Felepiɛŋ 1:23 - Ŋ̀âla Kɔlɔ Maa Waai

²³ Ŋ́gbaaŋɔɔ̂i ŋá ǹɛ́ a gɛ́ɛ ŋá kɛ́ ɣele ma kpaa máŋ ŋá sáa. Ŋa ŋ̀wɛ̂lii ŋá sáa ŋá kɛ́ Kôrai kɔlɛ, kpɛ́ni fêi, nyíti lɛ́lɛɛ̂i kpɔ́ a ŋ̀ánaa.

Felepiɛŋ 1:23 ပူးပေါင်းရင်းမြစ်များ

Samia Veerɛi 24:14

Deeƃé è mò Gâa ma ǹyɛɛi, “M̀ɛni-ŋai ŋí kélee káa a mɛni kpânaŋ-ŋa. Tɔɔ kúlɛɛ Yâwɛɛ yêei. A pâi kúmalôŋ kâai é tɛ́ɛ la kúlɛɛ núu-kpune yêei ma.”

Wule-woo-ŋa 17:15

À kɛ̀ a ńyãa, ŋa pâi kɛ̂i íŋɛi-tuɛ a teniŋ-ƃo pere. Ŋa ŋ́ɛi lá ƃò, lii-nɛ̃ɛ a pâi kɛ̂i ḿâ, kpɛ́ni fêi, ŋ́gaa íkɔlɛ ma.

Wule-woo-ŋa 49:15

Kɛ́lɛ Ɣâla a pâi ŋ́uŋ maa ƃôi, é ŋ́gula saa ŋɔwála-wala-laai yêei.

Lûu 12:50

Batâi-kɛ-pere káa ńyêei nyii fɛ̂ɛ da ŋábatâi kɛ́ lai; ee, berei káa ŋa mɔ̃lɛ̂i la e lɛɛ zu e kpɛɛ!

Lûu 23:43

E mò ma, ǹyɛɛi, “Tɔ̃yâ ma, ŋá m̀ó yâ, sâa kwa ya kwa pâi kɛ̂i Paredai.”

Lûu 8:38

Nalôŋ ǹyînaŋ nyɔ́mɔɔ-ŋai dí kùla bôlui è Zîsɛ kperâi fè a gɛɛ é lɛ́ɛ gɔlɛ. Kɛ́lɛ, è dɛ̀ɛ pôlu, ǹyɛɛ ma,

Zɔ̂ŋ 12:26

À kɛ̀ núu da à tíi kɛ̀ mîi, fɛ̂ɛ é pîlaŋ ḿbôlu; ƃɛi ŋ́gaa naai naa ƃe ǹyée-mu-nuui a pâi kɛ̂i naa máŋ; à kɛ̀ núu da ǹyaŋ à tíi kɛ̀ mîi, Nàŋ-nuui a pâi ƃâa kɛ̂i ma.

Zɔ̂ŋ 13:1

Dɛɛ-mɛi kúui é lɛ́ɛ pâi serîi, tãi Zîsɛ è nâa gɔ̀lɔŋ la a gɛɛ ŋɔtãi a seri a gɛɛ é kúla ǹɔii sú é lí Nàŋ-nuui pɔi, berei è ŋɔ-ŋai wɛ̀li lai, nyii-ŋai kɛ̀ ǹɔii sui. È díwɛli kpɔ́ é tóo máŋ gbɛɛ ŋa.

Zɔ̂ŋ 14:3

Ǹyaŋ ŋà lì ŋà kwaa ma kpɛ̀tɛ kámaa mɛni ma, ŋa pâi pâi pôlu ŋɔ́nɔ ŋa kásiɣe ká kɛ́ mâ a gɛɛ ƃɛi ŋa naai káa máŋ ká kɛ́ naa.

