1 औंगे नाम एन्देर सोच'ओत? नाम पाप नन्ते बारिम र'ओत का, होले धर्मेसी मया अउरिम कोड़हे मनो का?
होले नाम ई पत्त'अना ती पॆसकन मेटदत का? कहियों मला। नाम पॆसकन कोड़हे बड़ियर नन्दत।
होले नाम एन्देर ननोत? नाम पॆसका ही तबे नू मल र'अदत अरा धर्मेस नमन आसी मया आबोन ऎद्ददस, ख़ने नाम पाप नन्ते र'ओत का? कहियों मला।
भईरो, नीम नाड़र'आ गे मॆख़्रकादर एन्ने अम्बो मना का ईद मॆद ही नलख गे मोका मनो। लिकिन चोन्हा ती ओर्त ओर्त गे सुसर नन्नर नेकअन।
नीम छछिन्द आलर लेक्खा उज्जा। लिकिन नीम गा धर्मेसी बिट्ठी ननू जॊंख़ र'अदर, औंगे निम्है छछिन्द आबोन मलदौ नना गे अमा बउर'आ।
ऎन इदगेम एन्ने लिखदन का जोक्क ठकवा सिखाब'उर निम्है मझी नू कलेकसे कोरचका र'अनर। आर धर्मेसिन नटनर। आर नम्है धर्मेसी मया आबोन मलदौ उज्जना ऎकना ही ओदहा नू बदलनर। आर नम्है ओन्टे लेका उर्बस येसु मसीसिन नटनर। आर ही नठारना चिरान नुम नेम्हा पुथी नू लिखिर ख़च्चकी र'ई।