Osia 13:9 - Anatunya Buku Baepole Ole Testamene Pii Lapo dee Nuu Tesamene

⁹ Isaraele wambu dupwa nambame pyao kokwa sero dokopa apimi nakama nyisarase?

Osia 13:9 ပူးပေါင်းရင်းမြစ်များ

Samu 33:20

Namwa Kamongo keta pyamalyapala karamano lao sepala kararama. Baame namwa nyiso kingi kapeme nee pyuo minyuo papingi.

Samu 46:1

Anatu namwana konambena mendeke ingyuo porai renge joo pyuo karenge. Randa epelyamo dupwana kaeya nao yuu peparae rapa rapa piru karapala nyisingi.

Poropepe 8:36

Akali mendeme namba kando nyii nara ramo doko baa range randa nyera. Mendeme namba epe kanda nara ramo doko baa range kumungi renge doko mona reto kararasa pira, leya.

Jeremaya 2:17

Nambame nakama Isaraele wambunya kata wapwakao pupunu dokopa nakamame namba nakamana Kamongo Anatu doko kame soo yaki nyiyami dokome randa dake nakama range keta nyilyaminyi.

Jeremaya 2:19

Nakama rangena koo dokome nakama randa jera. Dee nakamame namba mata jiyami dokome koo ingyuo karaminyi lao lasaka pirasa pira. Dopa piramo dokopa nakamana Kamongo Anatu namba doko yaki nyuo kaeyamo doko yulu ama koo wakasa lao soo nyerami. Namba Kamongo Mupwa Andake Wakasa Ama Porai dokome lapunu pilyamo.

Osia 13:4

Dokopa Kamongome lao, Namba nakamana Kamongo Anatu yuu Isipi piso lanyuo epeyo doko, leya. Nakamame anatu wakale mende soo nyii napala namba iki soo nyepenge. Namba ikiko nakamana pyuo nyingi ingyuo karenge.

Osia 14:1

Isaraele wambu dupwa nakamana Kamongo Anatu karamo dokona kapu kyuo pupwape. Nakamana koo dupwame nakama lukumakapala pao palimi kandape.

Malakae 1:12

Nakambame nambana kana pyare lasi doko kwaelyamo lapala namba ketae pyambwa nalyaminyi. Nenge awa nami dupwa kana pyare lasi dokona kiso jiminyi doko kilya kandaminyi doko kandelyo.

Malakae 1:13

Nakamame lao, Namwame dupwana peparae ama makalyamano lapala namba kando gyaa silyaminyi. Nakamame mena minyuo epo kiso jilyamano lapala mena anga ikyane palengepe kimbu koope waa menape dupwa minyuo epo jilyaminyi. Nambame dupwa rae maiyuo nyereŋe lao nakamame suu pilyamisi?

Malakae 1:9

Epapu nakama purisi dupwame Anatumi namwa kando keyange pinya lao piso soo kandalapape. Dokopa nakamana ateŋa doko isingi yano pyaka nara ramo doko nakama kwaeyarami dokona pira.

Dutaronome 33:26

Isaraele wambu dupwa selapape. Anatu mende nakamana Anatu kamame andake neta renge dokome yake dorena piso oko soo epo dee kopa rakapana dokona piso nakama nyisala epenge kandale dopale mende kara nalyamo.

Dutaronome 33:29

Isaraele wambu nakama raeme kumulyaminyi kande. Kamongome nakama nyiso lete nyipyamo dopale ingyuo yuu liti menge dupwa Kamongome nyisapyamo kara nalyaminyi. Kamongo baa nakamana konambe wua gelape ingyuo baa nenge nyakalyamo. Dopa pipala nakamana yanda pimwai dupwame sakame kumuo karamili lao piso soo epeyami kande dokopa nakama pyao kalya pisi pisi pyuo anamo kararami.