Zooɛ 2:27 - Ŋ̀âla Kɔlɔ Maa Waai

²⁷ Ka pâi gɔlɔnii a gɛɛ ŋ́gaa Eezuɛ lɔii sáma, ŋ́gɛ ƃò a Yâwɛɛ nyii gáa a Káɣâlai, ǹyaŋ ɣâla da kpɛ́ni kélee fé naa é kúla ḿbôlu. Ŋánûai dífe pâi ŋɔ́nɔ wɔ́lɔ ŋumɛi.

Zooɛ 2:27 ပူးပေါင်းရင်းမြစ်များ

Wule-woo-ŋa 46:5

Ɣâla káa daa-lee kɛ́tɛi tí su. Núu da fé pâi wɔ́lɔ naa su-karai. A pâi pâi a ɣele ƃɔ̂i kpini é kpɔŋ mâa tɛɛ bɔ́.

Wule-woo-ŋa 68:18

È tɛ̀ ŋ̀elei su póŋ-poŋ a kɔ-soŋ támaa. Nûa dí sama-sãa támaa tɛ̀ɛ bɔ́. Ŋɔkpɔara-ƃelai dí sama-sãa tɛ̀ɛ bɔ́ máŋ. Ɣâla Yâwɛɛ a pâi seêi naa.

Táre-woo-ŋa 1:23

À kɛ̀ kà káwolii tɔ̀ɔ ŋália-wooi ma, gɛ̀ ní ŋa pâi ŋámɔ̂leŋ ŋɔtárei kélee tɛɛ̂i kápɔ, ŋa ŋɔ́nɔ ŋ́oo-ŋai su-kulâi lɛ́ kâa.

Azaya 12:6

Tɔɔ diai kélee Zãiyɔŋ Yeei mai dí láɣi ɣelêi pere a wule-wôo. Eezuɛ Ŋɔɣâla tɔnɔ maa waai kɛ̂tɛi. Gɛ̂i nɔ́ ƃa ŋɔnûai sáma.”

Azaya 44:3

“Ŋa pâi gɛ̂i tuna é pú, ǹɔii kpâlai é yɔɔ. Ŋa pâi gɛ̂i ya-ɣɛli pɛlɛɛ-ŋa dí láa vɛ̃ɛ-kpâlaŋ-ŋai su. Ŋa pâi Ŋámɔ̂leŋ pûi kálônii kponôi, ŋá lûwa láa dîa.

Azaya 44:8

Ŋánûa, káfe yào. M̀ɛni-ŋai pâi kɛ̂i, ŋá gélee ƃo kâa a gɔ́ɔ-pîlani. Káa kpîŋ ka gɔ́lɔŋ. Kákaa a ŋásêre-ŋa. Ɣâla da kpɛ́ni káa naa é kúla ḿbôlu? Kɔni da fé naa é kpanaŋ yɛ̂ɛ ńyãa. Fé dɔnɔ kpîŋ da kɔ́lɔŋ.”

Azaya 45:18

Yâwɛɛ ƃé ŋ̀ele-kɔ̂lɔŋ-ŋai kpɛ̀tɛ. Ǹyaa nɔ́ ƃa Ɣâla! Ǹyaa ƃé ǹɔii pù gîe ma, é gbɛ̀tɛ. È gbɛ̀tɛ a gbanaŋɔɔ. Gáa naa wɔ́lɔ-wɔlɔ da wɔlɔ-wɔlɔ. Vé gbɛ̀tɛ ní kpɛ́ni-kpɛni. È gbɛ̀tɛ a núu-kpune kɛ̂i. Ǹyaa ƃé m̀o ǹyɛɛi, “Ńyãa ƃa Yâwɛɛ. Ɣâla da kpɛ́ni fé naa é kúla ḿbôlu.

Azaya 45:5

“Ńyãa ƃa Yâwɛɛ. Ɣâla da kpɛ́ni fé naa é kúla ḿbôlu. Ŋa pâi íkponôi kpananîi, berei máŋ ífe ŋ́gɔlɔŋ lai.

Azaya 45:6

Ŋa pâi gɛ̂i tí a gɛ́ɛ ŋ̀éniɛi gwaa kélee su-ƃela dí gɔ́lɔŋ a gɛ́ɛ ńyãa ƃa Yâwɛɛ, ǹyaŋ Ɣâla da kpɛ́ni fé naa é kúla ḿbôlu.

