“Lí í Zuda-ŋai kélee ŋáa tɛ́ díkîe ma Susa taa-leei su ka dîa-ni ká sûŋ siɣe ḿɛni ma. Ka sûŋ siɣe a fólo saaƃa. Kwa ńyee mu-ƃelai kwa pâi gɛ̂i tí máŋ. Zûŋ ŋá ɣále tãi ŋa pâi liî gâloŋ pɔ́ naa berei máŋ vé tí la dɔ̂ŋ lá-woo mai. À kɛ̀ ŋa pâi saâi m̀ɛnii ŋí su, gɛ̀ ní é kɛ́ tí.”
Káai a ǹúu pɔ̂lɔ-ŋai, ka nyíŋi mɛ́ni, káai kélee ǹɔii sui, ka káwoli tɔ́ɔ! M̀ɛnii ŋí da a tá wɔ́lɔ kɛ́ kákɛ̀ ɣéniɛi su, kpaa máŋ kánâŋ-ni dí kɛ̀ ɣéniɛi su?
Ka mii-sɛŋ sala kula Yâwɛɛ ma a fólo lɔ́ɔlu mɛi feerɛ. Vóloi ǹɔ́ɔlu mɛi saaƃa ɣelei ka kákpîŋ maa wáa ká káŋaa tɛ́ gîe ma ká Yâwɛɛ fɛli ká kéreŋ sala kula. Káfe tíi da kélee kɛ̀ a ŋ̀elei tí. Gáa a ɣele kûu maa waa Yâwɛɛ mɛni ma.
Ǹyaŋ Ninivɛ-ƃelai dí làa a Ɣâla. Nya ƃe dí gbɛ̀tɛ a gɛɛ ǹûai kélee dípili sûŋ su dí maloŋ tôo-maa sêɣe ɣiri dîa é ǹɛ́ a gɛɛ da dí pôlu tɔɔ dísɔnyɔ̂ŋ-ŋai dîa é síɣe ǹúu kpaya-kpayai dîa é tóo bɛlɛ-pɛlɛɛi dîa.
Kɛ́lɛ fɛ̂ɛ nuu-kpune da fɛnɛ-sãa dí maloŋ tôo-maa sêɣe ɣiri dîa, dí wɔ́lɔ kpɔ́ a zu kɛ́tɛ Ɣâla ma. Tɔɔ núu kélee é bôlu tɔɔ ŋɔsɔnyɔ̂ŋ ma da ŋɔŋwana-lɔ̂ɔi.