Osia 5:1 - Ŋ̀âla Kɔlɔ Maa Waai

¹ “Óo zâla láa soŋ-ƃelai, ka káwoli tɔ́ɔ! Óo Eezuɛ-ƃelai, ka káwoli tɔ́ɔ! Ka káwoli tɔ́ɔ, káai a gâloŋ ŋɔpɛ́rɛi mu-ƃelai! M̀ɛni ŋá téɛɛi ŋí tɔɔ̂i kâa. Kpɛ́ni fêi, ka nâa kɛ́ a ƃáre Mizipa taa-leei su, ká ƃò nâa a tuma Tabɔ Yeei mɛi kpɛ́ni fêi káa ƃé ka ǹûai kɛ́ díkɛ Ɣâla da kpɛ́ni-ŋa fɛ̀li naa.

Osia 5:1 ပူးပေါင်းရင်းမြစ်များ

Zɛlemaya 11:7

Kpɛ́ni fêi, tãi ŋá kánâŋ pɔlɔ-ŋai kùla la Izei, ŋá dí lia-woo ƃò gîe mɛi, é tóo sâa ma, ńyɛɛ dîa ka káwoli tɔ́ɔ ŋ́oo ma.

Zɛlemaya 13:18

Yâwɛɛ è mò ḿâ ǹyɛɛi, “Mó gáloŋ da ǹee dîa a gɛɛ díkula díkâloŋ see-sãai ŋá dí pîlaŋ. Kpɛ́ni fêi díkâloŋ ƃɔrɔ lɛ́lɛɛ-ŋai da kula díŋûa da too.

Zɛlemaya 46:18

Ńyãai ŋ́gaa a Ŋ̀wála-wâla kélee Yâwɛɛ, ŋ́gaa a kâloŋ. Ńyãa ƃa gɛ-ɣele-ma Ɣalai. Berei Tabɔ yee kɛ́tɛi tɔɔ̂i la ǹyée-ŋai mɛi, Kamɛɛ yeei tɔɔ́ ǹyúoi mɛi, bere ƃé diai pâi gɔ́i toôi kâai, díwala-wala-laai káa la.

Osia 10:15

Óo Eezuɛ ŋɔpɛ́rɛi mu-ƃelai, m̀ɛni tɔnɔi tí a pâi kɛ̂i a káa ká ŋwana-lɔ̂ɔ kɛ́tɛi mɛni ma. Eezuɛ kaloŋ a pâi saâi a gɔ́i kɔ́ɔ pîlaŋ tãi.”

Osia 13:8

Ŋa pâi pɛlɛ̂i dîa yɛ̂ɛ berei ditala a pɛ̂lɛ la sɛŋ da ma nyii a ǹônii siɣei. Ŋa pâi dísu-tee-têei ŋá dímii yɛ̂ɛ yala-sulu.

Osia 4:1

È mò ǹyɛɛi, “Teniŋ ƃô-nuu tɔnɔ kpîŋ fé naa. Dífa ŋ́oo sìɣe a gbanaŋɔɔ. Dífe ŋɔ́nɔ ŋ́gɔlɔŋ a Díɣâla.

Osia 6:9

Yɛ̂ɛ berei mɛni nyɔ́mɔɔ kɛ́-ƃela da kɛ̂ la díkpulu mâ díkɛ núu maa kpɛ̂ŋ a gɛɛ dí sɛŋ kula yêei kɛ̂i, bere ƃé zâla láa-soŋ-ƃelai díkaa la díkîe ma. Da núu pàa Sɛkɛŋ perei ma. Tɔ̃yâ ma, da mɛni nyɔ́mɔɔ kɛ̀ a núu.

Osia 9:8

Ɣâla ŋɔlóno kɛ́-nuui ƃé gáa a Eezuɛ-ŋai mɛi káa núu. Ɣâla a ńdɛɛ ŋɔnûai pɔ́. Kɛ́lɛ ƃɛ́i kélee ŋa lî naai, da ƃáre tɛ̀ ḿberêi yɛ̂ɛ ŋɔni. Kpɔara káa nɔ́ Ŋáɣâlai ŋɔpɛ́rɛi mu.

Zooɛ 1:2

Káai a ǹúu pɔ̂lɔ-ŋai, ka nyíŋi mɛ́ni, káai kélee ǹɔii sui, ka káwoli tɔ́ɔ! M̀ɛnii ŋí da a tá wɔ́lɔ kɛ́ kákɛ̀ ɣéniɛi su, kpaa máŋ kánâŋ-ni dí kɛ̀ ɣéniɛi su?

