Osia 7:1 - Ŋ̀âla Kɔlɔ Maa Waai

¹ “Ŋá kɛ̀ ŋ̀wɛ̂lii ŋá Eezuɛ ƃálo, ŋá gɛ́ é ƃûu ƃó, kɛ́lɛ gáa nɔ́ nîi ŋɔsɔnyɔ̂ŋ kɛ̂i. Sameria káa nɔ́ ŋwana lɔ̂ɔ kɛ̂i da lɛ́ɛ, ŋ̀uma-ƃelai dí kɛ́ ŋúma kɛ̀, mɛni-nyɔmɔɔ kɛ́-ƃelai dí kɛ́ mɛni nyɔ́mɔɔ kɛ̀.

Osia 7:1 ပူးပေါင်းရင်းမြစ်များ

Azaya 28:1

Kpalo ƃelaâi Eezuɛ láa túɛ-ƃelai dîa. Díkaa a lɔɔ ŋánaa kpele-ƃela. Díyoŋkaai, dísu mɛni kɛ́tɛɛ. Kɛ́lɛ díkɛtɛ-laai maa mɛ̂ni a kpɛɛ̂i nûa kíli ŋá. Lɔɔ ŋánaa kpeleɛɛ a dímaa fálenîi yɛ̂ɛ da wúru poa kùla ŋ̀á fólo kɛ́ tòo ma. Díkpeleɛ̂i díkɛ ƃò lâani yɛ̂ɛ nûa da sàa.

Azaya 59:12

“Yâwɛɛ, kúsɔnyɔ̂ŋ su a kɛ́tɛ íŋɛi-tuɛ. Kúsɔnyɔ̂ŋ a kúmaa-sêre faa kɛ́ yɛ̂ɛ berei kúkaa lai. Kútɔ̂ŋ-karaai káa nɔ́ kúkponôi kú tɔɔ́ yâ, ǹyaŋ kwa kúmɛni nyɔ́mɔɔi kɔ́lɔŋ.

Azaya 59:13

Kúsɔnyɔ̂ŋ-ŋai ƃa tɔ̂ŋ-karaa, yá Yâwɛɛ, ímaa-sîa toɔɔ. Kú tɔɔ̂i yá Yâwɛɛ yâ, kwa kúpôlu tɔɔ ísɛŋ lɛ́ɛi ma. Kwa nûa lùaŋ, kúkɛ nûa pɛlɛ wôo-ŋa ƃò, kúkɛ lɛ́ɛ kɛ̀.

Azaya 59:14

Kwa teniŋ ƃô-laa kpɛ́, tɔ̃yâ mɛni kɛ́ɛ a gɛ̂i kôyaa kûa. Kúfe ŋɔ́nɔ tɔ̃yâ mɛni-ŋa kɛ̂i m̀ɛni-sàa ƃó kwaa-ŋai ma. Mɛni sã́a kɛ́ɛ fé ŋɔnɔ kútûa-pere-ŋai su.

Zɛlemaya 51:9

Ŋ̀ɔ̃ya-ŋai díkaa naai dîyɛɛi, ‘Kúkɔ̀ a gɛɛ kú kpɔŋ mâa tɛɛ Babelɔŋ pɔ́, kɛ́lɛ pere fé kɛ́ ní naa. Gɛ̀ ní kwaa pere kɔ̂rii a gɛɛ kwaa pú kúli kú-pɔ taai. Ɣâla a Babelɔŋ kùla ma kɛ́ a ŋɔwála-wala-laai kélee. Ǹyaŋ a Babelɔŋ su kara kpɔ́ kpúŋ’ ”

Izikiɛ 16:46

“Kálîa-nɛnî kɛ́tɛi ƃa Sameria, nyii gáa ǹóŋ nɛnii pɔ́naa ká mɛi yá-ŋûa perei. Kálêɣe-nɛnii ƃa Sodɔŋ nyii gáa ǹóŋ-nɛnii pɔ́naa yá-kwára perei.

Izikiɛ 23:4

Nɛyaai ŋí maa-ŋuŋ láa ƃé kɛ̀ a Óola, ǹêɣe láa ƃé kɛ̀ a Óoliba. Ŋá díkula a nɛnî. Dí nîa-pɛlɛɛ maa sɔlɔ ƃó ḿî yɛ̂ɛ berei dílaa káa lai, Óola ƃa Sameria, Óoliba ƃa Zerusâlɛŋ.