Azaya 46:9

Ka kákili ŋá sía é pîlaŋ m̀ɛni-ŋai ma ŋá wɔ́lɔ dí kɛ̀ kásamai. Ka gɔ́lɔŋ a gɛ́ɛ ńyãa tɔnɔ nɔ́ ƃa Káɣâlai. Ɣâla da kpɛ́ni fé naa é kúla ḿbôlu.

Azaya 49:23

Kâloŋ-ŋa da pâi káŋa kɔnîi yɛ̂ɛ kánâŋ-ni. Dínɛyâai dí kámɛi káa yɛ̂ɛ kálee-ni. Da pâi pîlanii díŋume ŋá kákɔɔ mu, dí ƃaa kɛ́-maa tɛ́ɛ kápɔ. À kɛ̀ tí, ka pâi gɔ́lɔnîi a gɛ́ɛ ńyãa ƃa Yâwɛɛ. Ka kákili tɔ̀ɔ ḿâ, ŋumɛ fé pâi kápaâi.”

Azaya 53:6

Kúkelee kú kɛ̀ nɔ́ yɛ̂ɛ ƃála láŋɔɔ-ŋa. Kú kɛ̀ nɔ́ liî kúkpîŋ ŋuŋ ma. Kɛ́lɛ m̀ɛni kula maai kɛ̀ kúmɛni mai, Yâwɛɛ è gélee pù ŋ̀ûa. Kúa ƃé m̀aa nɛ̃ɛ̂i kɛ̀ kú m̀ɛni kula maai ŋí sɔlɔ ƃó.

Izikiɛ 37:6

Ŋa pâi gɛ̂i káluu é kɛ́ kâa, ŋama é kɛ́ kákponôi. Kákɔlɔ é tɛ́ kâa. Ŋa pâi gɛ̂i ká lɛ̂wo é tóo kákponôi ká kɛ́ ɣele ma. Gɛ̀ ní ká pâi gɔlɔnii a gɛɛ Ńyãa ƃa Yâwɛɛ.”

Izikiɛ 39:22

É síɣe tãi tí ma é lí tuɛ pere, Eezuɛ-ƃelai kélee da pâi gɔlɔnii a gɛɛ ńyãa ƃa Yâwɛɛ nyii gáa a Díɣâlai.

Izikiɛ 39:28

À kɛ̀ tí, ŋá ǹûai da pâi gɔlɔnii a gɛɛ ńyãa ƃa Yâwɛɛ nyii gáa a Díɣâlai. Kpɛ́ni fêi ŋá gɛ̀ dí lí kɔ-soŋ laa su lɔii-ŋuŋ da kpɛ́ni su, ŋá ŋɔ́nɔ gɛ́ dí pá pôlu díkpɔɔ̂i lɔii su. Ḿve pâi ǹɛɛ̂i naa dí tɔnɔ kpîŋ é lɛ́ɛ lɔii da kpɛ́ni su.

Izikiɛ 39:29

Ḿve ŋɔ́nɔ pâi ŋ́ɛi loôi Eezuɛ-ƃelai dîa. Kɛ́lɛ ŋa pâi gɛ́i ŋá mɔ̃leŋ é kɛ́ dípôlu va kula naa. Ńyãai ŋ́gaa a Ŋ̀wála-wâla kélee Yâwɛɛi ńyãa ƃé mò tí.”

Zooɛ 2:26

Ka pâi mii-sɛŋ támaa sɔlɔ ƃôi ká mii, kálii é láa, ká Yâwɛɛ láa maa tɛ́ nyii gáa a Káɣâlai, nyii a mɛni lɛ́lɛɛ kɛ̀ kâai. Ǹyaŋ ŋánûai dífe pâi ŋɔ́nɔ wɔ́lɔ ŋumɛi.

Zooɛ 3:17

“Ka pâi ŋ́gɔlɔnîi a Yâwɛɛ Káɣâlai, nyii gáa Zãiyɔŋ Yeei mai, ŋáyee maa-waai. Zerusâlɛŋ a pâi kɛ̂i a maa-waa. Ŋɔ̃́ya da kélee yée fé ŋɔ́nɔ pâi tɛɛ̂i m̀a.

Zooɛ 3:21

Ŋa pâi ŋánûai díkpâi kulâi. Fé pâi mɛni nyɔ́mɔɔ kɛ́-ƃelai su mɛni lɛɛ̂i, kpɛ́ni fêi, ńyãa Yâwɛɛ káa Zãiyɔŋ Yeei ma.”

