23 Ka kɛ́ a núu nina kákili ŋɔmɔlêŋ su.
Óo Ɣâla, ŋá kili-ŋa-siai kɛ́ a m̀aa waa, íteniŋ ƃô da mɔ̂leŋ nina tɛɛ ḿbɔ.
À kɛ̀ tí, ŋa pâi kili-ŋa sia nina kɛ̂i dîa, ŋa mɔ̃leŋ-nina tɛɛ dípɔ. Ŋa pâi lìi-su kpanaŋ-ŋai kulâi díyêei, ŋa wòo mɛ̂ni-lii tɛɛ dípɔ.
Ka káyee kúla kásɔnyɔ̂ŋ-ŋai su nyii-ŋai ka gɛ a ńyãai a gɛɛ líi-nina da mɔ̃leŋ nina díkɛ ká kponoi. Lé mɛni ƃe ka pâi saai la kaai a Eezuɛ ƃelai?
Ŋa pâi líi-nina da kíli-nina tɛɛ̂i ká pɔ. Ŋa pâi ká lii su kpânaŋ maa fálenîi a lii maa yêŋ.
Káfè kɛ̀ yɛ̂ɛ ǹɔii ŋí su-ƃelai, kɛ́lɛ, kámaa é kɛ́ a váleŋɔɔ kákili nina-ŋai sârai, a gɛ́ɛ ka Ɣâla ǹîa-mɛni kɔri nyíi gáa a mɛni lɛ́lɛɛ, da lii-laa-mɛni, e pɛlɛ mɛni-sãa ma Ɣâla ŋɛi tuɛi.
M̀ɛni ma kwa dîa-ni dí kúloo saa su batâi sârai, a gɛ́ɛ berei Nàŋ-nuui ŋɔfólo-laai sârai è Kôrai mu siɣe la saa yêei, kúa máŋ ku sía fúlu-laa nina su.
Ǹyaŋ núu kíli puɔɔ gbîŋ-tua-perei ma káa a saa, kɛ́lɛ, núu kíli puɔɔ M̀ɔlêŋ ma káa a fulu-laa da lii-sêe.
Kpɛ́ni fêi, kúkaa a Ɣâla ŋɔkpɛtɛ-sãa. È kúkpɛ̀tɛ Kôrai kponôi tíi lɛ́lɛɛ-ŋa kɛ́ mɛni ma, nyíi-ŋai Ɣâla è díkpɛ̀tɛ gíli ŋá nàa tuɛ a gɛ́ɛ kú díkɛi.
Ka kátûa-pere nina-ŋai siɣe nyíi gbɛtɛɛ̂i a nina, yɛ̂ɛ berei zɛŋ kélee kpɛtɛ-Ɣalai tua-pere káa lai, a gɛ́ɛ ka gɔ́lɔŋ a ǹɛ́lɛɛ.
è kúƃalo a kúwaa mì a gɛɛ kú kɛ́ a núu nina da M̀ɔlêŋ Maa Waai kɛ́ɛ a nina kúkponôi. Kútii lɛ́lɛɛ kɛ́ɛ fêi nyíi kwa gɛ́i, kɛ́lɛ, ŋɔƃɛlɛ-sêei su ƃe.
Mɛni ma ka kákili-ŋa-siai kpɛtɛ ká kɛ́ a káŋuŋ sú séɣeŋɔɔ, ká kákili-kɛ-zui kélee pú m̀ɛlɛ-seei ma nyíi pâi kápɔ a Zîsɛ Kôrai lɛ́ ɣelei.
