Osia 8:7 - Ŋ̀âla Kɔlɔ Maa Waai

⁷ À kɛ̀ da vãai sî, da pâi m̀á kulâi a fãa. Sí-sɛŋ nyii mɛi teɛɛ̂i, va ƃà. À kɛ̀ máŋ a ƃà, ŋɔ̃ya-ŋa nɔ́ ƃé pâi m̀á miî.

Osia 8:7 ပူးပေါင်းရင်းမြစ်များ

Zɛnɛse 41:23

Naa pôlu ma ŋá gbai-kaŋ kpálaa lɔ́ɔlu mɛi feerɛ kàa, nyii-ŋai kɛ̀ a géreŋɔɔ kpɔ́ a vãa kpálai da vóloi ŋɔzi-zii.

Kâloŋ Veerɛi 15:19

Tãi Minaŋɛŋ è kɛ̀ la ŋɔkâloŋ-laai sui, Asiria kaloŋ Tigila Pileza è kɔ́ pɛ̀lɛ Eezuɛ lɔii ma. È fàa ma é kpɔŋ-mâa tɛɛ Minaŋɛŋ pɔ́ naa a gɛɛ é tûa ŋɔkâloŋ-laai su, à kɛ̀ Minaŋɛŋ a fàa ma é sɛŋ kâo kole kpua-kpua ŋɔpãŋ wála buu lɔ́ɔlu mɛi feerɛ káo lɔ́ɔlu mɛi da (76,000) tɛɛ bɔ́.

Kâloŋ Veerɛi 15:29

Tãi Pika è kɛ̀ la a kâloŋ Eezuɛ lɔii mɛi, Asiria kaloŋ Tigila Pileza è pà é kɔ́ pɛ́lɛ ma, é daa-ŋai ŋí síɣe, Izɔŋ, Ebɛɛ-bɛ-maaka, Zanoa, Kedɛ da Azɔ. È ǹɔii kpîniŋ-ŋai ŋí sìɣe máŋ, Gilia, Galalii da Nɛfɛtɛli. È Eezuɛ-ƃelai kùla gwaa-ŋai tí ma é lí a dia a kɔ-soŋ-ŋa.

Zôo 4:8

Ŋá kɛ̀ ɣéniɛi su, ŋá gɔ́lɔŋ a gɛɛ diai da sɔnyɔ̂ŋ sîi, díkɛ ŋwana-lɔ̂ɔ kao sí yɛ̂ɛ berei tíi-kɛ-nuu a sí-sɛŋ kao sì la ŋɔkpâlaŋ ŋái, bere nɔ́ ƃé a pâi ŋwana-lɔ̂ɔ da mɛni kpɔ̂lu ƃá kulâi la.

Táre-woo-ŋa 22:8

Ƃà wôya-mɛni maa kɔ̂ri, ƃa mɛni kpɔ̂lu kàa. Í ŋwana-lɔɔi kóyaŋ káa ma.

Ikilisiati 5:16

M̀ɛnii ŋí káa a lii-too pôlu ŋánaa. Berei nɔ́ da núu-kpune maa sɔlɔ ƃô lai, bere ƃé a lî la pôlu. Ŋɔmɔ̃lɛ-laai kélee káa nɔ́ a fãa.

Azaya 17:11

À kɛ̀ zí-sãai ŋí da sòo dí poa nɔ́ a tãi ká dísi lai, ká fé pâi dí ƃá kulâi. Ka pâi kɛ̂i nɔ́ naa mɛni kpɔ̂lu tee-tee su, lii-too pôlu ŋánaa kɛ́ ƃò kâa.

Azaya 55:2

Lé ƃe kà káyêei sɛŋ-kao kɔlɛ̂i la sãâ pôlu, m̀aa sãai dífa kálii laai? Lé ƃe kà mɔ̃lɛ̂i la mii-sã̂a mɛni ma m̀aa mii-sãai dífa kápelai? Ka káwoli tɔ́ɔ ḿâ, ká m̀ɛnii mɛ́ni ŋa pâi m̀ôi kâai. Kà gɛ̀ tí, ka pâi kɛ̂i mii-sã̂a lɛ́lɛɛ-ŋa ŋ̀aa nɛ̃̂ɛ kulâi.

