25 Yâwɛɛ é gɛ́ ŋ̀ɛ́i é pono ká túɛ é káƃɛlɛ-see.
Nya ƃe Zosɛ è ŋ̀uŋ mu sìɣe é ǹêɣe Bɛŋsima káa nyii kɛ̀ a ǹee ǹóŋ. È mò dîa ǹyɛɛi, “Kákpɛɛ ŋái ƃéi, nyii ká mɛ̀ni ƃò mâi? Ńoŋ, Ɣâla é lûwa láa yâ.”
Ǹɛɛ naa íkɛ-naa-laai é lûwa láa ḿâ. Ítɔ̂ŋ-ŋai lɛ́ mí ḿâ.
Ya lûwa láa ma wɔ́lɔ-wɔlɔ da wɔ́lɔ-wɔlɔ mɛni ma. Íkɛ-naai a ǹáa fɛ́ɛ a lii-nɛ̃ɛ.
Íŋɛi pîlaŋ ḿâ ńyãai a íyee mu-nuui, í ŋ́uŋ ma ƃó íwɛli kɛ́-maa kpanaŋ sârai.
Ǹii-nɛ̃ɛi yâa dɛɛ ḿbɔi, dɛɛ̂i kpîŋ kúkpɔara-ƃelai díwɔ̂i ma tãi mii-sãa támaa è kɛ̀ la díyêei da ŋwã̂ai.
Óo Ɣâla, lûwa láa kûa, í íŋɛi pono kútuɛ, í kúƃɛlɛ sée,
Óo Ŋ̀wála-wâla kélee Ɣalai, pá a kûa pôlu. Íƃɛlɛ sêei lɛ́ kûa, gɛ̀ ní kwa pâi ƃâloi.
Óo Ŋ̀wála-wâla kélee Ɣalai, pá a kûa pôlu. Íƃɛlɛ sêei lɛ́ kûa, gɛ̀ ní kwa pâi ƃâloi!
Tínaŋ ḿbɔ naa pere í malôŋ káa, í ŋ́gbonôi kpanaŋ, íŋuŋ ḿâ ƃò, kpɛ́ni fêi, ŋa tíi kɛ́ yɛ̂ɛ, yɛ̂ɛ berei ńee è wɔ́lɔ gɛ̀ lai.
Yâwɛɛ ǹyɛɛ mai, “Ŋa pâi ŋásɔŋ-lɛlɛɛ-laai kélee kɛ̂i é tɛ́ɛ íŋɛi túɛ. Ŋa pâi Yâwɛɛ laai lɛ̂i yâ. Ŋa pâi ƃɛlɛ-see tɛɛ̂i diai pɔ́ ŋa pâi ƃɛlɛ-see tɛɛ̂i dípɔi, ŋá diai malôŋ káa ŋa pâi dímalôŋ kâai.
Kúɣâlai, íyee sée íyee mu-nuui ŋɔfɛli-wooi da ŋɔpɛlɛ gɔ́ɔ mu wooi mu. Íyee see íkwaa maa waa wóloɔɔi ŋí mɛni mu.
Káai a zâla-laa soŋ-ƃelai, ka Ɣâla marê kɛ́ a gɛɛ é mɛni lɛ́lɛɛ kɛ́ kûɛ. Vé pâi káɣâla fɛlii-wooi su toôi ǹyaŋ a pâi kulâi kásɔŋ su.
Kpɛ́ni fêi, dí dɔ̂ŋ tɛ̀ɛ Mose sârai, ƃɛlɛ-sêe da tɔ̃yâ è pà Zîsɛ Kôrai sârai.
Ɣâla e káwɛlini káai kákaa Luŋ. A kátoli a gɛ́ɛ kákɛ a ǹyaa Ɣâla bɔ́ɔ. Kúnâŋ Ɣâla da Kúnuu-namui Zîsɛ Kôrai dí káƃɛlɛ sée dí lii-see tɛɛ kápɔ.