Emɔ 3:1

Eezuɛ-lonii, ka káwoli tɔ́ɔ ŋ̀óoi ma ŋa môi a kaláai, nyii ŋa môi a kásuu kélee láa, nyii ŋá gùla Ize lɔii sui:

Emɔ 7:9

Aise ŋɔsâla-kula kwaa-ŋai ma su a pâi karâi, Eezuɛ ŋɔɣâla-pɛrɛ kpaya-kpayai su é kara, ǹyaŋ ŋa pâi tɔɔ̂i Zɛroboaŋ ŋɔpɛ́rɛi ma a ƃóa-sɔ̂kpɔ.”

Maka 3:1

Káai a Eezuɛ-ŋuŋ túɛ-ƃelai, ka káwoli tɔ́ɔ ḿâ. Vé a sɛŋ ká tɔ̃yâ-laa kɔ́lɔŋ?

Maka 3:9

Ka káwoli tɔ́ɔ, káai a Zeeka ŋɔnûai da Eezuɛ-ŋai dímɛi-ƃelai, káai ka tɔ̃yâ-laa kpɔara ka mɛni lɛ́lɛɛ pene a mɛni nyɔ́mɔɔi.

Maka 7:2

Tɔ̃yâ-nuu da kélee fé ŋɔ́nɔ ǹɔii su. Núu kélee fé naa nyii a yào Ɣâla mai. Ǹúui kélee a maa-kpɛ̂ŋ kɛ̂i gɛ́ pere kɔ̂ri a gɛɛ é núu páa. Núu kélee kɛ́ kɔ̀ a gɛɛ é gbɔ́ɔi nuai maa liî tée.

Malakai 1:6

Ŋ̀wála-wâla kélee Yâwɛɛ è mò zâla láa-soŋ-ƃelai dîa ǹyɛɛi, “Lóŋ-surɔŋ a ŋumɛ-mâa tɛ̀ɛ ǹâŋ pɔ́, yée-mu-nuu kɛ́ ŋumɛ-mâa tɛ̀ɛ ŋɔmɛi-nuui pɔ́. Ńyãa ƃa kánâŋ. Lé mɛni ƃé káfa ŋumɛ-mâa tɛ̀ɛ la ḿbɔi? Ńyãa ƃa kámɛi-nûui, lé mɛni ƃé káfa ƃaa-kɛ-maa tɛ̂ɛ la ḿbɔi? Ka káŋɛi nàɣiŋ ḿɛi ǹyaŋ ká mò kâa, ‘Kwa kúŋɛi naɣîŋ-pere kɛ̂i léŋ ímɛi?’

Malakai 2:1

Ŋ̀wála-wâla kélee Yâwɛɛ a môi zâla-laa soŋ-ƃelai dîa ǹyɛɛi, “M̀ɛni ŋí káa kámɛni ma:

M̀ɛni-sâa Ƃó-ƃelai 4:12

Sisela kɛ́ɛ a m̀ɛni a gɛ́ɛ Bara ni dí lì Tabɔ Yeei mai,

M̀ɛni-sâa Ƃó-ƃelai 4:6

Ɣele tɔ̂nɔ da è Bara worɛ̂ tɛ̀ɛ. Bara ǹâŋ láa ƃé kɛ̀ a Aƃiaŋ. Aƃiaŋ è kùla Kedɛ taa leei su Nɛfɛtɛli lɔii kpiniŋ su. Bara páai, Dibora è mò ma ǹyɛɛ, “Yâwɛɛ nyíi gáa a Eezuɛ-ŋai Díɣâlai è mò ǹyɛɛ, ‘Kɔ-kuluƃa wála puu (10,000) kúla Nɛfɛtɛli da Zɛbulɔŋ ni dínuu-suui su í tɔ́ɔ dítuɛ í lí a dia Tabɔ Yeei ma.

Samia Maa-ŋuŋ 7:16

A kâa lì daa lêe-ŋai ŋí su a kóraŋ kélee gɛ́ ǹûai loai kpɛ̀tɛ. Daa lêe-ŋai ŋí ƃé kɛ̀ a Bɛtɛ, Geega da Mizipa ma.

Samia Maa-ŋuŋ 7:5

Samia ǹyɛɛ diai, “Kákelee ka káŋaa tɛ́ gîe ma Mizipa, gɛ̀ ní ŋa pâi Yâwɛɛ fɛlîi kámɛni ma.”

Samia Maa-ŋuŋ 7:6

Díkelee dí díŋaa tɛ̀ ma Mizipa Samia kɛ́ ƃò a dílaa-tuɛ nuu. Dí yá kùla ziŋ-yai su dí bú Yâwɛɛ ŋɛ́i-tuɛ a sama-sɛŋ m̀ɛni ma. Maa ɣelei tí núu tɔnɔ da fé mii-sɛŋ da mii ní. Nya ƃe dí mò dîɛi, “Kwa sɔnyɔ̂ŋ kɛ́ a Yâwɛɛ.”