta malaga vayaʼmogi hapauʼniya kavakeʼmo alagi huʼnonaʼmonanafa hemenimo magoʼe huta osugune. Hogoteta kumai kavaʼmo hisunafeʼmo apayate alige amega lagufamoʼmo hauʼniya kavaʼmo huge aniʼmo neteta negi nagi kavaʼmo huge ogefagemo huge aniʼmo neteta hosu kigi yokalo gemo huge hutetaeʼmo aigofe gotitefeʼmo hosu monoʼmo huʼnone.

1 Pita 4:3 ပူးပေါင်းရင်းမြစ်များ

1 Kini 21:26

Ala kava neʼmoʼa Emo nofi vayaʼmogi mopaʼapimo alino Isaleli vayaʼmo apamisiyafeʼmo alino hapa faino apataleʼniya vayaʼmogimo huʼnaya agufa hosu kavaʼmo Ehapiʼmo huʼniye. Agaemo Gotiʼa avenatuʼnaʼmo heno neʼataleya agufa kavaʼmo huno aigofe gotigitefeʼmo monoʼmo huʼniye. Emo vayaʼmogi huʼnaya agufa kavaʼmo huʼniye.

Aiyeya 5:11

Lokiya aniʼmo neteʼa negi nagi hisayafeʼmo gotilamiyapiʼmo he netiya vayaʼmogi lokiya aniʼmo neme neme neʼvisageno haniʼilaga folaguʼmo hugiyaʼmofeʼmo lusi kava huʼa kage kage hugae. Neme neme uʼa negi nagi hugae.

Aiyeya 65:4

Apakaemo haniʼilagamo uʼa faliʼnaya vayaʼmogi kanoluleʼmo maiʼneʼa afulafaʼmo ameʼamo nege oʼneyo, huʼna huʼnova agufa afumo kaeʼnaya aniʼamo nege huʼnae.

Maki 7:22

kumaya alisaya kavaʼmo afole aige hapaʼye hisaya kavaʼmo afole aige muki agufa hosu kavaʼmo afole aige aigofe kavaʼmo afole aige ge oʼafiʼa kumai kavaʼmo nehaya kavaʼmo afole aige apaketeʼa apaipa kafamo nehapaya kavaʼmo afole aige huʼa faipa huʼa neʼapataya gemo afole aige himuʼnamu nehaya kavaʼmo afole aige negi nagi kavaʼmo afole aige nehiye.

Apa 17:30

Akeyaʼvilaga vayaʼmogimo Goti geʼamo oʼafiʼneʼapaeʼmo negi kavaʼmo huʼnagenoʼaeʼmo afaʼa apakeno apataleʼniyaʼmonanafa hemenimo muki haopalegamo neʼmaiya vayaʼaifeʼmo hunoʼaeʼmo, Lapaipamo alita afe leyo, huno hapa nepaiye.

Lomu 13:13

Ha le yateʼmo neʼmaiya vayaʼmogimo nehaya agufa fatago kavaʼmo higetao. Lusi neʼyaʼmo netapa alita anupa hutapa maiʼnetapaeʼmo hosu kavaʼmo osuge aniʼmo netetapa negi nagi gemo osuge kumai kavaʼmo osuge alu kava alu kavatetiʼmo muki kumai kavaʼmo osuge ge oʼvaige lapaipa kafa ohapaege hutapa maiyo.

1 Kolitiyani 12:2

Lapakaemo ago ageʼnayana malaga vayaʼmo maiʼnagenoʼaeʼmo lapavalelino uno apake noʼaiya negi aigofe gotiʼapimogitegamo lapateʼnigetapa hosu kateʼmo uʼnae.

1 Kolitiyani 6:11

Hogotetapa magoʼamogitapamo ani agufa vayaʼmo maiʼnae. Maiʼnayaʼmonanafa Kalaisiʼa ani faleno lapateʼnigeno Goti Aunemeʼamoʼa lapavaleno lapaote lapateʼnigeno Gotiʼa Ala kava netimo Yesu Kalaisi agiʼaletiʼe Aunemeʼaletiʼeʼmo, naulagaleʼmo fatago vayaʼmo maiʼnae, huno lapa paiʼniye.