Zɔ̂ŋ 17:24

Ńâŋ, ŋa ŋ̀wɛ̂lii a gɛɛ dia nyii-ŋai ya dítɛɛ ḿbɔi dí kɛ́ ŋ́gɔlɛ ƃɛ́i ŋa naai, a gɛɛ dí ŋáfolo-laai káa nyii ya dɛɛ ḿbɔi íwɛli-kɛ-maa laai su ḿaa-mɛni ma ŋ̀éniɛi e lɛɛ pâi kɛ̂i.

Zia-ƃelai Kɛ́-mɛni-ŋai 7:59

Díkɛɛ Tiƃiŋ sɔɔ̂i, è Ɣâla fɛ̀li, ǹyɛɛi, “Kúnuu-namu Zîsɛ, íyee sée ŋámɔ̂leŋ mu.”

Kɔleŋtiɛŋ Veerɛi 5:8

Fɔlɔ-fɔlɔ káa kúyêei, ǹyaŋ ǹɛ́lɛɛ a gɛ́ɛ kú kɛ́ a kúkɛ̂i gôyaa kúkponôi mâ kwa Kúnuu-namui-ni kúkɛ bɔ-taai.

Kɔleŋtiɛŋ Veerɛi 6:12

Kúfe kákpera ni, kɛ́lɛ, ká kákpîŋ kpèra kákpîŋ kili-ŋa-siai su.

Felepiɛŋ 1:24

Kɛ́lɛ, à kɛ̀ ŋà kɛ̀ ɣele ma, gɛ̀ ní mɛni lɛ́lɛɛ ká ti kámɛni ma.

Tɛsɛlôniɛŋ Maa-ŋuŋ 2:1

Kpɛ́ni fêi, ŋánûa, káa kpîŋ ka gɔ́lɔŋ a gɛ́ɛ kúnaa-kaa-siai ku gɛ̀ kápɔ naai, ve kɛ́ ni nɔ́ kpɛni-kpɛni;

Tɛsɛlôniɛŋ Maa-ŋuŋ 2:13

Kwa Ɣâla sɛɣɛ̂i fè máŋ a tãi kélee nyíŋi mɛni ma a gɛ́ɛ tãi ká Ɣâla ŋɔwóoi sɔlɔ ƃô la nyíi ká mɛ̀ni kúlai, ká káyee sèe mu, káfe káyee see ni mu yɛ̂ɛ núu-kpune wóo, kɛ́lɛ, ká káyee sèe mu yɛ̂ɛ berei gáa la a Ɣâla wóoi, nyíi tíi kɛ̂i káai a ǹaa-la-ƃelai kákponôi.

Tɛsɛlôniɛŋ Maa-ŋuŋ 4:17

Gɛ̀ ní kúai kúkaa ɣele mai, kúai kwa lɛɛ̂i, Ɣâla a pâi kúsiɣêi kwa dîa-ni é tɛ́ a kúa ŋele-kɔlɔŋ su a gɛ́ɛ kwa Kúnuu-namui-ni kú kúkîe-ni kɔyaŋ naa. Ǹyaŋ kwa Kúnuu-namui-ni kwa pâi wɔ́lɔ kɛ̂i naa.

Temete Veerɛi 4:6

Kpɛ́ni fêi, da nâa kɛ́ pâi ŋ́gulâi a sâla. Ŋá tãi a nâa seri.

M̀ɛni-lɛɛi 14:13

Nya ƃe ŋá wóo mɛni é kúla Ɣâla-taa, nyɛɛi, “Nyíŋi pɔ̃yɛ. Lûwa káa zaa-ƃelai dîa nyíi-ŋai da saa Kúnuu-namui kponôi é síɣe sâa ma é lí tuɛ-perei.” M̀ɔlêŋ a mò, nyɛɛ, “Lûwa káa dîa a tɔ̃yâ a gɛɛ dí dífii tɔɔ dímɔ̃lɛi yêei, kpɛ́ni fêi dí dítûa perei lɛ̀ɛ dípôlu!”