22 Dífa lii-nɛ̃ɛ kùla é lɛ́ɛ la zu dí sáa dí díloo.
Ŋ̀wana-lɔ̂ɔ-ƃelai dífe pâi tarêi m̀ɛnii su gáa kɛ̂i a diai. Dífa berei kâa a gɛɛ dí pú. Ǹyaŋ kili-kɛ-zu da kpɛ́ni fé ǹúu sîi-ŋai ŋí yêei é tée saa pôlu.
Núu-kpulu kɛ́tɛ a kɛ̂ zàa mâ. Ǹɔii a kɛ̂ líi nɛ̃ɛ̂i kulâi a gɛɛ é ǹyée sée mu.
Díkaa a ǹûai nyii ŋ̀wɛ̂lii dí sáa kɛ́lɛ saa fa pâ dípɔ. M̀ɛni ƃé díkaa saa kɔ̂ri là yɛ̂ɛ núu ƃé tɔɔ-sãa kɔ̂rii.
Lé mɛni ƃé Ɣâla a ŋ́gɛ la ŋ̀éniɛi su ḿaa tínaŋɔɔ a siɣãŋ fa berei kâai?
Ŋ́âi kɛ̀ a gɔ́lɔŋɔɔ, gɛ̀ ní ŋa pâi pilîi ɣelêi a lii-nɛ̃ɛ, ḿva ŋ́gili ŋá sìa é pîlaŋ zɛŋ sôli-maa kɛ́tɛi ŋí mɛni ma. M̀ɛnii kélee Ŋ̀âla Maa-Waai a wɔ́lɔ mò ḿâi ŋa wɔ́lɔ ńyee sèe mu.
“Ŋa Ɣâla fɛlîi a gɛɛ é m̀ɛnii kɛ́ mî nyii ŋa marê kɛ̂i m̀ɛni mai, a gɛɛ é m̀ɛnii kɛ́ ḿî nyii ŋa ŋ̀wɛ̂lii.
Eêi pɔ̂ri kɛ̂i a ǹɛ́lɛɛ à kɛ̀ núu da a ŋ́zòŋ a ŋ́gwana. A pɔ̂ri kɛ̂i a ǹɛ́lɛɛ a gɛɛ ŋá sáa é tɛ́ɛ la ŋá lɛ́ɛ a ŋ́gao ma.
Nya ƃe ŋá mò ńyɛɛ lii-nɛ̃ɛ támaa káa diai dîa da sàai é tɛ́ɛ diai dîa ɣele mai.
Ǹúui nɔ́ ŋɔlii-nɛ̃ɛi tɛɛ̂i zaa-ƃelai da vúlu-ƃelai dîai ƃa nyii dífe nîi maa sɔlɔ ƃó nii. Kpɛ́ni fêi, vé nîi zɔnyɔ̂ŋ mɛni-ŋai ŋí da kɛ̂i káa ní.
Ǹúu kpului nyíi pâi lɛɛ̂i ŋ̀wana lɔ̂ɔ nuu-suui nyíi-ŋai ŋá díkùla ƃɛ́i pɔ́ɔ ŋái, a pâi kɛ̂i ŋ̀wɛ̂lii é sáa é tɛ́ɛ la gɛɛ ɣele ma m̀a. Ńyãai ŋ́gaa a Ŋ̀wála-wâla kélee Yâwɛɛi, ńyãa ƃé mò tí.”
