Osia 2:12 - Ŋ̀âla Kɔlɔ Maa Waai

¹² Ŋa pâi ŋɔkpɔmɔ-ƃa wuru-ŋai da ŋɔfîi wurui paâi nyii a mò ǹyɛɛ, ‘Ḿbɔɔ ƃa dia. Ŋáwɛli-ŋai ƃé dí tɛ̀ɛ ḿbɔ a ŋá fela fêi.’ Berei máŋ è m̀ɛni-ŋai ƃò lai, ŋa pâi dí lɛɛ̂i naa lɔɔ-sûa-ŋa dí mìi.

Osia 2:12 ပူးပေါင်းရင်းမြစ်များ

Wule-woo-ŋa 80:12

Kɛ́lɛ í m̀aa kóli sãai kùla naa lé mɛni ma? Ya gɛ̀ tɛɛ-a-pere ƃela líi a kpele mà. Da kɛ̀ tɛɛ̂i da kɛ̂ m̀á da-ŋa ŋúmai ŋ̀á.

Azaya 29:17

Ǹaa kuro à kɛ̀ tí, wolâ a pâi pênei a kpâlaŋ ŋá tii kɛ́ lɔɔ, kpâlaŋ ŋá tii kɛ́ lɔɔ kɛ́ pène a wolâ.

Azaya 5:5

“Ŋa pá nɛɛ̂i naa ká m̀ɛnii kɔ́lɔŋ ŋa pâi gɛ̂i a ŋá kpɔmɔ kpâlaŋ. Ziɣãŋ dínaŋɔɔ̂i m̀ai, ŋa pâi ŋ̀ôlo-wôloi. Fɛnɛ-sãa da pâi kɛ̂i dílaa miî naa díkɛ ǹaa tàŋ-taŋ.

Azaya 7:23

“Maa ɣêlei tí a sèri, ƃɛ́i-ŋai kélee kpɔmɔ-ƃa kpalaŋ lɛ́lɛɛ nyii kpɔmɔ-ƃa wuru wála tɔnɔ (1,000) è kɛ̀ naa nyii dɔnɔ sɔ̃ɔ a pɔ̂ri kɛ̂i a káne wála tɔnɔi (1,000), ǹaa kélee a pâi kɛ̂i a kala da ɣalêŋ kpɔlɔ tee-tee.

Zɛlemaya 13:26

Ŋa pâi íseɣei tɛ̂i a íŋuŋ ŋá íƃɛlɛ tóo.

Zɛlemaya 26:18

“Tãi Maka nyíi kùla Mɔrɛsɛ taa-leei sui è wɔ́lɔ kɛ̀ la a ɣâla ŋɔlóno kɛ́-nuui, maa tãi tí Ɛsekaya ƃé wɔ́lɔ kɛ̀ a gâloŋ Zuda lɔii mɛi. Nya ƃe Maka è mò ǹûai dîa ǹyɛɛ, ‘M̀ɛnii Ŋ̀wála-wâla kélee Yâwɛɛ è mòi ká ŋí: Da pâi Zerusâlɛŋ sinîi yɛ̂ɛ núu ƃé kwaa sîi. Ǹaa a pâi kɛ̂i yɛ̂ɛ da kɔni ŋáa tɛ̀ gîe ma. À kɛ̀ tí, ǹyéei nyíi Ŋ̀âla-pɛrɛ Kɛ́tɛi tɔɔ̂i mai, a pâi kɛ̂i a lɔɔ pûŋ.’

Zɛlemaya 5:17

Da pâi ká sí-sãa ƃai ká ŋ̀áa tɛ̀ gîe mai miî é pɛ́lɛ kámii-sãai dîa. Da pâi ká lônii-sinaai da ká lônii nɛyãai paâi. Da pâi káƃala kpulu-ŋai da ká taa-tulɛ-ŋai miî. Da pâi ká kpɔmɔ-kpalaŋ-ŋai da ká fîi wuru-ŋai miî. Gɔ-kuluƃa-ŋai da pâi dítaa maa kánaŋɔɔ-ŋai nyíi ŋai díkili tɔɔ̂i m̀ai su karâi a ƃóa-sɔkpɔ-ŋa.”

Zɛlemaya 8:13

“Ŋá kɛ̀ ŋ̀wɛ̂lii a gɛɛ ŋá ŋánûai ŋáa tɛ́ díkîe ma yɛ̂ɛ berei kpâlaŋ-ŋa tíi kɛ́ nuu a ŋɔsí-sãai m̀á ŋáa tɛ̀ la gîe mai. Kɛ́lɛ díkaa nɔ́ yɛ̂ɛ kpɔmɔ-ƃa kpalaŋ nyíi m̀á fé ŋai. Díkaa nɔ́ yɛ̂ɛ fîi wuru nyíi m̀á fé ŋa, ǹáa a kpála m̀ai. M̀ɛni ma, ŋá gɛ̀ núu da kpɛ́ni-ŋa dí pá dí see dímɛi.”

Osia 13:8

Ŋa pâi pɛlɛ̂i dîa yɛ̂ɛ berei ditala a pɛ̂lɛ la sɛŋ da ma nyii a ǹônii siɣei. Ŋa pâi dísu-tee-têei ŋá dímii yɛ̂ɛ yala-sulu.

Osia 2:5

Dílee è wulu-wulu kɛ̀. È dímaa kôo sìɣe ŋumɛ tûa kɛ́ɛ su. È mò ǹyɛɛ, ‘Ŋa pâi liî ŋáwɛli-ŋai pɔ́ nyii-ŋai da kpólo yà ḿî, seɣe, wúlɔ da kpele-sɛŋ.’

Osia 5:14

Ǹyaŋ ŋa pâi kɛ̂i yɛ̂ɛ yala-sulu Eezuɛ mɛni ma, ŋ́gɛ ƃò yɛ̂ɛ yala-sulu loŋ Zuda mɛni ma. Ńyãa kpîŋ ŋa pâi dífala-falai ŋá dí ɣála-ɣâla. Ŋa pâi liî a dîa, núu da fé pâi dí kulâi ńyêei.

Osia 9:1

Eezuɛ-ƃela, káfe lii-nɛ̃ɛ kùla. Káfe lii-nɛ̃ɛ kùla yɛ̂ɛ lɔii da kpɛ́ni su-ƃela. Kpɛ́ni fêi, káfe a tɔ̃yâ-ƃela Káɣâlai mɛni ma. Ka pîlaŋ ŋ̀ulu-wulu kɛ́-nɛyaai pôlu zãâ-taŋ kwaa-ŋai ma.

Maka 3:12

Kátûa-perei mɛni ma, Zãiyɔŋ a pâi kɛ̂i a kpâlaŋ ŋá tii kɛ̂i. Zerusâlɛŋ a pâi kɛ̂i a pilêŋ ŋá, Ɣâla ŋɔpɛ́rɛi tɔɔ̂i kɛ́ ƃò a wolâ su.