Izikiɛ 24:13

Ŋɔkpɛ̃ɛi káa yɛ̂ɛ ŋɔwulu-wulu kɛ́ɛ maa liƃiɛɛ̂i. Kpɛ́ni fêi, ŋá ká maa waa, kɛ́lɛ ká maa fé waa ní. Ká maa fé ŋɔ́nɔ pâi waâi é lɛ́ɛ la zu ŋá ŋálii-ŋwanai ŋ̀aa see kɛ́ a káa.

Osia 10:5

Sameria-ƃelai kpáaŋɔ̂ɔi díkɛ kpɛ̃liŋ díɣâla niŋa-loŋ pɔkɔɔŋ mɛ̂ni ma Bɛtɛ taa-leei su. Ŋɔnûai da pâi wɔ̂lɔi mɛ̀ni ma. Ŋɔɣâlai ŋɔsâla láa-soŋ-ƃelai da pâi gbêɣe toôi mɛ̀ni ma, kpɛ́ni fêi, ƃaa kɛ́-maa fé ŋɔ́nɔ mà.

Osia 11:12

Eezuɛ a lɛ́ɛ kɛ́ ḿâ. Eezuɛ a ḿbɛlɛ̂i. Kɛ́lɛ Zuda-ƃelai díkaa nɔ́ niî ŋ́gbɔarâi ńyãai a gili-kɛ-zu Ɣala Maa-Waai.

Osia 11:8

“Óo Eezuɛ, ŋa pâi ńyee kulâi léŋ ímu? Óo Eezuɛ ŋa pâi teêi yâ lé-mɛni ma? Ŋá pɔ̂ri tuâi a yá yɛ̂ɛ berei ŋá gɛ̀ la a Adama kpaa máŋ yɛ̂ɛ Zeboliŋ taa-lee-ŋai? Fa pɔ̂ri nyíŋi kɛ̂i. Ŋáwɛli kɛ́-maai káa nɔ́ kámɛni ma.

Osia 12:1

Eezuɛ a vãai kpɛ̂i a ɣele láa-ƃoɔɔ su kôyaa. M̀ɛnii kélee da gɛ̀i gáa nɔ́ kpɛ́ni-kpɛni. Da lɛ́ɛ-mɛni támaa kpɛ̀tɛ, díkɛ ŋwana-lɔ̂ɔ kɛ̀, díkɛ laoi-laa kɛ̀ da Asiria lɔii, díkɛ ŋɔ́nɔ lì a wúlɔ Ize-lɔii su a sama-sɛŋ.

Osia 12:2

Yâwɛɛ a mɛni ƃôi a Zuda-ƃelai láa. A pâi tɔ̂ŋ kpɛ̂i Eezuɛ-ƃelai dîa yɛ̂ɛ berei dítûa-pere káa lai.

Osia 4:17

Eezuɛ-ƃelai díkaa a sɛŋ da kpɛ́ni-ŋa fɛli-ƃela. Tɔɔ dí sía a díkpɔɔi pere.

Osia 4:2

Ǹûai da Ɣâla láa sìɣe kpɛ́ni-kpɛni, dí lɛ́ɛ kɛ́, dí núu páa, dí ŋúma kɛ́, dí kɛ́ wulu-wulu kɛ̀. Da m̀ɛni-ŋai ŋí kɛ̀ a tãi kélee. Da kɛ̂ nɔ́ mɛni nyɔ́mɔɔ kɛ̂i gîe mɛi a tãi kélee, dí kɛ́ núu pàa nɔ́ gîe mɛi kéleŋ.

Osia 5:1

“Óo zâla láa soŋ-ƃelai, ka káwoli tɔ́ɔ! Óo Eezuɛ-ƃelai, ka káwoli tɔ́ɔ! Ka káwoli tɔ́ɔ, káai a gâloŋ ŋɔpɛ́rɛi mu-ƃelai! M̀ɛni ŋá téɛɛi ŋí tɔɔ̂i kâa. Kpɛ́ni fêi, ka nâa kɛ́ a ƃáre Mizipa taa-leei su, ká ƃò nâa a tuma Tabɔ Yeei mɛi kpɛ́ni fêi káa ƃé ka ǹûai kɛ́ díkɛ Ɣâla da kpɛ́ni-ŋa fɛ̀li naa.

Osia 6:4

Yâwɛɛ è mò ǹyɛɛi, “Óo Eezuɛ da Zuda, lé ƃé ŋa pɔ̂ri gɛ̂i a káa? Káwɛli-kɛ maai káa yɛ̂ɛ ɣele ƃɔ̂i kpini, yɛ̂ɛ lúu nyii a tɛ̂ɛ a maa félaai.