2 Kolitiyani 12:21

Fiku yanageʼna halate lapakaetegamo visugenoʼaeʼmo Gotiʼnimoʼmo lapaulagaleʼmo navagage yaʼmo namigiye. Hogotetapa asole vayaʼmogitapamo kavatapileʼmo oʼyagaitapa oʼaniʼya kavaʼmo huge kumai kavaʼmo huge afela afugana hutapa hosu lapaʼye huge hutapa maiʼnisaya vayaʼmogitapamo halate lapaipamo alita afe oleʼnisayana yulagefaʼmo aiguve.

Galesiya 5:19

Muki vayaʼmogimo atafa apaipa apakesamoʼmo hauʼniya kavaʼmo ago ageʼnae. Ani kavaʼmo haneʼniyana veʼalavefatiʼmo kumai kavaʼmo huge mafaʼnefatiʼmo kumai kavaʼmo huge oʼaniʼya kavaʼmo huge apavagage osigeʼa kalamogi nehaya agufa kavaʼmo huge nehae.

Galesiya 5:21

Hosu apaipa kalige kamitimo apamagige lusi aniʼmo neteʼa negi nagi gemo huge lusi kava huʼa ogefage huʼa apavamusa valeʼa negi nagi huge magoʼe huʼa ani agufa hosu kavaʼmo huge nehae. Hogoteʼna lapa paiʼnovanageʼna hemenimo halate magoʼe gemo huʼnaeʼmo, ehetapiye, huʼna lapa nepauve. Afole oʼaiʼniya afinaʼmo hogoteʼna lapa paiʼnaeʼmo mani agufa hosu kavaʼmo nehaya vayaʼmogimo Gotiʼa yagaino neʼapateya kopiʼmo uʼa haiʼa mafaʼneʼapimogimo afoʼapimogi yaʼmo neʼaliya kava huʼa Gotitegatiʼmo hetamaʼapimo afaʼa oʼaligae.

Efasasi 5:18

Lusi aniʼmo netetapa negi nagi gemo osigenoʼao lapakufamo alino hosu huno olapateno. Osutapa Goti Aunemeʼamoʼmo lapaipafiʼmo havai teno.

1 Tesaloniyani 4:5

Malaga vayaʼmo Gotiʼa oʼageʼnaya vayaʼmogimo apakufamoʼmo hauʼniya agufa kavaʼmo huʼa hapaʼye nehigeʼapaeʼmo aʼmo neʼaliya agufa kavaʼmo osiyo.

Taitasi 3:3

Hogoteta apakaekana huta maiʼneta negi kava huta ge oʼafita aigofe gegeʼmo afita maiʼnone. Asole agufa hosu kavatimo haneʼniyana lagufamoʼmo hauʼniya kavatimoʼe hosu lahaʼye nehiya kavaʼmoʼeʼmo yagaino lateʼnigeta alagepa huʼa oʼmaisayafeʼmo lagesamo afiʼnetaeʼmo hosu laipamo kalita apatege laipa kafa hapaege huta maiʼnone. Lagaefeʼmo apaini huʼnagetaeʼmo lagaeʼeʼmo apakaefeʼmo laini huʼnone.

1 Pita 1:14

Lapakaemo gemo neʼafiya mafaʼnegana hutapageʼmo maiyo. Hogotetapa Goti geʼamo oʼafiʼnetapaeʼmo amega lapakufamoʼmo hauʼniya kavaʼmo akame hutapa maiʼnayaʼmonanafa hemenimo lapakaefeʼmo keya aeno ge huʼniya vekamo alagepa aote vekamo maiʼniya kava hutapa muki kavaʼamo nehutapaeʼmo alagepa lapaote vayaʼmo maiyo.

Yuti 1:4

Mago vayaʼmogimo Gotifeʼmo alagepa huʼa mono nosaya vayaʼmo kesi katetiʼmo eʼa lagae folagapiʼmo afole aiʼnae. Apakaemo hapaʼye nehigeʼa kumai kavaʼmo hisayafeʼmo Goti geʼamoʼmo fikumo laha maeno nelamiya kavafeʼmo ava gemo aliʼa afe leʼa alu gemo nehae. Magoke vekamo yagaino neʼapateya Ala kava netimo Yesu Kalaisifeʼmo apakameʼyamo amiʼnae. Akeyaʼvilagamo Gotiʼa ani kavatefeʼmo lekana pai maleʼniyana agoti huʼna apateteʼna kayoʼmo apamiguve, huno hu maleʼniye.