Azaya 66:15

Yâwɛɛ a pâi pâi a ŋɔŋ. A pâi kɛ̂i vãai su gɛ́ pà a gɛ́ɛ diai ńii-ŋwânai diai, é díkula maa kɛ́.

Zɛlemaya 12:13

Dí wîi sì, kɛ́lɛ ŋalêŋ ƃé da pâi dêei. Da pâi tíi kɛ̂i a ŋánaa, kɛ́lɛ dífe pâi sɛŋ da sɔlɔ ƃôi zu. Tãi da pâi dísi-sãai têei lai, ŋumɛ a pâi dí kɛ̀i, kpɛ́ni fêi, Yâwɛɛ a ǹíi ŋwána dîa a ŋ̀ánaa.”

Zerusâlɛŋ Karáa Maa Wɔ̂lɔ-wooi 5:2

Ŋɔ̃́ya-ŋa da kúkɔ̃liŋ kélee síɣe a dí pɔ́ɔ, lɔii da kpɛ́ni su-ƃela da see kúkɛ̂i.

Osia 2:9

M̀ɛni ma ŋa pâi ŋá sí-sɛŋ su karâi a gula tãi. Ŋa pâi ŋáŋwã̂ai su karâi a gbɛ̀tɛ tãi. Ŋa pâi ŋáseɣe pala-sãai siɣêi pôlu nyii-ŋai ŋá dɛ̀ɛ bɔ́ a gɛɛ é seɣe pála la é dóo m̀ai.

Osia 7:9

Ŋɔ̃ya-ŋa da ŋɔwála-walai kúla ǹyêei, kɛ́lɛ vé gɔ́lɔŋ. Ŋuŋ pôa a too zu, kɛ́lɛ vé gɔ́lɔŋ.

Osia 9:16

Eezuɛ-ŋai ƃóloŋɔɔ̂i sí-sɛŋ wuru ma nyii zame a kpála mu, va ŋɔ́nɔ ƃài. À kɛ̀ kpîŋ da nîa-pɛlɛɛ maa sɔlɔ ƃô, ŋa pâi díwɛli kɛ́-maa ŋ̀ɔɔ-ŋai paâi.”

Neeuŋ 1:3

Wála-wâla-laa káa Yâwɛɛ yêei, kɛ́lɛ ǹíi ŋwana la fé nɛ̃ɛ ní. Ǹyaŋ a pâi zɔnyɔ̂ŋ-ƃelai kùla maa kɛ̂i. Ƃɛ́i Yâwɛɛ a sîa naai, fãa su kpanaŋɔɔ a tɛ̂ɛ naa, ǹyaŋ ŋ̀ele-kɔ̂lɔŋ kolei ƃa gɔ́ɔ ŋá muluŋ.

Egaa 1:6

Ka sí-sɛŋ támaa sì, kɛ́lɛ ka m̀á kuro-té kùla. Ka mii-sɛ̂ŋ mìi, kɛ́lɛ káfa pîla. Ka lɔɔ kpêle, kɛ́lɛ kákoo láa fa fɛ̂ɛ. Ka seɣe támaa tòo kâa kɛlɛ kátɔnɔ kpîŋ kponôi fé niî fãa ní. Ǹúui a sɛŋ-kao tii kɛi, a bù bɛ̂bɛ su nyii lóa káa mai.

Galesiɛŋ 6:7

Káfe kákpîŋ pɛ̀lɛ. Núu fa ɣɛ́lɛ-maa kùla Ɣâla kponôi, kpɛ́ni fêi, zɛŋ núu a zìi, ǹyaa ƃe a gùla.

Galesiɛŋ 6:8

Kpɛ́ni fêi, núu a sɛŋ sí ŋɔkɛ-pere-nyɔŋ mɛni mai, a su-kara kùla ŋɔkɛ-pere-nyɔŋ su. Kɛ́lɛ, núu a sɛŋ sí M̀ɔlêŋ mɛni mai, a wɔlɔ-wɔlɔ fulu-laa kùla M̀ɔlêŋ kponôi.

Dutɛrɔnome 28:33

Núu da kpɛ́ni-ŋa ƃé pâi káfɔnɔ-kpɔrɔi ŋ̀á-nɛ̃ɛ kulâi díkɛ kálùaŋ.