Osia 7:13

“Kpalo ƃêlaai dîa. Da dípôlu fé ḿî. Da pâi saâi, kpɛ́ni fêi, da ŋ́gbɔara! Ŋâi pɔ̂ri dí ƃâloi, kɛ́lɛ da lɛ́ɛ kɛ̀ a ńaa.

Osia 8:5

Óo Sameria taa-leei, fé wɛ̂lii a kániŋa-loŋ pɔkɔɔŋ fɛli-mɛnii. Níi ŋwanâai dí mɛni ma. Tãi nênɛ ƃé ka pâi teêi la dífɛliɛɛ mai?

Osia 8:9

Eezuɛ-ŋai da lí Asiria lɔii su yɛ̂ɛ wɛlɛ-sôo-ŋa ƃé dí sáa kɔ̂rii a gɛɛ dí tɛ́ dí kɛ́ tɛ̀ɛ-tɛɛ nɔ́ díŋuŋ ma díkɛ díkpɔŋ maa-ƃela kɔ̀ri. Da nâa díwɛli kɛ́ maa-ƃela káa.

Emɔ 3:10

Dífe mɛni lɛ́lɛɛ kɛ́-pere kɔ́lɔŋ, nyii-ŋai da ŋwana-lɔ̂ɔ mɛni da ŋúma-mɛni lòo díkili-tɔɔ maa kwaa-ŋai mâ.

Emɔ 3:9

Ka m̀ó Asɔdɔ ŋɔkili-tɔɔ maa kwaa-ŋai dîa Ize ŋɔkili-tɔɔ maa kwaa-ŋai dîa kâai, “Ka káŋa tɛ́ mà Sameria Yeei ma, ká berei káa daa-ƃelai wóo fé la zu tɔnɔɔi, da berei ŋwana-lɔ̂ɔ káa la zui.”

Emɔ 8:14

Diai da dífòo Asima ma nyii gáa Sameria, díkɛ m̀ó, dîyɛɛi, ‘Óo Daŋ, íɣâlai káa ɣele ma,’ Dîyɛɛ, ‘Óo Bɛɛsiba, ímɛi-kaa-ɣalai káa ɣele mai,’ da pâi toôi, dífe pâi ŋɔ́nɔ dímu siɣêi pôlu.”

Maka 6:16

Nyíŋi a pâi kɛ̂i, kpɛ́ni fêi, ka pîlaŋ gâloŋ Oŋri ŋɔtûa-pere nyɔ́mɔɔ-ŋai pôlu da ǹóŋ Eɣa nyii máŋ è kɛ̀ a kâloŋ. Ka pîlaŋ dímɛni kpɛ́tɛɛ nyɔ́mɔɔ-ŋai pôlu ǹyaŋ ŋa pâi ká su karâi, núu kélee é ká kpɔara. Núu kélee a pâi ŋ̀ɛ́i naɣînii ká mɛi.”

Maafîu 23:37

“Óo Zerusâlɛŋ, Zerusâlɛŋ, yái Ɣâla ŋɔlóno-kɛ-ƃelai pâa, í diai sɔ́ɔ a kɔni dí dítɛ̀ɛ ípɔ-naai! Ŋa ŋ̀wɛ̂lii ŋá ílônii ŋá tɛ́ díkîe ma a tãi támaa, yɛ̂ɛ berei tɛ́ɛ-lêe a ǹônii ŋá tɛ́ la díkîe ma goôŋ mui, kɛ́lɛ, ífa faa m̀a!

Lûu 13:34

Ee Zerusâlɛŋ, Zerusâlɛŋ, yái ƃa Ɣâla ŋɔlóno-kɛ-ƃelai pâa, íkɛ dísɔɔ a kɔni nyii-ŋai da dítɛɛ ípɔ naai! Tãi támaa ƃe ŋa kɛ̀ ŋ̀wɛ̂lii ŋa ínîa-pɛlɛɛi ŋá lɛ́ɣɛ a díkîe yɛ̂ɛ berei tɛ́ɛ-lee a ǹônii lɛ̀ɣɛ la goôŋ mu, kɛ́lɛ, ífe faa ni!

Lûu 19:42

ǹyɛɛi, “Eêi kɛ̀ kpîŋ îi gɔlɔŋ íɣelêi ŋi su le-mɛni-ŋa ƃa lii-sêe kɛ̀! Kɛ́lɛ, loníi ma ǹoɔɔ̂i íŋɛi.