Zɛfɛnâya 3:11

Maa ɣêlei tí dífe pâi íŋumɛ̂i ímɛni nyɔ́mɔɔ-ŋai ƃa gɛ́ a ńyãai m̀ɛni ma, kpɛ́ni fêi, ŋa pâi ǹyoŋka ƃela kpɛ́ni-kpɛni-ŋai kulâi kásama, ǹyaŋ yoŋka-nuu fé ŋɔ́nɔ pâi kɛ̂i ŋáyee maa waai ma.

Zɛfɛnâya 3:17

Íɣâlai Yâwɛɛ káa íkɔlɛ. Ŋɔwála-wala-laai à gɛ̀ íyee é tɛ́ɛ íkpɔara-ƃelai dîa. A pâi lii-nɛ̃ɛ kulâi í mɛni ma, a pâi ísɔnyɔ̂ŋ su-mɛni lɛɛ̂i ŋɔwɛ̂li-kɛ-maai mɛni ma. A pâi wule toôi é lii-nɛ̃ɛ kula ímɛni ma

Zɛkɛrâya 2:9

“Yâwɛɛ ǹyaa kpîŋ a pâi kɔ̂i kápɔ, ǹyaŋ ka pâi kɛ̂i ǹûai mu nyii-ŋai kɛ̀ kámu a luɛ-ŋai.” M̀ɛnii ŋí à gbâa kɛ́, ǹúui kélee da pâi gɔ́lɔnîi a gɛɛ Ŋ̀wála-wâla kélee Yâwɛɛ ƃé ńdɛ̀ɛ.

Nɔŋba 11:29

Kɛ́lɛ Mose è mò ma ǹyɛɛi, “Íkaa ḿaa-tolo kulâi? À pɔ̂ri kɛ̂i a ǹɛ́lɛɛ Yâwɛɛ é ŋɔmɔ̂leŋ pú ŋɔnûai kélee kponôi a gɛɛ dí kɛ́ a ŋɔlóno kɛ́-ƃela.”

Nɔŋba 23:21

Ŋa gáa a gɛɛ Eezuɛ ŋɔtínaa tuɛ-pere, Mɛni kpɔ̂lu fé pâi kulâi mà, kpaa máŋ mɛni-sôli. Yâwɛɛ, Díɣâlai káa díkɔlɛ. Da mò dîɛ ǹyaa ƃa Díkâloŋ.

Kɔleŋtiɛŋ Veerɛi 6:16

Lé mɛni kpɛ́tɛɛ ƃe Ŋ̀âla-pɛrɛ kɛ́tɛi da ɣâla-pɔkɔɔŋ-ŋa da pɔ̂ri gɛ̂i? Kpɛ́ni fêi, kúa ƃa vulu-laa-Ɣalai ŋɔpɛ́rɛ kɛ́tɛi, yɛ̂ɛ berei Ɣâla è mò lai, “Ŋa pâi kɛ̂i díkponôi ŋá sía dísama, ŋa pâi kɛ̂i a Díɣâla, dí ƃo a ŋánûa.

Dutɛrɔnome 23:14

Kpɛ́ni fêi, Káɣâlai Yâwɛɛ a kɛ́ siâi m̀ûui su gɛ́ ǹaa maa kpɛ̂ a gɛɛ kákpɔara-ƃelai yée fé tɛ̀ɛ kâa. Mɛni ma, ká-mûui su kɛ́ a maa waa a gɛɛ Káɣâlai Yâwɛɛ fa lâa mɛni maa liƃiɛɛ kaa la m̀ûui su é bôlu tɔɔ kâa.

Pitɛ Maa-ŋuŋ 2:6

Kpɛ́ni fêi, gáa Ŋ̀âla-kɔlɔi su, “Ka gáa, ŋ́gaa kɔni lâai Zãiyɔŋ su, nyíi gáa a zonoŋ su-kɔni nyíi ŋá nɛ̀ maa-mɛni kpanaŋɔɔ mâi. Ǹúui a lâa lai vé pâi ŋumɛ̂i.”

M̀ɛni-lɛɛi 21:3

Nya ƃe ŋá wóo su kɛ́tɛ mɛ̀ni é kúla gâloŋ see-sɛŋ ma, nyɛɛi, “Gáa, Ɣâla-kɛi káa núu-kpune sama. A pâi kɛ̂i dísama, dí kɛ́ a ŋɔnûa, ǹyaŋ Ɣâla ǹyaa kpîŋ a pâi kɛ̂i dísama é kɛ́ a Díɣâla.