9 A ŋátɔɔ-laai da ŋáƃaa kɛ́-maa kélee kúla ńyêei.
A dáre-ƃelai su kɛ́ ǹyɔ̃ɔ, é gâloŋ-ŋai kíli-ŋa pú.
A zâla láa-soŋ-ƃelai díwala-wala-laai kùla díyêei, é núu mɛi-ƃelai díwala-wala-laai kpera.
Ŋá maloŋ-too maa-seɣe tòo ḿâ. Ɣâla a ńdoo muluŋ su.
Ǹîa-pɛlɛɛi nyii-ŋai dífe tɛ́-ni ḿbɔi díkaa nâa ɣɛ́lɛ-maa kulâi ŋ́gbonôi. Dínâŋ-ni kpɛ́ni-kpɛniɛi kpɔ́ a sɛŋ nyii ḿva pɔ̂ri dí marê kɛ̂i a gɛɛ dí kpɔŋ mâa tɛɛ ŋáɣila-ŋai pɔ́ a gɛɛ dí ŋáƃála-ŋai mɛi kaa.
Ya gbanaŋ-wooi ɣále ka ǹyaa káloai, ya gâloŋ-ƃɔrɔi kúla ŋ̀ûa ya bili muluŋ su.
Ya ziɣãŋ-ŋai wólo daa-leei ma, naa a lɛɛ fóŋ-kpoŋ.
Ya ŋɔkâloŋ-wuruii kúla ǹyêei, gâloŋ see-sɛŋ a kula ǹyêei a too ǹɔii ma.
kpɛ́ni fêi, tɔɔ-laa fa tûa zu. Lɔii-ŋuŋ-ŋa dífe pâi lɛɛ̂i naa wɔ́lɔ-wɔlɔ da wɔ́lɔ-wɔlɔ.
Da pâi ká tôlii a Yâwɛɛ ŋɔsâla láa-soŋ ƃela, Ɣâla ŋɔtíi kɛ́-ƃela. Ka pâi ǹɔii-ŋûŋ-ŋai dítɔɔ-sãai ŋàa-nɛ̃̂ɛ kulâi, ká kɛ́ yoŋka tèe a gɛ́ɛ díkaa a ká pɔ́ɔ.
Gâloŋ ƃɔrɔi kɛ̀ kúŋûai, a kula naa a too. Mɔ̃́lɛ-laa a pá kúpɔ kpɛ́ni fêi, kwa sɔnyɔ̂ŋ kɛ́.
Eezuɛ-ŋai díkɛtɛ-laai a pâi koônii yɛ̂ɛ ŋɔni-ŋa. Núu-kpune maa sɔlɔ ƃó-mɛni fé pâi kɛ̂i naa, koo-mɛni fé pâi kɛ̂i naa, koo-nɛni fé pâi kɛ̂i naa ŋɔ́nɔ. Nɛyâai dífe ŋɔ́nɔ pâi koo siɣêi.
